1 Ani Saaroonike Tsigeereda

Dhooqa giddike daraaroqqa.

2 Qu'muudotixxe oddo'n hedheeke dancha daraarishsha

eeyyemallo anxinna danchalluwwatixxe oddo'n iittanden.

3 Gongomiinxe haqqexxe oddo'n hedheemmake appiletike haqichchishsha

eeyyemalli ankinna dargageeyyetixxe oddo'n iittanden;

Isixxe gaaddiddo hunda offo'la anee eeyyisa;

isixxe gummaxxi xe'menna anee goddisaan.

4 Isinna ifixxe jilake mine'ni anee iyyemare;

ane'ni afeek yaadinna jaalalaten.

5 Jaalala isixxi anee abiddee'naa dhibemennaxxee

Zebiibe itissina'n mikita anee jabeesse;

Apiletanna itissina'n anee gammachchiisse.

6 Isixxa bita'ixxa anga boraafateennen

middixxi isixxi anganna anee hanqalfitaan.

7 Tee Iyyerusaalemixxe dubartee,

jaalala umo ifingenninni yorte'e kexxaa qico'n

Jaalala le'misinabaashsha yookaan dammasitinabaashsha

xaaxinkenninna qiilla gammoojjek gadansiinke summinni ha'no kadhatenne;

8 Kunse anke eeyyemallik hafuur

koobuwwa hanii'ni utaala'n

Gooruwwati hanii'ninna xogga'n

ane'n dage.

9 Ank eeyyemalchi xaaxa yookaan qiilla gammoojjeke gadansa labbaan;

kunse, no'oke minixxe gimo uduma uurreedheen;

Maskootetenaa'n sammi hiyye mini'a uuda'neen;

qo'akeenaa'ninna ceeqqisa'neen.

10 Anke eeyyemalli anee hiyyee qici,

«Tee anxe jaalala ke'i;

tee anxe danchilee aniba'a amo.

11 Kunse haarsi sa'een;

xeenikinna caame sa'eedheen.

12 Daraaruwwi bogi giddo leelleen;

meellatixxi yanna dageen

Guugenotik hafuur

no'oke bogi giddo laqeme.

13 Balase gumma gummisse'e

daraarteexxi woyyinuwwanna fishshe fa'a assite.

Tee anxe eeyyemallo kexxe amo;

tee anxe danchilee anibaa amo.»

14 Rassatike baqaquwwa'n

koobuwwa giddo sho'omatixxe bakkaara'n hexxettexxe tee anxe guugenjoo!

Alba atika ane'n leellishshaata;

Haaso'i atik xe'make

Bifa atixxinna biiffaammaxxee

hafuura atikanna ane'n laqissaata.

15 No'ok woyinetike hiddichchixxa bakka

daraaroke'n hedheeka no'oka woyinetik hiddichchixxa bakka

Balleessita'neexxa yayyuwwa;

eettene shiixxaramma yayyuwwa no'o'a fonxoroti abidde.

16 Ank eeyyemalli anke, aninna isixxe;

isi hore ifika danchallamma daraaruwwi giddo bobbaalsa.

17 Boro haachchabbebaa edo

dukkanatinna saxxebaang;

Koo anke eeyyemalloo

xaaxxuffa yookaan

Bobboqqe koobuwwa ha'nii'n xoggitammaxxe

gadansiinxe beltanjoshsha labi.