1 Lino kwakali bamwi bakaliwo kuchiindi eecho bakaambila Jesu atala abaGalili aabo Payileti mbwaakajaya alimwi mbwaakaswanizya azipayizyo zyabo. 2 Mpawo wakabavwiila wati, "Muyeeya kuti aba baGalili bakali basizibi kwiinda boonse baGalili na, nkaambo bakapenzegwa munzila eeyo? 3 Ndamwaambila, Peepe; pesi kunze musanduke anywebo muyonyonyoka. 4 Nibaba abaya balikkumi amusanu abatatu aabo bakawidwa anganzi yakuSilomi mpawo yakabalimba mpawo yabajeya, muyeeya kuti nywebo bakali basizibi kwiindilila na kwiinda boonse bakkala muJerusalemu? 5 Ndamwaambila, Peepe; pesi kunze kwakuti musanduka anywebo muyonyoonyonwa mbuli mbabo."

6 Eelyo Jesu wakabaambila mukozyanisyo ooyu wati: "Mwaalumi wakala mukuyu wakazikidwe mumuunda wakwe; alimwi wakaya kukulanga muchelo alinguwo alimwi tewakuujana pe. 7 Mpawo wakaambila basikulima kuti, ‘Amulange, eeyi minyaka itaatu kandiliikusika kandiyanda muchelo kumukuyu ooyu, alimwi takwe chindijana pe. Amuugonkele aansi; nkaamboonzi nuweleede kubelesya ivu?’ 8 Alimwi sikulima wakamuvwiila wati, ‘Mwami, tuwulindile munyaka uumwi, mane ndilawusyida mumbali akuwubikkila mbole. 9 Mpawo kuti wazyala michelo munyaka utobela, nchinoli cheelela akubota; pesi kuti pe, muugonkele aansi.’ "

10 Lino wakali kuyiisya mulichimwi chikombelo chabaJuda musabata. 11 Mpawo kwakali mwanakazi wakali amuuya wakumulebula kwaminyaka ilikkumi amusanu ayitatu; wakali wotomene takukwe naakali kukonzya pe kwimikila kabotu. 12 Mpawo Jesu naakamubona, wakamwiita alimwi wakamwaambila wati, "Yomwanakazi wangununwa kubulwazi bwako." 13 Mpawo wakamubika maanza, alimwi mpawawo wapona wawololoka, mpawo walumbayizya Leza.

14 Pesi mweendelezi wachikombelo chabaJuda, wakanyema, nkaambo Jesu wakaponiya mubuzuba bwasabata, wakati kubantu, "Taali musanu alimwi na mazuba ngeelede kubeleka mulingawo; kamuza mumazuba aayo kuzosilikwa, alimwi peepe mubuzuba bwasabata."

15 Mpawo Mwami wakamuvwiila wati, "Inywe nibasikuupawupa! Takwe na akati kanu unga mubuzuba bwasabata wangununa ŋombe yakwe niba mboŋolo yakwe mubbondo, wayitola kuti ikakunywe meenda? 16 Alimwi takweelede na ooyu mwanakazi, mwana musimbi wa Abburahamu ooyo Satani ngwakaanga kwaminyaka ilikkumi amusanu ayitatu, aangununwe kubwaange oobu mubuzuba bwasabata?" 17 Naakachili kwaamba eechi, boonse basinkondonyina bakawusa; alimwi bantu boonse bakakondwa kuli zyoonse zintu zilabulemu zyakachitwa anguwe.

18 Nkikaako Jesu wakabuzya wati, "Bwami bwaLeza buli biyeni? Mpawo ndiyobukozyanisya anzi? 19 Buli mbuli nseke niini kulizyoonse eeyo muntu njabweza akuyimiinza muchilili chakwe; mpawo yamena mpawo wabamusamu, alimwi bayuni bamujulu balachita zisaba muntabi zyawo."

20 Alimwi Jesu wakabuzya wati, "Mbuli nzii mbundiyookozyanisya bwami bwaLeza? 21 Buli mbuli bumena oobo mwanakazi mbwaakabweza mpawo wakunika muchisuwo chabusu bunante bwachinkwa, mane kusika zyoonse zyababumena."

22 Jesu wakeenda kayabwiinda mumadolopo amumyuunzi, kalokuyiisya, alimwi kali mulweendo lwakuya kuJerusalemu. 23 Mpawo umwi wakati kulinguwe, "Mwami, ani mbache buyo na bayoofutulwa?"

Mpawo wakati kulimbabo, 24 "Amukakatile kunjila mumulyango umanikide; nkaambo bayiingi, ndamwaambila, bayooyandisya kunjila, pesi tabakoyokonzya pe. 25 Awo muna aŋanda aakunyampuka, akujala mulyango, muyoyiimikila kuunze akukonkomona kumulyango akwaamba kuti, ‘Muuni aŋanda, tujulide.’ Uyoomuvwiila kuti, ‘Tandimwizi pe kuti muzwa kuli.’ 26 Mpawo muyootalika kwaamba kuti, ‘Twakalya akunywa kubusyu bwako, wakayiisya munzila zyesu!’ 27 Mpawo uyooti, ‘Ndamwaambila, tandimwizi pe kuti muzwaayi; amuzwe kulindime, moonse inywe nibasimuchita zitaluleme!’ 28 Awo muyoolila akuluma ntwiino, mwaakubona Abburahamu aAyizekki aJakkobbu abasinsimi boonse mubwami bwaLeza, anywebo nobeni muyowalilwa aanze. 29 Alimwi bantu bayooza kabazwa kujwe akumbo, kumusansa akunyika, mpawo bayookkala aansi atebuli apobwe mubwami bwaLeza. 30 Alimwi laanga, aabo bamwi bakumagolelo lino bayooba bataanzi, alimwi bamwi bataanzi lino bayooba bamagolelo."

31 Muchindi nchicheecho bamwi baFarisi bakaza, alimwi bati kulinguwe, "Zwa aano, nkaambo Herodi uyanda kukujeya."

32 Alimwi wakabavwiila wati, "Kamuya mpawo mukabaambile ooyo simwaaba Herodi kuti, ‘Amulange, nditanda basikazwa mpawo akuponiya sunu ajunza amubuzuba bwatatu ndiyomanisya mulimu wangu.’ 33 Nikuba oobo ndeleede kweenda sunu ajunza alimwi amubuzuba butobela; nkaambo musinsimi takweelede afwide kunze amunzi waJerusalemu.

34 "Jerusalemu, Jerusalemu, nuwakajeya basinsimi akubadonkola mabwe aabo bakatumwa kulinduwe! Ndiyobabunganiya tungana bana bako, mbuli nkuku mbibukata bana bayo, alimwi tazikoyooba pe! 35 Laanga, ŋanda yako iyooba tyongo. Mpawo ndamwaambila kuti, tamukoyoondibona limbi mane mukati, ‘Ulaachoolwe ooyo uza muzina lyaMwami!’ "