1 Ndaamba kuti sikukona, kuti kali mwana, tali mbubo kwiinda muzike, nikuba kuti nguumuna wabuvubi boonse; 2 pesi uli aansi abaleli abamweendelezya mane kubuzuba bwakabikkwa awisi. 3 Mbumbubo andiswe; nitwakali bana, twakali bazike kutunsiyansiya twamyuuya yamumulengalenga. 4 Pesi chiindi nichakazulila, Leza wakatuma Mwana wakwe, wakazyalwa kumwanakazi, wakazyalwa kunsi amulawu, 5 kuti anunune aabo bakali aansi amulawu, kuchitila kuti tukatangilwe mbuli bana baLeza.

6 Alimwi nkaambo muli bana, Leza wakatuma Muuya waMwana wakwe mumyoyo yesu, woompolola kuti, "Abba! Taata!" 7 Aboobo mukwiinda muli Leza tuchili muzike pe pesi mwana, alimwi kuti kuli mwana eelyo uli sikukona.

8 Kuchiindi chakayinda, kamutana ziba Leza, mwakali mubuzike kuzintu eezyo abulenge ziteensi baleza; 9 pesi lino mbuli mbumwakaziba Leza, nikuba kuti mulizibikene aLeza, ngamulabweeda biyeni lubo kubukompami abatakwe mulimu, muchiyanda kuba bazike bali biyeni lubo? 10 Mubamba mazuba amyeezi azyiindi aminyaka! 11 Ndayoowa kuti ndakabelekela chabiyo alindinywe.

12 Nibakwesu, ndamukumbila, mube mbuli mbundibede, nkaambo andime ndakali mbuli mbumubede. Taakwe chibi nchimwakachita pe kulindime; 13 mulizi kuti zyakali ankaambo kamachise amubili kuti ndikambawuke makani mabotu kulindinywe lutaanzi; 14 alimwi nikuba chiimo changu chakali chakusunkwa kuli ndinywe, taakwe nimwakandiwela pe nikuba kundilangila aansi, pesi mwakanditambula mbuli mungelo waLeza, mbuli Kkirisitu Jesu. 15 Niinzi nchimwakamvwa chakapa kuti mukkutikane? Nkaambo ndimujisidili bukamboni bwakuti, koonzyo zyalikukonzeka, mwali kunoononkola meso aanu mpawo kamundipa. 16 Eelyo ndaba sinkondonyokwe na akumwaambila kasimpe?

17 Bachita zyiingi atala andinywe, pesi kakutakwe chibotu pe; bayanda kumujalila aanze, kuti mubachitile zyiingi. 18 Nkaambo kakuchita bubotu nchibotu kuti kuchitwe oobo lyoonse, alimwi peepe luzutu nindili andinywe. 19 Nibana bangu, aabo mbindili mukumyongwa lubo mane Kkirisitu abumbwe mulindinywe! 20 Ndilombozya kuba andinywe lino akusandula maambwiido aangu, nkaambo ndapengaana atala andinywe.

21 Mundaambile, inywe nimuyandisya kuba aansi amulawu, tamuumvwina mulawu? 22 Nkaambo kulilembedwe kuti Abburahamu wakali abana babili, umwi wakazyalwa kumuzike alimwi umwi kumwanakazi walwaangunuko. 23 Pesi mwana wamuzike wakazyalwa mukwiinda kumubili, mwana wamwanakazi walwaangunuko wakazyalwa mukwiinda kuchisyomezyo. 24 Lino ooyu mukozyanisyo biyo: banakazi aaba nzizuminano zibili. Uumwi uzwa kuchilundu chaSinayi, uzyala bana babuzike; nguHaga. 25 Lino Haga nchiichilundu chaSinayi muArabbiya; wiimikilila Jerusalemu ilisunu, nkaambo ulimubuzike abana bakwe. 26 Pesi Jerusalemu ulikujulu ulaangunukide, alimwi mbiibaama besu. 27 Nkaambo kulilembedwe kuti,

"Sekelela, iwe nungomwa, eeyo itazyali;

pasuka mpawo woompolole, iwe nuutamyongwi;

Nkaambo bana bawulekedwe mbayingi loko

kwiinda bana bayooyo ukwetwe."

28 Lino inywe, bakwesu, mbuli Ayizekki, muli bana bachisyomezyo. 29 Pesi mbuli kuchiindi eechiya ooyo wakali wazyalwa kumubili wakapenzya ooyo wakazyalwa mbuli kuMuuya, aboobo mbukubede lino. 30 Pesi malembe atyeni? "Tanda muzike amwana wakwe mulombe; nkaambo mwana mulombe wamuzike takonzyi kujana lukono amwana mulombe wamwanakazi walwaangunuko." 31 Aboobo, bakwesu, tatuli bana bamuzike pe pesi bamwanakazi walwaangunuko.