1 Lino ipobwe lyachinkwa chitakwe bumena lyakali lyaba afwiifwi, litegwa ipobwe lyaKwiindilila lyabaJuda. 2 Alimwi bapati babapayizi abayiisyi bamulawu bakali kuyanduula nzila yakuti bamujaye biyeni Jesu; nkaambo bakali kuyoowa bantu.

3 Eelyo Satani wakanjila muli Judasi Isikkariyoti, wakali umwi wabalikkumi ababili; 4 wakayinka mpawo wakubamba abapati babaPayizi abakapokola baŋanda yaLeza, kuti bamwaabe biyeni kulimbabo. 5 Alimwi bakabotelwa kapati, bakazuminana kuti bamupe mali. 6 Judasi wakazumina, mpawo wakayanduula nzila yakwaaba Jesu, muchiindi nkamu yabantu bayiingi kabatawo pe.

7 Eelyo nilyakasika zuba lyapobwe lyaChinkwa Chitakwebumena, awo imbelele lyaKwiindilila niyeelede kupayilwa. 8 Aboobo Jesu wakatuma Pita aJoni, wati, "Kamuya mukatubambile chisusulo chaKwiindilila kuti tukakulye."

9 Mpawo bakabuzya bati, "Uyanda kuti tukabambile kuli?"

10 Wakavwiila wati, "Mwakunjila muchiisi, muyooswana mwaalumi, unotukkide nongo yameenda, mukamutobele muŋanda njatakaakunjile, 11 mpawo muyoomwaambila muni aŋanda kuti, ‘Muyiisi wati ilaali ŋanda yabeenzu, oko kundikakulide Pobwe lyaKwiindilila abasikwiiya bangu?’ 12 Alimwi uyoomutondezya ŋanda mpati yamujulu, ibambidwe kabotu. Mukatubambile mumo."

13 Aboobo bakayinka, bakakujana mbuli mbwaakabaambila mpawo bakakujana zyoonse mbuli Jesu mbwaakabaambilila; mpawo bakabaambila kulya Pobwe lyaKwiindilila.

14 Mpawo chiindi nichakasika, Jesu wakakkala abatumwa bakwe aansi atebuli kuti balye. 15 Alimwi wakati kulimbabo, "Ndali achiyandisyo kapati kuti ndilye Pobwe lyaKwiindilila andinywe kanditanaa kupenzegwa pe; 16 nkaambo ndamwaambila, tandikozoolya lubo mane do zikazuzikizigwe mubwami bwaLeza."

17 Mpawo wakabweza chinywido, mpawo naakamana kulumba Leza, mpawo wakati kulibasikwiiya bakwe, "Amutole eechi chinywido, alimwi mwabane akati kanu; 18 nkaambo ndamwaambila kuti kuzwa lino tandichikwe kuyoonywa lubo pe kumucheelo wamasansa, mane bwami bwaLeza bwakuboola."

19 Alimwi wakabweza chinkwa, naakamana kulumba Leza, wachikwamuna, mpawo wakabapa kubasikwiya bakwe, mpawo wakati, "Ooyu mubili wangu wapedwa ndinywe. Kamuchita eechi kamukundiyeeya." 20 Mpawo nibakamana chilalilo, wakati, "Eechi chinywido nchisinizyo chimwakatililwa chizuminano chipya mubulowa bwangu. 21 Pesi amulange muntu uyanda kundaaba ulaandime aawa atebuli. 22 Nkaambo Mwana aMuntu uyoofwa mbuli mbukwakaambwa; pesi maawe kuliyooyo mwaalumi uyoomwaba!"

23 Mpawo bakatalika kubuzyaniya umwi awumwi, kuti ngwani akati kabo uyoochichita eechi.

24 Kwakaba kukazyaniya lubo akati kabo, kuti ngwani akati kabo uyooba mupati. 25 Mpawo wakati kulimbabo, "Bami babatali baJuda babelesya bwami atala abantu; alimwi abaabo balimubweendelezi kulimbabo balyamba kuti mbaagwasyi. 26 Pesi teeboobo kulindinywe pe; pesi ooyo mupati loko akati kanu ngabe mbuli muniini loko, alimwi muzulwiidi mbuli umwi ukutawukila. 27 Nkaambo ngwani mupati, ngooyo na ukkede atebuli, naakuti ooyo ukutawukila? Tali nguwe na ukkede atebuli? Pesi ndili akati kanu mbuli ukutawukila.

28 ‘Muli baabo balokwinkilila anembo andime mumisunko yangu; 29 alimwi ndamupa nguzu zyakuti mweendelezye, mbuli Taata mbwaakandipa, nguzu zyakweendelezya, 30 kuti mukalye akunywa atebuli lyangu mubwami bwangu, mpawo mukakkale azyuuno zyabwami kukuzobeteka mikowa ilikkumi ayibili yaIzirayeli.

31 Eelyo Jesu wakati, "Sayimoni, Sayimoni, laanga, Satani wayanda kukusunka, kuti akubbeete mbuli zilyo, 32 pesi ndakukombela kuti lusyomo lwako lutakachilwi; alimwi naa wazunda lubo, usimye banyoko."

33 Alimwi wakati kulinguwe, "Mwami, ndililibambilide kweenda anduwe kuntolongo nikuba kulufu."

34 Mpawo wakati, "Ndakwaambila, Pita, mukuku tukoyokolika buzuba obuno, mane ukanditame tutatu kuti tundizi pe."

35 Eelyo Jesu wakati kulimbabo, "Nindakamutuma kamutakwe kakwama nikuba chikwama nikuba nsangu, kuli nchimwakabula na?"

Bakavwiila bati, "Takwe pe,"

36 Wakati kulimbabo, "Pesi lino, ooyo ujisi kakwama ngabweze, alakwe ulachikwama ngabweze, alimwi ooyo utakwe panga ngawuzye chisamo chakwe awule panga. 37 Nkaambo ndamwaambila kuti aaya malembe aleelede kuzuzikizigwa mulindime, ‘Mpawo wakabalilizigwa aamwi abasizibi’; nkaambo eecho chakalembwa atala andime chilijisi kuzuzikizigwa kwacho."

38 Mpawo bakati, "Laanga, Mwami, ngaya mapanga aabili." Alimwi wakati kulimbabo, "Kwazulila."

39 Mpawo wakazwa muJerusalemu weenda, mbuli chiyanza chakwe, kuchilundu chama Olivu; alimwi basikwiiya bakwe bakamutobela. 40 Alimwi naakasika kubusena oobo mbwakaamba kulimbabo wakati, "Kamukomba kuti mutanjili mumisunko."

41 Alimwi wakazwa akati kabo waya kunembo intamo fwiifwi, mpawo wakafugama wakomba, 42 "Taata, kuti kuyanda, gwisya chinywido eechi kuzwa kulindime; nikubaboobo kutabi kuyanda kwangu, pesi akube kuyanda kwanu." 43 Mpawo kwakaliboniya mungelo kazwa kujulu, kamusungwazya. 44 Alimwi kali mumachise wakakomba changuzu; alimwi matukuta aakwe akaba mbuli madonsi abulowa kaawida aansi anyika.

45 Alimwi naakabuka kuzwa kukukomba, wakabweeda kulibasikwiiya bakwe waakujana baloona chakuusa, 46 Mpawo wakati kulimbabo, "Monenaanzii? Amubuke mpawo mukombe kuti mutanjili mumisunko."

47 Jesu naakachili kwaambuula, aawo kwakasika inkamu yabantu, amwaalumi utegwa Judasi, umwi wabali kkumi ababili, wakali kubazulida. Wakaswena afwiifwi kuli Jesu kuti amumyonte; 48 pesi Jesu wakati kulinguwe, "Judasi, nga ulawuzya Mwana aMuntu na alumyoonto?"

49 Mpawo bamwi basikwiiya baJesu nibakabona zyakalikunochitika, bakati, "Mwami, tubagonke apanga na?" 50 Umwi wabasikwiiya wakabweza panga mpawo wakwazula kutwi lwakululyo lwamulanda wamupayizi mupati.

51 Pesi Jesu wakati, "Mutachiti oobu pe!" Mpawo wakajata kutwi kwamwaalumi mpawo wamuponiya.

52 Eelyo Jesu wakati kumupati wabapayizi abakapokola baŋanda yaLeza abaalu, bakaza kuzoomulwaniya "Mwaza kulindime mbuli baza kumubbi na, amapanga ankoli? 53 Nindakali andinywe buzuba abuzuba mulubuwa lwaŋanda yaLeza, taakwe nimwakandijata pe. Pesi eechi nchiindi chanu, anguzu zyamumudima."

54 Eelyo bakamubweza, mpawo bamweeta kuŋanda yamupayizi mupati. Pita wakali kuyabutobela chakulekule; 55 alimwi nibakakutula mulilo akati kalubuwa mpawo kabakkede aansi aamwi, Pita wakkala akati kabo. 56 Eelyo mulanda mwanakazi wakabona Pita naakaya kukukkala kumulilo, wakamulangisisya wati, "Ooyu mwaalumi alakwe walaamwi aJesu."

57 Pesi Pita wakakaka, wati, "Yomwanakazi tandimwizi pe me."

58 Alimwi mukayindi kaniini kwakayinda umwi muntu lubo wakabona wati, "Tuli uumwi wabo na?"

Mpawo Pita wakavwiila wati, "Yomwaalumi, tee ndime pe."

59 Mpawo muchiindi chahola limwi umwi wakaza chakukakatila wati, "Kasimpe ooyu mwaalumi alakwe wali aJesu; nkaambo muna Galili alakwe."

60 Pesi Pita wakamuvwiila wati, "Yomwaalumi, tandizizi pe ime nzulokwaamba,"

Mpawowawo nakachili kwaambuula mukuku wakalila. 61 Mwami wakacheba walanga Pita. Eelyo Pita wakayeeya ijwi lyaMwami, mbuli mbwaakamwaambila kuti, "Uyoonditama tutatu sunu, mukuku kutana kulila pe." 62 Mpawo Pita wakazwa anze, alimwi waakulila chamoyo uchisa.

63 Lino baalumi bakali kubamba Jesu bakatalika kumuwela alimwi kabalokumuuma; 64 bakamuvumba kumeso kwakwe, bakamuuma kubusyu, mpawo kabali kubuzya kabati, "Sinsima! Kuti ngwani wakuuma?" 65 Alimwi bakaambuula matusi miingi atala anguwe, kabamutukila.

66 Nibwakacha, inkuta yabeendelezi babantu abapati babapayizi abayiisyi bamulawu bakabungana aamwi, bakamutola munkuta, 67 kabati "Ndunduwe Kkirisitu na? Twaambile."

Mpawo Jesu wakavwiila wati, "Kuti ndamwaambila tamukwe kuyoondisyoma pe; 68 alimwi kuti ndamubuzya tamukwe kundivwiila pe. 69 Pesi kuzwa lino, Mwana aMuntu uyookkala kuluboko lwakululyo lwaLeza Singuzu."

70 Mpawo boonse bakabuzya bati, "Uli Mwana waLeza na?"

Wakavwiila wati, "Mwaamba kabotu kuti ndime."

71 Alimwi bakati, "Mbukamboni nzi mbutuchiyanduula? Twalimvwiida kuzwa kumulomo wakwe."