Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
येशुले नेंलोअ अन्ढलाने आसबेलौने
येशु नङंन आहिनज्याऔक नेंलोअ अन्ढलानेले "ऐ दाऊदल ज़ा, घेनजन दया ढासिन्ते" ऐलेस्यु कलिकौयन आछिनछिन लागिऊने। ओ झिमल पसियापाइना ना अन्ढलाने आल्योङ रांऔने। ओटन येशु नकानेजन ऐआढोवने, "ङा आका ऐढुदुङा ऐलेस्यु झेन बिस्वास माढोचिनच्यो?" नकाने ओलजन ऐनेढोव, "औ, प्रभु।" तब येशुले नकानेल म्युउ छुस्यास्यु ऐआढोवने, "झेन बिस्वास अनुसार झेनजन नैजै ग्याताइत्या।" ओटन नकानेल म्युउ रंनौ। येशुले ऐढास्यु नकानेजन कडा चेताउनी आयोवने, "ईका छेन काङ्काईले तासनरत्या।" तर नकाने हिनौने, ओटन नका देसला इलाकाभरि आबाए नेंफैलाहौ।
येशुले नेंलोअ अन्ढलानेजन आसबेलौने
येशु सनर आ सिइयाङ यरीहोङन राहिनज्याऔक, तोलोअ घिन्या रुयाङल हुल ओयाङल छिन्ट लागिवाङ। यमल वङल चुङज्यान्या नेंलोअ अन्ढलाने येशु नका यम हिनज्याऔ, ऐरालज्यान्या नेंथटौ ओटन ऐलेस्यु कलिकौने, "औ प्रभु, दाऊदल ज़ा, घेनजन दया ढासिन्ते।" रुयाङै नानेजन छपक्कै दिङचिन्ते लेस्यु राहप्काहौ, तर नकाने ऐलेस्यु चोएसै कलिकौने, "औ प्रभु, दाऊदल ज़ा घेनजन दया ढासिन्ते।" तब येशु अदिउ ओटन नकानेजन खुल्स्यु ऐआढोवने, "झेन नै झेनचाहिचिनु? ङा झेन नाल्ट नै ढास्याचिन?" नकानेले ओलजन ऐनेढोव, "औ प्रभु, घोन म्युउ फएस्यासिन्ते।" येशुले यीङताए मानिस्यु नानेल म्युउ आछुस्यौने ओटन ओचोएटै नकानेले नेंरङौ ओटन आछिन्ट लागिऊने।
बेथसेदालं येशुले मारङन्या रुजन आसबेलौ
नाल छिन्ट नकाङ बेथसेदा रांवाङ, ओटन रुयाङै तोलोअ मारङन्याजन येशु ल्योङ राहोनौ, ओटन नकाजन छुते ऐलेस्यु बिन्ति रांढोव। तब येशुले ना मारङन्याल कुई कोलोअस्यु नङ्गरलन बाहेर आहोनौ, ओटन नकाल म्युउल ठिल्स्यु नकाल यर्त आकुई नाएस्यु नाजन आगिनौ, "नैति नङ कोबाअ नरङनु?"
ओटन नकाले यादेए खिमस्यु ऐलेऊ, "ङा रुयाङजन ङारङ्ङु नकाङ सिङयाङ मनताइन्या रांबाज्यान्या रङज्याङा।" ओटन येशुले फरि नकाल म्युउल कुई आनाटौ, ओटन नाले चान्यासं आखिमौ, ओटन सोगलै जन्तु छरलङ्गै रङौ तअसिऊ। तब येशुले नकाजन ऐढास्यु झिम आपरिङौ, ईका नङ्गर भितर ताहिनन्।
येशुले भैरा सनर या माछ्योङन्या रुनेंजन आसबेलन्या
टुरोसला पोलन पलिईस्यु येशु सीदोनलन ताइस्यु डेकापोलिस सहरला सान्ढल खार्लन ताइस्यु गालील समुन्दर हिनौ। रुयाङै नङं तोलोअ भैरा सनर तोलोअ माछ्योङन्या वाला रुनेंजन येशु ल्योङ राहोनौ, ओटन ओयाङै नकानेल यर्त कुई नाएस्योवनेते, लेस्यु ओलजन बिन्ति रांढोव। येशुले नकानेजन हुललन अलक्कै पोल लाङस्यु भैरालं नांल कुईसैले आछुउ ओटन ओलं छिन्क माछ्योङन्या वालाल ल्हेल ठिल्स्यु आछुउ। ओटन नमदेए खिमस्यु ल्होन्या सअ हिनस्यु नाजन आढोव, "इफ्फाता," इकाल अर्थ "फएसिन्ते।" ओटन नवाए बेलाई नकाल ना थहौ, ओटन नकाल ल्हेल बन्दन पलाअसिऊ, ओटन नका फत्कारस्यु छ्योङौ तअसिऊ। "तब येशुले ऐलेऊ, ईका काङ्काईजन तापानस्योचिनर" ओमनलेस्यु येशुले नकानेजन आठाकौने। तर ओले ज्वाए तापान्चिन ऐआढोवने, जन भ्याई प्रचार ढाऔ तअसिऊने। रुयाङ भ्याई अचम्म ताइवाङ, ओटन पानौ तअसिवाङ, "इकाले जो आढोव चान्याई आढोव, ओटन नाले भैराजन थएन्या सनर माछ्योङन्याजन छ्योङन्या सक्ति आयोवने।"
येशुले म्युउ मारंनन्या बारतिमैजन आसबेलन्या
येशु सनर आ सिइयाङ यरीहोल रांवाङ, ओटन रुयाङल घिन्या हुल सकाए यरीहोङन रापलिइज्याऔक तिमैल ज़ा बारतिमै, तोलोअ मारङन्या बयानीन्या यमवङल बया नीज्याव। जब नकाले ओ नासरतला येशु ज्या ऐरालज्यान्या आठटौ, तब जोरसै कलिऊस्यु ऐलेऊ तअसिऊ "औ येशु, दाऊदल ज़ा, ङाजन दया ढाङते।"
तब भ्याईले नकाजन सज्याअस्यु छपक्कै दिङन्ते रांढोव। तर नकाजन अझै जोरसं कलिकौ तअसिऊ, "औ दाऊदल ज़ा, ङाजन दया ढाङते।"
तब येशु ठअ अदिउ ओटन ऐआढोवाङ, "नकाजन खुल्चिते।" ओटन नकाङै ना मारङन्याजन ऐलेस्यु रांखुलौ, "गाएगुइ तालेन सोन्ते येशुले नङजन खुलज्याऔ।"
ओटन नकाले आमि बाहेऱ्या खाइटो क्याइस्यु ना जरू सोव ओटन येशुल ल्योङ रांऔ।
येशुले नकाजन ऐआढोव, "नङ नै नरोअनु, ङा न नाल्ट नै ढोङ? ना मारङन्या रुले ऐलेऊ, औ रब्बी, ङा रङौ ग्याडोटङत्या।"
ओटन येशुले नकाजन ऐआढोव, "न यमल बान्ते। न बिस्वासले नङजन सबेल्दुन्वा।" ओटन ओचोएटै नकाले आरङौ ओटन यमल येशुल छिनछिन बाऔ तअसिऊ।
येशुले जर्मिऊकन्ता अन्ढलाजन आसबेलौ
जब येशु बाऔयन आढाज्याऔक तोलोअ आजर्मिऊ कन्ज अन्ढला रुजन आरङौ, आसिइयाङै ओजन रांगिनौ, "रब्बी, काङ्काले पाप आढोव, इकाले सन् इकाल आमा-बौले, ओटन ईका अन्ढला ताइस्यु जर्मिऊ?"
येशुले जबाक आयोवाङ, "न त इकाले पाप आढोव न इकाल आअमा-बौले, तर ऐताइस्यु अन्ढला ताहौ कि ईका रुल जिबनतन परमेस्वरलं सक्तिल काम ग्यारंनत्या। ङाजन परिङन्याल कामयाङ गे लाअकैज ढान्याताहौ। रिउ ताहकन काङ्काईले काम ढाऔ माढुदुरदी। जब समन ङा सङ्सारलं लिज्याङ, तब समन ङा सङ्सारला ज्योति हो?"
येशुले ईका छेन पानस्यु नामल आठिलौ, ओटन ठिलले व्म चरिन्या जाएस्यु नकाल म्युउल आठिइस्याङु। ओटन येशुले नकाजन ऐआढोव, "हिनन्ते सिलोआमला पोखराअल हुर्ते" (सिलोआमल अर्थ हो, परिङसिन्या) नकाले हिनस्यु आहुरौ, ओटन रङन्या ताइस्यु वलौ।
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
तोलोअ कोर लागिन्या आल्योङ रांऔ, ओटन आहाक घुन्डा टिकिस्यु ऐआढोव, "औ प्रभु, नङ चाहिनकन ङाजन सबेलौ ऐदुदुना।" येशुले आकुई पसारस्यु नकाजन आछुउ, ओटन ऐलेऊ, "ङा इच्छ्या ऐढोङा, नङ बेलन्ते।" ओचोएटै नकाल कोर बेलौ। तब येशुले नकाजन ऐआढोव। "काङ्काईजन तापानस्यौर। तर नङ हिनस्यु पुजाउरो ल्योङ थनसिन्ते, ओटन मोशाल आग्या अनुसारला भिटी चराइते, ओटन रुयाङ साची ग्याताहनत्या।"
ओटन रुयाङै चारपाईत वङज्यान्या तोलोअ लुलाजन आल्योङ राहोनौ। येशु नकाङल बिस्वास रङस्यु लुलाजन ऐआढोव, "ऐ ज़ा, साहस ढोते। न पाप छेमा ताइदा।" ब्यबस्थाला शास्त्रीयाङ मध्य ख्वाएले रारांल ऐलेवाङ, "इकाले परमेस्वरलं अपमान ढाज्याया।" येशुले नकाङल बिचार सनस्यु ऐआढोवाङ, "जे दानाङ जे यिङल माचान्या बिचार ढाज्याच्यो? नैताहकन कै ढान्या सजिलो लेऊ, ‘न पाप छेमा ताइदा’ ऐलेन्या सन् ‘सोन्ते ओटन बान्ते’ ऐढान्या? तर रुल ज़ाल पिरथ्बील पाप छेमा ढान्या अढिकार लेया ऐलेस्यु जे सनौ ढुदुचिते।" तब ओले ना लुलाजन ऐआढोव, "सोन्ते, न चारपाई वुरते, ओटन नझिम देए हिनन्ते।" ओटन ना सोव, ओटन आझिमदेए लागिऊ।
नल तोलोअ आकुई राङन्या रु लिज्याऔ। फरिसीयाङ दोस लाइन्या यिङले ओलजन रांगिनौ, "नैति शबाथ छिम्क काङ्काङजन सबेलन्या ठिक लेऊ?"
येशुले नकाङजन आढोवाङ, "जे मध्य तोलोअ जोल भेडा लेऊ, ओटन शबाथ छिम्क ना भेडा खादाल तेहकन, नैति जे नकाजन कोलोअस्यु पाखाल जेमापलिईचिऊ का? भेडातन रु ख्वाए भ्याई येएला लेऊ? नैताइस्यु ब्यबस्था अनुसार शबाथ छिम्क तोलोअले छुट्टैजन भलाई ढान्या चान्याई ताहा।" तब ओले ना रुजन ऐआढोव, "न कुई पसारते।" नकाले कुई आपसारिऊ, ओटन ना कुई छुट्टै मन्जै ताइदा।
सिमोनल माइज्यू आनाएबोरले थलिस्यु रुउज्याऔ, ओटन नाल बारेल ओचोएटै येशुजन रापानस्यौ। ओटन येशु नकाल नेराक रा:स्यु जब नकाल आकुई कोलोअस्यु नकाजन आसचोटौ, तब ना नाएबोरतन बेलौ, ओटन नकाले येशुल सेवा ढाऔ तअसिऊ।
येशुले तोलोअ कुरीजन आसबेलन्या
ओटन तोलोअ कुरी येशु ल्योङ रांऔ, ओटन ओलं सामन्दी घुन्डा टिकिस्यु बिन्ति आढोव "नङ इच्छ्या ढोनकन ङाजन सबेलौ ढुदुना।"
येशुले दया मानिस्यु कुई आपारिउ ओटन नकाजन छुस्यु ऐआढोव, "ङा ऐढाना नङ बेलन्ते।" नवाए बेलाईज नाल कोर बेलौ, ओटन ना बेल्दा।
ओटन चार गोटाले रावुरन्या तोलोअ लुला रोगिजन येशुल लेऊक राहोनौ। तर जब ना रुयाङल हुलले गर्दा येशुल नेराक हिनौ रांमाढुदुऊ, नैताइस्यु नकाङै नाझिमल छाना येशुल सोझा फलाअतन खुलिस्यु, ओलन्जै लुला रोगिजन आचारपाई सकाएज वान्ल रांल्हाटौ। येशुले नकाङल बिस्वास रङस्यु नका लुला रोगिजन ऐआढोव, "ऐ, ज़ा नपाप छेमा ताइदा।" तर नङं ख्वाएयाए शास्त्रीयाङ चुङज्यावाङ, ओटन नकाङ रायिङल ऐटाइन्या यिङज्यावाङ, "ईका रु दानाङ ऐलेस्यु छ्योङ? ईका ता ईस्वरलं बिरोद ढाज्याऔदी, सिरिप तोलोअ परमेस्वरले बाहेक अपुर काङ्का रुले पाप छेमा ढाऔ आढुदुऊ?"
ओटन नकाङ रारांल ऐलेस्यु बिचार ढाज्यावाङ, ऐलेन्या येशुल आत्माले ओचोएटै आसनौ ओटन नकाङजन ऐआढोवाङ, "दानाङ जे जेयिङलन ऐटाइन्या बिचार ढाज्याच्यो? लुला रोगिजन ‘नपाप छेमा ताइदा’ ऐढोङ सन्, ‘सोन्ते, नमी चारपाई छेन्स्यु बान्ते’ ऐढोङ, काङ्का सजिलो लेऊ? ङा जेजन प्रमान यांच्या, तर रुल ज़ाजन पिरथ्बील पाप छेमा ढान्या अढिकार लेया, लेस्यु जे सन्चिते।" तब येशुले ना लुला रोगिजन ऐआढोव, "ङा नङजन ऐढाना, सोन्ते नमी चारपाई छेन्ते, ओटन नझिम देए हिनन्ते।" ना सोव, ओटन ओचोएटै चारपाई छेन्स्यु सोगलै सामन्दी हिनौ। आवाए समन कि, सोगलै अचम्म ताइस्यु, ऐलेऊ तअसिवाङ, कि "गे ऐटाइन्या ता खकै मारङैदी" ऐलेस्यु नकाङै परमेस्वरलं महिमा रांढोव।
येशुले आकुई राङन्या रुजन आसबेलौ
फरि येशु आराधना झिमल हिनौ। नल आकुई राङन्या तोलोअ रु लेऊ। किगर्दाङ शबाथ-छिम्क येशुले नाजन आसबेलौ सन् आमासबेलौ लेस्यु, येशुजन दोस लाहौ नाल्ट रुयाङ काङ्काङ आचेवाल लिज्यावाङ। तब ओले आकुई राङन्या वाला रुजन ऐआढोव, "रुयाङ खार्ल च्याङनते।" ओले नकाङजन ऐआढोवाङ, ब्यबस्थाला नियाम अनुसार "शबाथ-छिम्क भलाई ढान्या ठिक लेऊसन? माचान्या ढान्या, परान जोगाइन्या सन् नास जाएन्या?" नै ठिक लेऊ? तर नकाङ छपक्कै दिङवाङ।
नकाङ यिङला कठोरताले गर्दा दुख मानिस्यु नकाङजन आयिङ चोस्यु चारवर आखिमौ, ओटन नका रुजन ऐआढोव, "न कुई पसारते" नकाले आकुई आपसारिऊ ओटन नाल कुई बेल्दा।
पोखराअला रीले राबेलन्या
ओलं छिन्ट यहूदीयाङल पर्ब लेऊ, ओटन येशु यरुशलेमल हिनौ। यरुशलेमल भेडा-झलापल नेराक पास गोटा थपल्याअ लेन्या तोलोअ पोखराअल री लेऊ, जोजन हिब्रू छिन्ङन बेथस्दा ऐढासिया। ओलं सोगल किसिमला नाएबोरन्याङ, अथाबा अन्ढलाङ, दुन्डाङ, लुलाङ वङज्यावाङ। नकाङ ख्वाए बेला री हुरलुक ले ऐलेस्यु वुइज्यावाङ। दानाङभन्या परमप्रभुल तोलोअ दुतले बेला-बेलाक पोखराअल लांइस्यु री हल्लाइवा, ओटन री छल्किया पाइना जो हादेए रीजिङल पसि, जोमनताइन्या नाएबोर लेकन बै ऐबेल। ओलं तोलोअ अर्तिस बर्सकन आनाएबोरन्या रु लिज्याऔ। येशुले नका लुलाजन ओलं आवङज्यान्या आरङौ, ओटन ल्होन्या समायतन ना आका दशात लिज्याऔ रैस, ऐलेन्या सनस्यु येशुले नकाजन ऐआढोव, "नैति नङ बेलौ नरोअनु?"
लुलाले येशुजन ऐआढोव, "औ, ज्वाएबेला री छल्कि ङाजन रीजिङल लाङन्या काङ्काई ङा रु माल्दी, ङा ङाहिनज्याऔक ङाहादेए छुट्टै रु रील ऐहिन।"
येशुले नाजन ऐआढोव, "सोन्ते, नतान छेन्ते, ओटन बान्ते।" ओचोएटै ना रु बेलस्यु, आतान छेन्स्यु बाऔ। ना दिन शबाथ दिन लेऊ।
ओलं छिन्ट येशु फरि गालीलला काना सहरल रांऔ, जोङ येशुले रीजन अङ्गुर रस आजाटौ। कफर्नहुमलं तोलोअ घिन्या हाकिम लेऊ, जोल ल्हेपाज़ा आनाएबोरस्यु लेऊ। येशु यहूदियालन गालीलल रा:स्यु लेऊ, ऐलेन्या थएस्यु नका येशु ल्योङ हिनौ, ओटन नकाले ङाज़ाजन रा:स्यु सबेलस्याङते ऐलेस्यु येशुजन कफर्नहुम हिनन्या लेस्यु बिन्ति आढोव, दानाङभन्या नकाल ल्हेपाज़ा सिङाई लिज्याऔ। येशुले नकाजन ऐआढोव, जे छक्कै ताइन्या सनर अचम्मला कामयाङ जेमारङौ समन काङन बै बिस्वास ढान्या माल्चिदी। ना घिन्या हाकिमले येशुजन ऐआढोव, "औ, ङाज़ा आमासिऊ हादेए जै ङासं रांन्ते।" येशुले नाजन ऐआढोव, "हिनन्ते, नज़ा जिङदाइ लिज्याया।" येशुले नकाजन आपानन्या बचन ना रुले बिस्वास आढोव, ओटन आयम लागिऊ। ओटन ना आहिनज्याऔक यमलै नकाल नोक्करयाङै नास डोएस्यु नज़ा बान्चिदा ऐलेस्यु रापानस्यौ।
ओटन नकाले बान्दाङजन नका ख्वाए बेलाकन बेलौ तअसिऊ ऐलेस्यु आगिन्वाङ, नकाङै ऐराढोव, "ज्योलाअ लाअका एक बजेकन नाजन नाएबोरले आराहौ।" येशुले ङाजन "न ल्हेपाज़ा बान्चिदा" ऐआढान्या बेलाकन ज्यारैस ऐलेस्यु आबौले आसनौ। ओटन ओल सनर आझिमलाङ सोगलैले बिस्वास रांढोव। यहूदियालन गालीलल रा:स्यु येशुले आढान्या नका दोस्रा अचम्मला काम ताहौ।
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
नवाए बेला बारं बर्सकन जी बगिन्या बेथा लेन्या तोलोअ मेएमा छिन्ङन रा:स्यु ओलं क्वाल टुप्पा आछुउ। दानाङभन्या नकाले आयिङयिङल यिङसिस्यु ऐलिज्याऊ, "इकाल क्वा याएज छुङकन बै ङा ऐबेल्ङा।" येशुले फरअ वलस्यु आब्याटौक ना मेएमाजन आरङौ, ओटन ऐआढोव, "ऐ ज़ा, साहस ढोते, न बिस्वासले नङजन सबेल्दुन्वा।" ना मेएमा नवाए बेलाई बेलौ।
ओटन बारं बर्स हाकन्ज जी बगिन्या वाला तोलोअ मेएमा नल लिज्याऔ। ओटन नाले तबर गुनीयाङ कुईतन घिन्या लेन्यामालन्या दुख आडोटौ ओटन आमि सोगल धनसम्पत खर्च ढास्यु बै नका माबेल्दा तर नका झन्जै माचान्या गतिल हिनस्यु लेऊ। नकाले येशुल चान्याथाई थएस्यु आनाटौ, ओटन ओ रुयाङ हुलल छिन्ङन रा:स्यु येशुल क्वा आछुउ। दानाङभन्या नकाले आयिङ आयिङल ऐलेऊ, "यदि ङा नकाल क्वा, याएज छुङकन बै ऐबेल्ङा।"
ओटन ओबजाक्कै नका मेएमाल जी बगिन्या रुकिसिऊ, ओटन आबुलला रोग आबेलन्या नकाले आसनौ।
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
सिन्या किटी सनर नाएबोरन्या मेएमा नेंबेलन्या
जब येशुले नकाङजन ईका छेन पानस्याज्याऔ, तब बैठअझिमला तोलोअ शासक रांऔ, ओटन ओलजन धोक यांस्यु ऐआढोव, "औ गुरु मेएमा ङाज़ा भाबाअ सिस्यु लेऊ, नङ रा:स्यु नकाल यर्त नकुई नाएते, ओटन नका बान्चिन्या लेया।"
येशु सोस्यु च्याङस्यु आसिइयाङसं शासकलं छिनछिन हिनौ।
ओटन जब येशु शासकलं झिमल ताप्रा:औ, ओले बाङसुली तपन्याङ सनर रुयाङ हुलले चिचच्याबास रालज्यान्या आरङवाङ। येशुले नकाङजन ऐआढोवाङ, "जे बाहेर हिन्चिते, दानाङभन्या किटी सिस्यु माल्दी, रुउज्याऔ दी।" ऐआलेऊक नकाङ शाईवाङ। रुयाङजन बाहेर देए पलिटौरा पाइना ओलं भितरलं पसिऊ, ओटन ना किटील कुई आकोलोकौ, ओटन ना जरू सोव।
आराधना झिमला शासकयाङ मध्य तोलोअ याईरस मिनला रु आल्योङ रांऔ, ओटन येशुजन रङस्यु आखङल फलुप्सिऊ, ओटन ऐलेस्यु भ्याई बिन्ति आढोव, "ङामि इङन्या मेएमा ज़ा सिङाईलिज्याव, नैताइस्यु रा:स्यु नकाल यर्त नकुई नाएते, ओटन ना बेलस्यु जिङदा ग्याताइत्या।" तब येशु नका सकाए हिनौ। तोलोअ घिन्या रुयाङ हुल आछिन्ट लागिऊ, ओटन, रुयाङ आल्योङ रांङालेस्यु थुईसिस्यु वङवाङ।
ओयाङ आराधना झिमला शासकलं झिमल तापवाङ ओटन भ्याई रुयाङ राव्रज्यान्या सनर राचिचच्याइज्यान्या रांरङवाङ। तब भितरलं हिनस्यु येशुले नकाङजन ऐआढोवाङ, "जे दानाङ हल्ला मच्चाईज्याच्यो ओटन दानाङ व्रच्यो? लुल सिस्यु माल्दी, तर नका रुउस्यु लेऊ।" नकाङ येशुल छेन थएस्यु साहौ तअसिवाङ। तब ओले नकाङ सोगलैजन पाखाल आपलिइवाङ ओटन लुलल बौ सनर आअमा ओटन ओलसं लिज्यान्या आ सिइयाङजन ओलसं लाङस्यु जोङ लुल लिज्याऔ, ओङ हिन्वाङ। ओटन लुलल कुई कोलोअस्यु ओले नकाजन ऐआढोव, "तालिता कुमी," जोल अर्थ हो, "ऐ लुल ङा नङजन ऐढाना सोन्ते।" ओटन ओचोएटै लुल सोव, ओटन बावतअसिऊ। ना लुल बारं बर्सला लेऊ। ओटन नवाए बेला नकाङ अचम्मै ताइवाङ।
लाजरसं आसिन्या
लाजरसं मिनला तोलोअ रु आनाएबोरस्यु लेऊ। नका मरियम सनर नकाल आदिदी मार्था बेथानिया नङ्गरला लेऊने। येशु प्रभुजन अत्तर ठिइस्यु आखङल आचेमले सिइस्यान्या मरियम ईकाइ ज्या। इकालै भाई लाजरसं आनाएबोरस्यु लेऊ। आका नेंलोअ दिदीनेंले येशु ल्योङ ऐलेस्यु थाई नेंपरिङौ, "औ प्रभु, जोजन नङ मया नढोनु, नका आनाएबोरज्याया।"
तर आका थएस्यु येशुले ऐलेऊ, "ईका नाएबोरले सिइल मासतापौदी, तर ईका परमेस्वरलं ज़ाल महिमालं नाल्ट हो।" येशुले मार्था, नकाल बैना मरियम सनर लाजरसजन मया ढोवरा, ताहकन बै लाजरसं आनाएबोरज्याऔ ऐलेन्या थएस्यु येशु जोङ लिज्याऔ, ओङ अझ नेंयोअ समन चुङौ। नकाल छिन्ट येशुले सिइयाङजन ऐआढोवाङ, "दे, आब गे फरि यहूदिया वलस्यु हिन्या।" सिइयाङै ओलजन ऐराढोव, "औ प्रभु, भाबाअ यहूदीयाङै नङजन लुङले टुपौ रोअज्यावाङ, ओटन नैति फरि नङ नङै हिन्ना?"
येशुले जबाक आयोवाङ, "नैति लाअ बारं घन्टा माताहौ का? लाअक बारिन्याङ माढुइरदी, दानाङभन्या नकाङै ईका सङ्सारला ज्योति रङरा, तर रिउल डुलिन्याङ धूइसिरा, दानाङभन्या नका रुयाङ ल्योङ रंनन्या माल्दी।" ओलं छिन्ट येशुले नकाङजन ऐआढोवाङ, "गे न्हाए लाजरसं मिऊरुइल परीस्यु लेऊ, तर नकाजन मिऊरुइतन सचोटौ नाल्ट ङा नङ हिन्ङा।" सिइयाङै ओलजन ऐराढोव, "अं प्रभु, नका मिऊरुइल परीस्यु लेकन नका ऐबेला।"
येशुले नकाल आसिन्या बारेल आपानज्याऔक, तर नकाङ मछ्यु मिऊरुइल बारेल पानज्याऔ ऐलेस्यु रायिङौ। येशुले नकाङजन प्रस्टै आपानस्योवाङ, "लाजरसं सिस्यु लेया।
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
येशुले आन्ढीजन आसदिङौ
येशु डोङ्गाल चरियापाइना सिइयाङ आछिनछिन हिन्वाङ। अभिलच्याङन दहल घिन्या आन्ढी लागिऊ, ओटन छालले डोङ्गाजन टुपौ तअसिऊ। तर नवाए बेला येशु म्वाईज्याऔ। सिइयाङ रा:स्यु ओलजन ऐलेस्यु रासोचटौ, "बचाइसिन्ते प्रभु! गे दुबिङा लेदुया।"
येशुले नकाङजन ऐआढोवाङ, "ऐ, अल्पबिस्वासी रुयाङ, जे दानाङ छ्याएज्याच्यो?" तब सोस्यु ओले आन्ढी सनर दहजन आहकारिउ, ओटन आन्ढी शान्त ताहौ। "आका कैताइन्या रु रैस, दानाङभन्या आन्ढी सनर दहले बै इकाल पानन्या मानिरा रैस" ऐलेस्यु नका रुयाङ अचम्मै ताइवाङ।
ओइ ताहापाइनाई येशुल सिइयाङ आल्योङ रा:स्यु ऐराढोव, "आका पोल काङ्काई रु माल्दी नमझ्याङा लेदा। आकाङजन बिदा योंवरते, ओटन इकाङै नङ्गरल हिनस्यु रांनाल्ट ज्यान्या जन्तु ग्यालङरत्या।" तर येशुले नकाङजन ऐआढोवाङ, "नकाङ हिनन्या आबस्यक माल्दी। जे जै इकाङजन ज्याऔ योंचिरते।" नकाङै येशुजन ऐराढोव, "इल गेसकाए पास पाटा भरेई सनर नेंलोअ ङा:स्या जाई लिज्याया।"
तब येशुले ऐलेऊ, "नका सोगल ङाल्योङ होन्चिते।" ओटन येशुले रुयाङजन छील चुङन्या हकुम आयोवाङ, ओटन नका पास पाटा भरेई सनर नेंलोअ ङा:स्या छेन्स्यु नमदेए खिमस्यु परमेस्वरजन धन्याबाद आयोव, ओटन भरेईजन कलाएस्यु सिइयाङजन आयोवाङ, ओटन सिइयाङै रुयाङजन रांयोवाङ। नकाङ सोगलैले ज्यास्यु पटिपन्न ताइवाङ, ओटन सिइयाङै येलन्या बारं घोनफाङ रादुकौ। मेएमाङ सनर लुलयाङ बाहेक ज्यान्याङ याएज जम्मा पास हजार ल्हेपाङ लेवाङ।
छकाल्या तिन बजेकन छ बजेदेए येशु दहला रीयर्त बास्युकने सिइयाङल्योङ रांऔ।
येशुले छुट्टै घिन्या रुयाङ हुलजन आयांइन्या
तब येशुले आ सिइयाङजन आल्योङ खुल्सिऊ ऐआढोवाङ, "ङा ईका रुयाङजन यीङताए मानिङरा दानाङभन्या इकाङ ङासकाए रालज्यान्या तिन दिन ताइदा ओटन इकाङ सकाए ज्यान्या नैज माल्दी। इकाङजन करेटै परिङन्या ङा मापरिङ्ङरदी। मानकन्ता इकाङ यमलै बिहोस ताइरा।" ओलजन आसिइयाङै ऐराढोव, "आवाए घिन्या रुयाङ हुलजन यांऔ नाल्ट ईका नैजमालन्या पोल नवाए धरअसा भरेई गे काङन होनै?"
येशुले नकाङजन ऐआढोवाङ, "जेसकाए ख्वाए गोटा भरेई लेऊ?" नकाङै ऐलेवाङ, साट पाटा भरेई सनर इङइङन्या ङा:स्या।
येशुले रुयाङ हुलजन नामल चुङन्या आग्या आयोवाङ। ओले नका साट पाटा भरेई सनर ङा:स्या होनस्यु परमेस्वरजन धन्याबाद योंवापाइना कलाएस्यु आ सिइयाङजन आयोवाङ, ओटन आसिइयाङै रुयाङजन रांयोवाङ। नकाङ सोगलैले कैस्यु वाङवाङ। ओटन येलन्या चोइलाङ नकाङै साट घोन रादुकौ। मेएमाङ सनर लुलल्याङ बाहेक कैन्याङ चार हजार ल्हेपाङ लेवाङ।
येशु ख्रीस्टले आराधना झिमल तिरो यांन्या बारेल आह्युउन्या
जब येशु सनर आ सिइयाङ कफर्नहुमलं रांवाङ, आराधना झिमल तिरो उठाइन्याङै पत्रुस ल्योङ रा:स्यु ऐलेवाङ, "नैति जे गुरुले तिरो आमाफोकौ?"
पत्रुसले ऐलेऊ, "औ ऐफोअवा।" पत्रुस झिमल पसियापाइना येशुले नकाजन हादेए ऐआढोव, "सिमोन, न बिचार नैलेव? पिरथ्बीला रययाङै तिरो अथाबा तिरो काङ्का ल्योङन रांउठाहौ? रा: ज़ायाङल्योङन सन् अपुऱ्याङ ल्योङन?" पत्रुसले जबाक आयोव, "अपुऱ्याङ ल्योङन," येशुले नकाजन ऐआढोव, "नै ताहकन ज़ायाङले ता छुट ऐडोएर रैस। तर रुयाङ गेसं रायिङताचोत्या ऐलेन्या यिङस्यु दहल हिनस्यु बल्छी होर्ते, ओटन पैला परिन्या ङा:स्या होनस्यु। नकाल याह् नफटौक तोलोअ चान्दील सिक्का डोएना। ओटन ना रएस्यु न नाल्ट सनर ङा नाल्ट नकाङजन तिरो योंवरते।"
येशुले ड्यूल टुङजन आसरापिन्या
तयोअका छकाल्याई यरुशलेम सहरदेए आवलज्याऔक येशु करेव। यमल वङक ओले तोलोअ ड्यूल टुङ आरङौ। ओटन नका टुङ लेऊक रांऔ, तर नकाल ल्हापटा बाहेक अपुर नैज मारङदा। तब नकाजन आढोव, "आब आटनपार नङत खकै शई तासैईत्या" ओटन ना ड्यूल टुङ ओचोएटै राङौ। नका रङस्यु आ सिइयाङ अचम्म मानिस्यु ऐलेवाङ, "ईका ड्यूल टुङ कडाई ओचोएटै राङौ?" येशुले नकाङजन ऐआढोवाङ, "ङा मछ्यु जेजन ऐढाच्या, यदि जेल्योङ बिस्वास लेकन सनर खकै सङ्का माढोच्योकन, ड्यूल टुङजन जोमन जाएसिऊ नवाए याएज माङडी, तर ईका डान्डाजन बै ‘भोइस्यु समुन्दरल तेहन्ते’ ऐढोच्योकन नैजै ताइन्यालेया। यदि बिस्वास ढास्यु प्रार्थनाल जो नीच्यो ना जे डोएन्यालेच्या।"
ओटन ओचोएटै नल घिन्या आन्ढी कोखा आढोव, ओटन रील छालयाङ डोङ्गाल पछरिऊ तअसिऊ, आवाए समन कि डोङ्गाल री फाङताइङा लेदा। येशु ओलजै डोङ्गाल छिन्ङन्ता पोल तोलोअ वूम नाएस्यु आम्वाईज्याऔक, नकाङै ओलजन ऐढास्यु रासोचटौ, "औ गुरुज्यू, गे सिङा गेलन्या नैति नङजन आतिइ मालेव रों?" तब येशु सन्सिऊ ओटन आन्ढीजन आहप्काहौ, ओटन समुन्दरल छालयाङजन ऐआढोव, "शान्त ताहन्ते! दिङन्ते!" ओटन आन्ढी थामिसिऊ ओटन भ्याई हेसाङवाङ। येशुले नकाङजन आढोवाङ, "जे दानाङ आवाए छ्याएच्यो? जेल्योङ अझ बै बिस्वास मालेऊ?" तर नकाङ भ्याईज छ्याएवाङ ओटन रारां छ्योङौ लागिवाङ, "ईका काङ्का? आन्ढी सनर समुन्दरले बै इकाल परीम मानिज्याऔने।"
ओटन जब भ्याई अदलाअ ताहौ, तब आ सिइयाङ आल्योङ रा:स्यु ऐलेऊ तअसिवाङ, "ईका अलक्कै पो लेया, ओटन आब ओइ ताइदा। नकाङजन बिदा योंवरते ओटन नकाङै चारवरङा नङ्गर जिऊल सनर डेराबाराल हिनस्यु रांनाल्ट कोबाअ ज्यान्या ग्यालङरत्या।" तर येशुले जबाक आयोवाङ, "जेईज नकाङजन कोबाअ ज्यान्या योंचिरते।" नकाङै ओजन ऐराढोव "नैति गे हिनस्यु नें सय चान्दील ध्याअले भरेई लाङस्यु नकाङजन ज्यान्या यांन्याङ?" येशुले नकाङजन आढोवाङ, "जे सकाए ख्वाए गोटा भरेई लेऊ? हिनस्यु ब्याएचिते।" ओटन ब्याएबिई ढास्यु ऐलेवाङ, "पास गोटा भरेई सनर नेंलोअ ङा:स्या।"
ओटन येशुले सोगलैजन बाङला पिङन्या छील यर्ल बगाल बगाल ताइस्यु चुङन्या हुकुम आयोवाङ। नकाङ सय-सय सनर पचास-पचासला बगाल ताइस्यु चुङवाङ। येशुले ना पास गोटा भरेई सनर नेंलोअ ङा:स्या आहोनौ, ओटन नमदेए खिमस्यु धन्याबाद आयोव, ओटन ना भरेई कलाएस्यु आ सिइयाङ आयोवाङ, ओटन सिइयाङै नकाङजन राभाअस्योवाङ, ओटन ना नेंलोअ ङा:स्या बै राभाअस्योवाङ। ओटन सोगलैले रांकयौ ओटन पटिपन्न ताइवाङ। ओटन रांकयौ छिन्ङ आसिइयाङै रा:सयलन्या भरेईल कलाए सनर ख्वाए ङा:स्या बारं घोन फाङ रादुकौ। भरेई कैन्या ल्हेपाङ पास हजार लेवाङ।
आसिइयाङै डोङ्गा राचलाइज्याऔक भ्याई दुख राडोएज्यान्या येशुले आरङौ, दानाङभन्या घूईका नकाङल उलत्यादेए ढाज्याव। छकाल्या ताहौ भन्या हादेए रिउला तिन बजे नका समुन्दरल यर्तन बास्यु नेराक रांऔ, ओटन नकाङजन बनाएस्यु हादेए हिन्ङा लेऊ, नकाङै ओलजन समुन्दरल यर्त आबाज्यान्या रङस्यु आका ता भूत दी कान्देए, ऐलेस्यु नकाङ चिचच्याइवाङ। दानाङभन्या ओलजन रङस्यु सोगलै छ्याएस्यु लेवाङ। तब ओचोएटै येशुले नकाङजन ऐआढोवाङ, "गाएगुइ ताछ्याएच्यो ङा दी।" ओटन येशु नकाङ रांलन्या डोङ्गाल चरिस्यु भितरलं रांऔ, ओटन घूईका शान्त ताहौ। ओटन नकाङ भ्याई अचम्म ताइवाङ,
येशुले चार हजारजन आयांइवाङ
नका दिनल फरि तोलोअ घिन्या हुल दुउसिवाङ, तर नकाङसं ज्यान्या जन्तु नैज मालेव। तब येशुले आ सिइयाङजन आल्योङ खुल्स्यु ऐआढोवाङ, "ङाजन ईका हुलल यर्त दया रांऔ, दानाङभन्या इकाङ ङासकाए रालज्यान्या आछिम तिन दिन ताइदा, ओटन इकाङ ल्योङ ज्यान्या नैज माल्दी। ओटन यदि इकाङजन करेटै झिम परिङ्ङरकन थाकिस्यु यमलै बिहोस ताइरा, दानाङभन्या इकाङ तन काङ्का-काङ्काङ लोएङन रा:स्युलेरा।"
आसिइयाङै ओलजन जबाक रांयोव, "आका काङ्काई मालन्या पोल आवाए भरेई काङन होनै, ओटन आकाङ वाङर?"
येशुले रांजन आगिन्वाङ, "जेल्योङ ख्वाए गोटा भरेई लिज्याऔ?" ओयाङै ऐलेवाङ, "साट पाटा भरेई" ओटन येशुले हुलजन नामल चुङन्या हुकुम आयोवाङ, ओटन ओले साट पाटा भरेई आकुईत हिनस्यु धन्याबाद यांस्यु आकलाटौ, ओटन आसिइयाङजन यांस्यु ऐआढोवाङ, कि नकाङल हाल नाएस्योचिरते। ओटन नकाङै रुयाङल हाल रानाएस्योवाङ। ओटन सिइयाङ ल्योङ इङइङन्या ङा:स्यायाङ तचिइ ठक्क लेऊ, ओटन धन्याबाद यांस्यु ओ बै नकाङल हाल नाएन्या आग्या आयोवाङ। ओटन रुयाङ कैस्यु वाङवाङ, ओटन कैस्यु रा:सयलन्या कलाएयाङ साट वटा घोनल फाङ रासिमौ। नङं छ्योअछ्योअ चार हजार ल्हेपाङ लेवाङ।
येशुले ड्यूजन सराप आयांन्या
छिन्काछिम येशु आ सिइयाङसं बेथानियाङन राराज्याऔ बेला येशु करेव। ओटन लोएतन ल्हापटा कै ल्हापटा लेन्या तोलोअ ड्यूल टुङ रङस्यु किगर्दाङ नकाल किगर्दाङ आजाए डोएसिऊसन लेन्या यिङस्यु हिनौ, तर नङं तापा पाइना येशुले ड्यूलटुङल ल्हापटायाङ बाहेक अपुर नैज माडोएदा, दानाङभन्या नकाए बेला शैन्या साहा माङडी। तब येशुले ड्यूल टुङजन ऐआढोव, "आब आटनपार काङ्काईले नजाए ताज्योरत्या।" ओटन ईका आपानौ बेला आसिइयाङै राथटौ।
राङन्या ड्यूल टुङ्ङन छेन ह्युउसिन्या
तयोअका छिम्क छकाल्या ओङंन पहेलाकाई यम ताइस्यु हिनज्यावाङ, ओयाङै नका ड्यूल टुङजन रिंनङन जै पुरै आराङज्यान्या रांरङौ। ओटन पत्रुसजन हाका छिम्का छेन यांका रांऔ, ओटन नाले येशुजन आपानस्योव, "औ गुरु, खिम्ते नङ सराप नयांन्या ड्यूल टुङ ता राङदा रैस।"
येशुले सिइयाङजन जबाक यांस्यु ऐआढोवाङ "परमेस्वरतं बिस्वास नाएचिते। ङा जेजन मछ्यु ऐढाच्या, यदि काङ्काङै रायिङल सङ्का माढास्यु ङायिङन्या पुरा ऐताहा लेस्यु बिस्वास ढास्यु ईका डान्डाजन ‘भोइस्यु नङ समुन्दरल तेहन्ते’ ऐढोवकन, नकाल नाल्ट नैज ताइन्यालेया। ऐताइस्यु ङा जेजन ऐढाच्या, प्रार्थनात जो नीच्यो ना डोएस्यु लेच्या, ऐलेन्या बिस्वास नाएचिते, ओटन ना जेमिई ताहा। जब जे प्रार्थना ढान्याल नाल्ट च्याङच्यो, तब काङ्काङै बिरोदल जेमि कोबाअ छेन लेकन छेमा नीचिते, ताकि स्वर्गल लिज्यान्या वाला जे बौले जेअपराद छेमा ग्याढोउत्या।
काना सहरल ब्याहा
तिस्रा दिन छिम्क गालील प्रदेसला काना सहरल तोलोअ ब्याहा लेऊ। येशुल आअमा मरियम ओलं लिज्याऔ। येशु सनर आसिइयाङजन बै ब्याहाल रांखुल्वाङ। अङ्गुरल रस आखेमौ छिन्ट, येशुल आअमाले ओलजन ऐआढोव, "नकाङ ल्योङ अङ्गुरल रस खेम्दा।" येशुले आअमाजन ऐआढोव, "औ स्त्री, ङा नै ढान्याताहौ ङाजन ऐताढाङ। ङा बेला अझै मारांडी।" ओलं आअमाले काम ढान्याङजन ऐआढोवाङ, "जे नकाले आपरिमन्या अनुसार ढोचिते।" आब यहूदीयाङल चोखाइन्या चलन अनुसार नल छ्योअ त सय लितर सुनन्या लुङल छ गोटा घारीयाङ नाएसिन्या लेऊ।
येशुले नोक्करयाङजन ऐआढोवाङ, "घारीयाङ री ले आयां समन फाङजाएचिते।" नकाङै घारील आयां समन रीले फाङ रांजाटौ। येशुले नकाङजन ऐआढोवाङ, "तचिठक्क री वापस्यु ब्याहाला मुख्या सेर ल्योङ लाङस्योचिते।" नकाङै ना रा:लाङस्यौ। ब्याहाला सेरले ना री आदारौ, जो आब अङ्गुर रस ताइस्यु लेऊ। ना, काङन राहोनौ नाजन थाहै माताइदा, तर री रेंपन्याङजन याएज थाह लेऊ। तर ब्याहाला मुख्या सेरले दुलाहाजन खुल्स्यु ऐआढोव। "ख्वाए रुयाङै हादेए चान्या अङ्गुर नुम्सिन्या पारिरा ओटन रुयाङै तबर रांओव छिन्ट माचान्या अङ्गुर नुम्सिन्या योंरा। नङ ता अझ समन चान्याई अङ्गुरल रस नुम्सिन्या नाएस्यु नल्नुरैस।" ओले अचम्मला कामयाङ ङन ईका पहेला अचम्मला कामयाङ येशुले गालील प्रदेसला काना सहरल आढोव। ऐलेस्यु ओले आमहिमा आथनौ, ओटन आसिइयाङै ओजन बिस्वास रांढोव।
येशुले नाजन बिचारस्यु ऐआढोव, दानाङभन्या ओलं जो ढोङा लिज्याऔ, ना ओलजन थाह लेऊ।
फिलिपले ओलजन जबाक आयोव, "सोगलैजन तचिचिइ यांसिरकन बै नें सय चान्दील सिक्काल भरेईले नकाङजन योअन्यामाल्दी।" येशुल सिइयाङ्ङन तोलोअ, सिमोन पत्रुसलं भाई अन्द्रियासले ऐलेऊ, "आल तोलोअ केटा लिज्याऔ, नासकाए तामल पास गोटा भरेई सनर नेंलोअ ङा:स्या लिज्याऔ। तर आवाए पुरैल नाल्ट नवाएले नै योक का?" येशुले नकाङजन ऐआढोवाङ, "रुयाङजन चुङौ परिङरचिते।" ना पोल भ्याई छी लेऊ। ओटन ओलं छ्योअ पास हजार ल्हेपाङ चुङवाङ। तब येशुले भरेई आहोनौ, ओटन परमेस्वरजन धन्याबाद आयोव ओटन चुङन्याङजन राभाअस्योवाङ, ओटन नैलेस्युई ङा:स्या बै राभाअस्योवाङ नकाङै राचाहिन्या याए रांकयौ। ओटन जब नकाङै भन्दिउ भरि वाङस्यु रांकयौ, येशुले आसिइयाङजन ऐआढोवाङ, यलन्या "आकलाए दुउचिते, ओटन नैज खेर ताटाइत्या।" नकाङ कैस्यु रा:सयलन्या ना तामल पास गोटा भरेईल टुक्राङ रादुकौक बारं घोन फाङताहौ।
पास-छ किलोमिटर डोङ्गा हादेए आहिनौ छिन्ट नकाङै येशुजन समुन्दरलयर्त बास्यु डोङ्गाल नेरा आरांज्यान्या रांरङौ, ओटन नकाङ छ्याएवाङ। तर येशुले नकाङजन ऐआढोवाङ, "ङा दी, ताछ्याएच्यो।" नकाङै ओलजन हेसाङस्यु डोङ्गाल रासचुनौ, ओटन नकाङ राहिनज्यान्या पोल डोङ्गा ओचोएटै ताप्रा:औ।
येशु साट जना सिइयाङ ल्योङ आरंनन्या
नकाल छिन्ट सिइयाङ ल्योङ तिबेरियास समुन्दरल लेऊल येशुले फरि आ सिइयाङ ल्योङ रंनौ। फिरि बै ओलझन्जै ऐलेस्यु आथनौ। सिमोन पत्रुस, दिदुमस ऐढासिन्या थोमा, गालीलला काना सहरला नथानेल, ओटन जब्दियाल नेंलोअ ल्हेपाज़ानें सनर आसिइयाङ्ङन अपुर नेंलोअनें बोलोङ लेवाङ। सिमोन पत्रुसले नकाङजन ऐआढोवाङ, "ङा ङा:स्या ङासएनाज्याङु।" सिइयाङै ओलजन ऐराढोव, "गे बै नङसं रांया।" नकाङ हिनस्यु डोङ्गाल चरीवाङ, तर ना रिउ नकाङै नैज माकोलोदुरा। छकाल्या ताइङा आलिज्याऔक, येशु आवङल च्याङौ। तर सिइयाङै नका येशु जै ज्या ऐलेस्यु माशईदुरा। येशुले नकाङजन ऐआढोवाङ, "बालअयाङ, जेसकाए ङा:स्या ख्वाए लेऊ?" नकाङै ओजन जबाक रांयोव, "माल्दी।"
ओले नकाङजन ऐआढोवाङ, "जाल डोङ्गाल दाइन्यादेए होरचिते, ओटन डोएचिरा।" तब नकाङै जाल राहोरौ, ओटन ङा:स्यायाङ वुरले गर्दा नकाङै जाल च्योङौ रांमाढुदुऊ। येशुले मया आढान्या सिइले पत्रुसजन ऐआढोव, "नका ता प्रभुदी रैस।" "नका ता प्रभु रैस" ऐआलन्या थएस्यु सिमोन पत्रुसले आमि बाहेरङन्ता क्वा कम्बरत आमलिङौ, दानाङभन्या नकाले आक्वा फिरस्यु लेऊ, ओटन रील जोकौ। अपुर सिइयाङ डोङ्गालै चुङस्यु ङा:स्या लेन्या जाल च्योङस्यु च्योङस्यु रांज्यावाङ। नकाङ आवङतन लोए मालेरदी, छ्योअ सय मिटर याए त लेवाङ। जब नकाङ आवङल लाइवाङ, तब नकाङै फिलङ्गाल भुबराल ङा:स्या सनर भरेई हिप्सिज्यान्या रांरङौ। येशुले नकाङजन ऐआढोवाङ, "जे भाबाअ जेकोलोअन्या ङा:स्यातन तचियाए होन्चिते।" तब सिमोन पत्रुस डोङ्गाल चरिस्यु तसय तिरपन्न गोटा घिन्या-घिन्या ङा:स्याले फाङताइन्या जाल पाखाल च्योङस्यु आहोनौ, तर आवाए भ्याई लेस्यु बै जाल माचिइदा।
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
येशुले रोमी कप्तानल नोक्करजन आसबेलन्या
जब येशु कफर्नहुम सहरल हिनौ तोलोअ कप्तान आल्योङ रा:स्यु बिन्ति ढास्यु। नकाले ऐलेऊ, "औ प्रभु, ङा नोक्कर लुला ताइस्यु भ्याईज दुख डोएस्यु झिमलै थाला परीस्यु लेया।"
येशुले कप्तानजन ऐआढोव, "ङा रा:स्यु नकाजन सबेल्ङा।"
तर कप्तानले ऐलेऊ, "औ प्रभु, ङाझिमल नङजन स्वागत ढान्या लायकला ङा मालेङदी, तर नङ बचन याएज छ्योङस्याङते, ओटन ङा नोक्कर बेलन्यालेया। दानाङभन्या ङा बै अढिकारीयाङल न्युउल लिज्याङा, ओटन ङा न्युउल सिपाइयाङ लेरा, ओटन ङा तोलोअजन ‘हिनन्ते’ ऐढोङा, ओटन ना हिना, ओटन छुट्टैजन ‘रांन्ते’ ऐढोङा ओटन ना रांया। ङा सेवाऱ्याजन ऐटाइन्या ढोते, ऐढोङा, ओटन नकाले ना ढोवा।"
नकाल छेन थएस्यु येशुले अचम्म आमानिउ! ओटन आछिनछिन रांन्याङजन ऐआढोवाङ, ङा मछ्यु, जेजन ऐढाच्या, इस्राएललं बै आवाए घिन्या बिस्वास ङा डोएस्यु मालेङदी। ङा जेजन ऐढाच्या, पुर्ब सनर पच्छिमङन तबर जना रांन्या लेरा, ओटन अब्राहाम, इसहाक सनर याकूबस स्वर्गला राज्यल भोसलं चुङन्या लेरा। तर इस्राएल राज्यला सन्तान बाहेरला चिऊन्याल क्याइसिरा। नङं रुयाङ व्अरन्या लेरा ओटन ह्वा ज़िङ कैन्यालेरा। तब येशुले कप्तानजन ऐआढोव, "हिनन्ते, नङ जोमनताइन्या बिस्वास नढोनु, नङजन ओमनजै ग्याताईत्या।" तब नका नोक्कर नवाए बेलाई बेलौ।
दुस्टआत्मा लागिन्या नेंलोअ रुनें
जब येशु दहल हुदिफन्ट गदरिनीयाङल प्रदेसलं रांऔ, तब दुस्टआत्मा लागिन्या नेंलोअ रुनें ऊईलन नेराज्याऔक ओलसं डोएसिऊने। नकाने आवाए छ्याइला लेऊने, कि काङ्काई बै नलन रांऔ हिनौ माढुदुज्यावाङ। नकाने ऐलेस्यु चिचच्याहौने, "औ परमेस्वरलं ज़ा, नङ घेनङन नै नरोअनु? नैति नङ घोन बेला आमाताहौङन घेनजन सजाय नयांरासिनु?" नकानेतन तचिइ लोएत वोअयाङल तोलोअ घिन्या बगाल लाज्यावाङ। दुस्टआत्माङै ओलजन ऐढास्यु बिन्ति रांढोव, "यदि नङ गेजन पलिइसिनकन, गेजन वोअयाङल बगालल परिङसिन्ते।" ओटन येशुले नकाङजन ऐआढोवाङ, "हिन्चिते।" तब नकाङ पलिईस्यु वोअयाङल पसिवाङ, ओटन वोअल सोगलै बगाल ओरलालन हुर्रिस्यु, दहला रील बुदिस्यु सिवाङ। वोअयाङ छाज्यान्याङ ढोङस्यु सहरल हिन्वाङ ओटन ना दुस्टआत्मा लागिन्यानेजन कैताहौ सोगल रापानस्योवाङ। तब सोगल इलाकाला रुयाङ येशु सकाए डोएसिरावाङ, ओटन ओलजन रङस्यु रुयाङै नकाङल पोलन हिनन्ते ऐलेस्यु ओलजन बिन्ति रांढोव।
येशुले लाताजन आसबेलन्या
जब ओयाङ पलिईस्यु हिनज्यावाङ, तब दुस्टआत्मा लागिन्या तोलोअ छ्योङौ माढुदुन्या रुजन येशु ल्योङ होन्सिऊ। भूत पलिइवापाइना नका लाटा छ्योङौ। ओटन "इस्राएलतं ऐटाइन्या खकै मारङसिदी" ऐलेस्यु रुयाङ हुल अचम्मै ताइवाङ।
येशु सनर बालजिबुल
तब येशु ल्योङ तोलोअ भूत लागिन्या रु जो अन्ढला सनर लाटा लेऊ। ओले नकाजन आसबेलौ, आवाए समन कि, ना लाटा रु छ्योङन्या सनर रङौ तअसिऊ।
कनानी मेएमाल बिस्वास
तब येशु नलन पलिईस्यु टुरोस सनर सीदोनला इलाकादेए हिनौ। नका इलाकालन तोलोअ कनानी मेएमा रा:स्यु कलिऊस्यु ऐलेऊ, "औ प्रभु, दाऊदल ज़ा, ङाजन दया ढाङते। ङाज़ाजन दुस्टआत्माले भ्याई दुख यांज्याऔ।" येशुले नकाजन नैज जबाक मायोदा। आ सिइयाङ रा:स्यु ओलजन बिन्ति रांढोव, "इकाजन परिङते, दानाङभन्या नका व्रस्युव्रस्यु गेछिनछिन रांज्याया।"
येशुले ऐआढोवाङ, "ङाजन इस्राएलला मांन्या भेडाङलं नाल्ट परिङसिऊ हो।" तर नका मेएमा रा:स्यु आहाक घुन्डा टिकिस्यु ऐआढोव, "औ प्रभु, ङाजन व्टङते।"
येशुले ऐलेऊ, "लुलल्याङल भरेई होनस्यु कांयाङजन क्याइस्यान्या ठिक माल्दी।" नका गैरयहूदी मेएमाले ऐलेऊ, "औ प्रभु, तर कांयाङ बै ता रांखसमलं देस्कतन तेइन्या भरेईल चोइलाङ कैरा सा।"
तब येशुले नकाजन जबाक आयोव, "ऐ स्त्री, न बिस्वास घिन्या लेऊरैस। नङ इच्छ्या नढान्या मन्जै ग्याताइत्या।" नकाल मेएमा आज़ा नवाए बेलाई बेल्दा।
येशुले भूत लागिन्या केटाजन आसबेलौ
जब येशु सनर आ सिइयाङ रुयाङ हुल लेन्या पोल ताप्रांरापाइना तोलोअ रुले आल्योङ रा:स्यु घुन्डा टेकिस्यु ऐलेऊ, "औ प्रभु, ङा ज़ाजन दया ढोते, दानाङभन्या नका चरिफाई लागिस्यु बअ दुख डोएज्याऊ। नका खयाङ्क मील परिया, खयाङ्क रील बुदिया। ङा नकाजन न सिइयाङल्योङ ङाहोन्ङु, तर नकाङै सबेलौ रांमाढुदुऊ।"
तब येशुले आढोवाङ, "ऐ अल्प बिस्वासीयाङ सनर भ्रस्ट पुस्ताङ, खक समन ङा जेसकाए लिज्याङ का? ङा जेजन खक समन सहिच्यो? नकाजन अदेए ङालेऊदेए होन्चिते।" जब नाजन येशुल ल्योङ राहोनौ, तब नकात लेन्या भूतजन आहकारिउ ओटन नका केटातन पलिईस्यु हिनौ, ओटन नका ओचोएटै बेलौ।
नकाए बेला नका यहूदीयाङ आराधना झिमल तोलोअ रु लेऊ, जोल्योङ दुस्टआत्मा लेऊ, ओटन ओ भ्याई जोर जोरसै चिचच्याइज्याऔ। "औ नासरतला येशु, गे ङन नै नचाहिनु? नैति नङ गेजन नस्ट नजाएरानु? ङा नङजन ऐशईना, नङ परमेस्वरलं पबित्र रु ज्या।"
येशुले नाजन ऐलेस्यु आसज्याकौ, "छपक्कै दिङन्ते, ओटन नका ल्योङन बाहेर देए पलिहन्ते।" नका रुजन लछार पछार जाएस्यु ना दुस्टआत्मा चोएसै कलिऊस्यु नका रु ल्योङन पलिईस्यु हिनौ।
येशुले भूत लागिन्या रुजन आसबेलन्या
ओटन येशु सनर आ सिइयाङ समुन्दरल हुदिफन्ट गेरासेनस मलुउलं रांवाङ। येशु डोङ्गालन ओचोएटै बाहेर पलिहौ, ओटन सिन्या रुयाङल ऊईलन तोलोअ अशुद्दआत्मा लेन्या रु येशुसं डोएसिऊ। नका ऊईजिऊलै चुङज्याया। ओटन काङ्काईले नाजन साङ्गलले समेत पोअस्यु नाटौ माढुदुरदी। दानाङभन्या नकाजन तबर पाला हटकरी सनर साङ्गलले पोअसिऊ, ओटन बै नकाले साङ्गल चेईस्यु कलाए-कलाए आजाटौ, काङ्काईले नकाजन कायम जाटौ माढुदुज्यारदी। नका सदाई लाअ रिउ ऊईजिऊल सनर डान्डा जिऊल कलिकौयन ओटन ओलं ओलझन्जै लुङले टुप्सिस्यु घाइत्या जाएवा। ओटन जब नाले येशुजन लोएतन आरङौ, तब चोएस्यु रा:औ, ओटन येशुजन घुन्डा टिकिस्यु ढोक आयोव। ओटन घिन्या ग़ाले चिचच्याइस्यु ऐलेऊ, "औ, सर्बोच्च परमेस्वरलं ज़ा येशु ङाजन नङसं नै काम? नङ ङाङन नै नचाहिनु? परमेस्वरलं मिनतन ङा नङजन बिन्ति ढाना नङ ङाजन दुख तायाङ।" (दानाङभन्या येशुले नकाजन ऐआढोव, "ऐ अशुद्दआत्मा नका तन पलिईस्यु हिनन्ते") ओटन येशुले नकाजन आगिनौ, "न मिन नैति?" नकाले येशुजन आढोव, "ङा मिन ता फौज दी, दानाङभन्या गे भ्याई लेई।" ओटन दुस्टआत्माङै येशुजन पालै पाला बिन्ति रांढोव, गेजन ईका पोलन तापलिइसिन। नला नेराका डान्डाल वोअयाङल तोलोअ घिन्या बगाल लाज्यावाङ। ओटन नका दुस्टआत्माङै ऐलेस्यु येशुजन बिन्ति रांढोव, "गेजन वोअयाङल ल्योङ हिनौ यांसिन्ते, ओटन गे नकाङल जिङल पसिया।" तब येशुले नकाङजन हिनन्या अनुमति आयोवाङ, ओटन ना दुस्टआत्माङ बाहेर पलिईस्यु वोअयाङ जिङल पसिवाङ, ओटन छ्योअ नेहजार वोअयाङल बगाल ओरलालन हुर्रिस्यु समुन्दरल तेइवाङ ओटन बुदिस्यु सिवाङ। नका वोअयाङ छान्या वालाङ ढोङस्यु, बजार सनर नङ्गरल हिनस्यु रांपानौ। ओटन ईका नैति ताहौ, ना ब्याटौ नाल्ट रुयाङ नल रांवाङ।
तर जे ऐलेच्या, कि यदि काङ्काङै आबौ या आअमासं ऐले। जो-ज्वाए नङजन ङा ङाव्एनु नका बलि ज्या (नकाल अर्थ ना परमेस्वरजन चराहौमन) ज्या, नैताहकन नाजन आअमा या आबौल नाल्ट फरि नैज सेवा ढाऔ मायोचिदी। ऐलेस्यु जे ढास्यु जेरांन्या, चलनङजन कायम नाएस्यु परमेस्वरलं बचनदेए यिङ मायोचिदी। ओटन ऐटाइन्याई कामयाङ ढोच्या।"
रुजन जुठुउ जाएन्या छेन
तब येशुले रुयाङल हुलजन आल्योङ खुल्स्यु नकाङजन ऐआढोवाङ, "जे सोगलैले ङा छेन थएचिते ओटन बुजिचिते। ऐटाइन्या नैज जन्तु माल्दी बाहेरलन भितर पसिस्यु जो रुल भितर कोलोअस्यु अशुद्द जाएन्या, तर रुङन बाहेर पलिईन्या छेनलेईज रुजन अशुद्द जाएवा।
सिरिया-फोनिकेला मेएमाल बिस्वास
फरि येशु नङंन सोस्यु टुरोस सनर सिदोनल सान्ढल हिनस्यु, तोलोअ झिमल पसिऊ। ओटन ईका छेन काङ्काईले तासनरत्या ऐलेऊ, तर ओलजै मोअसिऊ माढुदुडा। ना बेला तोलोअ मेएमाले आबारेङन थएस्यु आनाटौ, ओटन नका रा:स्यु येशुल खङल धोक आयोव, दानाङभन्या नकाल मेएमाआज़ाल ल्योङ दुस्टआत्मा लेऊ। ना ग्रीक मेएमा ओटन सिरियाल फोनिकेला पोल जर्मिन्या हो, नाले येशु सकाए ऐलेस्यु बिन्ति आढोव, कि मेएमा ङाज़ा ल्योङन दुस्टआत्मा पलिइस्योते। येशुले नाजन जबाक आयोव, "पहेला लुलल्याङजन वाङौ योंवरते, दानाङभन्या ईका ठिक माङडी लुलल्याङ भरेई न्हानस्यु कांयाङजन क्याइस्यान्या ठिक माङडी।" तर नकाले येशुजन ऐआढोव, "औ, प्रभु, तर कांयाङै बै ता लुलल्याङै टेबल न्युउ रा:सतेईन्या टुक्राङ कैरा सा।" येशुले नकाजन ऐआढोव, "नङ ऐनलेऊकाले ज नझिम हिनन्ते। न ज़ा ल्योङन भूत पलिईस्यु हिन्दा।" जब ना आझिमदेए हिनौ, आज़ा चारपाई त आरुउज्यान्या आडोएनाङौ, ओटन नका ल्योङन भूत पलिईस्यु हिनस्यु लेऊ।
हुललन तोलोअले ओलजन जबाक आयोव, "औ गुरुज्यू, ङामि ल्हेपा ज़ा जोल्योङ लाटा आत्मा लागिस्युलेऊ, नैताइस्यु ङा नल्योङ ङाहोन्ङु। जब नकाले ङा ज़ाजन कोलोकौ, तब नामल पछारवा, ओटन आयांलन फुई पलिईस्यु, आह्वा ज़िङ कैवा, नका कग्रक्कै ताहा। ङा न सिइयाङजन पलिइस्योचिते लेस्यु धोक ङायोङवाङ, तर नकाङै पलिटौ माढोदुरा।" ओटन ईका थएस्यु येशुले नकाङजन आढोवाङ, "ऐ, अबिस्वासी रुयाङ, ङा खक समन जे सकाए लिज्याङ्का? ओटन जेजन खसाअ सहिन्या? नकाजन ङा ल्योङ होन्चिते।" नकाङै ना केटाजन आल्योङ राहोनौ, ओटन नकाले येशुजन आरङौ चोएटै ना दुस्ट आत्माले नाजन फटेफटे जाएस्यु नकाजन नामल आपछारिउ, ओटन आयांलन फुई पलिईस्यु फुटीफुटी लेऊ तअसिऊ। येशुले नकाल आबौजन आगिनौ, "खकन इकाजन ऐ ताहौ?" नकाले ऐलेऊ, "आलुल योअकन्जै, इकाजन सएन्याल नाल्ट, नका दुस्ट आत्माले इकाजन खयाङ्क मील सनर खयाङ्क रील क्याइवा। तर यदि नङ कोबाअ ढाऔ ढुदुनकन, गे यर्त दया ढास्यु गेजन व्एसिन्ते।" येशुले नाजन ऐआढोव, "‘यदि नङ ढाऔ ढुदुनकन!’ ऐलेस्यु ईका नै नपान्नु? बिस्वास ढान्या वालाङ नाल्टता सोगलै छेन सम्भब लेया।" तब केटाल बौले आव्रकलिउसं ऐलेऊ, "ङा बिस्वास ऐढोङा, तर ङा अबिस्वासत ङाजन व्टङते।" तब हुल तचोएकै चोएस्यु रारांन्या आरङौ, ओटन येशुले दुस्टआत्माजन ऐलेस्यु आहप्काहौ, "ऐ, लाटा सनर भैरा आत्मा, ङा नङजन आग्या यांना, नकातन पलिईस्यु हिनन्ते, ओटन फरि खकै नकाल भितर तापसिन।" ओटन ना केटाजन भ्याई जै चिचच्याइस्यु लछार पछार जाएस्यु पलिहौ, ओटन ना बालअ सिन्याङमन ताहौ, आङ समन कि भ्याउयाएले ऐलेऊ तअसिवाङ कि आका ता सिदा। तर येशुले नकाल कुई कोलोअस्यु नाजन जरुक्कै आछेनौ, ओटन ना सोव।