1 Eelyo Jesu wakati kuli basikwiiya bakwe, "Kwakali mwaalumi muvubi wakali amubanzi, alimwi milandu yakeetwa kulinguwe kuti ooyu mwaalumi wakatakanisya zintu zyakwe. 2 Aboobo wakamwiita mpawo wati kulinguwe, ‘Niinzi eechi nchindiliikumvwa atala anduwe? Kondipandulwida abubanzi bwako, nkaambo tuchiyoobi mubanzi pe.’ 3 Mpawo mubanzi wakati mumoyo wakwe, ‘Ndichite biyeni, mbukunga simalelo wangu uyanda kubweza bubanzi bwakwe kuzwa kulindime? Tandikwe nguzu pe zyakusya, alimwi ndili abweeme bwakukumbila. 4 Ndayeeya nzindiyanda kuchita, kuchitila kuti bantu bakanditambule mumaanda aabo eelyo nindiyoogwisigwa mulimu wangu wakubamba.’ 5 Aboobo, wakayita umwi awumwi woonse wakali achikwelete kuli simalelo wakwe, wakati kumutanzi, ‘Ulaamalinzi njujisi yasimalelo wangu?’ 6 Wakamuvwiila wati, ‘Ndilaamwaanda wamweelo wamagaloni alimusanu ayitaatu wamafuta.’ Mpawo wakati kulinguwe, ‘Bweza lugwalo lwachikwelete chako mpawo ukkale aansi chakufwaambana mpawo ulembe magaloni alimwaanda iine.’ 7 Eelyo wakati kuli umbi, ‘Ujisi maliinzi yasimalelo wangu?’ Wakati, ‘Ndilaamwaanda ilikkumi wamweelo wazilyo.’ Wakati kuli nguwe, ‘Bweza lugwalo lwako lwachikwelete ulembe kuti mwaanda ilimusanu aatatu yamasaka yazilyo.’ 8 Simalelo wakalumbayizya ooyo sikubamba buvubi utaluleme mukuchita chamaanu; nkaambo bana banyika eyiino bali amaanu mukuchita azyazyalani lyabo kwinda bana bamumuni.

9 Alimwi ndamwaambila, amulichitile beenzunyokwe amali italuleme, kuchitila kuti dozyakachila bakamutambule mubukkale butamani. 10 Ooyo usyomeka muziniini ulasyomeka alubo muzyiingi; alimwi ooyo utasyomeki muziniini alubo tasyomeki pe muzyiingi 11 Kuti eelyo kamutasyomeki mumali italuleme, ngwani uyoomusyoma mubuvubi bwinibwini? 12 Alimwi kuti kamutakwe mwakasyomeka muli eecho chawumwi, ngwani utakamupe izyanu?

13 Taakwe mulanda ukonzya kukutawukila basimalelo babili; nkaambo ulakonzya kusula umwi akuyanda umwi, nikuba uyoolipeda kuli umwi mpawo akasule umwi. Tukonzyi kubelekela Leza amali."

14 BaFarisi, bakali basimuyanda mali, bakamvwa zyoonse eezi, mpawo bakamuweela. 15 Eelyo wakati kuli mbabo, "Muli aabo balisalazya kunembo lyabantu, pesi Leza ulizi myoyo yanu; nkaambo chisumpulwa akati kabantu nchisesemyo kubusyu bwaLeza.

16 "Mulawu waMozesi amalembe abasinsimi akaliwo mane chiindi chaJoni; aboobo kuzwa eecho nchiindi makani mabotu abwami bwaLeza alii kukambawukwa, alimwi woonse unjila kulimbubo achabukali. 17 Pesi nchuuba kuti julu anyika zimane, kwiinda kafwapu kamwi kamulawu kuti kalubigwe.

18 Kufumbwa mwaalumi uleka mwanakazi wakwe mpawo wakwata uumbi wachita bwaamu, alimwi alakwe mwaalumi ukwata mwanakazi wakalekwa amulumi wakwe wachita bwaamu.

19 Eelyo Jesu wakati, "Kwakali umwi mwaalumi muvubi, wakali kusama mudabba wakamweenvwe alimwi muteteete uŋayima alimwi wakali kulya kabotu mazuba woonse. 20 Alimwi kumulyango walubuwa lwamuvubi kwakali kubikwa umwi mwaalumi muchete utegwa Lazarasi, kazwide zilonda, 21 wakali kulombozya kulya zyakali kuwa kuzwa kutebuli lyamuvubi; alimwi bankala bakali kuza kabali kumunyankuta zilonda zyakwe. 22 Mwaalumi muchete wakafwa mpawo wakabwezegwa abaangelo kuchaamba chaAbburahamu. Mwaalumi muvubi alakwe wakafwa mpawo wakavwikwa; 23 mpawo muuya wakwe wakaya muchikkalilo chabafu, kalokupenzegwa, wakabusya busyu bwakwe, alimwi wakabona Abburahamu kulaale aLazarasi nkali kuchaamba chaAbburahamu. 24 Alimwi muvubi wakayita wati, ‘Taata Abburahamu, kondifwida luse, mpawo utume Lazarasi kuti adompe kanwe kakwe mumeenda mpawo azotontozye lulimi lwangu; nkaambo ndatama mumulilo ooyu.’ 25 Pesi Abburahamu wakamuvwiila wati, ‘Mulombe, yeeya kuti iwe muchiindi chabuumi bwako wakajana zintu zibotu, alimwi Lazarasi wakali kujana zintu zibi; pesi lino ulimukuumbulizigwa okuno, mpawo iwe uliikutama. 26 Alimwi kakutali boobo, akati kesu anduwe kubikkidwe mugaano mupati, kuchitila kuti aabo bayanda kuza oko kulinduwe batakonzyi pe, alimwi taakwe uyootimbula kuzwa ooko kaza kulindiswe.’ 27 Alimwi wakati, ‘Eelyo ndakumbila, taata, kuti umutume kuŋanda yataata, 28 nkaambo ndilaabakulana balimusanu, kuchitila kuti akabachenjezye, nkaambo ngabalasika kubusena oobu bwakutama.’ 29 Pesi Abburahamu wakati, ‘Nkwali malembe aMozesi abasinsimi; ngakabakabaswilile.’ 30 Mpawo wakati, "Peepe, taata Abburahamu; pesi kuti umwi wayinka kulimbabo uzwa kubafu, bayoosanduka.’ 31 Wakati kulinguwe, ‘Kuti kabatakonzyi kuswiilila malembe aMozesi abasinsimi, taakwe nibayoozumina pe nikuba kukabuke uzwa kubafu.’ "