Issayaasikaa Raaga 36

Senaakire Iyyerusaalemii’n Afo’o Fulchedhdhe

1 Hiziqiyaasi moyeexxe tommenna shoole wogga’n, Asoorik moyanji Seenaakireemi Yihuda giddo hedhemmaka jabake kinjiinke dalla’uwwika qachchuwwa loldineexxi injifatine ifiti hiissedhdhe. 2 Moyanji Hiziqiyaasi anga uuwwo’a laqaashsha Asoorik moyanji isika loliinka manna ajajammaka, lumoke loliinke manninni welti Lakishii’n Iyyerusaalemi’a erge; isinna aligamike baleessiki wodi’i yaa’ammake dareeri qarqara seemma borcammake manjichchike fichchi bira uure. 3 Mootummatike miniki sooreessa ajajallo kademmaki Hilqiyaaki belti Eliyaaqemi, borreessanji Saaminaasinna jirte borreesa’aammaki Asaafiki belti Yoo’aahi isibaa mare. 4 Asooriki ajajalli hiyyee qici, «Moyanjo Hiziqiyaasi’a, ‹Asoorik moyanjo’n hitine kuldinaa qici, konnee qico riffi gophphettelchi ayyee addatteete? 5 Haaso’i callinni loliinka malanna hunate ate’n labbe; isi ati anxa laqa gibbaatteki ayye’n adde assexxeete? 6 Dedha Gibtsee ane gargartaani hite addatteten; yaane kinni Gbtse’n addata shombooqiinxe siqqo’ni irkati qixxete kaddeexxa ege’ni; shombooqi butute anga atixxa o’ootaan malee mittelchi’anna la’o fulabaan; Gibtseka moyaanjonna addataaka tennende heqqitaan› hitine kulle» hiyye.

7 Asooriki ajajalli lebeexxi haaso’a’n hiyyee qici, « ‹Ati kinni Duuchchi Woddika Gootta no’oke Mageno addateennen› hitattoxxe hexxeen; yoona Yihudakinna Iyyerusaalemiki ardi konne mitte tolchimalchi edo calla magenoofataashsha assaate Duuchchi Woddike Gottika tolchimalchuwwa diiggettaki ati Hiziqiyaasindebaa? 8 Tennexxee Asoorike moyanjike asso’a hasa’neexxa ate’ni kulo; gulufa dande’e gulufaaka manna affottole lame kuma fadhado ati’a uwwannon. 9 Ati hara shiixxoke hinaaka Asoorike ajajallika duuliinka manna dandeette ifi iimi’ni hoyyexxaboxxoken; tinni iita hexxe’naan Gibtseeki manni ani’a sarageeluwwakanna fadhado gulufamaka manna ani’a ergaan hita’n addatteetten. 10 Ante kadoonnolenna konne boga lole balleessa dande’enneki Duuchchi Woddike Goottixxe fedhi belo ati’a fakkaatta? Egendottoleqqa konne boga lole balleessannoshsha ane ajajeeki umo isikenni Duuchchi Woddike Goottan» hiyye.

11 Ookkoneechchi uduma Eliyaaqemi, Shebinanna Yo’aahi Asoorika loliinke mannika ajajallo, «No’o Sooryaka afo’o egennennaaxxee Sooryaake afo’inni haasottattoshsha kadhantaannen; dalla’ake’n ofo’leeki manni laqaashsha Ibrawotiinke laagadinni haasottoxxe’e» hine.

12 Asoorike loliinke mannik ajajallinna, «Asooriki moyaanji tennee duuchcha ha’no’ninna moyanjo ha’nooke’n calla kulannoshsha anee ergechcho ha’no’n fakkattaata? Ha’nooshshanni foole’a ifika ito’anna shi’na ifinxa ha’wo’a ookkone dalla’i hana ofo’leeki ardi duuchchi’annatebaata?» hiyye hiise haaso’e.

13 Ookkonneechchi uduma Asoorike loliinke mannik ajajalli ofo’lemmabaa’n iimi’a ke’exxi uurre: qonqo qeerriseexxi Ibrawotiinke laagadinni hiyyee qici, «Ulfeessemeeki Asooriki moyaanji ha’no’a hiyyeexxa laqqe! 14 Hiziqiyaasi hiyyaxxe’ni sobendinoqqe’e; isi ha’noo anjira dande’abaan; 15 Hizqiyaasi ‹Duuchchi Woddike Gootta’n addatte; isi no’o anjiraani; Asoorik lola’neeki manni qachchuwwa no’oke’n e’yabaashsha assaan› hiyya’n haaso’aaxxa laqqinoqqe’e. 16 Hizqiyaasi hiyyaaxxa laqqinoqqe! Asoorik moyanji hiyya’nee qici, ammee anibaa daggine weli aage’naa hedhdhe: tennee ani hiyyannoxxa assitinnole duuchchiingi woyyinetike hiddichchixxannaa balasetike haqichchixxa gumma ittinaan; muummuwwa ha’nooxxika wode’e ha’witinaan. 17 Tinnina kaddaaki moyanji ha’nooka boga fakkaataake boga’n ha’noo iyyemare ofo’lshooleten; ookkone boga’n woyinetixxa booka ha’witinaashsha woyinetike hiddichchuwwanna gelteexxa midha wiilsatiki fichchuwwi hedhen. 18 Tennexxee Hizqiyaasi ‹Duuchchi Woddiki Gootti yo’oxxenaa’n ha’noo anjiraan!› hiyya’n ha’noo gowwisoqqe; isi gosa gosake arduwwike magenuwwi giddii’ni mittekanna midde Asoorike moyanjixxe anganaa’n dande’e gatiseeki hedhee? 19 Yoonata Hamaatikinnaa Arifaadik bogiki magenuwwi haba hedhe? Sefaariwayiki mageni haba geye? Yoona konne magenuwwinna’ni mittikinna midde Semaariya anxe anganaa’n dande’e gatiseeki hedhee? 20 Konne duuchchiinge bogiki magenuwwi anxe anganaa’n boga ifika dande’e gatinseexxi yanna hexxe? Yoonata ha’no ‹Duuchchi Woddiki Gootti Iyyerusaalemi gatisaani› hitina’neekita hittate?»

21 Ardi kinna edi wodda moyanji Hizqiyaasi insa’nee ajajemmashsha mitte hiyyichchonna buccuqqi hiyyebaang sammi hiyye. 22 Ookkonneechchi uduma galchatike mineke ajajallo kade’eemmak Hilqiyaaki belti Eliyaaqeemi, borreessanji Shebinanna, jirtetik borreesanji Asaafiki belti Yoo’aahi yaadoti ifi ifixxa seemma daddarreexxi moyanjo Hiziqiyaasibaa dange; Asoorike loliinke mannik ajajalli haasoe’emmaxxa duuchchanna iso’n kulle.