22 Eelyo Jesu abasikwiiya bakwe nibakasika kuBbetisayida, alimwi bamwi bantu bakeeta mwaalumi moofu mpawo bakakumbila Jesu kuti amugume. 23 Aboobo Jesu wakabweza mwaalumi moofu aluboko wamutola anze amuunzi. Lino naakaswida mumenso amwaalumi wakabika maanza alinguwe, Jesu wakabuzya wati, "Kuli nchubwene na?"

24 Lino wakalanga kujulu wati, "Ndibwene bantu; kabali mbuli misamu yeenda."

25 Jesu wakamubika lubo maboko kumeso aakwe. Eelyo imeeso aakwe akajulika, wakabona, alimwi wakabona oobotu. 26 Jesu wakati, " Kuya kuŋanda, pesi utabwedi mumuunzi."

31 Eelyo Jesu wakazwa kuchilikiti chaTaya wakeenda wayinda muSidoni, kaya kulwizi lwaGalili mpawo wanjila muchisi chaDekkapolisi chamadolopo alikkumi. 32 Ooko, bamwi bantu bakamweetela mwaalumi musinkematwi kalisyataambi, mpawo bakamukumbila kuti amubikke luboko lwakwe amuponesye.

33 Eelyo wakamugwisya mubantu bayiingi wamutola kumbali, Jesu wakamunjizya minwe mumatwi. Mpawo Jesu wakaswida wadompa lulimi lwamwaluumi ooyo. 34 Mpawo wakalungumana walanga kujulu, mukweefula kupati wakati kulinguwe, "Efata!" (nkukwaamba kuti, "Sinkuka").

35 Nizyakachitwa eezi mwaalumi oolya wakasinkuka matwi aakwe, lulimi lwakwe lwakaangunuka mpawo watalika kwaambuula kabotu.

36 Eelyo Jesu wakabalayilila kuti, bataambili bantu, pesi naakali kubalayilila oobu, bantu nibakayindilila loko kwaambuula azyakachitika. 37 Bantu bakazula kugamba kabaamba kuti, "Uchita kabotu loko muzintu zyoonse, Uchita basinkematwi kuti bamvwe aabo syataambi kuti baambuule."

46 Jesu abasikwiiya bakwe ankamu mpati nibakasika kubusena butegwa Jerikko, nibakali kuzwa muchisi, umwi mwaalumi moofu, uutegwa Bbatimayasi chaamba kuti, mwana waTimayasi, wakali kkede kumbali anzila kaliikukumbila bayinda. 47 Bbatimiyasi naakamvwa kuti nguJesu waNazareti wakali kuyabwiinda, wakatalika koompolola kati, "Jesu, Mwana waDevidi, kondifwida luse!"

48 Mpawo bantu bayingi bakamukalalila kabati awumune, pesi wakiinkila anembo akoompololisya kati, "Mwana waDevidi kondifwida luse!"

49 Jesu wakayimikila mpawo wati, "Ngamumwiite kuti aze okuno."

Aboobo bakamwiita mwaalumi moofu bati, "Sangalilwa, nyampuka, ulookukwiita."

50 Aboobo wakawaalila aansi nsasiko yakwe, wakasotoka wikiimila amawulu aakwe mpawo wakaza kuli Jesu nkwaakabede.

51 Jesu wakabuzya wati, "Uyanda kuti ndikuchitileenzi?"

Mwaalumi moofu wakati, "Muyiisi, ndiyanda kuti ndibone."

52 Jesu wakati, "Kuya, lusyomo lwako lwakuponiya."

Alimwi mpawawo wakabona, mpawo watobela Jesu nkwakalikuya.

35 Naakasika afwiifwi akuJerikko, umwi mwaalumi moofu wakalikkede kumbali anzila kalikukumbila; 36 alimwi naakamvwa kuyoowela kwamakamu abantu akali kwiinda, wakabuzya kuti, "Sa niinzi zilokuchitika?"

37 Bakamwaambila bati, "Jesu wakuNazareti ulookwiinda."

38 Alimwi wakompolola wati, "Jesu, Mwana waDevidi, kundifwida luse!"

39 Lino aabo bakali kweenda anembo, bakamukalalila, kuti, ngawumune, pesi wakoompololisya, kalookwamba kuti, "Jesu Mwana waDevidi, kundifwida luse!"

40 Mpawo Jesu wakayimikila wakabalayilila bantu aaba kuti bamweete kulinguwe; alimwi nibakamweeta afwiifwi anguwe, wakamubuzya wati, 41 "Uyanda kuti ndikuchitilenzi?" Mpawo wakavwiila wati,

"Mwami ndiyanda kuti ndibone."

42 Jesu wakati kulinguwe, "Bona, lusyomo lwako lwakuponiya."

43 Mpawawo wakabona mpawo wakatobela Jesu, kalumbayizya Leza, alimwi bantu boonse, nibakabona eezi abalabo bakalumbayizya Leza.

30 Lino banyinazyala aSayimoni bakalilede bakali kukasala mubili, alimwi mpawawo Jesu bakamwaambila atala ambabo. 31 Alimwi wakaza, mpawo wabakajata aluboko, wabagwasya kunyampuka, kukasala kwamubili kwakamana, mpawo bakatalika kubakutawukila.

40 Alimwi sichipele wakasika kuli Jesu wamukumbila, alimwi kafugeme wakati kulinguwe, "Na koyanda, ulakonzya kundisalazya."

41 Mpawo Jesu kazwide aluse, wakatandabika luboko lyakwe mpawo wamuguma, mpawo wati kulinguwe, "Ndilayanda, kusalala!" 42 Alimwi mpawawo chipele chakamana, mpawo wakasalazigwa.

3 Mpawo baalumi bane bakasika kabanyampwide ulebukide, bakamweeta kuli Jesu. 4 Alimwi nibakakachilwa kumweeta afwiifwi anguwe nkaambo kakuvula kwankamu, bakagwisya chiluli; mpawo nibakajula, bakaselusya buyalangwe oobo mbwakalilede alimbubo ulebukide. 5 Alimwi Jesu naakabona lusyomo lwabo, wakati kuli ulebukide, "Mwanaangu, zibi zyako zyalekelelwa."

6 Lino bamwi bayiisyi bamulawu bakalikkede mpawawo, kabaliyeeya lwabo kuti, 7 "Nkaamboonzi ooyu mwaalumi naambuula oobu? Ulikusampawula! Ngwani ukonzya kulekelela zibi pesi Leza aliikke?"

8 Mpawawo Jesu, kazi muMuuya wakwe kuti eechi nchiinchicho nchibaliikuyeeya, wakati kulimbabo, "Nkaamboonzi nimuyeeya zintu ziliboobu? 9 Nchiichili chuuba, kwaambila ulebukide kuti, ‘Zibi zyako zyalekelelwa,’ nikuba kwaamba kuti, ‘Buka, bweza buyalangwe bwako mpawo weende?’ 10 Pesi kuti muzizibe kuti Mwana aMuntu ulaanguzu zyakulekelela zibi anyika." Jesu wakati kuli ulebukide, 11 "Ndakwaambila, buka, bweza buyalangwe bwako mpawo uye kuŋanda."

12 Mpawo wakabuka, wakabweza buyalangwe alimwi weenda kunembo lyabo boonse. Eechi chakabagambya boonse alimwi bakalumbayizya Leza, kabati, "Tatuna chibona pe chili mbuli eechi!"

1 Alubo Jesu wakanjila muchikombelo, mpawo kwakali mwaalumi wakanyanide luboko nkuko. 2 Bamwi baabo bakali kuyandula kaambo, kuti kujana ulamuponiya na mubuzuba bwaSabata, kuchitila kuti bamupe mulandu. 3 Mpawo Jesu wakati kumwaalumi wakanyanide luboko, "Kuza okuno." 4 Mpawo wakati kulimbabo, "Chili mumulawu naa kuchita chibotu na chibi muSabata, kufutula buumi na kujaya?"

Pesi bakawumunisya. 5 Alimwi wakabalanga boonse chakunyema, kawuside nkaambo kakuyuma kwamyoyo yabo, mpawo wakati kumwaalumi ooyo, "Tandabika luboko kwako." Walutandabika, mpawo luboko lwakwe lwakalulamikwa.

12 Naakachili mulichimwi chazisi, kwakasika umwi mwaalumi wakalizwide achipele; naakabona Jesu, wakavundama, mpawo wakamukumbila wati, "Mwami, kuti kuyaanda, ulakonzya kundisalazya."

13 Mpawo Jesu wakatandabika luboko lwakwe wamukombela, wati, "Ndakusalazya", mpawo wakati, "Kusalala." Mpawawo chipele chakamana.

18 Alimwi laanga, bantu bakeeta mwaalumi ulebukide kalede abuyalangwe, alimwi bakayanduula mbubanga balamunjizya mukati akumulazika kunembo lyaJesu; 19 pesi teebakajana mweenya pe wakumunjizya, nkaambo kakuvula kwabantu, bakatanta atala akaluli mpawo beenyuna mweenya akaluli, bamuselusya abuyalangwe bamweeta aawo akali Jesu. 20 Alimwi Jesu naakabona lusyomo lwabo, wakati, "Yomwaluumi zibi zyako zyalekelelwa."

21 Mpawo bayiisyi bamulawu abaFarisi bakatalika kulibuzya, kabati, "Ngwani ooyu mwaaluumi waambuula masampu aliboobu? Ngwani ukonzya kulekelela zibi pesi Leza aliikke?"

22 Awo Jesu nakaziba nzibakalikuyeeya, wakabavwiila wati, "Nkaamboonzi nimulipenzya mumyoyo yanu? 23 Nchichili chuuba, kwamba kuti, ‘Zibi zyako zyalekelelwa,’ nikuba kuti, ‘Buka weende?’ 24 Pesi kuti mukazibe kuti Mwana amuntu ulaanguzu anyika zyakulekelela zibi." Aboobo wakati kumwaalumi ooyo wakali lebukide wati, "Ndakwaambila, buka, bweza buyalangwe bwako uye kuŋanda yako."

25 Mpawawo wakabuka kunembo lyabo alimwi wabweza buyalangwe bwakwe, mpawo wakaya kuŋanda yakwe, kalokulumbayizya Leza.

6 ✝Mulimwi sabata, Jesu wakanjila muchikombelo chabaJuda mpawo wayiisya, alimwi kwakali mwaalumi wakali aluboko lwakululyo lulebukide. 7 Mpawo bayiisyi bamulawu abaFarisi bakali kuyanda kulanga kuti ulamuponiya na mubuzuba bwasabata, kuchitila kuti bamujanine mulandu wakumutamikizya. 8 Pesi Jesu wakalizi zyakali mumizeezo yabo, mpawo wakaambila mwaalumi wakali lebukide luboko wati, "Nyampuka uze wimikile awa akati." Alimwi mwaalumi ooyo wakabuka wimikila mpawawo. 9 Alimwi Jesu wakabaambila wati, "Ndikumbila kubuzya, zileelede mumulawu na mubuzuba bwasabata kuchita chintu chibotu naakuti nchibi, kuvuna buumi naa kubunyonyona?" 10 Mpawo naakamana kubalanga boonse, wakaaambila mwaalumi ooyu wati, "Tandabika luboko lwako." Alimwi wakachita oobo: luboko lwakwe lwakapona.

1 ✝Naakamana kwaambuula zyoonse kubantu bakali kuswiilila wakanjila mudolopo lyaKkapenawumi. 2 Kwakali silutwe mupati wankamu yabasilumamba yabaRoma wakajisi mulanda wakali muyandisyi* kulinguwe, lino ooyo mulanda wakwe wakali kuchiswa kuchiimo chakufwa. 3 Naakamvwa atala aJesu, wakatuma bapati baba Juda, kuti bayiinke kukumukumbila kuti aze mpawo amuponiye mulanda wakwe. 4 Mpawo nibakasika kuli Jesu, bakamukumbila muchoonzyo, bati, "Kuti nkazichita ooyu twakumbila kuti twiinke aamwi ukaakuponiye mulanda ooyu, 5 nkaambo ulachiyanda chisi chesu, alimwi ngunguwe wakatuyakila busena bwakukombela."

6 Alimwi Jesu wakeenda aabo. Lino naakasika afwiifwi aŋanda yasilutwe wabasilumamba, mpawo silutwe ooyo wakatuma mweenzunyina kuti ati kuli Jesu, "Mwami utali penzyi numwini, nkaambo tandeelede pe kuti unjile mukaluli kaŋanda yangu; 7 nkikaako nchinditakwe nindayeeya kuza kulinduwe. Pesi waamba biyo ijwi lyako, mpawo mulanda wangu ulapona. 8 Nkaambo ambebo ndijisi nguzu ndimwaalumi ubeleka ansi amulawu, alubo ndijisi nkamu yabasilumamba babeleka munsi lyangu; naa ndabalayila ndati ‘Kuya!’ ulayinka alimwi kuli umwi, ndati, ‘Kuza!’ alimwi ulasika; alimwi kumuzike wangu, ‘Chita oobu!’ mpawo ulachichita."

9 Jesu naakamvwa eechi, wakagamba, mpawo wakalanga nkamu yakali kuyobumutobela, mpawo wakabaambila wati, "Ndiliikumwaambila nikuba mu Izirayeli takukwe nindalinajana lusyomo lulibobu, pe."

10 Lino aabo bakatumwa nibakabweeda kuŋanda, bakaakujana mulanda ooyu wapona.

11 Mpawo kwakali mwanakazi wakali amuuya wakumulebula kwaminyaka ilikkumi amusanu ayitatu; wakali wotomene takukwe naakali kukonzya pe kwimikila kabotu. 12 Mpawo Jesu naakamubona, wakamwiita alimwi wakamwaambila wati, "Yomwanakazi wangununwa kubulwazi bwako." 13 Mpawo wakamubika maanza, alimwi mpawawo wapona wawololoka, mpawo walumbayizya Leza.

1 Mubuzuba bumwi bwasabata Jesu naakanjila muŋanda yamweendelezi wabaFarisi kuti akalye, bakali mulangide changuzu. 2 Alimwi laanga, kwaakali umwi mwaalumi kunembo lyakwe wakali kuzimba mawulu amaboko. 3 Mpawo Jesu wakati kubayiisi bamulawu abaFarisi, "Zili mumulawu na kuponiya mubuzuba bwasabata, naakuti takweelede?"

4 Alimwi bakawumuna. Eelyo wakamujata, mpawo wamusiilika, alimwi wakamuleka weenda.

11 Jesu naakali kuyabweenda kayabuya kuJerusalemu, wakayinda akati kamyuunzi yaSamariya aGalili. 12 Mpawo naakali kunjila muli umwi muunzi, wakaswanana abasizipele balikkumi, bakaliimvwi kulekule. 13 Alimwi bakoompolola bati, "Jesu! Mwami, kutufwida luse."

14 Naakababona, wakati kulimbabo, "Ngamwiinke mukalitondezye kubapayizi."

Mpawo nibakachili kuyobweenda, bakasalazigwa. 15 Eelyo umwi wabo, naakabona kuti wapona, wakabweeda, kalokulumbayizya leza ajwi pati. 16 Mpawo wakavuntama kumawulu aJesu mpawo wamulumba. Alimwi ooyo wakali muSamariya. 17 Eelyo Jesu wakababuzya wati, "Teebalikkumi na bakasalazigwa? Pesi balimusanu abane balikuli? 18 Tee bakajanika kuti baboole kukulumba Leza kunze kwamuzwakule?" 19 Eelyo wakamwaambila wati, "Buka kuuya; lusyomo lwako lwakuponiya."

25 Alimwi kwakali mwanakazi wakala kalobola kwaminyaka ilikkumi ayibili, 26 alimwi wakali wafwaaba kukuyandula kusilikwa kubasilisyi bayiingi, alimwi wakali wabelesya zyoonse zyakajisi, mpawo takwe nakapona pe pesi zyakali kwinkilila anembo. 27 Wakamvwa impuwo atala aJesu, mpawo wakaza kuzwa kusule lyakwe munkamu alimwi wakajata chisamo chaJesu. 28 Nkaambo wakati, "Kuti nindajata chisamo chakwe, ndilapona."

29 Mpawaawo kalobola kakamana; alimwi wakamvwa mumubili wakwe kuti wapona kuzwa kubulwazi oobu.

43 Mpawo kwakali mwanakazi wakalaabulwazi bwakalobola kwaminyaka ilikkumi ayibili; alimwi taakwe wakamuponiya pe. 44 Wakaza kusule lyakwe mpawo wajata mupimbili wachisamo chakwe, alimwi mpawaawo bulwazi bwakalobola bwakamana. 45 Eelyo Jesu wakabuzya wati, "Ngwani wandijata?" Eelyo boonse nibakakazya,

Pita wakati, "Mwami, inkamu ilikuzyungulukide akukusyanikizya."

46 Pesi Jesu wakati, "Kuli umwi wandijata; nkaambo ndamvwa nguzu kazizwa kulindime." 47 Mwanakazi naakabona kuti tachikonzyi pe kulisisa, wakaza bukankama; mpawo wakafugama kumawulu aakwe, wakaamba kunembo lyabantu boonse kuti nkaamboonzi chapa kuti amujate, alimwi ambwaakabuka akupona mpawaawo. 48 Jesu wakati kulinguwe, "Yomusimbi, lusyomo lwako lwakuponiya; koya muluumuno."

22 Eelyo kwakaza umwi mupati wachikombelo, izina lyakwe nguJayirasi; alimwi nakamubona, wakawida kumawulu aJesu, 23 alimwi wakamukumbila, kati, "Mwanaangu musimbi muniini wabaachimo chakufwa. Kuuza alimwi uzomubike maboko, kuchitila kuti aabe kabotu, mpawo apone."

24 Alimwi Jesu wakeenda aawe. Mpawo inkamu mpati yakamutobela mpawo bakamusyanikizya koonsekoonse.

38 Nibakasika kunganda yamweendelezi wachikombelo, wakabona lupyopyongano, alimwi bantu kabalila akoomoka kupati. 39 Alimwi naakanjila, wakati kuli mbabo, "Nkaamboonzi nimulila akoomoka? Mwana tafwide pe pesi uliikoona."

40 Mpawo bakamuseka. Pesi wakabaandila aanze boonse, mpawo wakayita wisi amwana abanyina abaabo mbakali aabo, mpawo banjila omo mwana mwakalibede. 41 Naakamubweza aluboko wakati kuli nguwe, "Talita kkumi" chaamba kuti, "Kasimbi, ndati kuli nduwe, buka."

42 Alimwi mpawo aawo musimbi wakabuka mpawo weenda, (wakali aminyaka ilikkumi ayibili yakuzyalwa), alimwi bakazula kugambwa.

31 "Ndiyobakozyanisya anzi bantu bazyalani elino? Alimwi bali mbuliinzi? 32 Bali mbuli bana bakkede kulubuwa bwakusambalila, mpawo balokuyita umwi awumwi kabali kuti, ‘Twakamusibila nyeele, pesi teemwakazyana pe; alimwi twakamulizya, temwakalila pe.’

33 Nkaambo Joni muBbapatizi wakaza katalyi chinkwa nikuba kunywa wayini; mwakamwamba kuti, ‘Ujisi muuya mubi.’ 34 Mwana aMuntu wakaza kali kulya akunywa; pesi mwakati, ‘Amulange ngusindya amukolwi, alimwi mweenzunyina wabasimutelo abasizibi!’ 35 Anukuti busongo bulasalazya mubana bakwe boonse."

36 Lino umwi wabaFarisi wakamukumbila kuti akalye awe, mpawo wakayinka wakunjila muŋanda yamuFarisi, mpawo bakkala atebuli balya. 37 Mpawo laanga, umwi mwanakazi wamuchisi eecho wakali sizibi, nakamvwa kuti Jesu mpali muŋanda yamuFarisi, ulikkede kaliikulya, wakaza akankuli kadula kamafuta anunkilila,

41 Alimwi kwakaza mwaalumi izina lyakwe utegwa Jayirasi, wakali mweendelezi wachikombelo chabaJuda; mpawo wakafugama kumawulu aJesu wamukumbila kuti beende aamwi kuŋanda yakwe, 42 Nkaambo wakali amwana musimbi uumwi biyo, ulaminyaka ilikkumi ayibili, alimwi wakali waamba kufwa. Alimwi nakeenda,

inkamu yabantu yakali kumusyanikizya.

49 Naakachili kwaambuula, kwakaza umwi mwaalumi mweendelezi wachikombelo chabaJuda, wakamwaambila wati, "Simalelo wangu utalikatazyi mwana musimbi wako wafwa."

50 Jesu naakamvwa oobo wakavwiila wati, "Utayoowi, syoma biyo, alimwi mwana musimbi wako ulapona."

51 Mpawo naakasika kuŋanda yaJayirasi, taakwe mbakazumizya kunjila awe, kunze kwa Pita aJoni aJakkobbu awisi abayina baMwana. 52 Bantu boonse muchiindi nchicheecho bakali kulila akuumamubila nkaambo kamwana, pesi Jesu wakati, "Mutalili, nkaambo tafwide pe, mwana muumi pesi ulede biyo."

53 Mpawo bakamuseka, kabazi kuti mwana wakalifwide. 54 Pesi wakamujata aluboko mpawo wati, "Yomwana buka!" 55 Mpawo muuya wakwe musimbi wakaboola, eelyo mpawawo wakabuka, alimwi Jesu wakabalayilila kuti bape mwana chakulya. 56 Mpawo bazyali bakwe bakagamba, alimwi Jesu wakabalayilila kuti bataambili naba uumwi zyakachitika.

37 Mpawo iguwo pati lyakanyamuka, alimwi mayuwe akanjila mubwaato, kusikila bwaato bwakali bwamba kuzula. 38 Pesi Jesu wakali musule abwaato, kalede amuchego; alimwi bakamubusya mpawo bati kulinguwe, "Omuyiisyi, tulikataazyi na kuti tuliikunyonyooka?"

39 Mpawo wakabuka walayilila iguwo, mpawo wati kulwizi, "Umuna! Batama!" Alimwi iguwo lyakabatama, mpawo kwakaba luumuno lupati. 40 Wakati kulimbabo, "Nkaamboonzi nimuyoowa? Tamujisi lusyomo na?"

41 Alimwi bakalizwide kuyoowa, mpawo bakati kuli umwi awumwi, "Ngwani lino ooyu, nikuba iguwo alwizi zilamuswiliila?"

35 Lino muchiindi eechi lyakali lyabagoko, eelyo basikwiiya bakwe bakaza kulinguwe. Bakati, "Okuno mbusena busitikide, alubo lyamba kubbila kale. 36 Mwayiisya bantu aaba baye mumyuunzi izyungulukide nyika eeyi bakalyulile chakulya."

37 Pesi Jesu wakabavwiila wati, "Mubape chintu chimwi chakulya."

Bakati kulinguwe, "Ziyanda makkobili alimyaanda iibili yamali!* Tubelesye mali iilibobu na kuti tuule chakulya tubape balye?"

38 Wakababuzya wati, "Mujisi zinkwa zingee? mwiinke mukalange."

Nibakalanguula bakati, "Tujisi zinkwa zilimusanu abaswi babili."

39 Eelyo Jesu wakalayilila basikwiiya kuti baambile bantu boonse kuti bakkale muzibunga zibunga abwizu butete. 40 Mpawo bakakkala aansi muzibunga zyamyaanda azibunga zyamakumi musanu 41 Jesu wakabweza zinkwa zilimusanu abaswi babili mpawo wakalanga kujulu, wakapa kulumba eelyo wakakwamuna zinkwa, mpawo wakapa basikwiiya bakwe kuti baabile bantu. 42 Bakalya boonse mpawo bakkuta, 43 alimwi basikwiiya bakabwezelela bufwefwelenga bwazinkwa abaswi bwakachala bazuzya zisuwo zilikkumi azibili 44 Imweelwe wabaluumi bakalya wakali kusika kuzyuulu zili musanu.

48 Wakabona basikwiiya kabalokuzundaana chabuyumuyumu kukuyamba abwaato, nkaambo muuwo wakabalwanisya. Achiindi chakubuchedo wakeenda atala ameenda, kaya kulimbabo. Wakali waamba kubayinda kumbali. 49 Pesi nibakamubona keenda atala alwizi, bakayeeya anga ncheelo, bakakwiila, 50 nkaambo boonse nibakamubona bakayoowa.

Mpawawo Jesu wakati kulimbabo, "Mujate moyo! Ndime, mutayoowi pe." 51 Eelyo wakanjila mubwaato ambabo, mpawo muuwo wakamana. Bakagamba loko,

1 Mumazuba aayo imwi nkamu mpati yakabungana. Mbukunga teebakali akulya pe, Jesu wakiita basikwiiya bakwe eelyo wakati, 2 "Ndabaaluse abantu aaba, baba amazuba aatatu kabala andime alimwi kabatakwe chakulya. 3 Kuti ndababweedezya kumyuunzi yabo anzala, bayoosuntuka munzila, nkaambo bamwi babo bazwakule."

4 Alimwi basikwiiya bakwe bakavwiila bati, "Pesi nkokuuli munkanda iloobu nkutunga tuyookonzya kujana chakulya chizulila bantu boonse aaba?"

5 Jesu wakabuzya kuti, "Mujisi zinkwa zingene?"

Bakamuvwiila bati, "Zilimusanu azibili."

6 Wakaambila makamu kuti akkale aansi. Naakabweza zinkwa zilimusanu azibili wakalumba, wakwamuuna wapa basikwiiya bakwe kuti baabile bantu, mpawo bakachita oobo. 7 Bakalaabaswi bache buyo abalo; alimwi wakalumba kuli Leza waambila basikwiiya bakwe kuti baabile bantu. 8 Eelyo bantu bakalya bakkuta. Nibakamana basikwiiya bakabwezelela zisuwo zilimusanu azibili zyabufwefwelenga bwakachaala. 9 Lino bakaliwo bakali baalumi bakalikukonzya kuba zyulu zine. Jesu wakabamwayisya

12 Mubuzuba butobela Jesu abasikwiiya bakwe nibakazwa muBbetani, Jesu wakaba anzala. 13 Mukubona mukuyu amatu aawo chakule, wakayiinka kuti akabone kuti ulamichelo na. Naakasika mpawo wakajana matu luzutu, kakutakwe michelo, nkaambo teensi chakali chiindi chankuyu pe. 14 Eelyo Jesu wakaambila mukuyu kuti, "Kutazoobi nikuba uumwi uzoolya michelo kulinduwe lubo."

Basikwiiya bakamumvwa kaamba makani aayo.

20 Jesu abasikwiiya bakwe chifumo, nkabayoobubweenda, bakabona mukuyu wakayuma kuzwa kumiyanda. 21 Pita wakayeeya mpawo wakati kuli Jesu, "Muyiisi, laanga! Mukuyu nguwakatuka wakayuma!"

22 Jesu wakavwiila kuti, "Amube alusyomo muli Leza. 23 Ndamwaambila kasimpe kuti, naa umwi wati kuchilundu eechi, ‘Kuya ukaliwaalile mulwizi,’ mpawo katadooneki mumoyo wakwe pesi kasyoma kuti eezyo nzyawamba ziyochitika, ziyoomuchitikila mbubo. 24 Nkikaako ndamwaambila kuti, kufumbwa nchimuyookumbila mukukomba, amusyome kuti mwachijana, mpawo chiyooba chanu. 25 Mpawo naa wayimikila kulikukomba, na kuwangilide umwi moyo, mulekelele, kuchitila kuti Wuso uulikujulu akulekelele zibi zyako."

1 ✝Lino muchiindi bantu nibakali kumusyanikizya kabali kuswiilizya ijwi lyaLeza, Jesu wakalimvwi kumbali alwizi lutegwa Genesareti. 2 Mpawo wakabona maato abili akali kunkomwe yalwizi; pesi bazubi babaswi bakali bazwa mulingawo, kabali kusanzya tuniyandi twabo. 3 Mpawo wakanjila muli bumwi bwamaato, obo bwakali bwa Sayimoni, wakamukumbila kuti abutontele mumeenda buniini kuzwa kunkomwe. Mpawo wakakkala wayiisya bantu kali mubwaato.

4 Lino naakamana kwaambuula, wakaambila Sayimoni wakati, "Chunda bwaato bwako mumeenda abbila mpawo uwaale tuniyandi twako uuche."

5 Alimwi Sayimoni wakavwiila wati, "Mwami, twabeleka busiku boonse mpawo takukwe nchitwacha pe! Pesi kujwi lyako, ndilawaala tuniyandi." 6 Alimwi nibakachita oobo mbaakamba, bakacha baswi bayingi loko, mane tuniyandi twakali kuzapuuka, 7 bakayiita basimulimunyina bakali muli bumbi bwaato, kuti baze bazobagwasye. Mpawo bakaza bakazuzya maato abili mane akali atalika kubbila. 8 Pesi Sayimoni Pita naakabona eezi, wakafugama munsi lyamawulu aJesu wati, "Mwami, zwa kulindime, nkaambo ime ndilisizibi."

9 Nkaambo Sayimoni wakagamba, abaabo boonse mbaakali aabo, mukubona baswi aaba mbibakacha muchiindi eecho; 10 alimwi alakwe Jakkobbu aJoni bana baZebbedi, bakali basimulimunyina aSayimoni. Mpawo Jesu wakaambila Sayimoni wati, "Utayoowi, kuzwa sunu uyooba sikuzuba wabantu."

11 Mpawo nibakeeta maato aabo kunkomwe, bakasiya zyoonse mpawo bakamutobela.

22 Buzuba bumwi wakayinka waakunjila mubwaato abasikwiiya bakwe, mpawo wati, "Ngatuzubukile mutaleeliya yalwizi." Mpawo bakazubuka baya mutala. 23 Mpawo nibakali kuyabuyamba wakoona. Alimwi kwakawunga iguwo pati lyamulwizi, bakazula ameenda, alimwi bakali mupenzi. 24 Mpawo bakayinka bamubusya bati, "Mwami, Mwami, tuliikufwa!"

Alimwi wakabuka wakulayilila iguwo amayuwe mumeenda; mpawo meenda akabatama. 25 Mpawo wakababuzya wati, "Lulaali lusyomo lwanu?" Alimwi bakayoowa bakaankamana, bakaambilana bati, "Ngwani ooyu ulayilila niliba guuwo ameenda, mpawo zimuswiilile?"

22 Buzuba bumwi wakayinka waakunjila mubwaato abasikwiiya bakwe, mpawo wati, "Ngatuzubukile mutaleeliya yalwizi." Mpawo bakazubuka baya mutala. 23 Mpawo nibakali kuyabuyamba wakoona. Alimwi kwakawunga iguwo pati lyamulwizi, bakazula ameenda, alimwi bakali mupenzi. 24 Mpawo bakayinka bamubusya bati, "Mwami, Mwami, tuliikufwa!"

Alimwi wakabuka wakulayilila iguwo amayuwe mumeenda; mpawo meenda akabatama. 25 Mpawo wakababuzya wati, "Lulaali lusyomo lwanu?" Alimwi bakayoowa bakaankamana, bakaambilana bati, "Ngwani ooyu ulayilila niliba guuwo ameenda, mpawo zimuswiilile?"

26 Mpawo bakayamba baakusika kubusena bwaba Gerasene, bulangene aGalili.

12 Lino izuba nilyakaya kukubbila; balikkumi ababili bakaza mpawo bati kulinguwe, "Leka bantu aaba beende, baye mumyuunzi amunyika zilaafwiifwi, bakajane busena bwakoona achakulya; nkaambo swebo omuno tuli mubusena buli abulikke."

13 Pesi Jesu wakati kulimbabo, "Amubape chakulya."

Mpawo bakati, "Taakwe nchitulaacho kunze zinkwa zilimusanu abaswi babili kunze kwakuti tweende tukawule chakulya chabantu boonse aaba." 14 Nkaambo kwakali baalumi bakali mbuli zyuulu zilimusanu.

Mpawo wakati kuli basikwiiya bakwe, "Amubalayilile bakkale aansi mutubunga, twamakumi alimusanu."

15 Alimwi bakachita oobo, mpawo bakabalayilila kuti bakkale aansi boonse. 16 Mpawo wakabweza zinkwa zilimusanu abaswi babili walanga kujulu, mpawo wakazilongezya akuzikwamuna, mpawo wakapa basikwiiya bakwe kuti baabile nkamu. 17 Alimwi boonse bakalya mpawo bakkuta. Alimwi bakabwezelela bufwefwelenga bwakachaala, bazuzya zisuwo zilikkumi azibili.

23 Eelyo kwakali mwaalumi muchikombelo chabo ooyo wakalinjidwe muuya mubi, 24 alimwi wakoompolola wati, "Uyandaanzi kuli ndiswe, Jesu waNazareti? Sa wazida kutunyonyoona na? Ndilizi kuti nduweni, Usalala waLeza!"

25 Pesi Jesu wakamukalalila, kati, "Umuna, alimwi zwa mulinguwe!"

26 Mpawo muuya mubi, wakamuzazamya changuzu alimwi kakwiila ajwi pati, wazwa mulinguwe.

1 Eelyo Jesu abasikwiiya bakwe bakayiinka mutala eliya yalwizi, kunyika yabaGerasenesi. 2 Alimwi Jesu naakazwa mubwaato, wakaswaniya mwaalumi wakazwa kuzibuunda wakala muuya mubi, 3 Mwaalumi ooyu wakali kukkala kuzibumda; alimwi takukwe wakali kukonzya kumwaanga pe, nikuba anketani. 4 Chiindi chiingi wakali kunoonga waangwa anketani kumaboko akumawulu, pesi nketani walizidunsula, alimwi zyakumawulu wakali kuzidunsula; alimwi takwe wakajisi nguuzu zyakumuzunda. 5 Sikati amansiku akati kazibuunda alimwi aziluundu wakali kulila choonse chiindi, mpawo kali kuli chudulula amabwe.

6 Alimwi nakabona Jesu kulaale, wakachijana mpawo wakafugama, 7 alimwi kalokoompolola ajwi pati, wakati, "Ulaanzi atala andime, Jesu, Mwana aLeza Usumpukide? Ndakukumbila aLeza, utandipenzyi." 8 Nkaambo wakali wati kulinguwe, "Kuzwa kumwaalumi ooyu, iwe muuya mubi!"

9 Alimwi Jesu wakamubuzya wati , "Nduweni izina lyako?"

Wakavwiila wati, "Izina lyangu ndime Ligiyoni; nkaambo tuli bayiingi." 10 Alimwi Ligiyoni wakali kunoonga kakumbila Jesu kapati kuti atabatandili kunze abusena.

11 Lino butaanga lupati lwangulube lyakali kuchela kumbali achilundu, 12 alimwi yakamukumbila kuti, "Alimwi myuuya mibi yakamukumbila kuti, "Tutandile mungulube, atunjile muli nzizyo." 13 Aboobo wakazizumizya kuti zyeende. Mpawo myuuya mibi yakazwa, mpawo yanjila mungulube; alimwi butanga bwangulube bwakali kunoba zyuulu zibili, zyakakunuka chakufwambana kunkomwe yalwizi, mpawo zyanikila mulwizi.

14 Bembeli bakachija, alimwi bakwaambila bali muchisi amunyika. Alimwi bantu bakaza kukuzoboona eecho chakali chachitika.

11 Pesi nywe mulati na muntu waamba kuli wisi abayina, kuti kufumbwa zilibiyeni nzimwaleelede kugwasigwa kulindime ngu ‘Kkobbani’ (nkukwaamba kuti, nchipo chaLeza), 12 eelyo mutamuzumizyi kuti achite chimwi chintu kuli wisi nibaba bayina. 13 Aboobo mulalobya ijwi lyaLeza nkaambo kaziyanza zyanu nzimwakabamba. Alimwi mulachita zintu zyiingi zili mbuli eezyo."

14 Eelyo Jesu wakayita makamu abantu wati, "Amundiswiilizye moonse mumvwisisisye eechi. 15 Taakwe chili kunze amuntu chikonzya ‘kumusofwaazya’ kuti chanjila mulinguwe. Pesi chisofwaazya muntu ncheecho chizwa mukati mumoyo wamuntu ‘nchiimusofwaazya.’

24 Jesu wakasiya busena oobo akuya kuchilikiti chaTaya. Wakanjila muŋanda alimwi teewakayanda kuti naba uumwi muntu azibe kuti mpali, nikuba boobo wakakachilwa kuyuba. 25 Mpawawo umwi mwanakazi wakali amwana wakalinjidwe muuya mubi, naakamvwa biyo atala aJesu wakaza wawida kumawulu aakwe. 26 Mwanakazi ooyo wakali wamusyobo wabaGilikki wakazyalilwa kuSayilofonisiya. Wakakumbila Jesu kuti atande muuya mubi uzwe kumwana wakwe musimbi.

27 Jesu wakati kulinguwe, "Lutaanzi leka bana balye zyoonse nzibayanda, nkaambo tachili chibotu pe kubweza chakulya chabana mpawo usoweele bankala."

28 Wakamuvwiila wati, "Iiyi Mwami, pesi alabo bankala balabwezelela bufwefwelenge bulosegwa abana munsi lyatebuli!"

29 Mpawo wakamwaambila kuti, "Mbwasandula oobo, kuya biyo, muuya mubi wazwa kale mumwana wako musimbi!"

30 Eelyo wakabweeda kuŋanda wajana mwana ulilede abulo, muuya mubi kuuli wazwa kale.

17 Mwaalumi wakali munkamu yabantu wakavwiila wati, "Muyiisi, ndakweetela mwanaangu, uujiswi muuya wasyataambi uchita kuti ataambuli pe. 18 Naa zyamubukila mwanaangu, nga wamusuntula. Umugwisya fulo kumulomo, akuluma ntwinyo mpawo ingawayuma chwa. Ndabakumbila basikwiiya bako kuti buutande muuya pesi taakwe nibakonzya pe."

19 Jesu wakavwiila wati, "Inywee nimulizyalane litasyomi, ndeelede kukkala chiindi chilamfu biyeni anywebo? Kuyooba lili kandimuchitila moyo mulamfu. Mweete mulombe ooyo kulindime." 20 Lino bakamweeta kuliJesu.

Muuya nuwakabona Jesu, mpawawo wakasuntula mulombe wamuzazamya chabukali. Wakawida aansi wabumbuluka, wazwa fulo mumulomo. 21 Jesu wakabuzya kuliwisi wamulombe wati, "Wabaachiindi chilibiyeni kaliboobu?

Wakasandula wati, Kuzwa kubuniini bwakwe," 22 "Chiindi chiingi ukkala kuumuwisizya mumulilo nikuba mumeenda kuuyanda kumujeya. Kuti kukonzya kuchita chintu, kutufwida luse utugwasye!"

23 Jesu wakati, "Waambaanzi, kuti nkuti kukonzya kuchita chintu? Zyoonse zilakonzeka naa kusyoma."

24 Mpawawo wisi wamulombe wakoompolola wati, "Ndasyoma; ndigwasye ndizunde kutasyoma kwangu!"

25 Jesu naakabona nkamu yabantu kabalookuchijanina kuli ooyu mulombe, wakulayilila muuya mubi, wakati, "Iwe nomuuya wakutamvwa asyataambi, ndakulayilila, ndati zwaa mulinguwe utabooli lubo."

26 Muuya wakakwiila, wakamuzazamya changuzu wazwa. Mwana mulombe wakalangika anga mutunta zyakuti bantu bayiingi bakati, "Wafwa." 27 Pesi Jesu wakamujata kuboko wamwiimikizya amawulu aakwe, mpawo mulombe wakayiimikila.

38 Eelyo Jesu wakabuka wazwa muchikombelo chabaJuda, mpawo wakaya kuŋanda yaSayimoni. Lino bajana bayinazyala baSayimoni baliikuchiswa loko, mpawo bakamukumbila kuti abakombele. 39 Mpawo wakasweena afwiifwi ambabo wakatingama alimwi wakalayilila chilwazi kuti chizwe, mpawo bapona, batalika kubakutawukila.

27 Mpawo Jesu naakazwa wakalyata kunkomwe, wakaswaniya mwaalumi uzwa muchisi wakala muuya mubi; kwachiindi chilamfu taakali kuzwaata zisamo pe, taakali kukkala muŋanda pesi mumagolo azibunda. 28 Naakabona Jesu, wakagawula, wawida kumawulu aakwe, mpawo wompolola ajwi pati wati, "Ujisi nzi andime, Jesu, Mwana waLeza Sijulu lyaMajulu? Ndakukumbila, kuti utandipenzyi." 29 Nkaambo Jesu wakalayilila muuya mubi kuti uzwe mumwaalumi ooyu. (Nkaambo chiindi chiingi wakali kunoonga wamusikila; wakali kulindwa, akwaangwa anketani kumaboko akumawulu, pesi wakali kuzidunsula alimwi wakali kutolwa asikazwa kubusena butakwe bantu.)

30 Eelyo Jesu wakamubuzya kuti, "Nduweni zina lyako?" Mpawo wakamuvwiila wati,

"Ndime Ligiyoni"; nkaambo wakalinjidwe abasikazwa bayiingi. 31 Mpawo yakamukumbila kuti atayitandili mumulindi utagoli.

32 Lino kwakali butanga bupati bwangulube bwakali kuchela kumbali achilundu; eelyo myuuya yakamukumbila kuti ikanjile mungulube. Mpawo wakiizumizya kuti iyeende. 33 Mpawo basikazwa bakazwa kuli ooyu mwaalumi mpawo bakunjila mungulube, mpawo butanga bwakachijana bwakukunukila mulwizi mpawo bwanikila.

34 Lino aabo beembeli nibakabona zyakachitika, bakachija, mpawo bakubaambila eezi muchisi amunyika. 35 Mpawo bantu bakazwa kukuyoolanga zyakachitika, alimwi bakaza kuli Jesu, mpawo bakamujana mwaalumi wakali abasikazwa bakali baandwa, kakkede kumawulu aJesu, kazweete alimwi kalomene; mpawo bakayoowa.

27 Pesi ndamwaambila kasimpe, kuli bamwi bayimvwi aawa tabakwe kuyoolabila lufu pe kabatana bona bwami bwaLeza."

28 Lino nikwayinda mazuba alimusanu aatatu awo Jesu nakaamba aaya majwi, wakeenda aPita aJoni aJakkobbu, mpawo wakatanta aabo chilundu kukuyookomba. 29 Mpawo naakalichili kukomba, busyu bwakwe bwakasanduka, alimwi zisamo zyakwe zyakatuba bu akubayima mbuli kalabi. 30 Alimwi laanga, baalumi babili bakali kwaambuula awe, aabo bakali Mozesi aElayija, 31 bakayubunuka mubulemu bwakwe alimwi wakaambuula aabo atala alufu lwakwe mbwaakaleelede kuyozuzikizigwa kuJerusalemu.

32 Lino Pita abaabo mbakali aabo, bakafuntwa ngonzi; nibakabuka, bakabona bulemu bwaJesu abaalumi babili bakaliimvwi aawe. 33 Alimwi aaba baalumi nibakali kwanzana, Pita wakati kuli Jesu, "Mwami, tee chibotu na kulindiswe kuti tukkale aano tuyake zidyumba izitatu, chimwi chako, chimwi chaMozesi, alimwi chimwi chaElayija." (Katazi nzyakali kwamba.)

38 Mpawawo uumwi mwaalumi wakali munkamu eeyi wakompolola wati, "Muyiisyi, ndakukumbila kuti ufwide luse mwanaangu, nkaambo ngunguwe alikke. 39 Alimwi laanga muuya mubi ngawamunjila, mpawo ulakwiila; alimwi ngawamuchisa mpawo wamugwisya kkovu, ngawamuzapawula mpawo uzwa chabuyumuyumu. 40 Ndakakumbila basikwiiya bako kuti bawutande pesi wakabakachila."

41 Mpawo Jesu wakavwiila wati, "Nywebo izyalani litakwe lusyomo liswekede, kuyooba liili kandichikkede andinywe akumulampisizya moyo? Amumweete okuno mwana."

42 Mulombe nakali kuyobuza kuli Jesu, sikazwa wakamusuntula wawida ansi, wakagwayala. Pesi Jesu wakalayilila muuya mubi, alimwi mulombe wakapona mpawo wakamutola kuli wisi.

43 Alimwi boonse bakagambwa kubona nguzu zyaLeza.

Pesi nibakachiligambide umwi awumwi kuzintu zyakachitwa aJesu, wakaambila basikwiiya bakwe wati,

14 Lino Jesu wakali kutanda sikazwa wasyatambi; lino sikazwa nuwakazwa, muntu ooyo syatambi wakaambula, alimwi bantu bakagamba.

50 Umwi wabasikwiiya wakabweza panga mpawo wakwazula kutwi lwakululyo lwamulanda wamupayizi mupati.

51 Pesi Jesu wakati, "Mutachiti oobu pe!" Mpawo wakajata kutwi kwamwaalumi mpawo wamuponiya.

24 Lino nibakeenda basikwiiya baJoni, wakatalika kwaambuula kunkamu atala aJoni wati, "Nimwakaya munkanda kuyoobona Joni, mwakali kuyeeya kuti wakalimbuli iinzi? Muyeyanga wakali kunooba mbuli tete na eelyo lyakawungwa aguwo? 25 Niinzi eelyo nchimwakaya kuyoboona? Mwaalumi uzweete malembo anjenjema na? Amulange, aabo basamide zisamo zyamidabba meebesi, bakkede kabotu alimwi balajanika mumaanda abulemu abami. 26 Niinzi eelyo zimwakaya kukuyolanga? Musinsimi na? Iiyi, ndamwaambila kuti, Joni ujisi mulimu mupati kwiinda musinsimi. 27 Ooyu ngunguwe, ooyo wakalembwa atala anguwe kuti: ‘Amulange, ndiyotuma simweenda nembo kubusyu bwanu, utakamubambile nzila njimutakutobele.’ "

28 "Ndamwaambila, akati kabo bazyedwe kumwanakazi taakwe mupati kwiinda Joni, pesi ooyu muniini kubwami bwa Leza ngumupati." 29 ✝Nibakamvwa eechi bantu boonse abasimutelo bakatambula Leza, nkaambo bakali babbapatizigwa lubbapatizyo lwaJoni; 30 pesi baFarisi abayiisi bamulawu bakakaka lulayo lwaLeza, nkaambo tebakabbapatizigwa pe aJoni.