1 Mubuzuba bumwi bwasabata Jesu naakanjila muŋanda yamweendelezi wabaFarisi kuti akalye, bakali mulangide changuzu. 2 Alimwi laanga, kwaakali umwi mwaalumi kunembo lyakwe wakali kuzimba mawulu amaboko. 3 Mpawo Jesu wakati kubayiisi bamulawu abaFarisi, "Zili mumulawu na kuponiya mubuzuba bwasabata, naakuti takweelede?"

4 Alimwi bakawumuna. Eelyo wakamujata, mpawo wamusiilika, alimwi wakamuleka weenda. 5 Alimwi wakati kulimbabo, "Ngwani akati kanu, ulamwana nikuba ŋombe yawida muchikkala, alimwi takonzyi na mpawawo kumugwiisya mubuzuba bwasabata?"

6 Alubo teebakakonzya kumuvwiila atala acheechi.

7 Mpawo wakaambuula mukozyanisyo kuli baabo bakatambidwe, naakalanga atala mbubakasala kukkala kuzyuuno zyamubusena bula ajulu, kati kulimbabo, 8 "Kuti wamutamba awumwi kupobwe lyabwiinga, mutakakkali muzyuuno zyabulemu, ateni kulasika umwi ulaabulemu bwindiilide kwiinda bwanu utambidwe anguwe; 9 mpawo ooyo wakamutamba moonse ulaza kulindinywe amwaambile, ‘Amupe busena kumwaalumi ooyu,’ eelyo muyootalika kuba abweeme kuyookkala azyuuno zilaansi. 10 Pesi kuti watambwa, kuya ukaakukkale kuzyuuno zilaansi, kuchitila kuti asika wakumutamba, ulati kulinduwe, ‘Mweenzuma, buka ukaakukkale kuzyuuno zyabulemu’; mpawo uyoobuka abulemu akati kabo mbukkede aabo atebuli. 11 ✝ Nkaambo kufumbwa ulisumpula uyoofwiinsigwa, alakwe ulifwiinsya uyoosumpulwa."

12 Wakaamba alimwi kuli sikumutamba, "Naa watamba bantu kuchisusulo nilibapobwe, utatambi beenzunyokwe nibaba bakulana bako, nibaba banyoko nibaba bavubi mbimuyakilene aabo, nkaambo ayebo bazokutamba kuti bakuboozye nzuwakachita. 13 Pesi naawachita pobwe, kotamba bacheete, zilema, batyokede aboofu, 14 alimwi uyoolongezegwa, nkaambo tabakwe nchibanga balakulumbula pe. Mpawo uyoolumbulwa mubuzuba bwabubuke bwabaluleme."

15 Umwi wabaabo mbakali kulya aabo naakamvwa eechi, wakati kulinguwe, "Ulaachoolwe ooyo uyoolya chinkwa mupobwe mubwami bwaLeza!"

16 Pesi Jesu wakati kulinguwe, "Umwi mwaalumi wakachita pobwe pati, watamba bantu bayiingi. 17 Muchiindi chachisusulo wakatuma mulanda wakwe kuti akaambile aabo bakatambidwe kuti, ‘Ngabasike; nkaambo zyoonse zintu zyabakabotu lino.’ 18 Pesi boonse bakatalika kulilalila. Mutaanzi wakati kulinguwe, ‘Ndakawula muunda, alimwi ndeleede kuyowulanga; ndakumbila, undilekelele.’ 19 Alimwi umwi wakati, ‘ndawula zipani zilimusanu zyabasune baŋombe, lino ndiyanda kuyoozyeezya; ndakumbila, undilekelela.’ 20 Mpawo ooyu uumbi wakati, ‘Ndakwata mwanakazi, alimwi tandikonzyi kuza.’ 21 Mpawo mulanda wakaza waamba kuli simalelo wakwe. Eelyo simalelo wakwe wakaamba mubukali wati kumulanda wakwe, ‘Kuuya chakufwambana mutuzila amutuzila twachisi, mpawo ukatambe bachete azilema abatyokede aboofu.’ 22 Mpawo mulanda wakwe wakati, ‘Mwami, twachita mbuli mbuwatulayila, alimwi kuchili busena bucheede.’ 23 Alimwi simalelo wakwe wakati kumulanda, ‘Kuuya munzila kulubaya, ukakombelezye bantu kuti bazonjile mupobwe, kuchitila kuti ŋanda yangu izulile.’ 24 Nkaambo ndamwaambila, takukwe pe naba umwi wabaabo bakalitambidwe bayo labila pobwe lyangu!’ "

25 Lino Jesu wakeenda ankamu mpati yabantu; mpawo wakabacheba wakati kulimbabo, 26 "Naakuti muntu waza kulindime alimwi taasula wisi abayina naba banakwe abana bakwe abakulana abachizi bakwe, iiyi, nikuba buumi bwakwe, takonzyi kuba sikwiiya wangu pe. 27 Kufumbwa ooyu utakonzyi kunyampula chiingano chakwe mpawo anditobele, takonzyi kuba sikwiiya wangu. 28 Nkaambo ngwani akati kanu, uyanda kuyaka sanza, utasanguni kukkala aansi kuti abale muulo walyo, kuti ulijisi izulide na kuti alimane? 29 Ambweni, nabikka ntalisyo, mpawo walela, boonse baboona balatalika kumuwela, 30 kabaamba kuti, ‘Ooyu mwaalumi watalika kuyaka, alimwi wakalela kulimanisya.’ 31 Alimwi nguMwami wamusyoboonzi, wiinka kunkondo kuyoolwana awumwi mwami, utakkali aansi lutaanzi, akulingulula naakuti ulakonzya na abasilumamba balizyuulu zilikkumi kuti alwaniye zyuulu zilimakumi abili? 32 Alimwi kwataba oobo, eelyo, umwi kachilikule, ulatuma mwiiminini akukuyokumbila nzila zyaluumuno. 33 Nkikaako, kufumbwa wanu utayandi kupeda zyoonse nzyalaazyo, teelede kuba sikwiiya wangu."

34 Jesu winkilila anembo kati, "Munyo mubotu; pesi kuti munyo wasaluka, uyoobwedezegwa biyeni kuba kulweela. 35 Tuchikwe mulimu pe nikuba munyika nikuba kuchitwa mbole; pesi bantu balusowa. Ooyo ujisi matwi akumvwa, ngamvwe."