Milagres de Jesus

Yesu awahonya matuntu waidi

27 Yesu ekuwaho ahauka hantu aho, matuntu waidi wakambasa na kutoa vuzo, "Mwana wa Daudi, utifiiye mbazi!"

28 Yesu ekwengiaho nyumbani, wantu awo waidi wakamtimia, nae akawauza, "Ivi, mwazumiiya nadaha kutenda mbui iyo?"

Nao nee wamtambaisa, "Eehe, Zumbe."

29 Aho Yesu akayadonta meso yao, akawamba, "Naiwe inga mzumiiavyo!" 30 Meso yao yakagubulwa. Nee Yesu akawahaza muno, "Mwesekumwamba mntu yoyose mbui inu!"

31 Iya wowo wakalawa na kuambaza mbui zakwe Yesu mwe si ida yose.

Yesu awahonya matuntu waidi

29 Kisingi Yesu na wahina wakwe wekuwaho wakahauka mwe mzi wa Yeliko, zumwezumwe kuu da wantu dikamtongea. 30 Matuntu waidi wekuwao wekaa khandakhanda ya sia, wekusikiaho kuwa Yesu emboka aho, wakatoa mgutio, "Zumbe, Mwana Daudi utifiiye mbazi!"

31 Dia zumwezumwe da wantu dikawaegezea na kuwakunda wanyamae. Iya wowo wakatendesa kutoa mgutio, "Zumbe, Mwana wa Daudi utifiiye mbazi!"

32 Yesu akagooka, akawetanga na kuwauuza, "Mwaonda niwagoswee mbwai?" 33 Wakamtambaisa, "Zumbe, takunda meso yetu yagubuke."

34 Yesu akawafiiya mbazi na kuyadonta meso yao, ahoaho meso yao yakadaha kuona, na wao wakamtongea.

Yesu amhonya mntu tuntu uko Betisaida

22 Yesu akabua mzi wetangwao Betisaida hamwe na wahinyi wakwe. Uko wantu wakamwegaiya mntu tuntu, wakamheembeza amdonte. 23 Yesu akamtoza mkono yuda tuntu na kumlavya chongoi ya mzi. Akamswiia ovu mwe meso, akamwiikia mikono kwe meso na kumuuza, "Wadaha koona chochose?"

24 Yuda tuntu akakauwa na kugombeka, "Naona wantu wakenda inga miti yendayo."

25 Naho Yesu akamwiikia vituhu mikono yakwe mwe meso ya yuda tuntu, naye yuda mntu akafua meso, ne meso yakavuguka, koona kwakwe kukamuuiya akoona kia kintu pwii. 26 Yesu akamwamba aite kaya na kumuemeza, "Naho usekwengia mwe mzi."

Yesu amhonya mntu mwenye kisita kikai na kiziba

31 Yesu ne alawa mwe mihaka ya mzi wa Tilo akemboka gatigati ya Sidoni akaita Dekapoli mana yakwe si ya mizi kumi, kwembokea tondoo da mazi ya Galilaya. 32 Aho wakamwegaiiya mwenye kisita kikai na kiziba, wakamheembeza amuiikie mikono. 33 Yesu akamuusa mwe dia zumwezumwe da wantu, akamgea vyaa mwe magutwi ya yuda mntu, ne aswa ovu mwe vyaa vyakwe na kumdonta mwe ulimi wakwe. 34 Naho akakauwa uwanga, akatoa mhezemuko akamwamba, "Efata," Mana yakwe, "Vuguka."

35 Ahoaho magutwi yakwe yakavuguka na ulimi wakwe ukaegea na kuvoka kutamwiiya vitana. 36 Yesu ne awaemeza wantu wasekumwamba mntu yoyose mbui izo. Akini ekuwaemezavyo ne watendesaho kuziambaza mbui izo. 37 Wantu wose wakahondomaa muno, wakagombeka, "Kagosoa yose matana kawajaiya viziba kutegeeza na mabubu kudaha kugombeka!"

Yesu amhonya Batimayo tuntu

46 Naho wakabua Yeliko, Yesu ekuwaho akahauka mwe mzi uwo na wahina wakwe hamwe na zumwezumwe da wantu, tuntu yumwe etangwaye Batimayo mwana wa Timayo ne kekaa khandakhanda ya sia akaombeza. 47 Batimayo ekusikiaho Yesu Mnazaleti emboka hantu aho, ne avoka kukema, "Yesu! Mwana wa Daudi! Nifiie mbazi!"

48 Wantu wangi wakamwakia na kumwamba anyamae, akini ne aendeea kukema, "Mwana wa Daudi, nifiiye mbazi!"

49 Yesu nee kagooka na kugombeka, "Mwetangeni." Wakamwetanga yuda tuntu, nee wamwamba, "Ekhe moyo! Gooka akwetanga."

50 Akatambika gwanda dakwe, akahauka kinyinyio na kumbasa Yesu.

51 Yesu ne amuuza, "Wakunda nikugosoee mbwai?" Uyo tuntu akamwamba, "Mhinyi, nakunda nione."

52 Yesu akamwamba, "Hita kuzumiiya kwako kukuhonya." Ahoaho akoona, akamtongea Yesu na kuita nae.

Yesu amhonya tuntu

35 Kisingi Yesu ekuwabuwaho hehi na mzi wa Yeliko, neekuwa na mntu yumwe tuntu kekaa khandai ya sia aombeza. 36 Yuda mntu tuntu ekusikiaho mgutio wa zumwezumwe da wantu dikemboka akauza, "Kunani?"

37 Wakamwamba, "Yesu kulawa Nazaleti emboka."

38 Nee alavya mgutio akamba, "Yesu, Mwana wa Daudi, nifiiye mbazi!"

39 Wada wantu wekuwao waongoa hemeso wakamuwakia anyamae. Akini yee akaendeea kulavya mgutio muno, "Mwana wa Daudi, nifiiye mbazi!"

40 Yesu akagooka, akawagiiya wada wantu wamwegae hemeso yakwe. Yuda tuntu ekubuwaho hehi, Yesu akamuuza, 41 "Wakunda nikugoswee mbwai?"

Naye akatambaisa, "Zumbe, nakunda kukauwa."

42 Yesu akamwamba, "Kauwa! Kuzumiiya kwako kukuhonya."

43 Ahoaho uyo mntu tuntu akadaha kukauwa, akambasa Yesu akamtogoa Muungu. Wantu wose wekuonaho ayo, wakamtogoa Muungu.

Yesu amhonya mntu mwekuvyaigwa tuntu

1 Yesu ekuaho akemboka, akamuona mntu yumwe mwekuvyaigwa tuntu. 2 Aho, wahina wakwe wakamuuza, "Mhinya! Ni yuhi mwekugosoa mavigaviga, mntu uyu hambu wavyazi wakwe ata avyaigwe tuntu?"

3 Yesu akawatambaisa, "Mbui inu khayokulawiiya kwaajii ya mavigaviga yakwe wala mavigaviga ya wavyazi wakwe, iya kavyaigwa tuntu ili udaho wa Muungu uoneke ukagosoa ndima umo mwakwe. 4 Kukawa kuke musi takundigwa titendese kugosoa ndima za yuda mwekuniagiiya, mana kio cheza mntu khadaha kugosoa ndima. 5 Kisingi nike mwe inusi, mie ni ung’azi wa inusi."

6 Ekubindaho kugombeka ayo, akaswa ovu ahosi, akagosoa ntope kwa dia ovu, akamsisa yuda tuntu he meso. 7 Akamwamba, "Hita ukesunte cheni he tondoo da mazi da siloamu" mana ya zina idi ni mwekuagiiwa, aho yuda tuntu akaita, akesunta akauya uku aona.

2 Nee eza mntu yumwe mwenye utamu wa nyoka khuu na akamkintia mavindi na kugombeka, "Zumbe ukakunda wadaha kuning’aza!"

3 Yesu akaunyoosha mkono akamdonta na kugombeka, "Nakunda, ng’azika!." Ahoaho mntu uyo akahona utamu wakwe wa nyoka khuu. 4 Naho Yesu akamwamba, "Kauwa, usekumwamba mntu yoyose, iya hita ukeonyeshe kwa mviki na kulavya malavyo inga akwambavyo Musa, na wantu wamanye kuwa kuhona."

2 Aho wakamwetea mntu mwenye kuhooa mwii, kagonezwa mwe javi. Yesu ekuonaho uzumizi wao, akamwamba uyo mntu mwe kuhooa, "Ekhe moyo mwanangu! Kuekewa mavigaviga yako."

3 Naho wamwe wa wahinyi wa miko wakavoka kumamakhanya mwe mioyo yao, "Mntu uyu amdumua Muungu!"

4 Yesu akayamanya wamamakhanyayo, akamba "Kwambwai mwamamakhanya ufyaimi mwe mioyo yenu? 5 Ni dihi dekuhuhado muno, kugombeka, ‘kuekewa mavigaviga, hambu kugombeka, gooka wende?’ 6 Naho, nakunda mmanye Mwana wa Mntu ana udaho mwe inusi ya kuwaekea wantu mavigaviga." Aho akamwamba uyo mntu mwekuhoowa, "Enuka, udoe javi dako uite kaya kwako."

7 Yuda mntu ekuhooae akahauka na kuita kaya kwakwe.

10 Nekuwa na mntu yumwe mwenye mkono wekuhoao. Naho, wantu wakamuuza Yesu, "Kulawana na miko yetu, ivi ni vitana kuohoa mntu Msi wa Kuhumwiiza? Wamuuza ivyo wapate kumuamuiiya masa."

11 Yesu akawamba, "Ni ndai gatigati yenu mwenye ngoto yumwe, na yuda ngoto akengia mwe tubwi Msi wa Kuhumwiiza, ivi khanaamtoze na kumlavya? 12 Nakunda mmanye du, mntu ana yombe muno kusima ngoto! Aho ni vitana kugosoa matana Msi wa Kuhumwiiza." 13 Naho akamwamba yuda mntu, "Unyooshe uwo mkono."

Akanyoosha, nao ukawa mgima inga uda mtuhu.

30 Naho mkwewe da Simoni ya kivyee nee yumwe usazi ni mtamu ana bombom kai, Yesu ekubuaho wakamwamba mbui zakwe. 31 Yesu akamtimia hehi yakwe, akamtoza mkono uyo mvyee, akamwenua na ahoaho homa ikamwekea. Akavoka kuwagosoeya ndima.

Yesu amhonya mntu mwenye utamu wa nyoka

40 Mntu yumwe mwekuwa na utamu wa nyoka akambasa Yesu, akamheembeza na kumkintia mavindi na kumwamba, "Ukakunda, wadaha kuning’aza."

41 Yesu akamwonea mbazi, akenua mkono wakwe na kumdonta. Nee amwamba, "Nakunda, ng’azika! 42 Ahoaho utamu wa nyoka ukamuekea yuda mntu, akang’azika."

3 kisingi ichoicho wantu wane nee wabua wakamwenua mntu yumwe mwekuhooa, wakamwegaa kwa Yesu. 4 Kwaajii ya zumwezumwe da wantu dekumemado, khawekudaha kubua hehi na Yesu. Ivyo wakabovoa hantu ha chusi yekuwayo uwanga ya hantu ekuwaho Yesu, nee waseeza javi da yuda mwekuhooa. 5 Yesu ekuonaho kuzumiiya kwao, akamwamba yuda mwekuhooa, "Mwanangu, kuekewa mavigaviga yako."

6 Wahinyi watuhu wa miko newawa mwe nyumba ida wekaa, wakamamakhanya mwe mioyo yao, 7 "Haikuka mbwahi ata agombeka ivi? Kamdumua Muungu! Khahana mdaha kuekea mntu mavigaviga iya Muungu ikedu!"

8 Yesu akamanya wamamakhanyavyo mwe mioyo yao nee awauza, "Kwa mbwai mwamamakhanya ivyo mwe mioyo yenu? 9 Vyedi ni vihi, kumwamba mntu mwekuhooa, ‘Kuekewa mavigaviga yako’, hambu kugombeka, ‘Enuka wetwike javi dako wende?’ 10 Akini mmanye Mwana wa Mntu ana udaho wa kuekea wantu mavigaviga yao mwe inusi." Nee Yesu amwamba yuda mntu mwekuhooa, 11 "Nakwamba, gooka, wetwike javi dako uite kaya!"

12 Ahoaho wantu wose nee wamkauwa yuda mntu akenuka, na kudoa kilago chakwe, akahauka. Wantu wose nee wahondomaa na kumtogoa Muungu wakamba, "Khatizati kuona katu mbui inga inu!"

Yesu amhonya mntu mwenye mkono wekuhooao

1 Naho Yesu akengia vituhu mwe Nyumba ya kuvikia Wayahudi, nemuwa na mntu mwekuhooa mkono. 2 Umo wantu watuhu wakamgoja amhonye mntu uyo Msi wa Kuhumwiiza ili wadahe kumuahiya masa. 3 Yesu akamwamba uyo mntu mwekuhooa mkono, "Soo aha gooka hemeso ya kia yumwe." 4 Naho akawauza, "Kulawana na miko yetu takundigwa kugosoa mbwai Msi wa Kuhumwiiza? Kuohoa ugima au kukoma?"

Akini wowo khawekuandua dodose! 5 Aho Yesu akawafuiya meso kwa maya, akaugumia, kwaajii ya mioyo yao itogayo. Naho amwamba yuda mntu, "Enua mkono wako!" Naye akenua mkono wakwe, ukatenda mgima vituhu.

Yesu amhonya mntu mwenye utamu nyoka

12 Aho Yesu ekuwaho mwe mzi umwewao, mntu yumwe mwenye utamu wa nyoka mwii mgima Yesu akamwona. Naho, mntu uyo akagonea ifu akamwombeza Yesu, "Zumbe, ukakunda wadaha kuning’aza!"

13 Yesu akenua mkono, akamdonta na kugombeka, "Nakunda, ng’azika!" Ahoaho akahona utamu wa nyoka.

18 Ahoaho wantu wakeza, wamwenua mntu yumwe mwekuhoowa mwii, kagona mwe usazi wakageeza kumwengiza ndani, wamwiike hemeso ya Yesu. 19 Kwaajii ya zumwezumwe da wantu dekumemado, khawokudaha kubua hehi na Yesu. Ivyo wakabovoa hantu ha chusi yekuwayo uwanga ya hantu ekuwaho Yesu, nee waseeza javi da yuda mwekuhoowa. 20 Yesu ekuonaho wekuwavyo na uzumizi mkuu, akamwamba mntu uyo, "Mmbuya kuekewa mavigaviga yako."

21 Wahinya wa Miagiiyo na Mafalisayo wakavoka kweuza wenye, "Nindai uyu atamwiaye mbui zakufuu? Khahana mntu adahae kuekea mavigaviga iya Muungu ikedu!"

22 Yesu akawamanya mamakhanyo zao, akawauza, "Mwamamakhanya mbwai mwe mioyo yenu? 23 Ni dihi dekuhuhado muno Kugombeka, ‘Kuekewa mavigaviga,’ hambu kugombeka, ‘Gooka, uite?’ 24 Naho nakunda mmanye kwaviya Mwana wa Mntu ana udaho wa kuekea wantu mavigaviga mwe inusi." Aho akamwamba uyo mwekuhoowa, "Gooka, doa javi dako, uite kaya."

25 Ahoaho uyo mntu mwekuhoowa akagooka hemeso ya wose, akadoa usazi wakwe akaita kaya kwake uku amtogoa Muungu.

Yesu ahonya mntu mwekuhoowa mkono

6 Msi mtuhu wa Kuhumwiza, Yesu neengia mwe Nyumba ya kukintania Wayahudi, nee awahinya. Mwe nyumba iyo, nekuwa na mntu ambae mkono wakwe wa kuume neuwa uhooa. 7 Wahinya wa miagiiyo ya Muungu na Mafalisayo nee wakoondeza kumkoeya masa Yesu, ivyo wakamkauwa kwa hehi ati endaahonye Msi wa Kuhumwiza. 8 Akini Yesu akamanya mamakhanyi zao, akamwamba yuda mwe mkono wekuhoao, "Enuka, gooka gatigati yao." Yuda mntu akagooka gatigati yao. 9 Naho Yesu akawamba wada Wahinyi wa miagiiyo na Mafalisayo akagombeka, "Nawauza nywie, kulawana na miagiiyo yetu ni dihi tana kugosoa msi wa kuhumwiza, kugosoa mbui ntana hambu kugosoa mbui ya ufyaimi? Kuohoa ugima hambu kuyadagamiza?" 10 Akawafuiya meso phande zose, akamwamba yuda mntu, "Enua mkono wako." Akawenua mkono wakwe ukawa mgima vituhu.

Yesu amhonya mndima wa mkuu wa Lumi

1 Yesu ekubindaho kugombeka mbui yedi kwa wantu, akengia mzi wa Kapelinaumu. 2 Uko nekuwa na mkuu yumwe wa asikai wa Kilumi neekawa na mndima wakwe, neakamkundisa muno. Uyu mndima nekawa mtamu hehi na kuuya na nyuma. 3 Mkuu wa asikai wa Lumi ekusikiaho mbui za Yesu, neawaagiiya wadaa wa Kiyahudi, wakamwombeze eze amhonye mndima uyo wa mkuu wa Lumi. 4 Wekubuwaho kwa Yesu, ne wamhembeeza muno, wakamba, "Mntu huyu afaa kuambizwa, 5 kwaajii yee aikundisa si yetu, na nee mwekutizengea ida Nyumba ya kukintania Wayahudi."

6 Naho, Yesu akaita hamwe nao. Ekuwaho hehi na kubua kwe nyumba ya yuda mkuu wa maasikai, yuda mkuu wa masikai wa Lumi akawaagiiya wambuya wakwe wamwambe Yesu, "Zumbe, usekwepisha muno, kwaviya miye khifaa weye wengie mwe nyumba yangu. 7 Naho miye nchekweona inga nafaa kweza kwako. Akini gombeka mbui du, na mndima yangu enda ahone. 8 Kwamana hata miye uwanga yangu kuna wagookezi, na nenao asikai asi yangu. Nikamwamba yumwe ‘Hita,’ naye aita, nikamwamba mtuhu ‘Soo,’ naye eza. Nikamwamba mndima yangu,, ‘Gosoa idi’ nae agosoa."

9 Yesu ekusikiaho mbui iyo akahondomaa, naho akahitukia diya zumwezumwe da wantu wekuwao wamuondeza akamba, "Nchekuona mwenye uzumizi inga unu mwe wantu wose wa Isilaeli."

10 Naho wada wantu wekuwao waagiiwa kwa Yesu wekuuyaho kaya nee wambwiiya yuda mndima kahona.

11 Na aho ne awa na mvyee yumwe ekuwaye mtamu kwa myaka kumi dimwe na minane, nekawa na zaiko dilimtenda mwii wakwe ne wenama muno hata asekudaha kugooka vitana. 12 Yesu ekumuonaho, akamwetanga akamwamba, "Mmaa, kuhonywa utamu wako!" 13 Nee amuikia mkono na aho akagooka vituhu, akawa amtogoa Muungu.

Yesu amhonya mntu yumwe

1 Msi umwe wa kuhumwiiza, Yesu nee kaita kuda khande nyumbai kwa muongoezi yumwe wa Mafalisayo na wantu wekuwao aho wakawa wamsunguumanya. 2 Hemeso ya Yesu nee hawa na mntu yumwe mwekuwa na utamu wa kumema mwii. 3 Yesu akawauza wahinyi wa miagiiyo na Mafalisayo, "Ivi miagiiyo ya Musa yawakunda kuhonya wantu msi wa Kuhumuiza hambu khivyo?"

4 Akini wowo wakanyamaa. Yesu akamtoza uyo mtamu, akamhonya, akambada aite.

Yesu awahonya wantu kumi dimwe wenye utamu wa nyoka

11 Yesu nee atamba kuita mwe mzi wa Yelusalemu hadi kwe mhaka wa gatigati ya Samalia na Galilaya. 12 Ekuwaho engia mwe mzi umwe wantu kumi dimwe wenye utamu wa nyoka nee wakintana naye, wakagooka kwa hae. 13 Nee wakakema na kugombeka, "Yesu mhinyi, tifiiye mbazi!."

14 Ekuwaonaho akawamba, "Hitani mkeonyeshe kwa waviki."

Naho wekuwaho waita, wakang’azika. 15 Yumwe wao ekuonaho kahonywa, nee auya kwa Yesu uku amtogoa Muungu kwa mgutio mkuu. 16 Nee etambika asi hemeso ya miundi ya Yesu uku amtogoa Muungu. Na mntu uyo nee ni Msamalia. 17 Aho Yesu akauza, "Khiyo wantu kumi dimwe wekung’azwao? Wada kenda wa hahi? 18 Ivi khekuoneka mntu mtuhu ekuuyae kumwekha ntunyo Muungu iya uyu mgeni ikedu?" 19 Yesu akamwamba uyo mntu, "Gooka uite, kuzumiiya kwako kukuhonya."

Yesu amhonya mtu uko Betisaza

1 Yekwembokaho ayo, Yesu akaita Yelusalemu kwe sikukhuu ya Wayahudi. 2 Uko Yelusalemu, hehi na uvi wetangwao uvi wa ngoto, nehawa na tondoo da mazi detangwado kwa kiebulania Betisaza ambado nee dizunguukwa na mabaaza mashano. 3 Aho nehawa na watamu wangi wekaa, matuntu, na wesao kudaha kwenda, na wekuhooawo. Newawa wakagoja mazi yatibulwe. 4 Kwaviya mndima wa uwanga wa Muungu kuna kisingi aseeya na kuyavuuga mazi mwe tindiziwa ido, mtamu yoyose avokae kwengia mwe mazi aho mazi yakatibulwa, ahona utamu wakwe wowose ekuwao nao. 5 Aho, hana mgosi mwekuwa mtamu kwa kisingi cha myaka makumi matatu na minane. 6 Yesu ekumuonaho kagona aho na kumanya kuwa kawa mtamu kwa misi mingi, akamwamba, "Ivi, wakunda kuhona?"

7 Yuda mtamu akamtambaisa, "Zumbe khina mntu wa kunegaa mwe tondoo da mazi kisingi yakatibulwa, kia nikageeza kwengia mntu mtuhu aniongweeya." 8 Yesu akamwamba "Gooka, na doa javi dako wende." 9 Vuupuu uyo mntu akahona, akadoa javi dakwe.

Akavoka kwenda, mbui inu igosoka Msi wa Kuhumwiiza.

46 Yesu akabua vituhu mzi wa Kana uko Galilaya, hantu ekuhituaho mazi na kuwa divai. Nee kuwa na mgookezi yumwe ekuwae na mwana mtamu uko Kapelinaumu. 47 Muongoezi uyo ekusikiaho Yesu kalawa Uyahudi na kubua Galilaya akambasa akamwoombeza aite akamhonye mwanawe mwekuwa mtamu wa kukauwiiwa. 48 Yesu akamwamba, "Mkesekuona utangio na vihii khamna mzumiiye."

49 Uyo Mwoongoezi akamwamba, "Zumbe chondechonde tite mwanangu asekweza kuuya na nyuma."

50 Yesu akamwamba, "Hita mwanao ni mgima."

Uyo muongoezi nee azumiiya mbui za Yesu, akaita zakwe. 51 Ekuaho yu siai, akakintana na wandima wakwe wakamwamba, "Yuda Mwana kindee kahona."

52 Naye akawauza neeiwa saa nyingahi mwana ekuhoneaho, wakamwamba, "Zana saa mfungate wa musi, utamu ukamuweekea". 53 Uyo tati yakwe akakumbuka iwa saa idaida Yesu ekumwambaho, "Mwanao ni mgima." Aho akazumiiya hamwe na nyumba yakwe yose.

54 Unu nee utangio wa kaidi ekugosoao Yesu ekuaho akaawa Uyahudi kuita Galilaya.

20 Kisingi ichoicho, mmaa yumwe, mwekuwa na utamu wa mtuo kwa kisingi cha myaka kumi dimwe na mbii, nee amtongea Yesu kwa nyuma, akadonta msao wa gwanda dakwe. 21 Kwaviya nee kegombekea mwe moyo wakwe, "Nikadonta du gwanda dakwe, nendanihone."

22 Yesu nee ahituka akamwona, akamwamba, "Ekhe moyo biti yangu! Uzumizi wako ukuohoa." Mmaa uyo akahona saa idaida.

25 Aho ne hawa na mvyee yumwe mwekuwa na utamu wa mtuo kwa kisingi cha myaka kumi dimwe na miidi. 26 Mvyee uyo ne kaangadika muno kuita kwa waganga wangi. Na etiho kaza mai zakwe zose, akini khekuona ebae, iya kaendeea kuwa mtamu muno. 27 Naye uyo mvyee ne kasikia mbui za Yesu ne ahenya gatigati ya dia zumwezumwe da wantu. Akamlawiiya Yesu kwa nyuma na kudonta nguo yakwe. 28 Kwaviya ne kegombekea mwe moyo wakwe, "Nikadonta nguo yakwe, nenda nihone."

29 Ahoaho utamu wa mtuo ukanyaa, akeona mwe mwii wakwe kahona utamu wakwe.

43 Kuwa na mvyee yumwe gatigati ya diya zumwezumwe da wantu, nekawa akalawa phome kwaviya nekawa na utamu wa mtuo kwa kisingi cha myaka kumi dimwe na mbii. Naho nekabinda vintu vyakwe vyose kwa waganga, khahana ekudahae kumhonya. 44 Uyo mvyee ne amtongea Yesu nyuma, akadonta msao wa gwanda dakwe. Ahoaho, akahonywa utamu wakwe wakulawa phome. 45 Yesu akauza, "Nndai mwekunidonta?"

Wose wakaemea wakamba khahana mntu ekukudontae. Naye Petulo akamba, "Zumbe, zumwezumwe da wantu wakuikia bunga na kukufintafinta!"

46 Akini Yesu akamba, "Kuna mntu kanidonta, mana khimanya kihinya mntu kwa udaho wangu." 47 Yuda mvyee ekuonaho khadaha kwefisa, akeaviiza huku akakama kwa kuogoha aketambika hemeso ya Yesu. Aho akawamba wantu wose chekumwekacho kumdonta Yesu na kwaviya ekuhonywavyo vuu puu. 48 Yesu akamwamba, yuda mwana kivyee, "Hita kwa uivanisa, kuzumiiya kwako kukuhonya."

Mwana kindee wa Mkuu yumwe na mmaa yumwe wahonywa

18 Yesu ekuwaho akagombeka ayo, mkuu yumwe wa Wakiyahudi neabuwa, akamkintia mavindi na kugombeka, "Mwanangu ya kindee kauya kae na nyuma isasa ivi. Akini tite ukamwikie mkono, nae endaatende mgima."

19 Yesu akahauka akatongeana nae, nao wahina wakwe wakamtongea.

23 Naho Yesu akengia nyumbani kwa yuda mkuu. Na ekuwaonaho wantu wavuzia fiimbi na zumwezumwe kuu da wantu wakatoa bwaimbo, 24 akagombeka, "Haukeni aha! Mndee uyu khekuuya na nyuma, kagonadu." Nawo nee wamseka. 25 Naho, zumwezumwe da wantu dekuuswaho, Yesu akengia mda ndani, akamtoza mkono uyo mndee, nae akenuka.

22 Aho akeza mntu yumwe etangwa Yailo yumwe wa wakuu wa Nyumba ya kuvikia Wayahudi, ekumuonaho Yesu akakinta mavindi hemeso yakwe. 23 Akamhembeeza akamba, "Mwanangu wa kivyee mdodo ni mtamu yu hehi na kuuya na nyuma. Nakuhembeza tite ukamuikie mikono yako adahe kuhona na aendeee kwekaa."

24 Aho, Yesu akahauka hamwe naye. Wantu wangi wakamtongea Yesu na kumfintafinta kia phande.

38 Wekubuaho mwe nyumba ya Yailo, Yesu ne aona wantu waketambikatambika asi wakiiya na kutoa bwaimbo. 39 Yesu ne engia gati, na kugombeka, "Kwa mbwai mwetambikatambika na kuiiya? Mndee khekuuya na nyuma, kagona."

40 Akini wowo wakamseka. Aho akawalavya wose chongoi, akamdoa tati yakwe na mami yakwe da yuda mwana na wahina wakwe watatu, wakengia mwe chumba wekumwikacho yuda mndee. 41 Naho akamtoza mkono, na kumwamba, "Talita, komu," Mana yakwe "Mndee mdodo nakwamba enuka!"

42 Ahoaho mndee yuda akagooka, na kuvoka kuita. Mndee yuda ne kawa na myaka kumi dimwe na miidi. Aho wantu wakahondomaa muno kwa dekulawiado.

31 Yesu akaendeea kugombeka, "Naho, nendaniwaiganize wantu wa kivyazi iki na kintu chani? Ni wantu wa namna yani? 32 Ni inga wabwanga wekwekao gwiiyo na kwambizana, kizumwezumwe kimwe na kituhu, ‘Tiwatoea fiimbi wala khamwekuvina, titoa wiya wa bwaimbwo wala kamwekuiya’ 33 Kwaviya Yohana mbatiiza keza, akehiniza kuda na khekudomea divai, nanywi mkamba, ‘Kakwewa ni mazaiko!’ 34 Mwana wa Mntu keza, ada na kudomea, nanywi mwamba, ‘Mkauweni uyu ni mmeo na mkozi, ni mmbuya wa watoza kodi na wenye mavigaviga!’ 35 Na ivyo, umanyi wa Muungu yamanyika kuwa ni ntana kwa wantu wose waizumiiyao."

Yesu mwe nyumba ya Simoni Mfalisayo

36 Mfalisayo yumwe nee kamgoneka Yesu kuda khande mwe nyumba yakwe. Na Yesu akengia mwe nyumba ya uyo Mfalisayo, na akekaa kuda khande. 37 Naho mwe mzi uda nekuwa na mvyee yumwe mwekuwa na mavigaviga. Ekusikiaho Yesu yuuko mwe nyumba ya uyo Mfalisayo, akadoa nchupa yekugosolwayo na iwe detegwado alabasta yekumemezwayo mavuta matana ya hea nyingi.

41 Aho akeza mntu yumwe zina dake Yailo, muongoezi wa Nyumba ya kukintania Wayahudi, nee etambika he meso ya Yesu, akamhembeeza aite kaya kwakwe. 42 Kwaajii ni mwana waikedu wa kivyee, mwenye myaka kumi dimwe na mbii, nekawa yu hehi na kuuya na nyuma.

Yesu ekuwaho akaita wantu ne wamfintafinta kiya phande.

49 Ekuwaho aendeeya kugombeka, Yailo yuda muongoezi wa nyumba ya kukuntania Wayahudi akaetewa mbui kulawa kaya, "Mwana yako wakivyee kauya kaye na nyuma, usekumpisha Mhinyi."

50 Yesu ekusikiaho ayo akamwamba Yailo, "Usekuogoha zumiiya du, naye endaahone."

51 Ekubuwaho nyumbani kwa Yailo khawekumbada mntu kwengia ndani hamwe naye, iya Petulo, na Yohana, na Yakobo na wavyazi wa mndee uyo. 52 Wantu wose nee wakiiya na kuomboeza kwaajii ya uyo mndee ekuyae na nyuma. Aho Yesu akawamba, "Msekuiiya, kwaajii mwana khekuuya na nyuma, kagona du!"

53 Nawo wakamseka Yesu kwaajii nee wamanya kauya kae na nyuma. 54 Akini Yesu akamtoza mkono akamba, "Mwana enuka!" 55 Muye wakwe ukamuuwiya, vuu puu akenuka, Yesu akawamba wamwekhe khande. 56 Wavyazi wakwe nee wahondomaa, aho Yesu akawaemeza wasekumwamba mntu yeyose aya yekugosokayo.

Ufe wa Lazalo

1 Mntu yumwe etangwae Lazalo, mwenyezi wa Besania, nekawa mtamu. Mntu uyo neakekaa mwe phaamo ya Besania ekuwayo akekaa Maliamu na umbude da Yesu. 2 Maliamu nee yuda mwekumsisa Zumbe mavuta ya mzingo mtana na kumhangusa kwa fii zakwe, Lazalo, kakie nee mwekua mtamu. 3 Ivyo awo waumbude Lazalo, Malia na Masa wakaagiiya mbui inu kwa Yesu "Zumbe, mbuyayo umkundisae ni mtamu."

4 Yesu ekusikiaho ivyo akamba, "Utamu unu khio wa ufe iya wendauwatende wantu wamtogoe Muungu na kwa sia iyo, Mwana wa Muungu viyaviya endaatogolwe."

5 Yesu kawakundisa muno Masa na Malia maumbude da na Lazalo. 6 Yesu ekwembigwaho Lazalo ni mtamu, Yesu akaendeea kwekaa hantu aho ekuaho kwa misi miidi. 7 Naho akawamba wahina wakwe, "Titeni vituhu mwe si ya Yudea."

8 Wahina wakwe wakamwamba, "Mhinyi! Kisingi kijihi chekwembokacho tangia Wayahudi wekukundaho kukukoma kwa maiwe, nawe waonda ukuite uko vituhu?"

9 Yesu akawamba, "Ivi saa za musi khio kumi dimwe na mbii? Naho mntu akenda musi khadaha kwekungwaa kwaviya aona ung’azi wa zua mwe inusi. 10 Akini mntu akenda na kio, ekungwaa kwaviya ung’azi khaumo umo mwakwe." 11 Yesu ekubindaho kugombeka mbui izo, akawamba, "Mmbuya wetu Lazalo kagona akini miye naita nikamwenue."

12 Wahina wakwe wakamwamba, "Zumbe, inga kagona usisiza, endaenuke."

13 Wowo wamamakhanya kuwa kagona usisiza, akini Yesu kamanya kae ati Lazalo kauya na nyuma. 14 Yesu akawamba pwii, "Lazalo kauya na nyuma,

Yesu atwiiza khusi khai

23 Naho Yesu akakwea ngaawa hamwe na wahina wakwe wakahauka wose. 24 Na wekuwaho mwe tambo vuupuu mwe mazimshindo ikalawiiya khusi khai hata mkubwadiso wa mazi ukavoka kugubika ngaawa, iya Yesu nee kagona usisiza. 25 Wahina wakambasa, wakamwenua wakagombeka, "Zumbe, tiohoe tadagamia!"

26 Yesu akawatambaisa, "Kwambwai mwaogoha, nywie wantu wenye uzumizi mdodo?" Ahoaho akenuka akaiwakia ida khusi na mkubwaniso wa mazi twiyani, nee kwatwiiya tui.

27 Wada wantu wakahondomaa na kugombeka, "Uyu ni mntu yevivihi? Hata khusi na mkubwadiso vyamtegeeza!"

15 Zuwa dekuswaho wahina wakwe wakambasa na kugombeka, "Hantu aha khahana wantu wekaisao aha na saa zemboka kae. Agana na awa wantu ili waite mwe mizi wakeguiye khande."

16 Yesu akawatambaisa, "Khawakundigwa kuhauka wekheni nywinywi khande."

17 Iya wao wakamtambaisa, "Tina mabumunda mashano na samaki waidi du."

18 Yesu akawamba, "Nieteyani hanu." 19 Akawakunda wantu wekae asi mwe mani. Yesu akayadoa yada mabumunda mashano na wada samaki waidi, akakauwa uwanga kwa Muungu, akavijaiya na kubendua yada mabumunda aho akawekha wahina wakwe ayo mabumunda na wada samaki, na wahina wakwe wakawekha wada wantu. 20 Wantu wose wakada na kweguta. Aho wahina wakadodoa phuguntio, na wakamemeeza ngahu kumi dimwe na mbii. 21 Wantu wekudao ntaazia yao nee ni wagosi elufu shano kwesiho kutaazia wavyee na wana.

25 Kio, hehi na kucha, Yesu akawatimia wahina wakwe uku enda uwanga ya mazi.

Yesu awekha khande wantu elufu nne

32 Aho Yesu akawetanga wahina wakwe akagombeka, "Nawafiiya mbazi wantu awa kwaajii wawa na miye misi mitatu, naho khawana khande. Khikunda kuwabada waite na saa, wasekweza kugwa msae siai."

33 Wahina wakwe wakamwamba, "Hantu hanu khahana wantu, tendatiipatie kuhi khande ya kuigania wantu wose awa?"

34 Yesu akawauza, "Mnayo mabumunda mangahi?"

Wakamtambaisa, "Tinayo mabumunda mfungate na visamaki vidodo naho ni vicheche."

35 Aho akawamba wada wantu wekae asi. 36 Akayadoa yada mabumunda mfungate na via visamaki vicheche, akamtogoa Muungu, akavibendua, akawekha wahina, nao wakawapangia wada wantu. 37 Wose wakada na kweguta. Wahina wakwe wakaika hamwe phuguntio vya vyekusigaavyo wakamemeeza ngahu mfungate. 38 Awo wekudao nee wawa wagosidu elufu nne kwesaho kutaazia wavyee na wana.

Kuiha kodi ya Nyumba ya Muungu

24 Yesu na wahina wakwe wekubuwaho Kapelanaumu, wadoao kodi he Nyumba ya Muungu wakamwezea Petulo na kumuuza, "Wee, ivi mhinyi yenu khaiha kodi ya Nyumba ya Muungu?"

25 Petulo akatambaisa, "Eehe yee aiha."

Aho, Petulo ekwengiaho mda ndani ya nyumba hata khazati kutamwiiya mbui, Yesu akavoka kumuuza, "Simoni, wee waona viivihi? Maseuta wa inusi wadoa kodi kulawa kwa kinandai? Kulawa kwa wantu wa si yao hambu kwa wageni?"

26 Petulo akatambaisa, "Kulawa kwa wageni."

Yesu akamwamba, "Inga ni ivyo wenye si yao khawakundigwa kuiha kodi. 27 Iya khatikunda kuwasefua moyo, hita mwe tondoo da mazi ukatambike ndoano, samaki wa bosi endaeatozwe mgubue muomo wakwe wenda umbwiiye heya idoe ukaihe kodi yako na yangu."

Yesu aubadia lazi mti wetangwao mtini

18 Keokeo da mtungaihu Yesu ekuwaho auya mwe mzi neekawa na saa. 19 Akoona mtini khandakhanda ya sia, akautimia hehi, akini khekuona tunda dodose iya manidu. Ahoaho akaugombeka uda mtini, "Wesekuvyaa vituhu matunda misi yose!" Aho uwo mtini ukanyaa.

20 Wahina wakwe wekuonaho mbui iyo wakahondomaa, wakamuuza, "Iwa viivihi mti unu wa mtini unyaa kinyio?"

21 Yesu akawatambaisa, "Nawamba kwei, inga mkazumiiya na mkesekuwa na matumatu, mwadaha khio du kugosoa ivyo kwa yada yekugosokanayo kwa unu mtini, iya ata mkawamba muima unu halawe uketambike mwe mazimshindo, inda igosoke ivyo. 22 Na mkazumiiya, dodose mwendado muombeze kwa kuvika, mwenda mwekhigwe."

37 Khusi khai ikaawiya, mkubwaniso wa mazi ikatoa ida ngaawa, nayo ikavoka kumema mazi. 38 Yesu ne yunyuma ya ngaawa, naho kagonea mwe kigonea, wahina wakwe wakamwenua na kumwamba, "Mhinyi kwa mbwai khutipatiiza khuona inga tinda tiuye na nyuma?"

39 Yesu akenuka na kuiwakia ida khusi na kuyamba mawimbi, "Nyamaa! Twiiya!" Ahoaho khusi ikaeka, ne kwatwiiya tui. 40 Yesu akawauza wahina wakwe, "Kwa mbwai mwaogoha? Khamzati kuzumiiya du?"

41 Naho wakaogoha muno, wakauzana wenye, "Uyu nndai? Hadi khusi na mawimbi vyamtegeeza!"

35 Wahina wakwe wakambasa Yesu wakamwamba, "Hantu aha nihe kiwawe na zua daswa. 36 Wabade wantu awa waite mwe minda na mwe mizi ya hehi, wakague khande."

37 Akini Yesu akawatambaisa, "Wekheni nywie khande." Ne wamuuza, "Khuona inga tendatikundigwe tiwe na mshahaa wa mntu wa miongo minane idahe kugua mabumunda na kuwekha wantu wade?"

38 Yesu akawauza, "Mna mabumunda mangahi? Hitani mkakauwe." Wekumanyaho, wakamwamba, "Kuna mabumunda mashano na samaki waidi."

39 Aho Yesu akagombeka na wahina wakwe wawaike wantu vizumwezumwe na kwekaa asi he mani. 40 Ne wekaa mwe vizumwezumwe vya wantu makumi kumi na vizumwezumwe vya makumi mashano. 41 Naho Yesu akadoa yada mabumunda mashano na wada samaki waidi, akakauwa uwanga kwa Muungu, akavijaiya, ne abendua yada mabumunda na kuwekha wahina wakwe wawapangie wantu. Na wada samaki waidi wawapangie wose. 42 Wantu wose ne wada na kweguta. 43 Wahina wakwe wakadodoa phugutio za vyekusigaavyo vya mabumunda na samaki wakamemeeza ngahu kumi dimwe na mbii. 44 Wekudao ida mikate ne wawa wagosi elufu shano.

48 Aho akoona wahina wakwe mwe ngaawa wakepisha kwa kutoa makasia, kwaviya ne wakahigana na khusi. Hehi na kucha, Yesu akawabasa wahina uku enda uwanga ya mazi, akakunda kuwemboka.

49 Akini wekumuonaho akenda uwanga ya mazi, ne wammamakhanya ni mzimu, wakakema. 50 Kwaviya wose wekumuonaho ne waogoha muno. Ahoaho Yesu akagombeka nao, "Twiiyani msekuogoha! Ni mie!" 51 Naho akengia mwe ngaawa wekuwamo na khusi ikatwiiya, wahina wakwe ne wahondomaa muno.

Yesu awekha khande wantu elufu nne

1 Kisingi icho, zumwezumwe da wantu dikakintana vituhu, na khawekuwa na khande. Aho, Yesu akawetanga wahina wakwe akawamba, 2 "Nawafiiya mbazi wantu awa kwaviya wawa na mie kwa misi mitatu, naho khawana khande. 3 Nikawabada waite kaya kwesaho kuda wenda wagwe msae siai, kwaviya watuhu walawa hae."

4 Wahina wakwe wakamuuza, "Hanu he kiwawe tendatikundigwe tipatie kuhi mabumunda ya kuwegusa wantu wose awa?"

5 Yesu akawauza, "Mna mabumunda mangahi?" Wakamtambaisa, "Tina mabumunda mfungate."

6 Aho Yesu akawamba wantu wekae asi, akayadoa yada mabumunda mfungate, akamtogoa Muungu, akayabendua yada mabumunda, akawekha wahina wakwe wawapangie wantu, ne wawapangia. 7 Naho kuwa na samaki wacheche. Yesu akamtogoa Muungu, na kuwekha wahina wakwe wawapangie wantu viyaviya. 8 Wantu wose wakada, na kweguta. Ne wahina wakwe wakadodoa phugutio za khande za vyekusigaavyo na kumemeeza ngahu mfungate. 9 Naho wekudao khande wabua wantu elufu nne, Yesu akabadana nao.

Yesu aubadia lazi mti wa mtini

12 Msi wekutongeao wekuwaho wakauya kulawa Besaniya, Yesu akaumwa nsaa. 13 Aho kwa hae akaona mti umanyikanao kwa zina da mtini wenye mani mangi, ne aubasa aukaue inga enda apate tini. Ekubuaho akaubwiia khauna tini iya manidu, kwaviya kisingi chakwe cha kuvyaa khakizati kubua. 14 Aho Yesu akawamba mtini, "Kuvokea ivyeo hadi misi zose khahana mntu endae ade tini kulawa kwako vituhu." Na wahina wakwe wakaitegeeza mbui iyo.

Mahinyo kulawa mwe mti wa mtini

20 Keokeo da mtungaihu, wekuwaho wakemboka ne wauwona uda mtini unyaa wose hadi kwe sina. 21 Petulo akakumbuka akamwamba Yesu, "Mhinyi, kaua uda mtini wekuubadiao lazi, unyaa!"

22 Yesu akatambaisa, "Mzumieni Muungu." 23 Nawamba kwei mntu akawamba muima unu, ng’oka uketambike mwe mazimshindo naye khana matumatu mwe moyo wakwe, akini akazumiia mbui zose agombekazo zagosoka, enda agosoewe mbui iyo. 24 Kwaajii iyo nawagombekani, mvikaho na kuombeza kintu chochose, zumiani kwamba mkihokea, nacho chenda kiwe chenu. 25 Nyie mgookaho kuvika, mwekeeni kia mntu mwekukubanangia chochose, ili Tati yenu mwe uwanga awaekee masa yenu.

Yesu awetanga wahinyi wa bosi

1 Msi umwe, Yesu ekuwaho kagooka khandakhanda ya tondoo da mazi ya Genesaleti, na wantu wangi newamzunguuka uku wakefintafinta, wategeeza mbui ya Muungu. 2 Akoona ngaawa mbii khandakhanda ya tondoo da mazi. Walowa wa samaki newalawa, wasunta nyavu zao. 3 Yesu akengia mwe ngaawa mwenga yekuwayo ya Simoni, nee amuombeza Simoni aisogeze mwe tondoo da mazi kulawa mpwani, Yesu akahinya zumwezumwe da wantu uku kekaa mwe ngaawa.

4 Ekubindaho kuhinya, akamwamba Simoni, "Yegae ngaawa adi mwekiindi, mkazitambike nyavu mdahe kulowa samaki."

5 Simoni akamtambaisa, "Zumbe titenda ivyo kio kigima khatokuambua kintu, akini kwaviya kugombeka, nenda nizitambike nyavu." 6 Ekubindaho kugosoa ivyo, wakalowa samaki wangi, ivyo nyavu zao zikavoka kudumuka. 7 Wakawetanga wezwao wekuwao mwe ngaawa ntuhu weze kuwaambiza. Wakeza, wakamemeeza ngaawa zose mbii samaki, zikawa hehi na kuzama. 8 Simoni Petulo ekuonaho ayo, akakinta mavindi hemeso ya Yesu akamba, "Hauke he meso yangu ee Zumbe, kwaviya mie ni mwenye mavigaviga!"

9 Simoni hamwe na weziwe wose wakahondomaa kwa ugenyezi wa samaki wangi viya. 10 Viyaviya Yakobo na Yohana, wana wa Zebedayo wekuwao walowa wa samaki weziwe Simoni, Yesu akamwamba Simoni, "Usekuogoha kuvokea isasa wendauwe mlowa wa wantu."

11 Naho, bada ya kuzieta zia ngaawa mpwani, wakabada vyose wakamtongea.

Yesu atwiiza khusi

22 Msi umwe, Yesu nekakwea ngaawa hamwe na wahina wakwe, akawamba, "Tidumuwe ntondoo da mazi tiite adi phande ya kaidi." Naho, wakavoka ntambo. 23 Ekuwaho wakatamba kwa ngaawa iyo, Yesu akagona. Ahoaho khusi khai ikavoka kuvuma, mazi yakavoka kwengia mwe ngaawa, newawa hehi na kudagamia. 24 Wada wahina wakamtimia Yesu, wakamwenua wakamwamba, "Zumbe, Zumbe! Tadagamia!"

Yesu akenuka akaiwakia ida khusi na mkubwaniso wa mazi, navyo vikatwiiya, nee kwatuiiya. 25 Naho akawamba, "Uzumizi wenu u hahi?"

Akini wowo wakatozwa ni umako na kuogoha uku wakagombekana, "Uyu ni ndai, ata agiiya khusi na mkubwaniso wa mazi, navyo vyamtegeeza?"

Yesu atwiiza khusi

22 Msi umwe, Yesu nekakwea ngaawa hamwe na wahina wakwe, akawamba, "Tidumuwe ntondoo da mazi tiite adi phande ya kaidi." Naho, wakavoka ntambo. 23 Ekuwaho wakatamba kwa ngaawa iyo, Yesu akagona. Ahoaho khusi khai ikavoka kuvuma, mazi yakavoka kwengia mwe ngaawa, newawa hehi na kudagamia. 24 Wada wahina wakamtimia Yesu, wakamwenua wakamwamba, "Zumbe, Zumbe! Tadagamia!"

Yesu akenuka akaiwakia ida khusi na mkubwaniso wa mazi, navyo vikatwiiya, nee kwatuiiya. 25 Naho akawamba, "Uzumizi wenu u hahi?"

Akini wowo wakatozwa ni umako na kuogoha uku wakagombekana, "Uyu ni ndai, ata agiiya khusi na mkubwaniso wa mazi, navyo vyamtegeeza?"

Yesu amhonya mntu mwekukwewa ni mazaiko

26 Waendeeya na ntambo, wakabua mpwani ya si ya Wagelasi zekuhakanazo na ntondoo da mazi da Galilaya.

12 Zua dekuswaho, wada wahina kumi dimwe na mbii wakamwiitia na kumwamba, "Wabade wantu waite mwe mizi na mwe minda ya hehi wakaondeze khande na hantu hakugona, kwaviya aha teiho ni mwe nyika."

13 Yesu akawamba, "Wekheni nywinywi khande."

Wakamtambaisa, "Khatina chochose iya mabumunda mashano na samaki waidi. Wakunda swie tikawagwiiye khande wantu wose hawa?" 14 Wekuwaho hada nee ni wagosidu elufu shano.

Naho, Yesu akawamba wahina wakwe, "Wagombekeni wantu wekae kwe mazumwezumwe ya wantu makumi mashano."

15 Wahina wakagosoa inga wekugombekwavyo, wambeni wantu wose wekae. 16 Naho Yesu akayadoa yada mabumunda mashano na wada samaki waidi, akakauwa uwanga kwa Muungu na kumtogoa Muungu, akavijaiya, akabendua, akawekha wahina wakwe wawekhe wantu. 17 Wantu wose wakada na kweguta. Wahina wakadodoa phuguntio za khande, wakamemeeza ngahu kumi dimwe na mbii.