1 Tee ja'laabiinxe beltoo,

kophe giddo atixxi lekka hittata elda'nee!

Biifa'neek atik tafiir beetto anga ifixxenni gisiteeke

fiixa seesuwwa labbaan.

2 Ha'nura atixxi wo'ma woyinetixxi eloxxi booka

giddo hexxeexxe gugu'mitte buuda labbaan.

Hidhi atik bukki assende usurendeexxe

dinnetixxe ladde labbaan.

3 Atik lamiing unun

lakko gadansiinxe beltanna labbaan.

4 Goobi atik Daane'iinxe issonni seesendeexxe, xelleephpho labbaan.

Ille atixxir Bati Reebike qachchike dalla'ixxe hulake

Haseebonike baleesuwwa labbaan.

Sano atixxi Demasiqo darre'n alba wirri hiteexxe

Libaanoosixxe xelleephphoshshaten.

5 Atik umi ati hana Qermeeloosixxe Koobashsha ati'a gaachchannake kadde'een;

ordichchi atike umik haarreti shimalixxe camarre labaan;

moyanjikinna atike shurrubbike shaggummaa booji'emeen.

6 Ati hittata danchate! Hittata eldaattexxe!

Tee anxe eeyyemalloo, ati gammaachchisaatexxen.

7 Hojja atixxi meexxetishsha tagaggi hiteexxen;

ununi atikinna isenxe rogge labaan.

8 Aninna, «Eettenee meexxe da'me da'mannon;

gumma isexxa qocedhannon» hiyyenne.

Ununi atikir woyinetixxe roddeshshaten,

atike hafuurxi fishshenna Apletixxe gummakishsha kaduun.

9 Suume atixxinna eloxxe woyinetixxe bookashsha xe'mituun.

Yoona iitti eloxxi woyinetixxi booka

laana dhuqudhuqu hita'n

anke eeyyemallike afo'i giddi'a issotixxe oddonaa'n saxxuun.

10 An anke eeyyallixen;

isixxi yortenna anenden.

11 Koo anke eeyyallo, amo hadi giddi'a me'ino;

ookkonna baxxe mare gallo.

12 Bariisa woyinetike hiddichchika fichcha marro;

woyine luuphisseexxa,

Daraartenna pha'a hiteexxa,

roomanetinna gummiseexxa uundo;

Ookkonna jaalalati ani ifi ati'aa uwwannon.

13 Turunguwwatinna fishshe fa'a assiteen;

reefi qocendeexxe kadi raxxeexxi

Xe'maxxi gumma duuchcha,

baxxe no'oxxe'n wo'miteen;

tinniirinna koo anke eeyyemallo, ani ati'a uggeennen.