1 Duuchchi Woddiki Gootti hiyya'nee qici,

«Labbaki are ifixxa waale shorrammashsha,

ani arda anka ha'noo shoreennechcho fakkatte?

Iittate kaddoole waalennexxa ege'nishshaaxxi borro habata hexxe?

Manji oose ifinxa garbumate gurgurammashsha

ani ha'no booji'endino'a gurgurennechcho fakkate?

Iitta kaddooleta hoone liqeesanji'a ha'noo gurgudhdhenne?

Ha'noo booji'ootee gurgurendineechchi cubbo ha'nooxxixxe buuto'aaten;

shorrendinechchinna hujinemmaxxe balleessa'aten.

2 Ani dagenne wodda mitti manjinna ookko hedha gopheechchi maye'aate?

Ye'enne woddanna mitti manjinna hiissichcho uwwa gopheechchi mayete?

Ani anjira dande'abo'noo?

Dande'e wodannoxxa hunna afebo'noo?

Ajaja callinni abbaayya bassannon;

wodu'uwwa qiilla gammoojjumma'ni jijjiirannon;

qulxu'muwwatinna wode'e gophatenaa'n kexxeexxa rerte aloottaan.

3 Iimuwwate'ni dukkana oddeessannon

iimuwwatiki golinna yaaddotixxe seemma fakkaataashsha assannon» hiyye.

4 Gophaaleeyye jajjabeessa ege'nannoshsha

Duuchchi Woddik Gootti Mageni haaso'iki anee cabbeen;

gorsa gorsa diphokenaa'n ane dammassaan;

Baratichchiinshanna caqasonna'a mansha anxa banaan. 5 Duuchchi Woddiki Gootti ille mansha anee baneen;

ani xaqaritichchake kade isonaa'n bayyatebo'non.

6 Anee jadhafaake dudduro anka,

areeda coraakenna boqo anxa uwwennen;

yowwaakenna anee'n cirqataake alba buqedhebo'non.✝

7 Duuchchi Woddiki Gootti Mageni anee gargarammaxxee salphatebo'non;

tennexxee ani jabaake kinjishsha ifi jabeesseennen;

shookabo'noxxanna ege'neenen. 8 Balleessa afebo'noxxa muraaki Mageni shiqa hedheeni;

ayyeteta ane ku'laaki?

Ane ku'laaki hedhexxe kaddoole murtetixxe songo edo afeeme'naa;

dhugaa adhdhowwaali.

9 Duuchchi Woddiki Gootti anee gargaaraan;

ayyeteta balleessanjoke asse ane'ni muraaki?

Dhariki ane ku'laakiiri seemmatishsha mudaan;

biletinna insa'nee ittaan.✝

10 Ha'no giddii'ni Duuchchi Woddika Gootta sodaataakinna

isike erganjike hiyyichchi'aa ajajemaaki ayyete?

Ifa waalini dukkana giddonna me'oole

Duuchchi Woddike Gootta'ni addatowwaali;

Mageno ifike'ninna irkatowwaali.

11 Ha'no duuchchiingi manjoke'n yaane giiratishsha ha'yishina'neekinna,

bubbi assitineken;

ha'yishinemmaxxe giira'ninna bubbi assitinemmake bubeninninni baxxinaan;

aninni tinni ha'no'n geltaashsha assannon;

ha'nonna lumo qico rakkatinaan.