João 5

पोखराअला रीले राबेलन्या

1 ओलं छिन्ट यहूदीयाङल पर्ब लेऊ, ओटन येशु यरुशलेमल हिनौ। 2 यरुशलेमल भेडा-झलापल नेराक पास गोटा थपल्याअ लेन्या तोलोअ पोखराअल री लेऊ, जोजन हिब्रू छिन्ङन बेथस्दा ऐढासिया। 3 ओलं सोगल किसिमला नाएबोरन्याङ, अथाबा अन्ढलाङ, दुन्डाङ, लुलाङ वङज्यावाङ। 4 नकाङ ख्वाए बेला री हुरलुक ले ऐलेस्यु वुइज्यावाङ। दानाङभन्या परमप्रभुल तोलोअ दुतले बेला-बेलाक पोखराअल लांइस्यु री हल्लाइवा, ओटन री छल्किया पाइना जो हादेए रीजिङल पसि, जोमनताइन्या नाएबोर लेकन बै ऐबेल। 5 ओलं तोलोअ अर्तिस बर्सकन आनाएबोरन्या रु लिज्याऔ। 6 येशुले नका लुलाजन ओलं आवङज्यान्या आरङौ, ओटन ल्होन्या समायतन ना आका दशात लिज्याऔ रैस, ऐलेन्या सनस्यु येशुले नकाजन ऐआढोव, "नैति नङ बेलौ नरोअनु?"

7 लुलाले येशुजन ऐआढोव, "औ, ज्वाएबेला री छल्कि ङाजन रीजिङल लाङन्या काङ्काई ङा रु माल्दी, ङा ङाहिनज्याऔक ङाहादेए छुट्टै रु रील ऐहिन।"

8 येशुले नाजन ऐआढोव, "सोन्ते, नतान छेन्ते, ओटन बान्ते।" 9 ओचोएटै ना रु बेलस्यु, आतान छेन्स्यु बाऔ। ना दिन शबाथ दिन लेऊ। 10 ऐताइस्यु येशुले आसबेलन्या कारन ना रुजन यहूदीयाङै ऐराढोव, "आछिम ता शबाथल दिन दी नङ तान वुरन्या माताइदी।"✝5:10 नहेम्याह १३:१९; यर्मिया १७:२१

11 लुलाले नकाङजन जबाक आयोवाङ, "जोले ङाजन आसबेल्ङु ओइलेज ऐआढाङु, ‘न तान वुरस्यु बान्ते।’" 12 नकाङै नाजन रांगिनौ, "नङजन तान वुरस्यु बान्ते, ऐढान्या रु काङ्का?" 13 तर ना बेलन्या रुले ओ काङ्का ऐलेस्यु माशैदा, दानाङभन्या ना पोल रुयाङ हुल रालिज्याऔकाले येशु ओलन आहिनन्याई मासन्दा। 14 छिन्ट येशुले नकाजन मन्दिरलं डोएस्यु ऐआढोव, "खिम्ते, नङ बेलस्यु लेना। फरि पाप ताढो, दानाङभन्या नयर्त अझ भ्याई माचान्या ताटाइरात्या।"

15 बल्ल ओलं छिन्ट ङाजन सबेलन्या ता येशुदी रैस ऐलेस्यु, नका रुले हिनस्यु यहूदी अढिकारीयाङजन आपानस्योवाङ। 16 नैताइस्यु यहूदीयाङै येशुजन सताइज्यावाङ, दानाङभन्या येशुले ईका काम शबाथ-छिम्क आढोव। 17 तब येशुले नकाङजन ऐआढोवाङ, "ङा बौले सदाई काम ढाज्याया, ओटन ङा बै काम ढाज्याङा।" 18 नैताइस्यु यहूदी अढिकारीयाङै येशुजन सएन्या लेस्यु भ्याईज जोर रांढोव, दानाङभन्या येशुले शबाथ-छिम्का नियाम याएज भङ्ग आढोव माङडी, तर ओलझन्जै परमेस्वरलं बराबर ङप्सिस्यु ओले परमेस्वरजन ङा बौ ऐलेस्यु लेऊ।

ज़ाल अढिकार

19 येशुले नकाङजन ऐआढोवाङ, "मछ्युजै, ङा जेजन ऐढाच्या, ज़ाले ओलजै नैज ढाऔ माढुदुऊदी, तर बौले जो आढान्या रङौ नकाई याएज ढोवा, दानाङभन्या बौले जो ढोव, ज़ाले नाइज ढोवा। 20 दानाङभन्या बौले आज़ाजन प्रेम ढोवा, ओटन ओले ओलजै आडोएज्यान्या सोगलै काम आज़ाजन थनस्योवा। इकातन महान काम ओले आज़ाजन थनन्यालेया, ओटन जे अचम्म ताइन्यालेच्या। 21 दानाङभन्या जोमनलेस्यु बौले सिन्याङजन जिङदा जाटौर ओटन नकाङजन जिबन योंवर, नैलेस्युज ज़ाले बै जोजन इच्छ्या ढोव, नकाजन जिबन योंवा। 22 दानाङभन्या बौले काङ्काईल निया माढोवदी, तर सोगलै निया ढान्या काम आज़ाजन यांस्यु नाएवा, 23 जोमनलेस्यु नकाङै बौल आदर रांढोव। नैलेस्युजै सोगलैले ज़ाल आदर ग्याढोरत्या, ज़ाल आदर माढान्याले ओलजन परिङन्या बौल बै आदर माढोरदी।" 24 "मछ्यु, ङा जेजन ऐढाच्या, जोले ङा बचन थटौ ओटन ङाजन परिङन्याल यर्त बिस्वास ढोव, नका सकाए अनन्त जिबन लेया। ना नियाल मारांडी, तर सिइकालतन नका जिबनल रा:स्यु लेया। 25 ङा जेजन मछ्यु, ऐढाच्या, नका बेला रांदा, ओटन ना बेला आकै ज्या, जब सिन्याङै परमेस्वरलं ज़ाल ग़ा थएर, ओटन थएन्याङ बान्चिन्या लेरा। 26 दानाङभन्या जोमनलेस्यु बौ ओलसै जिबनल ले, ओमनलेस्युज बौले आज़ाजन बै आल्योङै जिबनल स्रोट ताइन्या अढिकार यांस्यु नाएवा। 27 ओटन ङाजन ङा बौले नियाल निर्नय ढान्या अढिकार यांस्यु नाटङवा, दानाङभन्या ङा रुल ज़ा हो। 28 ईकात अचम्म तामानिच्यो, दानाङभन्या बेला रांज्याया, जब ऊईल लिज्यान्याङ सोगलैले ओलं ग़ा थएन्या लेरा, 29 ओटन ऊईलन बाहेर पलिईस्यु रारां सुकर्म ढान्याङ जिबन पुनरुत्थानल नाल्ट, सनर कुकर्म ढान्याङ सजायल आग्या पुनरुत्थानल नाल्ट जिङदा सोन्यालेरा।"✝5:29 दानियल १२:२

येशुल गवाइ

30 "ङा ङाईज नैज ढाऔ माढुदुङदी। जो ङा परमेस्वरङन थटङ, ङा नैताइन्याई निया ढोङा, सनर ङा निया ठिक ठहरिया, दानाङभन्या ङा इच्छ्या मारोकङदी, तर ङाजन परिङन्याल इच्छ्या पुरा ढाऔ चाहिङा।"

31 "यदि ङा ङाबारेल बयन योंङकन ङा गवाइ सत्य माताइदी। 32 ङा बारेल बयन यांन्या तोलोअ छुट्टै लेया, ओटन ङा ऐसन्ङा, कि ङा बारेल ओले जो गवाइ योंव, ना बयन सत्य ज्या।" 33 "जे यहुन्ना ल्योङ गिनौ जेपरिङचिऊ, ओटन नकाले सत्यल बयन यांस्यु लेया।✝5:33 यहुन्ना १:१९-२७; ३:२७-३० 34 ङा रुल बयन ग्रहन माढोङदी, तर जे उद्दार ग्याताइत्या ऐलेस्यु ईका छेन ङापानज्याङु। 35 यहुन्ना भलाङन्या सनर चम्किन्या बत्ति लेऊ, ओटन जे ओत तचिइ समाय आनन्द मनाइन्या राजि जेताइचिऊ।" 36 "तर ङासकाए जो बयन ले, ना यहुन्नातन घिन्या लेया। दानाङभन्या जो कामयाङ पुरा ढाऔ नाल्ट बौले ङाजन यांस्युलेया, ङा ना काम ढाज्याङा, ओटन नकाले ङा बारेल बयन यांज्याया, कि बौले ङाजन आपरिङ्ङु हो।" 37 ङाजन परिङन्या बौले ओलजै ङा बारेल बयन यांस्यु लेया। आमि ग़ा जे खकै थएस्यु मालेचिदी, ओटन आ अनवार खकै मारङचिदी।✝5:37 मत्ती ३:१७; मर्कुस १:११; लूका ३:२२ 38 सनर ओलं बचन जेल्योङ मारहिदी, दानाङभन्या जोजन ओले आपरिङौ, जे ओजन बिस्वास माढोचिदी। 39 दानाङभन्या जे ईका यिङसिस्यु पबित्रशास्त्रलं अनन्त जिबन डोएसिया ऐलेस्यु रोअच्या। ङा बारेल बयन यांन्या नाइ पबित्रशास्त्र ज्या। 40 ओटन बै जे जिबन डोटौ नाल्ट ङाल्योङ रांऔ मारोअचिदी।

41 "ङा रुयाङल प्रसम्सा ग्रहन माढोङदी, 42 तर ङा ऐसन्ङा कि जे कैताइन्या किसिमला रुयाङ हो, ओटन ङा ऐसन्ङा जे यिङल परमेस्वरलं नाल्ट नैज प्रेम माल्दी। 43 ङा ङा बौल मिनतन रा:स्यु लेङा, तर जे ङाजन ग्रहन माढाङचिदी। छुट्टै जो आ मिनङन रां ओजन जे ग्रहन ढान्यालेच्या।" 44 जे कैलेस्यु बिस्वास ढाऔ ढुदुच्यो, जब कि जे तोलोअले छुट्टैङन जे सम्मान रोअच्या, तर ना सम्मानल खेदा मापरिचिदी, जो तोलोअ याएज परमेस्वरङन डोएसिइ? 45 "ईका तायिङसिच्यो, कि ङा बौ लेऊक जेजन दोस लाइच्या। जेजन दोस लाइन्या ता मोशा दी, जोल्योङन जे आस जेढोचिऊ। 46 दानाङभन्या जे मोशाजन बिस्वास जेढान्या ताहकन ङाजन बै बिस्वास ढान्याजेल्चिऊ, दानाङभन्या ओले ङा बारेल सरस्यु आनाटौ। 47 तर जे नकाले आसरन्या छेनयाङ बिस्वास माढोच्योकन, ङा छेन कैलेस्यु बिस्वास ढोच्यो?"