1 ✝Muli bumwi buzuba Jesu kali kukomba mubusena bumwi, lino naakamana kukomba, umwi wabasikwiiya bakwe wakamwaambila wati, "Mwami, tuyiisye kukomba, mbuli Joni mbwakayiisya basikwiiya bakwe."

2 Mpawo wakabaambila wati, "Nimukomba, kamwaamba kuti:

‘Taata wesu ulikujulu,

Alilemekwe zina lyako.

Bwami bwako abusike.

3 Utupe buzuba abuzuba chakulya eecho nchituyanda.

4 Alimwi utulekelele zibi zyesu,

mbuli mbutu balekelela aabo batubisizya.

Mutatuzulwidi mumisunko.’ "

5 Eelyo Jesu wakabaambila wati, "Ngwani akati kanu ulamweenzunyina uza akati kamansiku wati kulinguwe, ‘Mweenzuma, ndicheneke zinkwa zitatu; 6 Nkaambo ndaswayigwa mweenzuma wazwa mulweendo lulamfu pesi mebo nsikwe chakulya pe kuti ndimupe.’ 7 Alimwi uyovwiila kalimukati kuti, ‘Utandikatazyi; mulyango wajalwa kale, alimwi bana bangu balamwi andime kubulo; tandikonzyi pe kuti ndibuke ndikupe nikuba chili.’ 8 Ndamwaambila, nikuba kuti takonzyi kubuka kuti amupe, pesi nkaambo kakuti mweenzunyina, nkaambo kwakukakatila ulabuka akuyinka kuyoomupa kufumbwa nzyayanda. 9 Alimwi ndamwaambila kuti, kamukumbila, alimwi mulapegwa; kamuyanduula mulajana, kamukonkomona mulajulilwa. 10 Nkaambo kufumbwa woonse ukumbila ulapegwa, alimwi uyanduula ulajana, alakwe ukonkomona ulajulilwa. 11 Ngwani wisi akati kanu na mwana wako wakumbila muswi, kwiinda muswi inga ulamupa muzoka na? 12 Alubo akumbila iji, ulamupa kabanze na? 13 Kuti nywebo, nibasizibi, kamukonzya kupa bana banu zipo zibotu, ani kulaba biyeni kuli Taata wanu ulikujulu, upa Muuya Usalala kulibaabo bamukumbila!"

14 Lino Jesu wakali kutanda sikazwa wasyatambi; lino sikazwa nuwakazwa, muntu ooyo syatambi wakaambula, alimwi bantu bakagamba. 15 Pesi bamwi bakati, "Waanda myuuya mibi kabelesya Bbelizabbabbu mweendelezi wabasikazwa."

16 Alimwi bamwi, bakamusunka Jesu, kabakumbila kulinguwe chitondezyo chizwa kujulu kuli Leza. 17 Pesi Jesu kazi miyeeyo yabo wakati, "Boonse bwami bwanzeene bulatakanika, alimwi iŋanda itanambene ilawida aansi. 18 Alimwi kuti Satani kaanzene mubwami bwakwe, bulayimimikila biyeni bwami bwakwe? Nkaambo mwaamba kuti nditanda basikazwa munguzu zyaBbelizabbabbu. 19 Alimwi kuti kanditanda basikazwa munguzu zya Bbelizabbabbu, lino bana banu ninguzu zyani nzibabelesya kukutanda? Lino bayooba babeteki banu. 20 Pesi kuti kakuli anguzu zyaLeza nkinditandya basikazwa, takuchikwe kudoneeka pe, zyabaantangalala kuti bwami bwaLeza bwaza alindinywe."

21 "Naa mwaalumi mukozu, kalaazilwanisyo zyeleede, wakwabilila lubuwa lwakwe, lubono lwakwe bunolondokede muluumuno. 22 Pesi kuti ulaanguzu zyiindilide waakumulwaniya akumuzunda, ulabweza zilwanisyo zyakwe zyoonse nzyabikilidide moyo, mpawo ulazyabanisya."

23 "Ooyu utali andime, ngusinkondoma, ulwana andime, mpawo ooyu utabunganiyi amwi andime ulamweya."

24 "Naa muuya mubi wazwa mumuntu, ulayinda mumasena atakwe meenda pe kuyanduula kulyokezezya; alimwi kuti waabula, ulaamba kuti, ‘Ina ndibweede muŋanda mundakazwa,’ 25 Alimwi naaboola, ulajana busena buliyilidwe kabubambidwe kabotu bwasalala. 26 Lino ulayinka akatambe iimbi myuuya ilimusanu ayibili eeyo yindiide bubi kwinda nguwo, ulanjila ooyu muntu unoli wabija chakwindilila chiimo chasunu kwiinda jilo."

27 Naakachili kwaambuula zintu eezi, umwi mwanakazi munkamu wakoompolola ajwi pati wati, "Bulaachoolwe bula bwakakutumbuka, ankolo nzuwakanyonka!"

28 ✝ Pesi wakati, "Alimwi balaachoolwe aabo bamvwa ijwi lyaLeza akulibamba!"

29 Awo nkamu niyakali kuvula, wakatalika kwaambuula wati, "Aaya mazyalani akompeme! Bayanduula chitondezyo; pesi takukwe chitondezyo chiyoobawo pe, pesi aayo akaba muchiindi chamusinsimi Jona. 30 Nkaambo mbuli Jona wakaba chitondezyo kubantu baNiniva, mbumbubo mbukubede akumazyalani asunu, lino Mwana aMuntu mbayooba kuzyalani eli. 31 Nabulelo wakuNyika uyoobuka mulubeta abaalumi amazyalani alino akubapa mulandu, nkaambo wakazwa kumagolelo anyika azomvwe busongo bwamwaami Solomoni, alimwi amulange, umwi mupati kwiinda Solomoni ulaano. 32 Bantu bamu Niniva, bayoobukila mukubetekwa alubeta lwamazyalani aaya, akuyonyontooka, nkaambo bakasanduka kukukambawuka kwaJona; alimwi amulange chimwi mupati kwiinda Jona ulaano!"

33 "Takukwe uyasya chimwinikisyo mpawo alibike muchinkuma, nikubamunsi lyatebuli, pesi ulabika achibikilo chimwinikisyo ataangalala kuchitila kuti aabo banjila babone mumuuni. 34 Igisyo lyako ndilampi lyamubili wako, nchinchicho naakuti igisyo lyako kalizwide mumuuni, alimwi mubili woonse ulajana mumuuni, pesi kuti igisyo lyako lyaba bbi, mubili woonse ulazula mudima. 35 Nkikaako amuchenjele kuti mumuuni uli mulindinywe utabi mudima pe. 36 Eelyo kuti mubili wako woonse wazula mumuuni, kakutakwe naba amwi alimudima, woonse mubili uyooba amumuuni mbuli chimwinikisyo mbuli bekema kukumwinika kwalyo."

37 Nakachili kwaambuula, uumwi muFarisi wakamukumbila wamutamba kuti balye aamwi; eelyo Jesu wakanjila wakkala atebuli. 38 MuFarisi wakagamba kuti nkaamboonzi natasambide pe katanaalya. 39 Mpawo Mwami wakati kulinguwe, "Lino inywe nibaFarisi musalazya anze lyankomechi andido, pesi mukati kanu kuzwide kulisumpula abusofwazi. 40 Inywe nubafubafuba! Tee ooyo wakalenga zili anze ngunguwe wakalenga zilimukati azilazyo? 41 Pesi mupe zipo kuzintu ezyo zimujisi; alimwi muzibe kuti, zyoonse zintu zilasalala kulindinywe."

42 ✝ "Pesi maawe kulindinywe nibaFarisi! Nkaambo mupa chakumi chamini, chisyungwa, azisyu zyamumuunda azimwi zisiyene, alimwi mutaaluka kubeteka mukasimpe amuluyando lwaLeza; ezyo nzimweelede kuchita, kamutasiyi zimwi pe."

43 "Maawe kulindinywe nibaFarisi! Muyanda zyuuno zili ajulu muzikombelo zyabaJuda, alimwi muyandisya kujuzigwa chabulemu kuzisambalilo. 44 Maawe kulindinywe! Nkaambo muli mbuli zibunda zitaliboniyi pe, alimwi bantu beenda atala azyo kabatazizi pe."

45 Lino umwi wabayiisi bamulawu wakamumvwila wati, "Muyiisyi, aswebo watukalalila."

46 Mpawo wakabaambila wati, "Maawe kulindinywe nibayiisi bamulawu! Nkaambo mulemya bantu mukuli milemu, anywebo njimutakonzyi kunyampula pe akanwe kanu kamwi. 47 Maawe kulindinywe! Nkaambo muyaka zibunda zyabasinsimi, aabo basinsimi bamawuso mbibakajeya. 48 Kasimpe mujisi bukamboni oobu buzuminina kusunda kwabamawuso; nichonzyo bakabajeya, mpawo mwayaka zibunda zyabo. 49 Nkikaako alabo busongo bwaLeza bwamba kuti, ‘Ndiyoobatumina basinsimi abatumwa, mpawo bamwi babo bayoobajeya akubapenziya,’ 50 kuti oobo bulowa bwabasinsimi boonse, obo mbumwakatila kuzwa kumalengelo anyika, buyoyitwa kuzyalani eeli, 51 kuzwa kubulowa bwa Abbelo kuyosika kubulowa bwaZakkariya, ooyo wakafwa akati kaŋanda yaLeza achipayililo abusena busalala. Iyi ndambwaambila buyoyitwa kumazyalani aaya!

52 "Maawe nubayiisi bamulawu! Nkaambo mwakasowa chijuzyo chaluzibo; takukwe nimwakanjila nibeni, alimwi mwakabinda aabo bakalikuyanda kunjila kuti batanjili!"

53 Alimwi nakalikweenda, bayiisyi bamulawu abaFarisi bakatalika kumubilizya chakwiindilila akumudyokola kuti aambuule zintu zyiingi, 54 Kabali kuyubilila kuti bayanduule kaambo nkibatamutame aako kuti bamwaange.