1 «Jalliyye oose'a aanne»

hiyya'neen Duuchchi Woddik Gootti

«Anke kadeebaaka yaada hordonfaan

anke yaada kaddebaaxxa kako aangaan

cubbonde'ni cubbo lephphinaan.

2 Anee qodhdhinebaangi

Gibtsee'a me'ineeni;

Gibtseeka gaaddisa gollakee harse'naan

3 Yaane kinni Feri'oonixxi heqqa insa'ne'a shooko iyyedagaan,

Gibtsee'ni golcho salphine insa'ne'n iyyedaggaan.

4 Fedhee qiconna galchalluwwa Xaanosik qachcha'ni anfoolenna midde

insa'ne erganjuwwi Xaanewoosi hinaaba marre gennolenna.✝

5 Yaane kinni insa'ne'a salphinnekanna shookoke malee

gargaarsakenna kado la'o insa'ne'a hasisabaak

Mittelchonna insa'nee uwwabaake ardixxe buutonni

uwwabaake ardibaa me'a ha'no duuchchiinge shookoken

duuchchingi shookoke'ni ibaan» hiyye.

6 Negeeb hinaba hedheek hori biniinchi'a kulemeeka hiyyichcho

Erganjuwwi karra insa'neexxa harrete'ni

fiixa miya insa'neeka gaalake'ni fe'e'ne

meyyakinna labbak neequwwi

Ha'latik bofinna carri hiyya'ni me'ammaki bofuwwi hedhammaba

rakkonna abara afeeke fuggoke bogi giddi'n sa'neexxi

Mitte la'o insa'ne'a uwwabaak ookkone ardibaa;

7 Gargaarsi iseki mitte la'onna uwwabaak Gibtsee me'inaan

Tennexxee summa iseka

Raa'abii mitte la'o uutabaaxxe hiyyee isee ye'annon.

8 Ta'a me'i xilloke bidiro'ni insa'ne'a borreessi

mirqisanjo maxaafa'ni giddo borreesite uggi

Dagaake baruwwi'a

duuchchi woddi'a naqaashete kadaan;

9 Kunnichchinna Duuchchi Woddike Goottika ajaja laqa gibaake,

jalliyye ardanna dhariyye oosen.

10 Leella uudamakara

«Ta'inni udumi'a leella uuddinoqqe» hinaan

Wabeekotanna hinaa qici

«Dhugaatika raaga ta'anna edi'a raagginoqqee

Gammachchissaaxxa no'o'ni haaso'we

no'o eenannoxxa no'aa lallabe.

11 Ora no'okenaa'ni gamake'ni higge

hodhdhichchakenaa'ninna bayyatte

Isira'eelike Woyyichchi Magenixxe

langaxxa lanqonna'a hansaabo'non!»

12 Tennexxee woyyichchi Isira'eeliki Mageni hiyya'nee qici,

«Konne hiyyichcho ha'no shollishinemmaxxee,

fuggoxxa assa amandineemmaxxee,

soboke'ni irkatinemmaxxee,

13 Tennexxee tinn cubbo

hashakki hashakki hiyye iba shiqeeke

keekkachcho belo dedhange'ni ibammake

qeerraake kinjiinke dalla'ishsha ha'no'ni kaddaan.

14 Bututeechchi uduma

kashilo faashatee

Wode'e qulxuphphate kadaak balchi midde afemabaa qico'ni

mittikinna gatebaangi bututammak

faarink miyishsha bullo'aan.»

15 Isira'eelik woyyichchi dada duuchchike Duuchchi Woddik Gootti hiyya'nee qici

«Higatinna ti'ni hiyyati anjirendinaan

sammi hiyyatinna addatati hunna alfitinaan;

ha'no kinni tennee assitinebaan.

16 Higgeenni ‹Kaddabaan fadhadik baanjannon› hitine

tennexxee ha'no baqattinaan.

Higgeen, ‹Qolchaake fadhadinni baanje fullannon› hitineen

yaane kinni ha'noo shorra'neeki ha'no iimi darre qolchaken.

17 Koobatixxe xungo'ni otemeeke baandirishsha

tulluchchuwwake'ni hana uurreek beesisishsha

Kaddinaa qico'ni

mitte manjichchixxe sodaachchisaan

Kumi manna baqataan

onde manji'a

ha'no duuchchiingi baajinaan» hiyye.

18 Duuchchi Woddiki Gootti kinni ha'no'a o'waa ossaan;

mararte ifixxanna ha'no'a leellisho'a ke'aan.

Duuchchi Woddiki Gootti Magen dhugaa muraake kademmaxxee

isoo addatati heqqedhaak eebbisemeeken.

19 Ha'no Iyyerusaalemi hexxina'neeke Tsiyoonike arda! Konnechchinni edi'a ooxxinabaan; Duuchchi Woddiki Gootti mararaake kademmaaxxee ha'no gargaarsa hassine isiba'a ooxxina wodda oodhishsha ha'nooxxa laqeexxi hiissichcho ha'no'a uwwaan. 20 Dada duuchchik Gootti lumoxxe rakko ha'no'ni geltaashsha assaaxxe hexxeen; yaane kinni isi ha'noo barachchiiso'a isi ha'nonni welti hedheen; higgeenni isoo harsitina'n rakkatinabaan. 21 Me'itinaaka ora haakkine middannaa bita'i'a doonsa kiyya hitinabaan «Ori konneten! Konne me'i» hiyyaaka hafuura laqqinaan. 22 Birretike siblijinninna worqeti bunqeexxa fakkuwwa ha'nooxxanna «No'onaa'n bayyatte!» hitinaa'n raritina'n cancitinaa'ni battotteexxe yaaneshsha aaxxine fugusitinaan. 23 Midha facaasitineexxiki mudhi lateexxi nophpho'anna yo'oxxa midha aassexxinaashsha Duuchchi Woddiki Gootti xeena ha'no'a gansiisaan; hore ha'nooka alla'litinaaxxa heddo bakka alfitinaan. 24 Fichchuwwa qottammaxxi qotiyyuwwanna harruwwa eloka maxine fifixendeeka oke'a ittaan. 25 Ardi bagediki midhemaa wodda lumollamma koobuwwanaa'ninna tulluwwatenaa'n wodi'inxi muume phu'issaan. 26 Eettene yanna agenji arishshotishsha wa'a hitee iffaan; arishshotinna edi qiconaa'ni torbaane anga saxxe iffaan; torbaane barra qiciki ifi mitte barra'ni ifissaan; tinni duuchchi kadaaki Duuchchi Woddiki Gootti umi isenginninni arda madeessemmaaxxa mada ci'loome fayyisaaxxe barra'niten.

27 Kunnise Duuchchi Woddike Goottik summi

ha'yitaaxxe mufenni diimmo duumanchixxe tuqutuqu hitaaxxe wiliillenni welti bayyii'ni dagaan

Haaso'i isik mufeti wo'meeken

arrabi isikinna ittammaxxe giirashshaten.

28 Isiki hafuuri gure adhdhe me'ammake

goobi qico'ninna geyammake dageeke wode'ishshaten

Isi moyanjuwwa balleessatixxe diddiqqanni insa'nee diddissaan

gosa gosatik ardik qeqqeshshinni

ba'netika habooqqe ofo'o insa'neeke'ni bixaalan.

29 Ha'no hashsha woyyichcha ayyaana ulfeessitinaa wodda

faaro faarsitinammashsha

Faarsitinaan;

Duuchchi Woddike Goottixxe kooba'ni

Isira'eelixxe rassaba'a

manni suusu'le ufuufa'ni gammashshoti qabatammashsha

ha'nooxxi qalbenna ittanni ililissaan

30 Duuchchi Woddiki Gootti ha'yita'neexxe mufenninna ittaaxxe giiranni,

danbala'ikinna balaqik kaadeti

Gaachchanni wo'meeka ye'injo isika manni laqaashsha assee laqisaan;

jabaki isik xixxichchi dirraa'naa uundaan.

31 Duuchchi Woddiki Goottik hafuur Asoorito alaalshaan;

siqqichcho isixxinna insa'nee gandaan.

32 Duuchchi Woddik Gootti insa'nee'ni ibisa'nexxi mura woxisa

siqqo duuchcha

Lumoke kiraarinninnaa okolik luuljinni qoqqobemeeken

lolik hunna ifixxa leellisha insa'ne gane.

33 Qeeraake baronaa'ni safe Toofet hinaak gubatik

boonchi qophpheesseme'een

Asoorik moyanji'anna giisseme'en

giira ha'ishendaaxxi balenna ba'laxxenna dhi'mooten

Ise giddo heddo giiranna tuulendeexxi haqqe hexxeen

Duuchchi Woddik Goottik hafuuri

ha'yaake kinjinni ha'ishaan.