1 Duuchchi Woddiki Gootti Demaasiqoxxee hiyyaa'nee qici, «Kunnise ta'anni edi'a Demasiqoxxi qachchumma gatee'naan;

isinna oletixxe tuulo kaddaan.

2 Aro'eeriki qachchchuwwi manji hedhabaake ona kadee gataan;

gedhebikinna lali ookko bobba'aake kadaan;

insa'nee sodaachchiisaak hedhaba'a.

3 Kinjik ijaaremeek qachchi Efireeminaa'n

mootummatixxa baallenna Demasiqonaa'n gattaan;

Sooriyake mannixxi hafenna

Isira'eelike gaachchannishsha kaddaan»

Hiyya'neen Dada duuchcha Ajajak Duuchchi Woddik Gootti.✝

4 «Eettene barra Ya'iqoobik lumminni salphataan;

isike bisik furdinninna shu'mi hiyyaan.

5 Haamali uurrixxa midha bukki asseexxi

haamendemmaxxa angate'n bukki assammashshanni

Tinninna Rafayimixxe dhooqa'n

qocendaaxxe deeggeeshsha kaddaan.

6 Kaddo malee ejersiink haqichchi uxxemaa wodda

lame yookaan sase gumma dametixxe xongo'n gattammashsha

Shoole yookaan onde gumma mitte bukki hiteexxe dame'n gattammashsha

iittanni hee'noxxi deegge gattaan,»

hiyya'neen Isira'eelik Duuchchi Woddik Gootti.

7 Eettene barra manni insa'nee dademmakiba'a uundaan;

ille insa'neexxinna Isira'eelike woyyichchiba'a uuddaan.

8 Anga ifixxenni giissinemmake tolchimalchiba'a uundaba'a;

qubba ifixxenni giissinemmake hixaanike gubisanjuwwiba'a

Aheraxxe magenefachchotixxi soodduwwa'anna

ulfeessinaba'a.

9 Eettene yanna Isira'eeli lolde miite'naa one gateemmake Hiwaawikenna Amoorake arduwwike qachchuwwishsha ha'nooki jabaki qachchuwwinna one gataan.

10 Atika anjirallo Mageno deeteetten;

golla atika atixxa rassanna qaabbattebexxon;

Tennexxee filemeeka hiddichcho kaassottolenna

hiri fiixexxa sannenna rokkottole,

11 Iitti sanne kaassettxxe barra'n lataashsha

rokkotte langa baro daraartaashsha assitettexxe kaddoolenna midde

Iitti midha bukki asseccatixxi maye dhukkubiinxennaa fayyitabaaxxe dhiboxxe barra

bakka isexxi baxxaan.

12 Hayi hoola heddo gosa gosake ardixxe mufetik hafuura

abbaayyatike danbala'ishsha luulaan;

Hayi hoola manniinxe bira saxxeexxe raaree

jabake wodi'iinke luuljishsha gigiwwisaan.

13 Mannikinna jabake wodi'ik luuljishsha gigiwwisoolenna

isi insa'nee xixaa wodda

Tullichchi hana diidalloti xeeremammake huurishsha

hoobonbalteti xeelagemamake korishsha xeeremaan.

14 Kunnise bogi galgalo'aa wodda dedhange'n weekkensha kadde;

bogi soodeba'a edi darre kinni insa'nenaa'n mittikinna afemeba'a;

Saamemmake mannike qoobbi

gudhdhemmake manninna geyaachchi konnende.