1 Nkaambo kalwaangunuko Kkirisitu wakatwaangununa, nkikaako ngamwiimikile nji, alimwi mutalituuli lubo kujokwe lyabuzike.

2 Lino ime, Pawulu, ndaamba kuti kulindinywe kuti mwatambula bupalule, Kkirisitu unooli katachikwe mulimu pe kuli ndinywe. 3 Ndasinizya lubo kuli woonse utambula bupalule kuti ulaangidwe kubamba mulawu woonse. 4 Mwalipambula kuzwa kuli Kkirisitu, inywe nimuchiyanda kululamikwa amulawu; mwazwa kuzwa kuluzyalo. 5 Nkaambo mukwiinda muMuuya, alusyomo, tulindila bulangilizi bwabululami. 6 Nkaambo muli Kkirisitu Jesu bupalule nikuba kutapalulwa tazikwe mulimu pe, pesi cheelede ndusyomo lubeleka mukwiinda muluyando.

7 Mwakalikuchijaana kabotu loko; ngwani wakamukasya kuzwa kukuswiilila kasimpe? 8 Kumukombelezya takuzwi kuli Leza pe ooyo wakamwiita. 9 Busweezyo buche bulabizya mulwi woonse. 10 Ndili abusichaamba muMwami kuti tamukwe kuyoobweza muzeezo umbi pe kwiinda wangu; alimwi ooyo umupenzya uyoobetekwa, kufumbwa ngwani.

11 Bakwesu, pesi kuti mebo, kandichikambawuka bupalule, nkaamboonzi nindichipenzegwa? Aboobo chilebyo chachiingano chagwisigwa. 12 Ndilombozya aabo bamunyonganya kuti balizibe!

13 Bakwesu, nkaambo inywe mwakayitwa kulwaangunuko, mutabelesyi lwaangunuko lwanu mbuli mweenya wakubotezya mibili luzutu, pesi mukwiinda muluyando amube balanda bawumwi awumwi. 14 Nkaambo mulawu woonse ulazuzukizigwa mumulawu uumwi waamba kuti, "Yanda nguyakilene aawe mbuli mbuliyanda." 15 Pesi kuti mwalumana akulyana ngamuchenjele kuti mutamanani.

16 Pesi ndaamba kuti, mweende chaMuuya, ankaambo kacheechi tamukwe kuzuzukizya ziyandisyo zyamubili. 17 Nkaambo ziyandisyo zyamubili zilalwana aMuuya, alimwi ziyandisyo zyaMuuya zilalwana amubili; nkaambo eezi zilakazyana, kuti zikukasye kukuchita eecho nchuyanda. 18 Pesi kuti kamuzulidwa aMuuya tamuli aansi amulawu pe.

19 Lino milimu yamubili ili antanganana: bwaamu, busofwazi, zisusi zibi, 20 kukomba mizimu, bulozi, nkondo, bulwani, ibbivwe, lunyemo, kutangala, inkondo, mipampumipampu, 21 munyono, kukolwa, misalo yamunyika, azimwi zili boobo. Ndamuchenjezya, mbuli mbundakamuchenjezya kale, kuti aabo bachita zintu ziliboobo tabakwe kuyookona bwami bwaLeza pe.

22 Pesi michelo yaMuuya nduyando, lukondo, luumuno, moyomulamfu, buuya, bubotu, kusyomeka, 23 kulibombya, kulibatamika; atala azeezi taakwe mulawu pe. 24 Alimwi aabo balikuli Kkirisitu Jesu bakagankamina mibili yabo azisusi zyayo aziyandisyo. 25 Kuti twapona achaMuuya, alubo ngatweendelezegwe achaMuuya. 26 Tatweelede kulisumpula pe, peepe kudyokolana, peepe bbivwe kuli uumwi awumwi.