1 Mumunyaka wakkumi amusanu wabweendelezi bwaTibberiyasi Siza, alimwi Pontiyasi Payileti kali mweendelezi waJudiya, mpawo Herodi kali mwami wagundu lyaGalili, amukulana wakwe Filipu kali mwami wagundu lyaIturaliya aTarakkonitisi, aLayisaniyasi kabali mwami waAbbilene, 2 muchiindi Anasi aKkeyifasi kabali bapayizi bapati Leza wakaambuula kuli Joni mwana mulombe waZakkariya aawo Joni kali munkanda. 3 Mpawo Joni wakeenda masena woonse ali Jorodani, kayabukambawuka kuti bantu basanduke mpawo babbapatizigwe kuchitila kuti Leza abalekelele zibi zyabo. 4 Mbuli mbukulembedwe mubbuku lyamusinsimi Ayizaya, kuti

"Ijwi lyayooyo woompolola munkanda kati:

‘Amubambe inzila yaMwami;

amululamike tuzila twakwe! 5 Masena woonse ayooyelana,

alimwi zilundu zyoonse atulundu ziyoofwiinsigwa,

alimwi zipilingene ziyolulamikwa,

anzila zilamakombakomba ziyootandabala;

6 alimwi bantu boonse bayoobona lufutuko lwaLeza.’ "

7 Nkikaako wakati kumakamu akaza kukubbapatizigwa anguwe, wakati, "Inywe nubana bachipile! Ngwani wamuchenjezya kuchija bukali bulokuza? 8 Amuzyale michelo itondeezya kusanduka, alimwi mutani kulyaamba kuti, ‘uli aAbburahamu mbuli taata wesu.’ Nkaambo ndamwaambila kuti, Leza ulakonzya kuli aaya mabwe kuti alenge bana kuli Abburahamu. 9 Nikuba lino kaleba kalibambidwe kale kumiyanda yamisamu; nkikaako kufumbwa musamu utazyali muchelo mubotu ulagonkelwa aansi mpawo akuwalilwa mumulilo."

10 Lino nkamu yakabuzya kulinguwe yati, "Mpoo tuchiteenzi?"

11 Alimwi wakabavwiila wati, "Ooyu ujisi zisamo zibili, ngaabile ooyu utajisi pe; alimwi ooyu ujisi chakulya weelede kuchita oobo alakwe."

12 Alabo basimutelo bakaza kukubbapatizigwa, mpawo bakati kulinguwe, "Muyiisi, tuchite nzi?"

13 Alimwi wakati kulimbaabo, "Mutabwezi lubo mweelo windilide."

14 Basilumamba abalabo bakabuzya bati, "Ani iswe tuchite biyeni?"

Alimwi wakati kulimbabo, "Mutanyanzyi naba uumwi changuzu, nikuba akubapa mulandu, ngamukkutikane ampindu yanu njimujana."

15 Mbuli kuti bantu bakali mubulangilizi, mpawo bantu boonse akulibuzya mumyoyo yabo atala aJoni, anteni ngunguwe Kkirisitu, 16 Joni wakabavwiila boonse wati, "Ndimubbapatizya ameenda; pesi ooyo usalala kwiinda ndime ulaza, ooyo ngunditajisi cheelelo chakwangununa twaanzyo twansangu zyakwe; uyoomubbapatizya aMuuya Usalala amulilo. 17 Chisuwo chakwe chakupupuluzya chilimumaboko aakwe, kuti apupulule alubuwa mpawo abbeete, akubungika zilyo mubutala bwakwe, pesi buungu uyoobuumpa amulilo utamani."

18 Aboobo, akusungwazya kumwi kwiingi, wakakambawuka makani mabotu kubantu. 19 Pesi Herodi mweendelezi, wakali wakabulwa anguwe ankaambo kaHerodiyasi, mwanakazi wamukulana wakwe, alimwi ankaambo kabubi boonse oobo bwakachitwa aHerodi, 20 naakaswanizya eechi kuli woonse, Herodi wakajalila Joni muntolongo.

21 Lino bantu boonse nibakabbapatizigwa, mpawo Jesu alakwe kaali wabbapatizigwa. Alimwi wakali kukomba, ijulu lyakajulika, 22 alimwi Muuya Usalala wakaselukila alinguwe mbuli inziba, mpawo ijwi lyakaza kuzwa kujulu, kaliti, "Iwe nduwe Mwana wangu ngundiyandisya; mulinguwe mundikondelwa."

23 Jesu, naakatalika mulimu wakwe, wakali aminyaka yakuzyalwa ilimakumi aatatu, kali mulombe (mbuli mbwakaliyelede kutegwa mwana) waJozefu mwana waHeli, 24 Heli mwana waMatati, Matati mwana waLevi, Levi mwana waMelikki, Melikki mwana waJanayi, Janayi mwana waJozefu, 25 Jozefu mwana waMatatiyasi, Matatiyasi mwana waAmosi, Amosi mwana waNahamu, Nahamu mwana waEsili, Esili mwana waNagayi, 26 Nagayi mwana waMaati, Maati mwana waMatatiyasi, Matatiyasi mwana waSemeyini, Semeyini mwana waJosekki, Josekki mwana waJoda, 27 Joda mwana waJowanani, Jowanani mwana waResa, Resa mwana waZerubbabbeli, Zerubbabbeli mwana waSeyilitiyeli, Seyilitiyeli mwana waNeri, 28 Neri mwana waMelikki, Melikki mwana waAdi, Adi mwana waKkosamu, Kkosamu mwana waElimadamu, Elimadamu mwana waEri, 29 Eri mwana waJoshuwa, Joshuwa mwana waEliyaza, Eliyaza mwana waJorimu, Jorimu mwana waMatati, Matati mwana waLevi, 30 Levi mwana waSimiyoni, Simiyoni mwana waJuda, Juda mwana waJozefu, Jozefu mwana waJonamu, Jonamu mwana waEliyakkimu, 31 Eliyakkimu mwana waMeleya, Meleya mwana waMena, Mena mwana waMatata, Matata mwana waNatani, Natani mwana waDevidi, 32 Devidi mwana waJese, Jese mwana waObbedi, Obbedi mwana waBbowazi, Bbowazi mwana waSala, Sala mwana waNashoni, 33 Nashoni mwana waAminadabbi, Aminadabbi mwana waAdimini, Adimini mwana waAni, Ani mwana waHezironi, Hezironi mwana waPerezi, Perezi mwana waJuda, 34 Juda mwana waJakkobbu, Jakkobbu mwana waAyizekki, Ayizekki mwana waAbburahamu, Abburahamu mwana waTera, Tera mwana waNaho, 35 Naho mwana waSerugu, Serugu mwana waRewu, Rewu mwana waPelegi, Pelegi mwana waEbba, Ebba mwana waShela, 36 Shela mwana waKkeyinani, Kkeyinani mwana waArifasadi, Arifasadi mwana waShemu, Shemu mwana waNowa, Nowa mwana waLamekki, 37 Lamekki mwana waMetusela, Metusela mwana waInokki, Inokki mwana waJaredi, Jaredi mwana waMahalaleli, Mahalaleeli mwana waKkeyinani, 38 Kkeyinani mwana waInosi, mwana waSeti, mwana waAdamu, mwana waLeza.