1 Maa hedhe silaati, mitte amaka ununa unu'nineennele

anke dayyo kaddeetele!

Ookkoo'n atee gadho afe'eennele,

silaati atee sunqedhannan;

ayyinna anee tuffatammabaan.

2 Ati, edo me'a'n

anee barsiisseemmaxxe,

anixe amake minibaa atee iyyemarannan;

Ha'wittatoxxa xe'maxxa woyintixxa booka,

roomaanetika bulbulonna ati'a uwwannan.

3 Bita'ixxa anga isixxa boraafateennen;

middixxi anga isixxinna anee hanqalfiteen.

4 Tee Iyyerusaalemixxe dubartee,

jaalala umo ifikenni eete kexxa qico'n

jaalala nunnussitinabaashsha ha'noo maganne hiyyaannen.

5 Ifike eeyyallixxe dugummo'n irkatteexxi

qiilla gammoojjenaa'n alalle dagete'n hexxeexxi isi tinni ayyete?

Qara ama atixxi ate'e godoba horatte ildeemmabaan,

ookko Apletike haqichchi hunda atee dammassenne.

6 Qalbe giddo maatamiinsha

anga atixxe'ninna qabbantetishsha anee uggudhdhi;

Jaalala reyoti caala jabachchon;

hinaafa isexxinna hirreessi caalanna gakki hitaan;

Tallissammaxxe giirashsha

jaba qico bubeniinshanna bubbaan.

7 Jirak wodi'i isee habushshi assabaan;

abbaayyatik wodi'inna isee ca'la ca'la assabaan;

Manji karra afeexxa duuchcha

jaalaltee'e uwweexxe kaddeele

manni isoo ceeggaan.

8 Ununi guntutebaaxxe

dayyo shiixxoxxe anfeennen;

Isee laqe'naaxxa barra

ise'a maa assa dandeenna'neelaati?

9 Ise silaati dalla'ake kaddeele

ise hana birretike sibljixxe xelleephpho ijaarraa'naa

Ise silaati hulate kaddeele

birbirsiinke cufaninni isee bunqaannani.

10 Kunse, ani dalla'ake'n

ununi anikinna xelleephphuwwatishshaten;

Aninna ille isixxe'n

nage'i isi'a afemaaxxe manjo kadenne.

11 Solomooni woyinetike hiddichchika fichcha Ba'aalhamooni afeemmaan;

ookkone woyinetika fichchanna hiddichchiinke heqqanjuwwin maallaqakee uwween;

Mitti mitting heqqanjuwwinna ookkone fichchixxe gummake hiri'a

mitte mitte kuma birretika sibljo iyyedanga'emman.

12 Yaane kinni ani umi ankenne woyinetike hiddichchika fichcha afeenen;

koo Solomooni, mitti kumi birretik siblji ati'anni;

lami dhibbinna woyinetike fichchixxa gumma heqqamakeri'anni kaduun.

13 Tee ookkone hiddichchiinke fichchi giddo hexxettexxee;

jaaluwwi ank haaso'a atika caqansa'neen,

ballo'o aninna haaso'a atika laqo.

14 Koo anke eeyyemalloo, rakke anibaa dagi;

qimametik hiddichchuwwi fuldaaxxe koobuwwa'ni

utaaldammaxxe

geedumma yookaan gadansiixxa beltanna ani'a kadi.