1 ✝ Mubuzuba bwasabata, *Jesu naakali kuyabweenda kabayabwiinda mumyuunda yazilyo, mpawo basikwiiya bakwe bakatalika kupulula mayila, kabaliikupuka amaboko mpawo kabolookulya. 2 ✝ Pesi bamwi babaFarisi bakababuzya bati, "Nkaamboonzi nimuchita ziteelede mumulawu mubuzuba bwasabata?"

3 ✝Mpawo Jesu wakavwiila wati, "Tamunabala na kuti Devidi wakachitayi naakaba anzala, lwakwe antoomwe abaabo mbakali aabo: 4 ✝ Ambwaaka kunjila muŋanda yaLeza, mpawo wakubweza chinkwa mpawo walya chipayililidwe, eecho chitakukwe kuzumininwa amumulawu wakachita ziteelede mumulawu kunze kwabapayizi abalikke kukulya, alimwi wakapa bakali kweenda aawe?"

5 Alimwi wakabaambila wati, "Mwana amuntu nguMwami wasabata."

6 ✝ Mulimwi sabata, Jesu wakanjila muchikombelo chabaJuda mpawo wayiisya, alimwi kwakali mwaalumi wakali aluboko lwakululyo lulebukide. 7 Mpawo bayiisyi bamulawu abaFarisi bakali kuyanda kulanga kuti ulamuponiya na mubuzuba bwasabata, kuchitila kuti bamujanine mulandu wakumutamikizya. 8 Pesi Jesu wakalizi zyakali mumizeezo yabo, mpawo wakaambila mwaalumi wakali lebukide luboko wati, "Nyampuka uze wimikile awa akati." Alimwi mwaalumi ooyo wakabuka wimikila mpawawo. 9 Alimwi Jesu wakabaambila wati, "Ndikumbila kubuzya, zileelede mumulawu na mubuzuba bwasabata kuchita chintu chibotu naakuti nchibi, kuvuna buumi naa kubunyonyona?" 10 Mpawo naakamana kubalanga boonse, wakaaambila mwaalumi ooyu wati, "Tandabika luboko lwako." Alimwi wakachita oobo: luboko lwakwe lwakapona.

11 Alimwi kabafundikide mukunyema abukali, mpawo bakabamba kuti ngabalamuchita biyeni Jesu.

12 ✝ ✝ Lino mumazuba aayo, wakaya kuchilundu kukukomba, oko nkwakakukomba kuli Leza busiku boonse. 13 Nibwakacha, wakayiita basikwiiya bakwe, mpawo wasala balikkumi ababili akati kabo, aabo mbakawulika kuti mbatumwa; 14 Wakasala Sayimoni, ooyo ngwakawuzika kuti Pita aEnduru mukulana aSayimoni aJakkobbu aJoni aFilipu aBbatolomewu, 15 mpawo Mateyu aTomasi aJakkobbu mwana aAlifasi aSayimoni muZiloti, 16 alimwi Judasi mwana aJakkobbu aJudasi Isikkariyoti, ooyu wakamuzya.

17 ✝Wakaseluka aabo, mpawo bakayimikila anyika itendebede, kali ankamu mpati yabasikwiiya bakwe, amakamumakamu abantu bakaza kabazwa mumyuunzi yoonse yaJudiya akuJerusalemu, alimwi akunkomwe zyalwizi lwakuTaya akuSidoni, bakaza kuzomuswiilizya, akuti abaponiye kumalwazi aabo; 18 alabo bakali kupenzegwa amuuya mubi bakaponesegwa. 19 ✝ Alimwi makamumakamu woonse akali kuyanda kumuguma, nkaambo nguzu zyakalikuzwa kulinguwe mpawo wakabaponiya boonse.

20 ✝ Mpawo wakatambya meso akwe kuli basikwiiya bakwe, wati:

"Mulaachoolwe nubachete,

nkaambo bwami bwaLeza mbubwanu!"

21 "Mulaachoolwe inywe nimulaanzala lino,

nkaambo muyookkuta!"

"Mulaachoolwe inywe nimulila lino,

nkaambo muyoosekelela!"

22 ✝"Mulaachoolwe na bantu bamusula akumwaanda akumwaamba bubi, nkaambo kazina lyaMwana aMuntu!" 23 Ngamukabotelwe mubuzuba oobo, alimwi mukakondwe, nkaambo impindu mpati ili kujulu, nkaambo mbumbubo mbubakachita bamawisi kubasinsimi.

24 ✝ ✝ "Pesi maawe kuli ndinywe bavubi,

nkaambo mwabujana kale bulumbu bwanu!"

25 "Maawe kulindinywe nimukkutide lino,

nkaambo muyooba anzala!"

"Maawe kulindinywe nimulo kusekelela lino,

nkaambo bayoolila akuuma mubila!"

26 "Maawe kuli ndinywe, naa bantu boonse nibazomulumbayizya, nkaambo mbubakachita bamawisi kubasinsimi babeji!"

27 ✝ "Pesi ndamwaambila eezi inywe nimuswilizizye kuti, Muyande basinkondonyokwe, mubachitile bubotu aabo bamusula, 28 amubalongezye aabo bamusyulikizya bubi, mubakombele bamudyaamizya. 29 Kuli ooyo umumata kuseya, mumupe alubo lumbi; alimwi kuli ooyo umutolela chisamo chanu mutamukasyi kuti abweze achigogo lubo. 30 Mupe kuli woonse umukumbila; alimwi bamutolela mbono zyanu mutakazilondi lubo pe. 31 Alimwi mbuli mbumuyanda kuti bamuchitile, amubachitile abalabo.

32 ✝ "Nkaambo kuti mwayanda bantu bamuyanda, niinzi nchimulumbwa aacho? Nkaambo basizibi alabo bayanda babayanda. 33 Alimwi kuti mwachita bubotu kuli baabo bamuchitila bubotu, niinzi mpindu njujana? Nkaambo nikuba basizibi mbubachita mbuboobo. 34 Na kuti wapa muntu ngulangilila kukupa, ninzi nchimulumbwa aacho? Nkaambo basizibi balapa kuli basizibinyina kuti bajane zyiindilide lubo. 35 ✝ Pesi yanda basinkondonyokwe, alimwi uchite obotu, amupe, kamutalangilili kujana*; nkaambo mpindu yanu iyooba mpati, alimwi muyooba bana baSijulu lyaMajulu; nkaambo ulaluse kuli batalumbi abasindya. 36 Amube aluse, mbuli Taata wanu mbalaaluse.

37 ✝ "Mutabeteki, kuti anywebo mutabetekwi; mutatamikizyi, kuti mutatamikizigwi alanu; amulekelele, kuti anywebo mukalekelelwe; 38 ✝ ngamupe, anywebo muyoopegwa, mumweelwe weelede, chisindiidwe, alimwi chumidwewumidwe, chifusukide kulindinywe. Ooyo mweelo ngumubelesya kulibamwi nguyoobelesegwa akulindinywe." 39 ✝ Wakabaambila chikozyanisyo wati: "Sa moofu ulakonzya na kuzulwida moofu nyina? Tabakonzyi kuwida mukomba boonse na? 40 ✝ Sikwiiya tayindi sikumuyiisya pe, pesi nawayiiya chizulide ulaba mbuli sikuuyiisya." 41 ✝ "Nkaamboonzi nimubona kafwapu aako kali muliso lyamukulana wako, pesi kutaboni tanda lili muliso lyako? 42 Naakuti nkaamboonzi nuwaamba mukulana wako kuti, ‘Mukwesu, ima ndikugwisye kafwapu kali muliso lyako,’ awo iwe nkujisi tanda muliso lyako? Nusikuupawupa, lutaanzi talika ugwisye tyanda lili muliso lyako, alimwi eelyo ulabona antangalala kugwisya kafwapu ako kali muliso lya mukulana wako."

43 ✝ "Nkaambo taakwe musamu mubotu ukonzya kuzyala michelo mibi, nikuba kuti musamu mubi ukonzya kuzyala michelo mibotu; 44 nkaambo awumwi musamu tulakuuziba amichelo yawo. Nkaambo kumukuyu tukoyochela maamvwa pe, nikuba kumasaansa kuzwa kumasanzu achooba pe. 45 ✝ Muntu ululeme mulizezyo nzyabambide zimwetela bubotu, pesi muntu ulamoyo mubi mububi moyo wakwe weeta bubi; nkaambo zilimumoyo nziizwa amulomo wakwe."

46 ✝ "Nkaamboonzi nimundita kuti, ‘Mwami, Mwami,’ kamutachiti nzindimwaambila? 47 ✝ Woonse uza kulindime alimwi kaswiliizya majwi angu akwaachita, ndiyoomutondezya kuti ukozyezye aani: 48 ulimbuli muntu uli kuyaka ŋanda, wasya yabbila, mpawo wabika ntalisyo amwaala; alimwi nikwaba zambangulwe, iguwo nilyasika atala aŋanda, alimwi tikooyokonzya kuzyukuka pe, nkaambo iyakidwe obotu.* 49 Pesi oyu umvwa akutalichita ijwi lyangu ulimbuli muntu uyaka ŋanda anyika itakwe ntalisyo; awo nilyaza zambangulwe, alimwi mpawaawo yawa, mpawo kuwa kwayo ŋanda nkupati."