1 Bakwesu, naa muntu wazundwa muchibi, inywe nimupona chamuuya mweelede kumuboozya amoyo mubombe. Amuchenjele, ambweeni inywe alanu mulasunkwa. 2 Ngamunyampuzyane mikuli, alimwi mukuchita oobu mulazuzikizya mulawu waKkirisitu. 3 Nkaambo naa umwi wayeeya kuti nchimwi chintu, anukuti peepe, ooyo ulalyeena lwakwe. 4 Pesi uumwi awumwi ngasunke mulimu wakwe, alimwi eelyo kulikankayizya kwakwe kulaba kwakwe aliikke peepe kuli ngwayakilenaawe. 5 Nkaambo muntu woonse weelede kunyampula mukuli wakwe.

6 Muleke ooyo uyiisigwa ijwi lyaLeza aabane zyoonse zintu zibotu ayooyo uyiisya.

7 Mutayenwi; Leza taniyakwi, nkaambo kufumbwa muntu nchaabyala, nchiinchicho nchayotebula lubo. 8 Nkaambo ooyo ubyala bukompami kumubili wakwe uyootebula bukompami kuzwa kumubili; pesi ooyo ubyala kumuuya uyootebula buumi butamani kuzwa kuMuuya. 9 Alimwi tutakatali mukuchita bubotu, nkaambo muchiindi cheelede tuyootebula, kuti teetwabola moyo. 10 Eelyo aboobo, mbuli mbutujisi mweeenya, ngatuchite chibotu kubantu boonse, alimwi kapati kuli aabo bakuŋanda yalusyomo.

11 Ngamulange mabala mapati ngindimulembela aluboko lwangu ndimwini. 12 Chili kuli baabo bayanda kulitondeezya kabotu mumibili kuti bamupenzye kuti mupalulwe, alimwi kuchitila kuti batapenzegwi luzutu nkaambo kachiingano chaKkirisitu. 13 Nkaambo nikuba aabo bapalulwa, tababambi mulawu pe, pesi bayanda kuti inywe mupalulwe kuti babe abulemu mumibili yanu. 14 Pesi tandikwe kulikankayizya pe kunze kwakulikankayizya atala achiingano chaMwami wesu Jesu Kkirisitu, mukwiinda anchicho nyika nchiyakagankaminwa kuli ndime, andime kunyika. 15 Nkaambo nikuba bupalule tabwaambi chintu pe, nikuba kutapalulwa, pesi cheelede mbulenge bupya. 16 Luumuno aluse lube kuli boonse beenda alulayo oolu, atala aIzirayeli waLeza.

17 Mpawo lino kutabi muntu undipenzya; nkaambo ndijisi impa zyaJesu amubili wangu.

18 Bakwesu, luzyalo lwaMwami wesu Jesu Kkirisitu ngalube amuuya wanu. Ameni.