1 Gibtseeke middike bogi giddo hedheeke Migidooli, Xaafinaasinna Memifisi iittann Gibtseke bita'n hedha'neeke Ayihudiinke ardixxee Duuchchi Woddiki Gootti hiyyichchi anee'e Ermiyaasi'n dage: 2 «Lumok Duuchchi Woddik Gootti Isira'eelik Magen Iyyerusaalemikenna Yihudake qachchuwwa duuchcha'n iyyedagennexxa jabaxxa ba'ne ha'no uudine'een; telcho kunni qachchuwwi ayyinna giddo hedhabaake urmake kadedheen. 3 Tinni kaddeelchi insa'ne assineexxe fuggo'aaten; insa'netenna kando ha'no yookaani annuwwi ha'nooki ege'nebaaka wele magenuwwi'a hixaana gubatinna isoo magenooffatati anee'e mufachchiinse'een. 4 Aninna insa'ne'e, ‹Tenne ani gibaanexxa battitte yaane assitinoqqe› hiyya'n raagole anxa erganjuwwa higge higgeen insa'neeba ergennen. 5 Insa'ne kinni lanqebaan; qalbeefantebaan; ifixxe fuggoxxe hujena'inna hingeba'a; wele magenuwwi'a hixaana guba waallebaan. 6 Tennexxee bala anixinna mufe anxi lolaateexxi Yihudake qachchuwwa'inna Iyyerusaalemike oruwwa'n ha'yite; telcho uuddina'neeshshanni ayyinna hedhabaake onuwwanna oluwwa assiteen.

7 «Ta'anna Lumoki Duuchchi Woddiki Gootti Isira'eelik Mageninna Sanne ha'nooxxi gattabashsha labballinna melaalle, oosetinna annoole Yihudake boga'n afendabaashsha iitta hexxeexxa jabaxxa ba'ne mayee ifi'n iyyedaqqitinee? 8 Hexxino'a daggineeke konne Gibtseeke bogi giddo wele magenuwwi'a hixaana gubati, anga ha'noxxi giisiteexxe yaanuwwanni mayee'e anee'e mufachchisinaa? Butta'te'n hedheeke gosa gosake arduwwi duuchchi edo badinotikenna gacifachotike kaddino'a ifinni ifi balleessitinaata? 9 Yihudiinke boga'ninna Iyyerusaalemike oruwwa'n ediki ha'nooki annuwwi, Yihudiink moyanjuwwinna insa'neexxi aruwwa, iittanni ha'nonna ha'nooxxi aruwwa assitineexxa fuggo deetinee'si? 10 Telchiqico'n ifi heeshshi assinebaan; edike ha'nooke anuwwi edonna ha'noo edo uggenneka anka seeranna anxa aada hordonfebaan.

11 «Tennexxe'e Lumok Duuchchi Woddik Gootti Isira'eeliki Mageninna ha'no'n ba'ne iyedagona'anna Yihuda duuchcha bironna'a mudhdheennen. 12 Gibtseeke boga'n mare ofo'latee'e mudhdheeka booji'otenaa'n gateeka Yihudiinka arda duuchcha birannon; insa'ne Gibtsike boga'n wolaantichchik rennaan; solo'o'ik mundaan; lumokenaa'ni shiixokiqico'n wolaantichikinna solo'ik rennaan; ce'memaake, insa'ne'e uunde henkeki hiyyaakenna oso'lichinke kandaan. 13 Iyyerusaalemii'i xixeneshshanni, Gibtsee hedheekanna wolaantichik, solo'ikinna dhukkubik xixannon. 14 Gibtsee'a dageek boojjotenaa'n gateeke, Yihudak manni Yihudi'a higo'a halchoolenna heenoke booji'emeeke manna malee'e baajeexxi yookaan lubbo gate'e Yihudike bogibaa higaak mitti manjinna hedhabaan.»

15 Aruwwa insa'nexxi wele magenuwwi'a hixaana gubbeexxa ege'neek labballuwwi duuchchi, ookko hexxemmaxxi melaalluwwa duuchchi, bita'ixxenna middixxe Gibtsee'n hedheek ardi duuchchi anee'e Ermiyaasii'i hiyyeeqic, 16 «Ati Duuchchi Woddike Goottike summinni no'o'n haasottettaxxa erga lanqabe'non! 17 Assinnanon, hinennexxa duuchcha assinnano; edik anuwwi no'oki, moyanjuwwi no'okinna ja'laabuwwi no'ok Yihudiinke qachchuwa'ninna Iyyerusaalemike oruwwa'n assinemashanni no'onna iimatixxe mootitte'a hixaana gunbanno; ha'watika tolchanna ise'a tolchinnanno; iitta assinnanna wodda indannolchi wo'meemman; eloqica he'nenna malee'e mitte fuggoxxi no'oo miitaaxxi geltebaan. 18 Yaane kinni iimatixxe mootitte'a hixaana gubanna ha'watika tolcha isi'a tolcha waalenechinni kayyi'a, duuchchingecho gonpheenen; wolaatichchikinna solo'ik mudate'n he'nennen» 19 Melaalletinna, «Iimatixxe mootitte'a hixaana gubaanexxa yannanna ha'watika tolcha ise'a tolchinnanna wodda, ra'isinennaxxa isexxe misileshsha hexxeexxa kebbonna lolaanseenneka ha'watika tolcha aro'uwwi no'ook ege'neenni hedhemman» hite. 20 Ani Ermiyaasi hissichcho konne'e uwweeke arda labballokanna, melaalle duuchcha'n hiyyeeqic, 21 «Ha'nonna edik ha'nok annuwwi, moyanjuwwi ha'nokinna ja'laabuwwi ha'nok ittanni bogiink ardi Yihudake qachuwwa'ninna Iyyerusaalemike oruwwa'n gubbineeka hixaana Duuchchi Woddiki Gootti qaabbata'nebaakenna dedheechcho ha'no'n labbee? 22 Duuchchi Woddiki Gootti assitineexxa fuggonna hujjineexxa battitte yaane ossa dande'a gophemaxxe'e, telcho bogi ha'nok badinemeekenna manji hedhabaake ona boga kade'een. 23 Ha'no hixaana wele magenuwwi'a gubiyyoti Duuchchin Woddike Gootta'n cubbo hujjinemaxxenna hiyyichcho isika heqqedha gophphinemmaxxe'e seera, gorsatanna ajaja isika ulfeessa gophphinemmaxxee telcho uudina'neeshshanni ba'ne ha'no'n dagge'een.»

24 Ookkonechchi uduma ani arda duuchcha giddii'inni melaalle hiyyee qici: «Gibtseeke boga'n hexxina'neeke Yihudiinke arda duuchcha, Duuchchi Woddike Goottika hiyyichcho laqqe. 25 Dada duuchcha ajajaake Duuchchi Woddike Gootik Isira'eelik Magen hiyya'nee qici: ha'nonna aruwwa ha'nooxxi, ‹Eettene iimatixxe mootitte'a hixaana gubbateenna ha'watika tolcha ise'a tolchatee werreegenneka werreega muunxanno› hitinee haasotinemmashshanni muuxxine'een.»

«Elo qica'n yoona mee udumi'a higge; uutino'a werreeginemaka werreeganna muuxxe! 26 Gibtsee hexina'neeke Yihudiinke manna duuchcha Duuchchi Woddike Goottika hiyyichcho laqqe: Duuchchi Woddiki Gootti hiyya'nee qici: Konnechchinni edi'a fedheeki Gibtsike boga'ni hedha'neeki huuni Yihudiink manjinna, ‹Hedhaake Duuchchi Woddike Goottixxa!› hiyye summa anka ganabaashshanna, kakatabaasha lumoke anke summin kakateennen. 27 Eloxxe kaddebaak fuggo ha'no'n kaddo'a assannaxxee Gibtseeke boga'n hedhaak Yihudiink manni mittikinna gatabaa qico'n wolaantichchikinna dhukkubik mudaan. 28 Wolaantichchokenaa'ni gateexxi, Gibtsee'in Yihudiinke bogiba'a higaakir heenoke kadaan; Gibtsike boga'ni hedhatee dageek hafe gateek Yihudiki ardi duuchchi, anike yookaan insa'neeke hiyyichchi giddii'n huuni dhugaate kadeexxa ege'naan.

29 « ‹Isi Ha'no'n iyyedaganno hiyyenaxxa fuggoxxa yaane muuxannoxxa egendinaashsha konne booncho'n ha'noo xixannoxxi tinni hano'a beessisake kaddowwaal› hiyya'neen Duuchchi Woddiki Gootti. 30 Tinninna ‹Yihudaka moyanjo Sedeqiyaasi'i naaphi iso'o shiyo'a hasa'neeke Baabiloonike moyanjo Nabukadanatsoorixxe anga'n sa'isse uwwenneshshanni, iittanni Gibtseek moyanjo Feri'oonii'i Hofiraani shiyo'a hasa'neeke isike naaphuwwa'n iso'o sa'isse uwwannon.› »✝