1 Eelyo nkamu yoonse yakabuka aamwi, mpawo yakatola Jesu kuli Payileti. 2 Mpawo bakatalika kumutamikizya, kabali kuti, "Twajana mwaalumi ooyu kalokunyonganiya chisi chesu, alimwi kalikutukasya kutela kuliSiza, kalokuti we mwini nguMesiya mwami."

3 Alimwi Payileti wakamubuzya wati, "Nduwe Mwami wabaJuda na?"

Mpawo wakamuvwiila wati, "Waamba mbubo."

4 Mpawo Payileti wakati kubapayizi bapati ankamu, "Tandijene mulandu pe kumwaalumi ooyu."

5 Pesi bakakakatila kapati, kabati, "Wanyoonganiya bantu, kalokubayiisya muJudiya yoonse, kuzwa kuGalili mane kuzosika kubusena obuno."

6 Eelyo Payileti naakamvwa eechi, wakabuzya kuti naakuti mwaalumi ooyu ngwaku Galili? 7 Mpawo naakamvwa kuti ngwankuta yaHerodi, wakamutola kuliHerodi, ooyu wakali muJerusalemu muchiindi eecho. 8 Awo Herodi naakabona Jesu, wakakondwa kapati, nkaambo wakalachiyandisyo chakuti amubone muchiindi chilamfu, nkaambo wakali wamvwa mpuwo mpati atala anguwe, wakali kuyanda kubona chitondezyo mpawawo. 9 Aboobo wakabuzya mumajwi mayiingi asiyenesiyene; pesi Jesu takwe naakamuvwiila. 10 Bapati babapayizi abayiisyi bamulawu bakayimikila mpawo kabalo kumutamikizya milandu chabukali. 11 Mpawo Herodi abasilumamba bakwe bakamusonsya akumuwela; eelyo bakamusamika mudabba uŋayima udula, mpawo bakamubwedezya kuli Payileti. 12 Alimwi mubuzuba mbuboobo Payileti aHerodi bakabusilizya bweenzunyina bwabo, nkaambo kakutanaba eechi bakali basinkondonyina.

13 Eelyo Payileti wakayita antoomwe bapayizi bapati abeendelezi abantu, 14 mpawo wati kulimbabo, "Mwandeetela mwaalumi ooyu mbuli muntu uyuunga bantu kuti balwaniye fulumende wabaRoma; alimwi ndamufunkulula kunembo lyanu mpawo ndajana katakwe mulandu kuli zyoonse nzimwamutamikizya; 15 nikuba Herodi, wamubwedezya kulindiswe. Amulange, taakwe mulandu ngwakachita weelela lufu pe; 16 aboobo ndilamuuma biyo mpawo ndimwaangunune." 17 (Nkaambo wakaleelede kubaangunwida mwaange umwi mwaalumi kuPobwe lyaKwindilila.)

18 Eelyo bakoompolola boonse ajwi limwi, "Bweza muntu ooyu, mpawo utwangunwide Bbarabbasi!" 19 Ooyu mwaalumi wakali wawalilwa muntolongo nkaambo kambukila muchisi, akujeya.

20 Payileti wakabayinkiila lubo, kalaachiyandisyo chakwaangununa Jesu; 21 pesi bakayiinkilila anembo kabakoompolola bati, "Ngabambulwe! Ngabambulwe!"

22 Wakabaambila kachitatu wati, "Nkaamboonzi? Bubinzi mbwaachita? Takukwe nindamujanina amulandu weelede lufu pe; nkikaako ndilamuuma biyo, mpawo ndimwaangunune."

23 Pesi akufwambana, bakaamba ajwi pati, kuti weleede abambulwe. Mpawo jwi lyabo lyakazwidilila. 24 Aboobo Payileti wakapa chisubulo chakuti kuchitwe mbuli mbubakalikuyanda. 25 Wakabaangunwida ooyu mwaalumi wawaalilwa muntolongo nkaambo kambukila akujeya, pesi Payileti wakabapa Jesu ooyu ngubakali kuyanda.

26 Alimwi nibakali kumutola, bakajata changuzu umwi mwaalumi utegwa Sayimoni waku Sayirini, wakalizwa kunze anyika, mpawo bakamunyampuzya chiingano, kuti alemunuzye Jesu kalokumutobela.

27 Alimwi wakatobelwa ankamu mpati yabantu, abanakazi, aabo bakali kuya bumuliilila akoomoka. 28 Pesi Jesu naakacheba kulimbabo wakati, "Nibanakazi bamu Jerusalemu, mutandilili pe, pesi amulilile lwanu abana banu. 29 Nkaambo laanga, mazuba ayoosika awo mpubaatambe kuti, ‘Balaachoolwe banakazi ngomwa, amada atanaakuzyala pe, ankolo zitakwe zyakanyonkwa pe!’ 30 Eelyo bayotalika kwaamba kuti kuzilundu, ‘Tuwide’; alimwi bayowamba kuti kutulundu, ‘Mutuvumbe.’ 31 Nkaambo kuti bachitoobu kumusamu mutete, niinzi chiyoochitika do wayuma?"

32 Bamwi babili bakali basimulandu, bakatolwa aamwi aJesu kuti bakajeegwe.

33 Alimwi nibakasika kubusena butegwa Choompo, nkuunkuko nkubakamugankamina, abasimulandu, umwi kululyo alimwi umwi kulumwensi 34 Mpawo Jesu wakati, "Taata, balekelele; nkaambo tabachizi pe nchibachita."

Mpawo bakawuma chisolo kuti baabane zisamo zyakwe. 35 Alimwi bantu bakaliimvwi afwiifwi, kabamulangide; beendelezi babaJuda bakamuwela kabati, "Wakali kufutula bamwi; ngalifutule, kuti kali Kkirisitu waLeza, Musale!"

36 Basilumamba alabo bakamuwela, kabaza kulinguwe kuti bamupe mundulwe, 37 mpawo kabati, "Kuti kuli mwami wabaJuda, lifutule!"

38 Kwakali bulembo atala lyakwe bwakali lembedwe kuti, "OOYU MWAMI WABAJUDA."

39 Umwi wabasimulandu wakali lengelede wakamutukila, kati, "Tuli Mesiya na? Lifutule mpawo andiswe!"

40 Pesi umwi wakamukalalila, kati, "Tuyoowi Leza na iwe, mbukunga ayebo ulimuchisubulo nchicheechi? 41 Alimwi iswe twapegwa chisubulo cheelede; nkaambo twajana impundu yakubisya kwesu; pesi ooyu mwaalumi taakwe nchaakabisya pe." 42 Mpawo wakati, "Jesu, ukandiyeeye wakuboola mubwami bwako." 43 Alimwi wakati kulinguwe, "Kasimpe, ndakwaambila, sunu unooli andime muParadayisi."

44 Chakali chabachiindi chakalanga bweeseme, kwakaba mudima muchisi choonse kuzwa kukalanga bweeseme kuyoosika goko, 45 aawo izuba nilyakaleka kubala; mpawo mudabba waŋanda yaLeza wakadeluka akati. 46 Eelyo Jesu, wakalila ajwi pati, wakati, "Taata, muuya wangu nduubika mumaanza ako!" Naakamana kwaamba aaya wakayooya chakwelelezya.

47 Lino umwi silutwe wabasilumamba naakabona ezyo zyakachitika, wakalumbayizya Leza, wati, "Kasimpe ooyu mwaalumi waliluleme!"

48 Alimwi makamu woonse akabungene nibakaboona zyakachitika, bakabweeda kumuunzi yabo mukuusa. 49 Alimwi boonse basikwiiya bakwe abanakazi bakali kuyabumutobela kuzwa Galili bakayimikila kulekule, alimwi bakazibona zintu eezi

50 Lino kwakali mwaalumi utegwa Jozefu. Wakali umwi wankuta, wakali mwaalumi mubotu, kaluleme, 51 ooyo utakwe naakazuminana azeezyo nzibakabambide akuchita. Uzwa kumaJuda wakuchisi chaArimatiya, alimwi wakaza kaliikuyanduula bwami bwaLeza. 52 Ooyu mwaalumi wakayinka kuli Payileti mpawo waakukumbila mutunta waJesu. 53 Eelyo wakuwangula, mpawo wawuvunga mumudabba uŋayima, alimwi bakawulazika muchibunda lyakali golo, oomo mutakwe mwakalina lazikwa muntu pe. 54 Bwakali buzuba bwakubambila, mpawo sabata yakalikutalika.

55 Banakazi bakali baza awe kuzwa kuGalili bakatobela, bakabona chibunda amutunta wakwe mbuwakalazikwa; 56 eelyo bakabweeda, kuti bakabambile butopozyo atununkilizyo twamubili.

Alimwi musabata bakalyokezya mbuli mumulawu.