1 ✝Naakamana kwaambuula zyoonse kubantu bakali kuswiilila wakanjila mudolopo lyaKkapenawumi. 2 Kwakali silutwe mupati wankamu yabasilumamba yabaRoma wakajisi mulanda wakali muyandisyi* kulinguwe, lino ooyo mulanda wakwe wakali kuchiswa kuchiimo chakufwa. 3 Naakamvwa atala aJesu, wakatuma bapati baba Juda, kuti bayiinke kukumukumbila kuti aze mpawo amuponiye mulanda wakwe. 4 Mpawo nibakasika kuli Jesu, bakamukumbila muchoonzyo, bati, "Kuti nkazichita ooyu twakumbila kuti twiinke aamwi ukaakuponiye mulanda ooyu, 5 nkaambo ulachiyanda chisi chesu, alimwi ngunguwe wakatuyakila busena bwakukombela."

6 Alimwi Jesu wakeenda aabo. Lino naakasika afwiifwi aŋanda yasilutwe wabasilumamba, mpawo silutwe ooyo wakatuma mweenzunyina kuti ati kuli Jesu, "Mwami utali penzyi numwini, nkaambo tandeelede pe kuti unjile mukaluli kaŋanda yangu; 7 nkikaako nchinditakwe nindayeeya kuza kulinduwe. Pesi waamba biyo ijwi lyako, mpawo mulanda wangu ulapona. 8 Nkaambo ambebo ndijisi nguzu ndimwaalumi ubeleka ansi amulawu, alubo ndijisi nkamu yabasilumamba babeleka munsi lyangu; naa ndabalayila ndati ‘Kuya!’ ulayinka alimwi kuli umwi, ndati, ‘Kuza!’ alimwi ulasika; alimwi kumuzike wangu, ‘Chita oobu!’ mpawo ulachichita."

9 Jesu naakamvwa eechi, wakagamba, mpawo wakalanga nkamu yakali kuyobumutobela, mpawo wakabaambila wati, "Ndiliikumwaambila nikuba mu Izirayeli takukwe nindalinajana lusyomo lulibobu, pe."

10 Lino aabo bakatumwa nibakabweeda kuŋanda, bakaakujana mulanda ooyu wapona.

11 Jesu naakamana aawo, wakaya kuchiisi chaNayini; abasikwiiya bakwe ankamu mpati bakayinka aamwi anguwe. 12 Lino Jesu nakaamba kusika kumulyango wamuunzi, alimwi wakaswana bantu bakanyampwide mutunta, kali mwana mulombe uumwi wamukamufu, bantu bayiingi bamumuunzi bakali kuyobweenda aawe. 13 Alimwi Mwami naakamulanga, wakamufwida luzyalo, mpawo wakamwaambila wati, "Utalili pe." 14 Mpawo wakayinka waguma buyalangwe, bakali nyampwide buyalangwe bakayimikila mpawo wakati "Mulombe, ndati kulinduwe, buka." 15 Alimwi oyu mwaalumi wakali fwide wakabuka wakkala, wakatalika kwaambuula. Mpawo wakamupeda kuli bayina.

16 Boonse bakasikilwa kuyoowa kupati, mpawo bakalumbayizya Leza, bakati, "Musinsimi mupati wabuka akati kesu!" Alimwi, "Leza watuswaya bantu bakwe."

17 Lino mpuwo yakwe yakeendelela mumasena woonse aJudiya, amasena abambene achisi eecho.

18 Alimwi basikwiiya baJoni bakamwaambila zintu zyoonse. 19 Lino Joni, wakayita basikwiiya bakwe babili, wabatuma kuMwami, kukuyobuzya kuti, "Ndunduwe na wakaambwa kuti uleelede kuzosika? Naakuti tuchilaawumbi uchiza?"

20 Aaba baalumi nibakasika kulinguwe bakati, "Joni Mubbapatizi watutuma kulinduwe, wati, ‘Nduwe na weelede kuza, naakuti kuli umbi ngutweelede kulangilizya’?" 21 Mpawo muchindi eecho wakaponiya bakala malwazi asiyene amyuuya mibi abayiingi boofu bakabona.

22 Lino wakabavwiila, basikwiiya wati, "Kamuya mukamwaambile Joni zyoonse nzimwabona akumvwa: Boofu balabona, bateendi baleenda, balachipele ulabasalazya, batamnvwi balamnvwa, bafwide balabuka, kubachete ijwi lyamakani mabotu lila kambawukwa. 23 Alimwi ulaachoolwe ooyu muntu utalebwi nkaambo kangu."

24 Lino nibakeenda basikwiiya baJoni, wakatalika kwaambuula kunkamu atala aJoni wati, "Nimwakaya munkanda kuyoobona Joni, mwakali kuyeeya kuti wakalimbuli iinzi? Muyeyanga wakali kunooba mbuli tete na eelyo lyakawungwa aguwo? 25 Niinzi eelyo nchimwakaya kuyoboona? Mwaalumi uzweete malembo anjenjema na? Amulange, aabo basamide zisamo zyamidabba meebesi, bakkede kabotu alimwi balajanika mumaanda abulemu abami. 26 Niinzi eelyo zimwakaya kukuyolanga? Musinsimi na? Iiyi, ndamwaambila kuti, Joni ujisi mulimu mupati kwiinda musinsimi. 27 Ooyu ngunguwe, ooyo wakalembwa atala anguwe kuti: ‘Amulange, ndiyotuma simweenda nembo kubusyu bwanu, utakamubambile nzila njimutakutobele.’ "

28 "Ndamwaambila, akati kabo bazyedwe kumwanakazi taakwe mupati kwiinda Joni, pesi ooyu muniini kubwami bwa Leza ngumupati." 29 ✝Nibakamvwa eechi bantu boonse abasimutelo bakatambula Leza, nkaambo bakali babbapatizigwa lubbapatizyo lwaJoni; 30 pesi baFarisi abayiisi bamulawu bakakaka lulayo lwaLeza, nkaambo tebakabbapatizigwa pe aJoni.

31 "Ndiyobakozyanisya anzi bantu bazyalani elino? Alimwi bali mbuliinzi? 32 Bali mbuli bana bakkede kulubuwa bwakusambalila, mpawo balokuyita umwi awumwi kabali kuti, ‘Twakamusibila nyeele, pesi teemwakazyana pe; alimwi twakamulizya, temwakalila pe.’

33 Nkaambo Joni muBbapatizi wakaza katalyi chinkwa nikuba kunywa wayini; mwakamwamba kuti, ‘Ujisi muuya mubi.’ 34 Mwana aMuntu wakaza kali kulya akunywa; pesi mwakati, ‘Amulange ngusindya amukolwi, alimwi mweenzunyina wabasimutelo abasizibi!’ 35 Anukuti busongo bulasalazya mubana bakwe boonse."

36 Lino umwi wabaFarisi wakamukumbila kuti akalye awe, mpawo wakayinka wakunjila muŋanda yamuFarisi, mpawo bakkala atebuli balya. 37 Mpawo laanga, umwi mwanakazi wamuchisi eecho wakali sizibi, nakamvwa kuti Jesu mpali muŋanda yamuFarisi, ulikkede kaliikulya, wakaza akankuli kadula kamafuta anunkilila, 38 alimwi wakaliimvwi kusule kumawulu aakwe, kalokulila, wakali kutetya mawulu akwe amisozi yakwe, akwiisinda amasusu aakwe amumutwe wakwe, mpawo wamyoonta mawulu aakwe, mpawo wakaananika amafuta anunkilila. 39 Lino muFarisi wakali mutambide naakazibona, wakaamba chamumoyo wakwe wati, "Ooyu mwaalumi naali musinsimi, naaziba kuti ooyu mwanakazi wamujata kuti ngwani, nkaambo ngusizibi."

40 Alimwi Jesu wakavwiila wati, "Sayimoni ndilazyakukwaambila", mpawo wakamuvwiila wati,

"Muyiisi, kundaambila?"

41 "Kwakali uumwi sikukweletisya wakajisi bantu babili bakali azikwelete; uumwi wakalijisi iimyaanda ilimusanu yamakkobili, alimwi umwi wakajisi makumi alimusanu. 42 Alimwi takukwe nibakalijisi chakubbadala mulandu ooyu, mpawo ooyu mulandu ngubakalawo bakalekelelwa. Lino ngamundaambile, ngwani akati kabo uyoomuyandisya?"

43 Sayimoni wakavwiila wati, "Ndiyeeya kuti ooyu wakalekelelwa kapati ooyo wakalijisi mulandu mupati." Wakamwaambila wati, "Waamba kasimpe mbubo wabeteka obotu." 44 Mpawo wakacheba walanga kumwanakazi ooyu, alimwi wati, kuli Sayimoni, "Laanga ooyu mwanakazi? Ndanjila muŋanda yako, takukwe nuwandipa maanzi kuti ndisambe mawulu angu, pesi mwanakazi ooyu wasanzya mawulu angu amisozi yakwe, wandibukusa amasusu akwe. 45 ‘Takukwe nuwamyoonta mawulu angu pe, pesi ooyu mwanakazi kuzwa muchiindi naasika muŋanda, takukwe naaleka kumyoonta mawulu angu pe.’ 46 Takukwe nuwananika mutwe wangu pe amafuta, pesi ooyu mwanakazi wananika mawulu angu amafuta anunkilila. 47 Alimwi ndamwaambila kuti, zibi zyakwe zyaliziyiingi, zyalekelelwa nkaambo wayanda chakwindilila, pesi kuli ooyu ulekelelwa buniini, alakwe uyanda buniini."

48 Mpawo wakamwaambila wati, "Zibi zyako zyalekelelwa."

49 Alimwi aabo bakakkede aamwi anguwe kabaliikulya aamwi atebuli, mpawo bakatalika kungunguna akati kabo kabati, "Ngwani ooyu, ukonzya kulekelela zibi?"

50 Mpawo Jesu wakati kumwanakazi ooyu, "Lusyomo lwako lwakufutula; yinka muluumuno."