1 Muchiindi eecho, awo zyuulu zyankamu zyabantu nizyakabungene kazili kulyatana, wakatalika kwaambila basikwiiya bakwe wati, "Amuchenjelele bumena bwabaFarisi, kachaamba kuupawupa kwabo. 2 Nkaambo takukwe chivumbidwe chitakaleke kuyubununwa; nikuba chisisidwe chitakaleke kuzibikana. 3 Nkikaako kufumbwa nzuwakaamba mumudima ziyomvwigwa mumumuuni; alimwi kufumbwa nzuwakavwiiya kukutwi muchimpetu ziyoowambwa antangalala ansonge yaŋanda."

4 "Ndamwaambila, nibeenzuma, kuti mutayoowi aabo bajeya mubili, nikwaayinda awo takwe chimbi nibamana awo takukwe nchibakonzya kuchita pe. 5 Pesi ndamuchenjezya ngumweleede kuyoyoowa: mumuyoowe ooyo, naamana kujeya, ujisi nguzu zyakuwalila mubbila lyamulilo; iiyi ndamwaambila, mumuyoowe!"

6 "Ani tee tutiiti tulimusanu tulasambaalwa amuulo amakobili abili? Alimwi takukwe nikuba kamwi kalubidwe kubusyu bwaLeza. 7 Nkaamboonzi, nikuba susu lilimumutwe wako lyoonse lilibalidwe. Mutayoowi; mulayandika kapati kwiinda tutiiti twiingi."

8 "Alimwi ndamwaambila kuti, kufumbwa uyoondizumina kunembo lyabantu, alakwe Mwana aMuntu uyoomuzumina kunembo lyabaangelo baLeza; 9 pesi ooyo undikaka kunembo lyabantu alakwe ndiyomukaka kunembo lyabaangelo baLeza."

10 "Alimwi kufumbwa woonse waambuula bubi atala aMwana aMuntu uyolekelelwa; pesi ooyo utukila Muuya USalala takoyoolekelelwa pe."

11 "Alimwi kuti baakumweeta muzikombelo zyabaJuda abeendelezi abasinguzu, mutakayanduuli naakuti kuyeeya nzimuyovwiila, nikuba nzimuyoowaamba; 12 nkaambo Muuya Usalala uyomuyiisya muchiindi nchicheecho nzimweelede kwaambuula."

13 Umwi wankamu wakati kulinguwe, "Muyiisyi, layilila mukulana wangu kuti, twaabane lukono andime."

14 Pesi Jesu wakati kulinguwe, "Yomuntu, ngwani wakandibika kuba mubetesi nikuba sikumwabaniya?" 15 Alimwi wakati kulimbabo, "Amuswiilile, alimwi muchenjele, nkaambo buumi bwamuntu tabuli mubuvubi bwakwe bwiingi pe mbwalijanina."

16 Mpawo wakabaambila mukozyanisyo kati, "Inyika yamuntu muvubi yakamupa butebuzi bwiingi loko. 17 Mpawo wakaliyeeya mwini wati, ‘Ndichite biyeni, nkaambo tandikwe butala bwakubamba zilyo zyangu?’ 18 Lino wakati, ‘Ndilachita oobu: ndiyomwayula matala angu, ndiyake mapati; mumo mundiyobamba zilyo zyangu zyoonse azintu zyangu zyoonse. 19 Alimwi ndiyoti kumuuya wangu, Muuya, wabambilwa zyeelede kwaminyaka miingi; lyookezye, lya, unywe, alimwi ubotelwe.’ 20 Pesi Leza wakati kulinguwe, ‘Iwe numufubafuba! Mansiku asunu ndilatola muuya wako; alimwi zintu nzuwakabambilila, ziyooba zyani?’ "

21 Eelyo Jesu wakagozya akuti, "Mbombubo mbuziyooba kumuntu ulibambila buvubi bwakwe mwini, pesi katavubide pe kuli Leza."

22 Alimwi wakati kuli basikwiiya bakwe, "Nkiinkako ndamwaambila kuti, mutalikatazyi atala abuumi bwanu, kuti mulalyaayi, nikuba kuti mulasamayi amibili yanu. 23 Nkaambo buumi mbupati kwiinda chakulya, amubili mupati kwiinda zisamo. 24 Amulange makubi: taalimi nikuba kutebula, taakwe chiyoobweedo nibuba butala; nikuba oobo Leza ulaasanina. Kulibulemu biyeni kulindinywe numuyandwa kapati kwiinda bayuni! 25 Alimwi nguni akati kanu ukonzya kuyungizya chisela chabuumi bwakwe nikuba aniini? 26 Kuti nywebo kamutakonzyi kuchita chintu chiniini chilimbuli eecho, nkaamboonzi nimulipenzya atala azintu zyoonse zyiingi? 27 Amulange malubaluba, mbaamena; tabeleki akuluka pe; alimwi ndamwaambila eezi kuti Solomoni mubulemu bwakwe boonse takukwe naakali samide mbuli limwi lya aaya. 28 Kuti Leza kasamika bwiizu oobo bulimumuunda sunu, alimwi junza bwawalilwa mumulilo, uyokachilwa biyeni kumusamika nywebo, inywe balusyomo luniini!"

29 "Alimwi mutayanduuli kuti mulalyayi, naakuti mulanywayi, nikuba kulipenziya mumiyeeyo yanu. 30 Nkaambo bantu batamuzi pe Leza bamunyika yoonse bayanduula eezi zintu; alimwi Taata wanu ulizizi kale nzimuyanda. 31 Anukuti, amuyanduule bwami bakwe, alimwi zyoonse zintu zimwi muyozipegwa alimwi."

32 "Mutayoowi, nukatanga kaniini, nkaambo nduyando lwaTaata wanu kuti amupe bwami. 33 Amusambale nzimujisi, alimwi mupe lubono lwanu kubachete; mulijanine zikwama zitakulumpali, amwanzike buvubi kujulu oko kutakwe kukachilwa pe, ababba nkubatakonzyi kusika, nikuba bamusunse banyonyona. 34 Nkaambo oko kuli lubono lwako, alimwi nkuuli moyo wako.

35 "Amukkale kamulibambilidide kuchita mulimu, azilazyo zimwinikisyo zyanu kaliikuyaka, 36 Alimwi amube mbuli bantu aabo balinda mwami wabo kuti asike, kazwa kupobwe lyakusimuna, kuchitila kuti aboola, akonkomona, bamujulide chakufwaambana. 37 Balaachoolwe aabo balanda bayojanika kabalindide aawo mwami akuboola; kasimpe, ndamwaambila kuti, uyoosama chisamo chamulimu, mpawo akabalayilile kuti bakkale atebuli balye, mpawo uyooza kukubakutawukila. 38 Balaachoolwe aabo balanda awo simalelo wabo akuboola mubulangilizyi nasika akatikaabo nikuba kubuchedo mpawo simalelo akubajana kabalokulanga! 39 Pesi amuzibe eechi, kuti muna ŋanda naa walizi kuti sikubba ulasika chiindi nzi, taalikuno siya ŋanda yakwe kuti injilwe. 40 Anywebo ngamulibambile; nkaambo Mwana aMuntu ulaza muchiindi nchimutayeyeli pe."

41 Eelyo Pita wakati, "Mwami, ulokwaamba chikozyanisyo eechi kulindiswe na, naakuti kuliboonse bantu?"

42 Mpawo Mwami wakati, "Ngwani mulanda usyomeka amubanzi musongo, ooyo simalelo wakwe ngwayobikka bwendeelezi bwaŋanda yakwe, kuti abaabile chipanzi chakulya kuchiindi cheelede? 43 Ulaachoolwe mulanda ooyo simalelo wakwe nayooboola akajane ulokuchita oobo. 44 Ndamwaambila kasimpe, uyoomupa bweendelezi atala azyoonse nzyajisi. 45 Pesi naa mulanda ooyo waamba kuti mumoyo wakwe, ‘Simalelo wangu wachedwa kusika,’ alimwi watalika kuuma balanda baalumi abanakazi, mpawo watalika kulya kunywa, akukolwa, 46 simalelo wayooyu mulanda uyoboola mubuzuba mbwatakukwe bulangilizi pe, alimwi muchiindi nchatazi pe, alimwi uyoomupa chisubulo chipati, akumubika aamwi abatasyomeki pe.

47 "Alimwi ooyo mulanda wakazi luyando lwasimalelo wakwe, pesi katakwe nakalibambila nikuba kuchita mbuli mbwakalayililwa, uyoowumwa kapati. 48 Pesi ooyo utakwe wakalizi pe, alimwi na watachita iziyanda kuti awumwe, uyowumwa buniini. Woonse kuliyooyo upegwa zyiingi, kuli nguwe kuloyandwa zyiingi; akuliyooyo muntu nkwalipeda kapati, kuyooyandwa zyiingi."

49 "Ndakaza kuti ndikutule mulilo anyika; alimwi ndalachiyandisyo chakuti niinga ukodede kale! 50 Pesi ndilalubbapatizyo ndundeelede kubbapatizigwa aalo; anzila njindeelede kuba amoyo mulamfu kusikila zikazuzikizigwe! 51 Mwezyanga ndaza kuzopa luumuno anyika? Peepe, ndamwaambila, pesi ndazida kupambukaniya; 52 kuzwa lino balimusanu muŋanda iimwi bayoopambukana, batatu bayoolwanisya babili, alabo babili bayoolwanisya batatu; 53 bayoopambukana, wisi uyoolwanisya mwana wakwe alimwi mwana uyoolwanisya wisi, bayina bayoolwanisya mwana musimbi mpawo mwana musimbi uyolwanisya bayina, bayinazyala bayolwanisya mukamwana alakwe mukamwana uyolwanisya bayinazyala."

54 Lino wakaambila inkamu wati, "Mwakubona ijoba kalilokunyampuka kuzwa kumboo, mpawo mukaambe kuti, ‘Imvula yambakuwa’; alimwi kuyooba mbuboobo." 55 Mpawo mwakubona iguwo lyawunga kuzwa kumusansa, mukambe kuti, "Kwaamba kupya, mpawo kuyooba mbuboobo. 56 Inywe nubasikuupawupa! Mulizi kupanduluula busyu bwajulu anyika; nkaamboonzi nimutakwizi kupanduluula chiindi echino?

57 "Alimwi nkaamboonzi nimutakonzyi kubeteka ziluleme? 58 Nimwiinka ambimwasundila kunkuta, amusungwalile kwaamana makani kamuchilimunzila, nkaambo uyootolwa kumubetesi, alimwi sikubeteka uyokwaaba kuli bakapokola, mpawo bakapokola bayookuwalila muntolongo. 59 Ndamwaambila, kuti takukwe niyoozwa pe, mane ukaliye kkobili lyamamanino."