1 Eelyo Jesu wakabaambila basikwiiya bakwe mukozyanisyo kuti nkaamboonzi nitweelede kukomba akutabola moyo. 2 Wakati, "Kuli limwi dolopo kwakali umwi mubetesi, watakali kuyoowa Leza, naakuti kulemeka bantu. 3 Mudolopo eelyo kwaakali mukamuufu wakali kunoonga waza kulinguwe, alimwi kaamba kuti, ‘Kondibetekela mulandu wangu.’ 4 Nkaambo kwachiindi wakakaka kubeteka; pesi kuzwa awo wakalyaambila mwini wati, ‘Nikuba kuti mebo kanditamuyoowi Leza nibaba kulemeka bantu; 5 nikubaboobo nkaambo kayooyu mukamufu wandikatazya, ndiyoomubetekela mulandu wakwe, nkaambo ulandimana nguzu anoza lubbe.

6 Alimwi Mwami wakati, "Amuswiilile mubetesi utaluleme mbwaamba. 7 Mpawo Leza takooyobabetekela chabuuya na aabo basale bakwe nibalila mansiku asikati kulinguwe? Ulabatolela chiindi chilamfu na? 8 Ndamwaambila eechi, uyoobabetekela chakufwambaana. Nikubabobo, aawo Mwana aMuntu nayookusika anyika, uyoojana bantu bajisi lusyomo na anyika?"

9 Wakaamba ooyu mukozyanisyo kuli aabo bakali kulisumpula kabati baliluleme akulangila bamwi boonse aansi: 10 wakati "Baalumi babili bakaya kuŋanda yaLeza kukukomba, uumwi wakali muFarisi alimwi uumwi kali simutelo. 11 Mufarisi wakayimikila wakomba walyambila wati, ‘Leza, ndakulumba kuti ime tandili mbuli bamwi bantu, balisumpula, batasyomeki, basibwaamu, nikuba mbuli ooyu simutelo. 12 Ndilalyiimya tubili amviiki; ndilapa zyakkumi zyazyoonse nzindijana.’ 13 Pesi simutelo, nkayimvwi kulekule, taakakonzya kunyampula meso akwe kujulu, pesi wakalyuuma akaango kakwe kalikulifwinsya, wati, "Leza wangu kondifwida luse ime ndisizibi!’ 14 Ndamwaambila kuti, ooyu mwaalumi simutelo wakabweeda kuŋanda yakwe kaliwalulamikwa kwiinda ooyu muFarisi; nkaambo kufumbwa woonse ulisumpula ulafwiinsigwa, alimwi ooyo ulifwiinsya ulasumpulwa."

15 Lino bantu bakali kweeta bana baniini kuli Jesu kuti ababike maanza, alimwi basikwiiya nibakabona eechi, bakabakalalila. 16 Pesi Jesu wakabayiita bana kulinguwe, wati, "Amubaleke bana baniini baze kulindime, alimwi mutabakasyi; nkaambo bwami bwaLeza mbubwababo baliboobu. 17 Ndamwaambila kasimpe, kufumbwa utatambuli bwami bwaLeza mbuli mwana muniini takukwe nayoobunjila pe."

18 Alimwi umwi mweendelezi wakabuzya Jesu wati, "Muyiisi mubotu, ndichite biyeni kuti ndikajane buumi butamani?"

19 Alimwi Jesu wakamwaambila wati, "Nkaamboonzi nundaamba kuti ndilimubotu? Takukwe mubotu pe pesi Leza alikke. 20 Muliizi milawu iiti: ‘Utachiti bwaamu Utajeyi Utabbi Utapi bukaamboni bwakubeja alimwi Lemeka wuso abanyoko.’ "

21 Mpawo wakamwaambila wati, "Zyoose eezi ndakazibamba kuzwa kandichili muniini."

22 Alimwi Jesu naakazimvwa, wakati kulinguwe, "Chintu chimwi nchuchede biyo. Uzya zyoonse nzujisi mpawo ukaabile mali kubantu bachete, alimwi uyooba abuvubi kujulu; eelyo uze, unditobele." 23 Pesi naakamvwa ezi, wakawusa, nkaambo wakali abuvubi bwiingi.

24 Jesu naakamulanga wakati, "Nkuyumu biyeni kulaabo bantu balaabuvubi kunjila kubwami bwaLeza! 25 Nkaambo nchuuba kuti inkamela injile mupuli lyanaliti, kwiinda muntu muvubi kuti akanjile mubwami bwaLeza."

26 Alimwi aabo bakamumvwa bakamubuzya bati, "Animpo ngwani ukonzya kufutulwa?"

27 Pesi Jesu wakavwiila wati, "Leza ulakonzya kuchita eezyo zintu eezyo zikachila muntu."

28 Eelyo Pita wakati kuli Jesu, "Laanga, twakasiya myuunzi yesu alimwi twakutobela."

29 Alimwi wakabaambila wati, "Kasimpe ndamwaambila kuti, takukwe muntu wakasiya ŋanda yakwe nikuba mwanakazi nikuba bakulana nikuba bazyali nikuba bana, nkaambo kabwami bwaLeza, 30 utakaleke kujana mpindu iyindulidwe muchiindi eechino, alimwi amuchiindi chiyoobuza kubuumi butamani."

31 Alimwi Jesu wakeenda abalikkumi ababili kumbali mpawo wakati kulimbabo, "Amulange, tuyobwiinka kuJerusalemu, alimwi zyoonse zyakalembwa atala aMwana aMuntu abasinsimi ziyoozuzikizigwa. 32 Nkaambo uyoowabwa kuli batali baJuda pe, alimwi uyoowelwa, alimwi uyoosampulwa, mpawo uyooswidwa. 33 Nibakumana kumuyasa bayomujeya, eelyo mubuzuba bwachitatu kuzwa nakafwa mpawo uyoobuka lubo."

34 Pesi basikwiiya bakwe tee bakamvwisisisya pe atala azyoonse zintu eezi, akuti eezi nzyakali kwaambuula zyakali basitide, alimwi teebakaziziba zintu zyakali kwaambwa.

35 Naakasika afwiifwi akuJerikko, umwi mwaalumi moofu wakalikkede kumbali anzila kalikukumbila; 36 alimwi naakamvwa kuyoowela kwamakamu abantu akali kwiinda, wakabuzya kuti, "Sa niinzi zilokuchitika?"

37 Bakamwaambila bati, "Jesu wakuNazareti ulookwiinda."

38 Alimwi wakompolola wati, "Jesu, Mwana waDevidi, kundifwida luse!"

39 Lino aabo bakali kweenda anembo, bakamukalalila, kuti, ngawumune, pesi wakoompololisya, kalookwamba kuti, "Jesu Mwana waDevidi, kundifwida luse!"

40 Mpawo Jesu wakayimikila wakabalayilila bantu aaba kuti bamweete kulinguwe; alimwi nibakamweeta afwiifwi anguwe, wakamubuzya wati, 41 "Uyanda kuti ndikuchitilenzi?" Mpawo wakavwiila wati,

"Mwami ndiyanda kuti ndibone."

42 Jesu wakati kulinguwe, "Bona, lusyomo lwako lwakuponiya."

43 Mpawawo wakabona mpawo wakatobela Jesu, kalumbayizya Leza, alimwi bantu boonse, nibakabona eezi abalabo bakalumbayizya Leza.