1 Eermiyaasi usuriinke minike heqanjuwwinxe baxxe'n usuremeba hedhee'naa Duuchchi Woddike Goottik hiyyichchi langaxxa iso'n dageexxi: 2 «butta dadeek, bifa affaashsha asseekinna bakka isexxe'n ooffo'lisheek Duuchchi Woddiki Gootti, summi isikinna Duuchchi Woddike Gootta kadeeki isi hiyya'neeqic: 3 ‹Anee ye'edhi, aninna ati'a heeyyannon; ati egendebexxoxxa lumoxxanna hunnameete yaane ate'n leellishshannon› 4 Isira'eelik Duuchchi Woddiki Gootti Magen Baabiloonik manni qarqarake'n qoqqobe buttinna tullubiyyoti lola ke'isseemma wodda diigememmake konnee qachchike minuwwixxeenna Yihudaki moyanjuwwixxe mootomatike minixxee hiyya'neeqic 5 ‹Qachchiink manni Baabiloonik manninni lolemo'a fulaan; yaane kinni isa'ne konne qachchi giddo assinemmaxxe fuggo duuchchi'a alba isonaa'n sho'edhannaxxee, mufe anxeninna bala anxenni shiyannoke mannik renshi giddo wo'maan.

6 « ‹Kaddo malee'e isi'a foorakanna fayyunte haaroba uwwannon; arda ankanna fayyisannon; bira sa'eeke nage'inni ti'ni hine he'naashsha assannon. 7 Yihudakanna Isira'eelika booji'ememmaka manna illeema hiissannon; edo he'nemmaxxe jiro'n he'naashsha assannon. 8 Anee balleesinemmaxxe cubbo duuchchanaa'n insa'nee'e ca'a assannon; ane'n jallantemmaxxa cubbo insa'neexxa duuchchanna gattowaal hiyyannon. 9 Ani konne qachchi'a assennexxe eloxxe yaane duuchchaa laqaake buttatik gosa gosake ardi duuchchi edo ani iso'n gammadannoke, galateeffatemannokenna ulfeessemannoke kadaan; isi'a uwwannoxxe bira saxxeexxe karranaa'inna nage'inaa'n kexxeexxa gosa gosaki ardi sodaate culphisaan› hiyye.

10 «Duuchchi Woddiki Gootti hiyya'neeqic: ‹Ha'no kunni boonchi, «manji hori hedhabaake urman hitinaan» yaane kinni manji hori hedhammabaakenna urma kade'eeke Yihudake qachchuwwa'inna Iyyerusaalemike oruwwa'n, haaroba hafuuri laqemaan. 11 Ililleettetikinna gammashshotik hafuuri waajubichchikinna waajubbichchotik hafuuri,

« ‹ «Ittanni Duuuchchii Woddiki Gootti eloke kademmaxxeenna

jaalala isixxi duuchchii woddixxe kaddemmaxxee

Lumoka Duuchchi Woddika Gootta galateeffatte» hiyyaak.

Galatinka tolcha abixxe Duuchchi Woddiki Goottike miniba'a dagaake manniki hafuuri laqemaan; konne bogii'n booji'ememmaki manni edishsha hedhaashsha illeema hissannon› ani Duuchchi Woddik Gootti tenne haasoennen. ✝

12 «Lumoki Duuchchi Woddiki Gootti hiyya'neeqic: ‹Hori manji hedhammabaaxxa konne duwwi booncho duuchcha'n, qachchuwwa duuchcha'n allalisano hore ala'litaaxxi bakka haaroba hexxaan. 13 Koobatike bogike qachchuwwa'n, dhidhimi darrexxe koobuwwa aadidarreke qachchuwwa'ninna Bita'ake'n hedheeke qachchuwwa'n, Biniyaamike bogi giddonna, Yihudiinke qachchuwwa'n iittanni Iyyerusaalemike qarqara'n hedheeke olla'uwwa'n allalisano haaroba hore ifika lako'wita'n towwattaan› ani Duuchchi Woddiki Gootti tenne haaso'eennen.

14 « ‹Yihudiinke ardi'a addachchiisennaka hiyyichcho muuxxannoxxe yanna daggaan› hiyya'neen Duuchchi Woddiki Gootti.✝

15 « ‹Okkone barixxe eettene yanna'n,

Daawwitixxe sannenaa'n qullitte kichcho lachchiisannon;

isinna bogake'n dhugaatanna qullumma assaan.

16 Ookone baro'n Yihudiink ardi anjiremaan;

Iyyerusaaleminna nage'ik hexxaan;

Duuchchi Woddiki Gootti no'ooxxe qullumman› hiyyemaake summininna ye'endaan.

17 Dawwitixxe sannenaa'n Isira'eelixxe moote'n hana ofo'laaki haranga gophemabaan;✝ 18 iittanni ciincatika tolcha shiqishatee, midhatika tolchcha cinceessateenna wele tolchuwwa tolchatee'e Leewwike manninaa'n qeesete kade'e duuchchii wodda ani edo uurraaki manji gophemabaan» hiyye.✝ 19 Duuchchi Woddike Goottik hiyyichchi Eermiyaasi'n dageexxi, 20 Duuchchi Woddiki Gootti, «Ani hashshatinna barra, hashshite sooddaashsha murennexxi aada muuxendabaashsha hoyya dadeessissoole, 21 ookene wodda callan erganjo anke Daawwiti'a aagennexxi kako, iittanni ani edo qeessummati ergatemaake Leewwike manni'a aagennaxxi kako diigendaak; iittanni ookene wodda callan Daawwitiinna ta'anni edi'a moote ifixxe'n moyaaka sanne ifixxinaa'n afabaak. 22 Erganjo anke Daawwitixxa sannenna ani'a ergataaka Leewwika manna iimixxe urjeshsha lako'emabaakenna abbaayyatike maanchishsha bira sa'issannon» hiyye.

23 Duuchchi Woddiki Gootti hiyyichchi Eermiyaasi'n dageexxi hiyyeeqic: 24 «Kunni ardi, ‹Duuchchi Woddiki Gootti fi'lemmaka Isireelixxenna Yihudaxxe mootummaka arda waale'een› hiyya'n haaso'a'neexxa hubattineenni hexxinebaata? Insa'ne anka arda tuffante'een; ardiinshanna laakonneebaan. 25 Duuchchi Woddik Gootti hiyye qici ‹Hashshatinna barra hexxaashsha kakoti mura gophoonnole, iimateenna buttatee aada uggeenneki ante kada gophoonnole, 26 Ya'iqoobixxanna erganjo anke Daawwitixxa sanne waalanno; oose isixxinaa'inna, Abirihaamixxe, Yisaaqixxenna Ya'iqoobixxe horte'n mootaashsha filabe'no; ani tenne hiyyaanneki booji'o insa'neexxa illeema hissannexxeenna insa'ne'a o'wanaxxeeten› » hiyye.