1 Eelyo nikwakayinda minyaka ilikkumi ayine ndakayinka lubo kuJerusalemu aBbanabbasi, alimwi ndakayinka aTayitasi. 2 Ndakeenda nkaambo Leza wakandiyubunwida, alimwi ndakapandulula mukavwindi kunembo lyabaabo bakali achiwa mbundakakambawuka kunembo lyabatali baJuda, ambweni muliimwi inzila ndinochijaana nikuba mbundakali kuchijaana kube kwabuyo. 3 Pesi nikuba Tayitasi, wakali andime, teebakamwaangila pe kuti apalulwe, nikuba kuti wakali muGirikki. 4 Aaka kaambo kabupalule kakabuka ankaambo kabakwesu babeji bakeetwa mukavwindi, bakalisyanikizya mukati kuti batweele lwangunuko lwesu ndutuli aalo muli Kkirisitu Jesu, kuti bakatunjizye mubuzike, 5 kuli mbabo teetwakazumina kuti tulifwinsye nikuba kayindi kaniini, kuti kasimpe kamakani mabotu kakakwabililwe nkaambo kandinywe.

6 Alimwi kuzwa kuli baabo bakali kulemekwa kuba chimwi kufumbwa mbubakalibede taakwe musiyano pe kulindime, Leza tasaluli pe, aabo, ndaamba kuti, bakali kulemekwa taakwe nchibakayungizya pe. 7 Pesi muli iimwi nzila, nibakabona kuti ndakasyomegwa amakani mabotu kuli batali baJuda, mbuli Pita mbwakapegwa makani mabotu kubaJuda. 8 Nkaambo woonse wakabeleka mukwiinda mumutumwa Pita kumulimu kubaJuda wakabeleka mukwiinda mulindime alubo kuli batali baJuda, 9 alimwi Jakkobbu aSifasi aJoni aabo bakali kulemekwa mbuli misemo mumbungano nibakabona luzyalo oolo ndundakapegwa, bakapa ndime aBbanabbasi cheelelo chabulidilano, kuti tweelede kwiinka kuli batali baJuda akubaJuda, 10 bakayanda luzutu kuti tuyeeye bachete, nchicho loko nchindakali kuyandisya kuchita.

11 Pesi Sifasi naakasika kuAntiyokki ndakamukalalila antanganana, nkaambo wakali amulandu. 12 Nkaambo kakutanasika bamwi bantu bakazwa kuli Jakkobbu, wakalya abatali baJuda; pesi nibakasika wakasosoloka mpawo walipambula, kayoowa nkamu yabaJuda. 13 Alimwi anguwe abamwi baJuda boonse bakatalika kuchita mbuli nguwe kuupawupa, mane nikuba Bbanabbasi alakwe wakanjila mukuwupawupa kwabo. 14 Pesi nindakabona kuti tabaluleme mbuli mukasimpe kali mumakani mabotu, ndakaambila Sifasi kunembo lyabo boonse kuti, "Kuti iwe, nikuba muJuda, wapona mbuli utali muJuda alimwi peepe mbuli muJuda, nga ulaangila biyeni batali baJuda kuti bapone mbuli baJuda?"

15 Iswe lwesu, nituli baJuda akuzyalwa alimwi peepe batali baJuda basizibi, 16 anukuti tulizi kuti muntu talulamikwi amilimu yamulawu pe pesi mukwiinda mulusyomo muli Jesu Kkirisitu, nikuba iswe alesu twakasyoma muli Kkirisitu Jesu, kuti tukalulamikwe alusyomo muliKkirisitu, alimwi peepe amilimu yamulawu, nkaambo amilimu yamulawu taakwe naba uumwi uyoolulamikwa. 17 Pesi kuti, mukweezya kwesu kuti tululamikwe muli Kkirisitu, iswe lwesu twakajanika katuli basizibi, Kkirisitu eelyo waba mulanda wachibi na? Peepe teembubo pe! 18 Pesi kuti ndayakulula lubo zintu nzindakamweya, eelyo ndalitondeezya sikutyola mulawu. 19 Nkaambo mukwiinda mumulawu ndakafwa kumulawu, kuti ndikaponene muliLeza. 20 Ndakagankaminwa antoomwe aKkirisitu, tandichili ndime pe nindipona, pesi Kkirisitu nguupona mulindime, alimwi buumi mbundipona lino mumubili ndibupona alusyomo muMwana waLeza, ooyo wakandiyanda akulyaaba nkaambo kangu. 21 Tandikonzyi kukaka luzyalo lwaLeza pe, nkaambo naa kululamikwa nkwamukwiinda amulawu, chaamba kuti Kkirisitu wakafwida chabiyo.