1 Jesu naakalanga mpawo wakabona bavubide kababikka zipo zyabo muchiyobwedo; 2 Mpawo wakabona mukamufu muchete kaliikubikka tukkobili tubili. 3 Mpawo wakati, "Kasimpe ndamwaambila, ooyu mukamufu muchete wapa kwiinda boonse; 4 Nkaambo boonse bakapa zipo zyabo mbuli mubwiingi bwabuvubi bwabo, pesi we mubuchete bwakwe wapa zyoonse nzyaalazyo."

5 Mpawo bamwi basikwiiya bakali kwaambuula atala aŋanda yaLeza, ambuyakali kweebeka amabwe mabotu azipo, wakati, 6 "Kulizezi zintu nzimubwene, mazuba ayoosika aawo nikutakakubulike ibbwe litakaakuchale atala alilimwi litakabule kuwalilwa aansi."

7 Alimwi bakamubuzya kuti, "Muyiisi, ndilili niziyoobawo, mpawo niinzi chiyooba chitondezyo niziyoowamba kuchitika?"

8 Mpawo wakati, "Ngamuchenjele kuti mutayungwi; nkaambo bayingi bayooza kulindinywe muzina lyangu, kabaamba kuti, ‘Ndiindime Mesiya!’ alimwi, ‘Chiindi chaba afwiifwi!’ Mutakabatobeli pe. 9 Mpawo mwaakumvwa nkondo akunyongana, mutakagambwi; nkaambo eezi zintu ziyelede kuyoochitika saansi, pesi mamanino taanoli asika pe."

10 Eelyo wakati kulimbabo, "Chisi chiyoolwana achisinyina, alimwi bwami buyoolwana abwaminyina; 11 kuyooba muzuzumo mupati munyika, alimwi mumasena asiyenesiyene kuyooba bbalangwe amalwazi; alimwi kuyooba zintu ziyoosya azitondezyo zipati kuzwa kujulu. 12 Pesi kakutana kuboobu bayoomuuma akumusonsya, bakamwaabe muzikombelo zyabaJuda amuntolongo, boyoomweeta kunembo lyabami abendeelezi nkaambo kazina lyangu. 13 Eechi chiyooba chiindi chanu mukape bukamboni. 14 Amuzibambe eezi mumiyeeyo yanu, mutayeeyi mumizeezo yanu kuti muyoovwila kamutyeni; 15 Nkaambo ndiyoomupa majwi aayo abusongo, nzibatakwe kuyookonzya basinkondonyokwe kumulwanisya nikuba kukazya. 16 Muyoowabwa nikuba abazyali banu abanyoko abamukowa wanu abakulana bako; alimwi bamwi bantu batali baJuda pe bayoojeyegwa; 17 Mpawo muyoosulwa aboonse nkaambo kazina lyangu. 18 Pesi takukwe nuuba muntenga wasusu lilimumitwe yanu liyoonyonyonwa. 19 Akukakatila muyoovuna myuuya yanu."

20 "Pesi mwaakubona Jerusalemu kazyungulukidwe abasilumamba, ngamukazibe kuti lunyonyoono lwaba afwiifwi. 21 Eelyo muleke aabo bali muJudiya bakachijile mutulundu amumalundu; alimwi amuleke balimukati lyagunzi bakazwe; mutabazumizyi bali kunze anyika kuti banjile; 22 nkaambo aaya anooli ‘Mazuba akubweedezya,’ kuti zyoonse zyakalembwa zikazuzikizigwe. 23 Maawe kuli aabo balaamala, alimwi abaabo banyonsya mumazuba aayo! Nkaambo kuyooba mapenzi mapati munyika eeyo, abukali atala abantu aabo; 24 bayoojezegwa apanga, mpawo bayootolwa mubuzike kumanyika woonse; alimwi Jerusalemu uyoolyatulwa abatali baJuda, mane chiindi chabatali baJuda chikazulile."

25 Jesu wakati, "Mpawo kuyooba zitondezyo kuzuba akumweezi akunyeenyezi aanyika manyika ayoowuusa akukatazigwa kukuvuuma kwalwizi amayuwe, 26 bantu bayoosuntuka nkaambo kakuyoowa, abulangizi kuzintu ziyoosya zichiza kunyika; nkaambo inguzu zyamajulu ziyoozunganisigwa. 27 Mpawo bayoobona Mwana aMuntu kaza mujoba anguzu abulemu bupati. 28 Lino mwaakubona eezi zyakutalika kuchitika, mukalange kujulu akubusya mitwe yanu, nkaambo lufutuko lwanu lunoli lwaba afwiifwi."

29 Lino Jesu wakaamba chikozyanisyo wati, "Amulange kumusamu wamukuyu, amisamu yoonse; 30 niyasyuuka ndelema, muyoolibonena lwanu kuti mayinza asika. 31 Alimwi mwaakubona eezi zintu zyachitika, mukazibe kuti bwami bwaLeza bwaba afwiifwi.

32 Ndamwaambila kasimpe, izyalani eeli talikwe kuyooyiinda pe mane zyoonse zikazulile. 33 Ijulu anyika zilayinda, pesi majwi angu takoyooyinda pe.

34 Ngamuchenjele lwanu kuti myoyo yanu itazundwi mukulyiiba, akukolwa amisalo yabuumi oobu alimwi buzuba oobo bulaza; mbuli kakole. 35 Nkaambo mbuli kakole buyoosika atala abaabo bakkala atala anyika yoonse. 36 Pesi ngamuchenjele zyiindi zyoonse, kamukomba kuti mukabe anguzu kuti mukakozye kuleya zintu zyoonse ezi niziyoochitika, akwimikila kunembo lyaMwana aMuntu."

37 Alimwi mazuba woonse wakalikuyiisya kalimulubuwa bwaŋanda yaLeza; mpawo mansiku wakalikuzwa wakuuwona kuchilundu chitegwa chama Olivu. 38 Mpawo bantu boonse bakaza chifumofumo kulubuwa bwaŋanda yaLeza kuti bazomuswiilizye.