1 «Ookkone baro» hiyya'neen Duuchchi Woddiki Gootti, «Ookkone baro'n ani Isira'eelixxe gosake minuwwi duuchchike Magno kadannon insa'nenna anke arda kandaan.»

2 Duuchchi Woddiki Gootti hiyya'neeqic,

«Wolantichchakenaa'n gateeki ardi,

qiilla gammoojje giddo anenaa'n elle alfaan;

Aninna Isira'eeli'i hafuura adhdhisonna'a dagannon.»

3 Duuchchi Woddiki Gootti bayyii'n no'o'n leelleexxi,

«Ani duuchchi woddixxe jaalalanni ha'no'o eeyyeennen;

tennexxee mararte anxenni ha'no'o ifi biri'a shiqilsenne.

4 Koo anke arda Isira'eeli haaroba ha'no'o ijaarannon;

ha'nonna ijaarendinaan;

Haaroba okole ha'nooka adhdhitineexxi

burraaqaakerni welt gammaddina'n burraaqqinaan.

5 Haaroba Semaariyaxxe koobuwwa'n,

woyyinetika hiddichcho kaalsitinaan;

Kaalsemmak hujalluwwi hiddichchuwwa

konnexxe gumma'n gammadaan.

6 Heqanjuwwi Efireemixxe kooba hana

hedhee hafuura gikki asseexxi,

‹Amme, Tsiyooni'a Duuchchi Woddike Gootta

no'oke Mageniba'a me'ino! Hiyyaaxxe barra daggaan.› »

7 Duuchchi Woddiki Gootti hiyya'nee qici:

«Ya'iqoobixxe hortexxee'e gammadik faarse;

angafa gosa gosatike ardikee,

Galatakanna shiqishshe;

‹Ee, Duuchchi Woddike Gootta,

arda atika Isira'eelixxa hafe anjiri› hiyye.

8 Kunse ani insa'nee'e middike boganaa'n iyyedagannon;

buttatixxe gabalabaa'ininna insa'nee bukki assannon;

Insa'nee giddo balla'uwwi, naafuwwi,

siiliinxirinna ciniffattaaxxiri hexxaan;

heenobaake ardanna kandee illeema hingaan.

9 Insa'nenna oo'na'ni dangaan,

aninna jajjabeessa'ni insa'nee iyyedagannon;

Ani Isira'eeli'a annake kadennexxeenna,

Efireemi anke sooreessa belto kademmaxxee,

Ani insa'nee'e wodu'uwwiinxe muummeke,

guggufantabaake eloke ora'n akeekannon.

10 «Koo gosa gosake arda, Duuchchi Woddike Goottika hiyyichcho laqqe,

bayya hexxeexxe abbaayya qarqaruwwa'n hedheeke arduwwa'ninna,

‹Isira'eelika arda xeereek isinni insa'nee'e bukki assaan;

hore ifika alalisanji heqqedhammashsha insa'nee'e heqqaan› hitina'n lasse.

11 Duuchchi Woddiki Gootti Ya'iqoobixxa horte fulchaan;

isa'nee'e caalaake mannixxe anganaa'inna insa'nee'e wodaan.

12 Insa'nenna dangeexxi Tsiyoonixxe kooba hana gammashoti farsinaan;

Duuchchi Woddike Gootti insa'ne'a badhaaseexxe

Midha'n, woyinetike bulbulo'n, Ejerisiinxa zayite'n,

re'etike'ninna gedhebiinke buruusa'n, jibichake'ninna raadate'n gammandaan;

Insa'ne geyaaka wode'e alfeeke hiddichchiinke boonchisha kandaan;

ta'inni eliqi'a yaandabaan.

13 Ookkoneechchi uduma dubarri insa'neek gammada'nee sirbaan,

dargaggeeyye insa'neexxinna labbaxxi geedhe insa'neexxi burraaqqaan.

Oodhishsha insa'neexxa gammashshote'n jijjiiranno;

yaaddotenaa'n insa'nee jajjabeessanno, gammashshotanna insa'ne'a uwwanno.

14 Qeese bira sa'isse eebbisanno;

arda ankanna arjuma anxenni goddisanno,»

hiyya'neen Duuchchi Woddik Gootti.

15 Duuchchi Woddiki Gootti hiyya'neeqici,

«Oodhishshanna hunbaasha,

Raamake qachchanaa'n laqende;

Oose ifixxa gophphemmaxxe'e,

Raaheeli ooxxe;

dayyeeffachchonna gibbe.»✝

16 Duuchchi Woddiki Goottinna hiyya'neeqic,

«Oodhishsha atixxa uurrisi;

indiddotanna fi'wi.

Raaheelii'i elo atixxi tola gatagophphammaxxee»

hiyya'neen Duuchchi Woddiki Gootti.

«Oose atixxi naaphiinke boginaa'n illeema higge daggaan.

17 Tennexxee ati hegeri adde afeetten,»

hiyya'neen Duuchchi Woddiki Gootti.

«Oose atixxi ifike bogiba illeema higgaan.

18 «Efireemike ardixxe oodhishshaxxa hinqilfachcho dhugaaten laqeennen;

‹Lenjisemebaake jibichchishsha ati no'oo xixeetten;

no'onna xixemmeennen;

Ati Duuchchi Woddike Gootta no'ooke Mageno kaddettaxxee,

no'o hiissi, no'onna hingannon.

19 Atenaa'n bayyantennechchi uduma,

wirri hine gaabbinen.

Yaane no'o'n aageechchi uduma,

yaaddoti qoma ifi ga'ninenne;

Dargaggeessummate'n assinennaxxe balleessanaa'n kexxeexxa

salphanteennen hangulli.›

20 «Efireemi anke belto eeya'enneken,

iso'n gammada'nekebata?

Heddole iso'o aallatte haaso'onnolenna,

hige hige'e isoo hedannon;

Tennexxee godobi anki isi'a raafemaan;

lumoshshanna isoo mararannon,»

ani Duuchchi Woddiki Gootti tennee haaso'eennen.

21 «Koo Isira'eelike arda oriinka beesisa uurlse;

ora akeekaalchonna olte;

Me'itina'neeka oranna,

ookkonee lumoka hodhichanna hubatte;

Tee dubarrichcho Isira'eeli, illeema higi;

qachchuwwa atikibaanna oriibi'aa ileema higi.

22 Koo addatendinebaake,

Isira'eelike arda haaniqico'n doonsakiyya hitina'n hexxina?

Ani Duuchchi Woddiki Gootti buttate'n haaroxxa,

yaane assannon tinninna melaalle labbakee gollake kaddaan.»

23 Dada duuchcha ajajaak Duuchchi Woddiki Gootti Isira'eelilk Mageni hiyya'neeqic: «Ani insa'nee booji'otenaa'ni wirri assee hissanno wodda Yihudiinke bogikinna isike qachchuwwiki ardi haaroba: ‹Tee qullummatike galduma kaddeettexxe woyyitte kooba, Duuchchi Woddiki Gootti atee'e eebbiso'o!› hiyyaan. 24 Wiisaluwwikinna hore horataaki manni Yihudi giddonna isike qachchuwwa'n mitteba hedhaan. 25 Ani shaqqeeka manna hunna haroonsannon; gaggabeekaranna jabeessannon.» 26 Eettene yanna diiphii'n dammaqee erqe kayya uudenne; diiphikinna yo'osha ane'ni xe'meemman.

27 «Isira'eelikanna Yihudiinke boga'n» hiyya'neen Duuchchi Woddiki Gootti. «Manjokanna hore wonshannoxxe yanna daggaan, 28 Insa'ne xuqqi hiyyemmashshanna diigemmaashsha, fedenshemmashanna ba'naashsha, insa'ne'n rakko daggaashsha assennashanni, ittanni insa'ne ijaarremmashshanna uurrinaashsha assannon» hiyya'neen Duuchchi Woddiki Gootti. 29 «Ookkone baro'n ardi langaxxa,

« ‹Annuwwi raxxebaaxxa woyinetixxa gumma itemmaxxee'e,

insa'neexxe oosexxi isso bukkurte hiyyaaka mammaassa mammaakabaan.›✝

30 Yaane kinni mitti mitting manji ifinxe cubboxxee reyaan; raxxebaaxxa woyinetixxa gumma itaak duuchchi ifinxe isso bukkurtaan.

31 «Ani Isira'eelikenna

Yihudake ardi'a» hiyya'ne Duuchchi Woddiki Gootti,

«Haaroxxa kako aagannoxxe

yaanna daggaan.✝

32 Tinni kakonna Gibtsee'ni insa'nee fulchonnaa,

anga insa'neexxa abide akeekennaxxa yanna,

Annuwwa insa'neekee aagennaxxe kakoshsha,

hexxeexxebaan;

Ani insa'neeke aro'o kadee'naanni

insa'ne kako anxa diinge'emman,»

hiyya'neen Duuchchi Woddiki Gootti.

33 «Yaane kinni eettene yaanna uduma,

Isira'eelike ardi'a aagaannexxi kako tenneten» hiyya'nen Duuchchi Woddiki Gootti.

«Seera anka qalbe insa'neexxi giddo uggannon;

godoba insa'neeki giddonna borreessannon;

Ani insa'neeke Mageno kadanno;

insa'nenna anke arda kandaan.✝

34 Ta'anni edi'aa ayyinna jaalo ifika,

yookaan dayyo ifika ‹Duuchchi Woddika Gootta ege'ni,› hiyyeexxi barachchiisabaan;

Shiixxokenaa'n lumokiqico'n hedheeki

duuchchiing anee'e ege'nammaxxe;

hiyya'neen Duuchchi Woddik Gootti.

«Ani balleessa insa'neexxa gattowwaali hiyyannon;

cubbo insa'neexxanna hige hedabe'non.»✝

35 Barra iffaashsha,

Arishsho uggeek,

Hashshanna iffaashsha

agenjokanna urjuwwa ajajeek,

Danbala'i luulaashsha,

abaayya raasendaashsha asseek,

Summi isik dada duuchcha ajajake Duuchchi Woddike Gootta kade'eeki hiyya'nee qici:

36 «Kunni seeri ani edii'n jijjiiremoole»

hiyya'neen Duuchchi Woddiki Gootti,

«Eettenee yanna calla Isira'eelixxe horteke,

arda kada duuchchii woddi'aa ani edii'n gattaan.»

37 Tinni maachcho hiyya'neen Duuchchi Woddiki Gootti:

«Iimate'n, iima mikenda'noole,

butta buttatixxi booso qorqorende ege'nenda'noole callan,

Assitemmaxxe balleessaxxe ani Isira'eelixxa horte waalannok»

ani Duuchchi Woddiki Gootti tennee haaso'eennen.

38 «Kunniseteni Iyyerusaalemik qeerrake kinji minenaa'ni ke'e Hanaani'eelixxe xeleephobaa'n kasiinxe dalla'iinxe hulaqico'n» hiyya'neen Duuchchi Woddiki Gootti, «konnee qachcha ani'aa qammalchemaaxxe barra daggaan; 39 Gabalatinna ookkoo'n kexxeexxi toggi hite'e Gareebike tullichchiba'a me'iteexxi Go'abaa gortaan. 40 Renshikinna bululi hunemammaxxi dhooqa duuchchi, boroti darre'n Qeediroonxe dhooqanninni, fadhadiinxe hulake kasiqico'n hedheeki boonchi duuchchi, Duuchchi Woddike Gootti'a woyyoome'eeke kadaan; ta'inni edi'a Iyyerusaalemik qachchi langaxxa findigemabaan; diigemabaan.»