1 Pesi mubuzuba butaanzi bwamviiki, chifumofumo, banakazi bakayiinka kuchibunda, kabalikweeta mafuta anunkilila ntubakabambide. 2 Mpawo bakajana bbwe kalili lyasunzulisigwa kuzwa achibunda, 3 pesi bakanjila mukati, takukwe nibakawujana mutunta waMwami Jesu. 4 Alimwi nibakachili kuzilikila eechi, mpawawo kwakaliboniya baalumi babili kabayimvwi kabasamide midabba uŋayima mbuli kalabi. 5 Kabachiyoowede akuvuntamika anyika, pesi baalumi bakati kulimbabo, "Muyandwidaanzi bawuumi akati kabafu? 6 Tawope aano; wabuka! Mwibawuluke mbwaakamwaambila naakachili andinywe muGalili, 7 kuti Mwana aMuntu weelede kuti akaabwe mumaanza abasizibi alimwi akabambulwe, mpawo mubuzuba bwatatu kuzwa kulufu lwakwe uyoobuka lubo."

8 Eelyo bakayibuluka majwi akwe, 9 Lino nibakabweeda kuzwa kuchibunda, bakabaambila zyoonze ezi kuli balikkumi awumwi abamwi boonse. 10 Lino bakali kuchibunda nguMeri Magadalini aJowana aMeri bayina aJakkobbu abamwi banakazi mbibakalaabo, bakaamba zyoonse eezyo kubasikwiiya. 11 Pesi majwi aaya kulimbabo akabaanga ntwaano tutakwe lugwasyo pe, nkaambo bakadoneka. 12 Pesi Pita, wakabuka, wachijana waya kuchibunda; mpawo naakasika wakanjila wafugama wajana kwachala midabba njibakalimuvungide aayo kicheede; eelyo wakabweeda kumuunzi, kagambide mulinguwe kuti niinzi zyachitika.

13 Mubuzuba oobo baalumi babili bakali kuyoobuya kumuunzi utegwa Emawusi, ooyo wakali misinzo wamakkilomita alikkumi alimwi kuzwa kuJerusalemu, 14 bakali kwaambuula atala azyoonse zintu eezi zyakachitika. 15 Nibakachili kuyoobwaambuula akwiizya, Jesu lwakwe wakasweenya afwiifwi, mpawo wakeenda aabo, 16 pesi meso aabo akalisitikidwe kuti batamuboni pe. 17 Mpawo wakababuzya wati, "Mulokwiizya atala anzi mulweendo lwanu?"

Mpawo bakaankamana nkabawuside kapati. 18 Eelyo umwi wabo, utegwa Kkilopasi, wakamuvwiila wati, "Nduwe mweenzu awulikke na kuJerusalemu utazi pe zintu zyakachitika ooko mumazuba aaya?"

19 Alimwi wakababuzya wati, "Nzintuunzi ezyo?"

Mpawo bakamuvwiila bati, "Atala aJesu waNazareti, ooyo wakali musinsimi wakalaanguzu mujwi mukuchita kunembo lyaLeza akubantu boonse, 20 alimwi aanzila bapati besu babapayizi abeendelezi mbubakamwaaba kuti apegwe chisubulo chalufu akumubambula. 21 Pesi twali abulangilizi kuti ngunguwe uyonununa zyalani lyaIzirayeli. Mbubo alimwi kakutali eechi pe, lino ndizuba lyatatu kuzwa mpuzyakachitika zintu eezi. 22 Atala azezi, bamwi banakazi baankamu yesu batugambya. Bayinka kuchibunda chifumofumo sunu 23 pesi tee bujana pe mutunta waKkirisitu; eelyo baboola kabaamba kuti, babona chilengano chabaangelo balikwaamba kuti muumi. 24 Bamwi besu mbitwakali aabo bakaya kuchibunda, mpawo bakujana mbuli mbubakaamba banakazi aaba; pesi Jesu tee bakamubona pe."

25 Mpawo Jesu wakati kulimbabo, "Nubantu bafubafuba, nimulibalenga myoyo kukusyoma zyoonse zyakaambwa abasinsimi! 26 Tee zyakeelede na kuti Kkirisitu asukusigwe muzintu eezi, mpawo akanjile mubulemu bwakwe?" 27 Eelyo kutalikila kumalembe aMozesi akubasinsimi boonse, wakapandulula kulimbabo mumagwalo woonse atala anguwe mwini.

28 Nibakaswena afwiifwi amuunzi ooyo nkubakali kuya. Jesu wakabaanga mbuli muntu uchiya anembo. 29 Pesi bakamukumbila kapati, kabati, "Kkala andiswe, nkaambo lyamba kubagoko alimwi zuba lyamana." Aboobo wakayinka wakukkala ambabo.

30 Naakalikkede atebuli ambabo, wakabweza chinkwa, wakalumba kuliLeza mpawo wakwamuna, wakabapa. 31 Alimwi meso aabo akajulika, bakamuziba; mpawo wakabulika kubusyu bwabo. 32 Mpawo bakaambila chabochabo bati, "Myoyo yesu teeyalikupya pe, naakachili kwaambuula andiswe munzila, anali kujula malembe kulindiswe?"

33 Lino bakanyampuka aawo babweeda kuJerusalemu; baakujana balikkumi awumwi kababungene aamwi, antoomwe abaabo boonse mbibakalaabo. 34 Bakabaambila bati, "Mwami wabuka nichoonzyo, alimwi waliyubununa kuli Sayimoni!"

35 Mpawo bakabaambila zyakachitika munzila, ambwaakazibikana amukukwamuna chinkwa.

36 Nibakachili kwaambuula eechi, Jesu alakwe wakayimikila akati kabo, mpawo wakabaambila wati, "Luumuno alube andinywe."

37 Pesi bakaankamana alimwi bakazula buyoofu, bakabaanga babona cheelo.* 38 Mpawo wakababuzya wati, "Nkaamboonzi nimulikatazya? Alimwi nkaamboonzi nimwaba amizeezo myiingi mumyoyo yanu? 39 Ngamulange maboko angu amawulu angu, kuti ndiindime choonzyo; ngamundijate, ngamumvwe; nkaambo cheelo* takwe nyama amafuwa, mbuli mbumundibwene ndilaawo."

40 Mpawo naakamana kwaambuula, wakabatondezya maboko amawulu akwe. 41 Alimwi nibakachili kudoneka nkaambo kalukondo amukugambwa wakababuzya wati, "Mulaachakulya na?" 42 Alimwi bakamupa chimpanzi chamuswi wakajikidwe. 43 Mpawo wakabweza, walya kabamubwene.

44 Lino wakabaambila wati, "Ngiimajwi ngindakamwaambila, nindakachili andinywe, kuti zyoonse ezi zyeelede kuzuzikizigwa zilembedwe mumulawu waMozesi, akubasinsimi amuntembawuzyo atala andime."

45 Mpawo wakabajula boongo bwabo kuti bakonzye kumvwiisisisya malembe, 46 Lino wakabaambila wati, "Kuli lembedwe, kuti zileelede kuti Kkirisitu akapenzegwe, mpawo uyoobuka kuzwa kubafu mubuzuba bwatatu, 47 Mpawo kuti kusanduka akulekelelwa kwazibi kuleelede kukambawukwa muzina lyakwe kubantu bamusyobo yoonse, kutalikila muchisi chaJerusalemu. 48 Lino andinywe muli bakamboni bazintu eezi. 49 Lino ngamulange, ndilamutumina chisyomezyo chaTaata alindinywe; pesi mukkale muchisi, mane mukasamikwe anguzu zizwa kujulu."

50 Mpawo wakazwa weenda aabo mane bakuusika kuBbetani, eelyo wakanyampula maboko akwe mpawo wakabalongezya. 51 Lino muchiindi naakali kubalongezya, wakeenda, wakabwezegwa ajoba waya kujulu. 52 Mpawo bakamukomba, alimwi bakabweeda kuJerusalemu mulukondo lupati, 53 mpawo bakayinkiilila anembo muŋanda yaLeza, kabalumbayizya akutembawula Leza.