1 Inywe nibaGalatiya bafubafuba! Ngwani wakamulowa, kunembo lyameso aani Jesu Kkirisitu mpaakapanduluulwa antanganana mbuli ugankamidwe? 2 Amundizumizye ndimubuzye eechi luzutu, mwakatambula Muuya ankaambo kamilimu yamulawu na, nikuba kuti akumvwa alusyomo? 3 Muli bafubafuba loko na? Kamuli mwakatanguna aMuuya, lino muliikujinsya amubili na? 4 Saa mwakapenzegwa zintu zyiingi chabiyo na? Kuti chachoonzyo zyakali zyabiyo. 5 Ooyo waabila Muuya kulindinywe alimwi kabeleka zigambyo akati kanu uchita oobo amilimu yamulawu na, nikuba akumvwa alusyomo?

6 Amuyeeye Abburahamu "wakasyoma Leza, alimwi wakaambwa mbuli musalali." 7 Aboobo mwazibona kuti mbantu balusyomo aabo bategwa mbana baAbburahamu. 8 Alimwi malembe, akaamba kale kuti Leza uyoolulamika batali baJuda alusyomo, akakambawukwa kale makani mabotu kuli Abburahamu, kuti, "Muli nduwe manyika woonse ayoolongezegwa." 9 Eelyo aboobo, aabo bantu balusyomo balalongezegwa aamwi aAbburahamu wakali alusyomo.

10 Nkaambo boonse babikkide moyo kumilimu yamulawu balikunsi alutuko; nkaambo kulilembedwe kuti, "Ngatukwe woonse utakkalilili muzintu zyoonse zilembedwe mubbuku lyamulawu." 11 Lino kuli antanganana kuti taakwe muntu ululamikwa kunembo lyaLeza kwiinda amulawu; nkaambo "Kufumbwa ululeme uyoopona mukwiinda mulusyomo." 12 Pesi mulawu tuukkali alusyomo pe, nkaambo "Kufumbwa uzichita eezi uyoopona anzizyo."

13 Kkirisitu wakatinununa kuzwa kulutuko lwamulawu, nguwe wakaba lutuko nkaambo kesu, nkaambo kulilembedwe kuti, "Ngatukwe woonse ulyaangilila amusamu" 14 kuchitila kuti muli Kkirisitu Jesu chilongezyo chaAbburahamu chikaakusike kuli batali baJuda, kuti tukatambule chisyomezyo chaMuuya mukwiinda mulusyomo.

15 Kupa chitondeezyo chabuntu, nibakwesu: taakwe umwi ukonzya kumweya kuyanda kwamuntu pe, nikuba kuyungizya kuli nkuko, kuti chazuminanwa. 16 Lino zisyomezyo zyakachitwa kuli Abburahamu akulunyungu lwakwe. Tachaambi kuti, "Alimwi kulunyungu," kachitondeka kubayingi; pesi, kachitondeka kuli uumwi, "Alimwi kulunyungu lwanu," chaamba kuti Kkirisitu. 17 Eechi nchindaamba: mulawu, ooyo wakasika nikwakayinda minyaka ili myaanda iine amakumi aatatu, tuukonzyi kulobya chizuminano chakale chakazumininwa aLeza, aboobo mbuli kuchita chisyomezyo chabiyo. 18 Nkaambo kuti lukono kaluli lwamulawu, nkukwaamba kuti taluchili lwachisyomezyo pe; pesi Leza wakalupa Abburahamu achisyomezyo.

19 Eelyo nkaamboonzi nikuli mulawu? Wakayungizigwa ankaambo kakubisya kwesu, mane lunyungu lukaze kuli yooyo wakachitwa chisyomezyo; alimwi chakananikwa abaangelo mukwiinda muli simwiimaakati. 20 Lino sikwiimaakati uyiimikilila uyinda uumwi pesi Leza ngumwi.

21 Eelyo mulawu ulwanisya zisyomezyo zyaLeza na? Peepe; nkaambo kuti mulawu wakapegwa kuti upe kupona, eelyo bululami nichoonzyo bwakali kunooba bwamulawu. 22 Pesi malembe akabikka zintu zyoonse kuchibi, kuchitila kuti eecho chakasyomezegwa kulusyomo muli Jesu Kkirisitu chikapegwe kuli baabo basyoma.

23 Lino lusyomo kalutanasika, twakali kupona kunsi amulawu, katubikkidwe aansi katudyaamizidwe mane lusyomo lukayubununwe. 24 Kuchitila kuti mulawu wakali sikutweendelezya mane kuza kwaKkirisitu, kuti tukalulamikwe alusyomo. 25 Pesi lino ankaambo kakuti lusyomo lwasika, tatuchili aansi asikutweendelezya pe.

26 Nkaambo muli Kkirisitu Jesu muli bana baLeza moonse, mukwiinda mulusyomo, 27 nkaambo mbuli bayiingi banu mbubakabbapatizigwa muli Kkirisitu bakasama Kkirisitu. 28 Taakwe nikuba muJuda nikuba mu Girikki, taakwe muzike nikuba waangunidwe, taakwe mwaalumi nikuba mwanakazi; nkaambo moonse muli bamwi muli Kkirisitu Jesu. 29 Alimwi kuti kamuli baKkirisitu, eelyo muli lunyungu lwaAbburahamu, muli basikukona bakwe mbuli chisyomezyo.