1 Alimwi Jesu wakati kuli basikwiiya bakwe, "Masukusyo akuti mubisye alaza; pesi maawe kuli yooyo uzaawo! 2 Alimwi kwalimbubo kuti uliboobo aangwe iziyo munsingo, mpawo awaalilwe mulwizi, kwiinda kuti alebe uumwi wabaaba baluleme kuti babisye." 3 Amulilingule nibeni!

"Naakuti munyoko wakubisizya, mululamike; alimwi naakuti wasanduka, kumulekelela. 4 Alimwi kuti wakubisizya tulimusanu atubili mubuzuba bumwi, mpawo waboola kulinduwe tuli musanu atubili, akwaamba kuti, ‘Ndasanduka,’ weelede kumulekelela."

5 Mpawo batumwa bakati kuMwami, "Komezya lusyomo lwesu!"

6 Alimwi Mwami wakati, "Kuti kamuli alusyomo luniini mbuli mbuto ilimbuuli nseke niini kulizyoonse, mwalikunooti kumusamu wamabbulosi, ‘Nyukuka, mpawo ukaakuzikwe mulwizi,’ alimwi uyomuswiilila.

7 "Ngwani akati kanu, ujisi mulanda ulima naakuti sikweembela mbelele, naasika kuzwa mumuunda, wati kumulanda, ‘Kuza lyokezye ulye?’ 8 Takoyooti na, ‘kondijikila chilalilo changu, mpawo uzwate zisamo zyakundikutawukila undipe ndilye akunywa, nuwamana ayebo mputakalye akunywa? 9 Ulamulumba na mulanda ooyu nkaambo wachita mbuli mbwakalayililwa? 10 Alimwi mbumbubo anywebo, naakuti mwachita zyoonse zintu zimwakalayiililwa, mwambe kuti, ‘Tuli balanda biyo; twachita biyo eezyo nzitweelede.’ "

11 Jesu naakali kuyabweenda kayabuya kuJerusalemu, wakayinda akati kamyuunzi yaSamariya aGalili. 12 Mpawo naakali kunjila muli umwi muunzi, wakaswanana abasizipele balikkumi, bakaliimvwi kulekule. 13 Alimwi bakoompolola bati, "Jesu! Mwami, kutufwida luse."

14 Naakababona, wakati kulimbabo, "Ngamwiinke mukalitondezye kubapayizi."

Mpawo nibakachili kuyobweenda, bakasalazigwa. 15 Eelyo umwi wabo, naakabona kuti wapona, wakabweeda, kalokulumbayizya leza ajwi pati. 16 Mpawo wakavuntama kumawulu aJesu mpawo wamulumba. Alimwi ooyo wakali muSamariya. 17 Eelyo Jesu wakababuzya wati, "Teebalikkumi na bakasalazigwa? Pesi balimusanu abane balikuli? 18 Tee bakajanika kuti baboole kukulumba Leza kunze kwamuzwakule?" 19 Eelyo wakamwaambila wati, "Buka kuuya; lusyomo lwako lwakuponiya."

20 Mulichimwi chiindi Jesu wakabuzigwa abaFarisi kuti, "Ani bwami bwaLeza buza lili?" Wakabavwiila wati, "Bwami bwaLeza tabuzi munzila njimulangilila pe; 21 nikuba kuti bantu bayooti, ‘Laanga mbobuno okuno!’ naakuti ‘Mbobuya!’ Nkaambo, amulange, bwami bwaLeza buli akati kanu."

22 Mpawo wakati kuli basikwiiya bakwe, "Mazuba ayoosika aayo mpumutazoyande kubona limwi lyamabuzuba aMwana aMuntu alimwi tamukwe kuyoobubona pe. 23 Bantu bayoowamba kuti kulindinywe, ‘Amulange, nguulya!’ naakuti ‘Nguuno okuno! Mutakayinki, nikuba kubatobela. 24 Mbumbubo oobu mbubutakabe mubuzuba mbwakuza kwaMwana aMuntu mbuli kalabi mbukamweka kulubazu lumwi ilwajulu kuyoosika kulilumbi lubazu. 25 Pesi lutaanzi weelede apenzengwe munzila zyiingi, mpawo akuyootamwa azyalani eli. 26 Mbuli mbukwakalibede mumazuba aNowa, mbukuyooba alimwi mumazuba aMwana aMuntu. 27 Bantu bakali kulya akunywa akukwatana bakali kupa bana babo mumakwatano, mane kusikila mubuzuba oobo Nowa mbwaakanjila mubwaato, alimwi zambangulwe nilyakasika lyakabanyonyona boonse. 28 Mbumbubo, mbuli mumazuba aLoti: bakali kulya akunywa, bakalikuula akuuzya, bakali kubyala akuyaka, 29 pesi mubuzuba oobo Loti mbwaakazwa mumuunzi waSodomu, kwakawa mulilo wabunde asarufa wakazwa kujulu mpawo wabanyonyona boonse. 30 Mbukuyooba mubuzuba aawo Mwana aMuntu aakuyubununwa.

31 Mubuzuba oobo, kufumbwa ooyo unoli ansonge yaŋanda ujisi zilongo zyakwe kazinoli muŋanda atakaseluki kuti akakuzibweze; mbumbubo kufumbwa ooyo unoli mumuunda alakwe atakayeeyi kubweeda kuŋanda kukuyoobweza chintu. 32 Amuyeeye zyakachitika kumwanakazi waLoti! 33 Kufumbwa ooyo muntu weezya kuvuna buumi bwakwe uyoobusweekelwa, pesi aabo basweekelwa buumi bwabo bayoobujana. 34 Ndamwaambila kuti, mansiku aayo kuyooba bantu babili balede abulo bumwi; umwi uyootolwa umwi uyoochala. 35 Kunoli banakazi babili banooziya aamwi; umwi uyootolwa mpawo umwi uyoochala. 36 Bantu babili banooli mumuunda, umwi uyootolwa mpawo umwi uyoochala.

37 Eelyo bakamubuzya bati, "Okuli, Mwami?"

Alimwi Jesu wakati kulimbabo, "Oko kuli mutumba, nkunkuko kuli makubi."