1 Isseyike tutunjonaa'n kichcho fuldaan;

isike hiddanaa'ninna mitte dame gumma gummissa.✝

2 Duuchchi Woddike Goottiki Hafuuri,

beekkumiinkinna qalbeefatatiki hafuuri;

gorsatikinna hunnatiki hafuuri;

ege'natikinna Duuchchi Wooddika Gootta sodaatatiki hafuuri iso'n hedhaan.

3 Isinna Duuchchi Woddike Gootti'a ajajemeexxee gammadaan.

Ille isixxi uuddeeshsha murabaan;

yookaan mansha isixxi laqqeeshsha woxabaan.

4 Yaane kinni dhugaati hiyyeeyyetee muraan:

gargaarsa affebaake gamo kadee seera heqqisaan;

Isike ajajinni ardakee murte uwwendaan;

isike afo'inninna fuggaalleeyye balleessaan.✝

5 Qullumma isike sabbata

xuurameesumma isike hidhixxe hiiton.✝

6 Yayyetinna gedhebi buruusinni welt mitteba hexxaan

qeedhanchi re'eti mitteba ciissaan:

Jabbetinna harade mitteba dheendaan:

belti shiixxoki jabbetanna harade mitteba bobbaasa'nee allalaan.

7 Lalikinna Dibi hiyyemaak biniichchi mitteba bobba'aani:

laliinxi jabbenna Dibixxi beltanna mitteba ciissaan:

neeqquwwi qotiyotishsha hicace itaan.

8 Ununixxi anno bofiinxe bale bira geebbaan:

ununa waaleki beltinna buutetixxe bale'n anga ugga'ni geeban.

9 Mageniinxe woyyitte kooba'n weli miidhaachchi hedhabaan

abbaayya wedi'ik wo'mittammashsha

Butta duuchcha Duuchchi Woddika Gootta ege'nati

wo'mitaan.✝✝

10 Eettene yanna Isseyixxe Daawwitixxe sanneki ardi gosa gosak ardi beesisake kadaan. Gosa gosaki arduwwi isoo hasa'nee ulfeessaan.✝ 11 Eettene yanna'ni Dada Duuchchiki Duuchchi Woddiki Gootti mittele ifixxe hunnanni hujete'ni ke'aan. Tinninna Asoorike, Gibtseeke, Phaxxiroosike boguwwi giddo: Tophiyiinke, Elaamike, Babiloonii'ni, Hamaatikenna iittanni abbaayyatike qarqarike boguwwi giddonna hiddichchuwwi duuchchi giddo hedheeka gatemmaka ifika arda boga insa'neekiba'a hiissaan.

12 Isi mootummuwwatee beesisa uurrisaan;

Isira'eelinaaa'n shorremeeka ille iima hiisse iyyedagaan;

Xexxeremeeka Yihudika arda

shooliinge buttatike kasanaa'n bukki assaan.

13 Ookkonechchi uduma Efireemik ardi Yihuda'ni abixxemmaka elobaaka yaada waalaan;

Yihudanna Efireeminni naaphiinsha weli uudanna uurrissaan.

14 Insa'ne dhidhimi darre'n Filisixeemike gooddo adadde me'inaan;

lamiing mitteba hingeexxi borote'n hedheeka arda saammaan;

Eedoomi'ninna Mo'aabi'n anga qophphi assinaan;

Amoonik ardinna insa'ne'n hiremaan.

15 Duuchchi Woddiki Gootti jabaxxe diidallonni

Gibtseexxe abbaayyaka suuxxichcha wode'e bassaan;

Anga ifixxanna Efiraaxxisike galaana'n qophphi asse ganeexxi;

torbaane shiixxara muummeke wede'e asse

Qoodaan.✝

16 Isira'eeli Gibtsee'n fuldee wodda

kaddemmashshanna

Asoorinaa'n gateek hafe ardi'a

ora insa'ne'a qophpheessaan.