1 «Hunnati raar; gatilsitoxxe;

hafuura atikanna malagatuffa laqis;

Arda ankee xaqaro insa'neexxa

Ya'iqoobike ardi'aanna cubbo insa'neexxa haaso'i.

2 Insa'nee barra barra'n anee harsinaan;

ora ankanna ege'natee yorraake lanbaan;

toggitte yaane assaake,

ifike Magenika ajaja waalebaake ardi duuchchi

Dhugaatixxa murte anee kadhataan;

insa'nee Mageni insa'neebaa shiqaashsha eeyyaake labaan.

3 Ardikinna, ‹Ati adhdha gophphaatechchinni

mayeeta agabo goddo honsenne?

Ati mittechchishshanna laakko'a gophphetechchinna

mayeeta ifi salphinsenne?› hiyyaan.

«Kaddo malee ha'nooxxe agabo goddo hosatixxa barra eetineexxa assitina;

erganjuwwa ha'nookanna miicinaan.

4 Ha'nooxxi agabo goddo hosa lolikinna moronshat

seerbeloxxa assatinna tuntummoti weli ganati muuxendaan;

Ta'ani edi'a techchixxe agabo goddo hosaashsha

hafuuri ha'nook alalle laqisaaxxa addatinoqqe'e.

5 Ani filennexxi agabo goddo hosa iitta hexxeexxeeta?

Manjita ifi salphisaak iitta hexxeexxe barra baro callata?

Qooccuffa ifi umo hangulli assateeta?

Yookaan yaaddotixxa seemma oddo'wati bululoke'n gangalachchoteeta?

Agabo goddo hosate hitettexxi yexxaattexxita tenneteeta?

Duuchchi Woddik Goottitta adhdhaaxxi iitta hexxeexxe barrata?

6 «Yoona ani fi'leenexxi agabo goddo hosa

miiccamiinka haachchaba tanshitinaashsha

qanbariinxa wodaro tikinaashsha

Miicemeekara leexa fulchitinaashsha

qanbara duuchcha enqitinaashshatebaata?

7 Atixxa ita sol'weeke qooddattoshsha

doonsa kiyyaa hiyaaka hiyyeessa mi'ne atike'n adhdhitottaa

Daareeka affotole oddeessitattoshsha

fira atikenaa'n alba sho'exxabexxoshshatebaa?✝

8 «Tennee assitottole ifi atiki soodimariinke ifishsha ifaan;

fayya ati'a rakkee daggaan;

Ati'a muraakinna ati edo me'aan;

Duuchchi Woddike Goottik gaachchanni gollake kadaan.

9 Eettene yanna ye'exxatton; Duuchchi Woddik Goottinna hiissichcho ati'a uwwaan;

gargaarsakee raartato; isinna ‹Ani ati'a hedhennen› hiyyaan.

«Miicenshatik qanbar,

fuggoxxi haaso'anna manjoke'n qubichcho toga ifinaa'n bayyissottole;

10 Solo'weeke marartotole;

rabemeekiir goddaashsha assitottole,

ifi atik dukkanate'ni ifa;

hashshatinnaa saafo'iinxe arishsho kadda.

11 Duuchchi woddik Gootti duuchchiin wodda atee akeekaan;

arishsho gubbeexxe butta'n isi yorte atixxa wonsha;

micco atikanna jabeessannon;

Wode'e goddeeke hiddichchiinxe bakka

haranga guuttabaaxxe muumme kaddatto.

12 Ardi atik edixxa oluwwa ille iima hiisse ijaaraan;

olmixxa boosonna ofo'linsha;

Atinna digemeek dalla'uwwike giissallo;

lumolla oruwwike qamalchallo hiyyendatto.

13 «Lekkuwwa atixxi Edi Eanbatuwwa jijjiirtabaashsha hoyyexxottole

woyyoondeexxe anxe barra'n atixxe qalbeka yaada assa gophphotoole,

Edi Sanbata gammashshote,

Duuchchi Woddike Goottixxa woyyitte barra ulfaatteexxe hite yexxottole,

Ora ifike'n me'atenaa'n

fedhii atixxishsha assatenaa'ninnaa

woyi fuldabaaxxe yaanenaa'n ifi qussottole,

14 Eettene yanna Duuchchi Woddike Gootta'n gammaddaton;

buttatike qephphinnuwwa'n gulufattoshsha

anna atika Ya'iqoobika qadaada goddite ittattoshsha assannon»

Duuchchi Woddike Goottik afo'o tenne haaso'edheen.