1 Ati baxxeboxxongi balleessitaatteki!

koo atee balleesanjo ati'a aanne'e!

Koo ati waakkatendebexxongi waakkattattok

koo ati wakkattattoke ati'a aane'e!

Balleessa waaldettexxa yanna

ati baxxatton;

Waakkata waaldattoxxa yanna waakatendatto.

2 Ee Duuchchi Woddike Gootta no'o'a marar;

Atee addanteenneen;

Gorsa gorsa'n jabeenna

wixxirrixxa yanna no'a anjirate kadi.

3 Arduwwi hafuur atikixxe diindinsonni bajaan;

mootummuwwatinna ati kexxatto wodda xeeremaan.

4 Koo gosa gosake arda awwaaneessi bukki hiyyammashsha

booji'o ha'nooxxinna bukki hitaan;

mannikinna ise hanna shiixxaramma awaanessishsha burraqaan.

5 Duuchchi Woddiki Gootti ale iima ofo'leexxi lummedheen;

Tsiyooni'a qullummatanna dhugaa'a wonshaan.

6 Isi ati'a addatendeexxa booso

anjiratike, ege'natikennaa beekumiinke mazigaba kadaan;

Duuchchi Woddika Gootta sodaatatinna Duuchchi Woddike Goottinaa'n kaddeexxe karran.*

7 Kunnise insa'neek goottuwwi ora ora'n raraan;

nage'iinke ergaluwwinna hiiqqinse oo'naan.

8 Lumollami oruwwi duwwike kade;

oruwwake'n manji hedhebaan;

wel aagonna diigende;

gorsaluwwi *tuffatemeedheen;

ulfatemeek hedhebaan.

9 Iikki bogi oodhe;

Libaanoosinna salphatte; qoorte;

Saarooni Arbiinke bogishsha qiilla gammoojje kadde;

Baasanixxennaa Qermeeloosixxxe koobuwwa'n hedheek haqqichchuwwi ifi fika shafa harcaalse.

10 «Ta'a yooni ani ke'aanen,»

«Ta'a lummedhanno;

ta'a ulfaatannon hiyya'neen Duuchchi Woddiki Gootti.

11 Huura siila'witine;

kunbakanna ildine;

ha'nook hafuuranna ha'no ittaaxxe giiran.

12 Arduwwi boo'e hunjendamake kinjishsha gubataan;

qu'muudotixxe waaccoshsha giirate'n gubataan.»

13 Ha'no bayya hexxineeki hujennexxa laqqe;

ha'noonna bira hexxineeki hunna anxa ege'ne!

14 Tsiyooni hexxeexxe cubbaalleeyye alalte

magno afebaak manni soda'a insa'ne'n ibbee'naa

«No'o giddii'n ittaaxxe giiranni welt aate hedha dande'a?

Duuchchi woddixxe giiranni welt ayyete hedha danda'a?» hiyye.

15 Qullummati me'aak

dhugaatixxa yaane haaso'ak

Dharak daggaaxxa la'o tuffataak

matta adhdha gophaatee anga bukki assedhaak

Manna anga sa'atixxa yaane laqa gophatee mansha ifixxa tulphaak

fuggoxxa uuda gophatee ille ifixxa himmi hiyyaak,

16 Iitta hedheek manji eettenne qephphitte bakka'n hedhaan;

koobatixxe kollonna isixxe irko kadda;

Itaachchinna isi'a uwwemaan;

wodi'ikinna isi'a gophemabaan.

17 Ille atixxi ookkone moyanjo danchumma isixxenninni isoo uudaan;

bayya fayemeeka boganna undaan.

18 Edi woddixxi rakko qaabata'n

«Iikki umik akeekisaji haba hedhe?

Irbo adhamakita haba'a me'a?

Iikki heqatixxe xeleephok umi haba hedha?» hitaton.

19 Ikki haaso'i insa'neekiir aagabaak

hinaaxxi ege'nendeebaakiir

aagabaaka laagada haaso'aakiir aafeeshshanni galaaka arda ta'anni edi'a affaboxxon.

20 Ege'nemeeka magenoonfachchotika ayyaanuwwa ulfeessinanneka Tsiyoonika qachcha uudde;

nage'iinke galdumixxe bakkaxxe duunkaane kaddeexxa

dhaaddo isexxi goshendabaaxxa

Isixxi wodaronna mittetinna midde tanshendabaaxxi

Iyyerusaalemi'i ille atixxi uddaan.

21 Duuchchi Woddiki Gootti ookko no'oxxe hunna kadaan;

iikki shafisuwwiinxi hoboluwwa saxxamabaaxxe

lumolluwwa hoboluwwanna foofamabaashsha

ba'lallama galaanuwwannaa yaasumuwwa no'o'a kadaan.

22 Duuchchi Woddiki Gootti no'ok hayyichchi

Duuchchi Woddik Gootti no'aa seerike uwwallon;

Duuchchi Woddik Gootti no'oke moyanjon;

no'oo anjiraakinna isoten.

23 Atixxi dhisatixxe wodaro luffe'een;

iikki utuphinna jabeesenme otemeba'a;

sharkinna dhisemebaan

eettenne yanna lumoxxe booji'o qoodendaan

naafikinna midde gatebaang booji'e qoodema.

24 Tsiyooni hedheexxi, «Ela gophenen» hiyyaaki hedhdhabaani;

ookkonna hedhaake manni cubbo duuchchi gattowwaal hiyyendaan.