1 Anxe dayyo anxe waajubichchoo anke hiddichchinxe bakkabaa dagenne;

anxe karbenna anxe shitotike haqqichchixxa gummuwwa qocedhenne;

Anxa malebiinxa dhaaba la'endinni iteeneni;

anxa woyinetixxa bookanna anxa ado ha'weeneni.

Jaaluwwi itte ha'we;

ha'no koo waajubichchonna tee waajubichcho jaalalti he'e hitinaa qico ha'we.

2 Ani diipheennen; qalbe anxi kinni diiphphebaan;

caqasse! Eeyyemalli ank hula gangana'n hiyya'ne qici,

Anxe eeyyemalloo, anxe dayyoo, anxe guugenjo

tee anxe muxuuxee hula ani'a bani.

Umo anka qori

umiinka anka ordichchonna hashshik woji shanshe corco asseen.

3 Seemma woldo fulchedhenen;

hittata langaxxa oddo'wanno?

Lekka woldo anshedhennen

hittata langaxxa xureessedhanno?

4 Ank eeyyemalli anga qo'akenaa'ni lussee wodda

godobi anee isi'a raafemate'n ke'e.

5 Anke eeyyemalli'a banonaa ke'enne;

karbetike shamininni corco hiteexxe anxe anganni

Duneddemmaxxe karbenni coo'mi hiteemmaxxe anxe qubbuwwanni

hulatika banisanjo abideenne.

6 Eeyyemallo anekee hula banenne;

eeyyemalli ank kinni me'eemman; hedhemmabaan.

Me'aammaxxee qalbe anixxi moornde.

Isoo jabeesse hasenne yaane kinni afebe'no;

isoo ye'enne yaane kinni heeyebaan.

7 Ookkone qachcha heqqaammak manni

qachchi giddo mammarema'n qachcha heqqaammake manna'n leellenne.

Iikki qachcha heqqaammak manni

anee ganne madeessine;

Seemma anxanna mulqe'ne.

8 Ha'no tee Iyyerusaalemixxe dubartee

Eeyyemalli anki ha'no'n leello'oole

jaalala isixxenni ani jammi hiyyennexxa iso'n kuldinaashsha

ha'noo maganne hiyyaannen.

9 Tee ati melaalle duuchchinaa'n caala danchoondeettexxee

atik eeyyemalli wele eeyyemmalluwwinaa'ni danchumma haba caalammalete?

Konne qico'o no'oo magannissa'ettechchi

eeyyemalli atik welekenaa'n danchumma haba caale'naate?

10 Eeyyemalli ank unde'naanna goddisabaake,

isi kuma labballo ginbaaken.

11 Umi iski ca'a hiteexxe worqe

isike umink ordichchi luuccakenna

qodhandiinsha xilloke quca.

12 Ille isixxir

muummeti qarqara hexxeexxe guggenjuwwashsha

Adotishsha gola'litaaxxe

qubbi qubbi hiyyeeke seesuwwishannaten.

13 Isixxe lamiinxe boqoxxe fishshexxi elle

gargar gargar hexxeexxe qurunfudduwwa hiddichchiinxe bakka fakkaattaan;

Suume isixxinna karbetixxe shittoxxi fishshe fa'a assaammake

dancha daraarishshaten.

14 Hirre isixxi fiixeeke kinjinni danchossendeexxe

worqetixxe zange labba;

Bisi isikinna senpeeri hiyyemaake fiixeeke kinjike seesinni

danchoossende'e giissendeexxe daane'iinxe isso labbaan.

15 Lekka isixxiir ca'itte worqeke uremalcho'n kaasemeeke

cabbetishsha hedheeke fiixeeke kinjike utuphuwwa labba.

Dhagga isixxinna Libaanoosixxe kooban;

eettene koobbaxxe birbiirsixxe haqqeshshanna filemeeken.

16 Afo'i isiki hara xe'me birasa'eeke

hedho isixxi duuchchinna halchissaaken;

Tee ha'no'o Iyyerusaalemixxe dubartee

yoona konnete ank eeyyeamalli; jaali ankinna isoten.