1 Mpawo Jesu wakayita basikwiiya bakwe balikkumi ababili atoomwe mpawo wakabaabila nguzu abweendelezi atala abasikazwa boonse, akusilika malwazi, 2 mpawo wakabatuma kuti bayiinke bakakukambawuke bwami bwaLeza, akuponiya bachiswa. 3 Alimwi Jesu wakabalayilila wati, "Mulweendo lwanu mutabwezi musako nikuba chikwama nikuba chakulya nikuba mali alimwi mutakabi azisamo zibili. 4 Lino kufumbwa ŋanda njimutakakunjile, ngamukakkale mumo, mane mukakuzwe mudolopo eelyo. 5 Kufumbwa nkubatakaleke kumutambula, nimwaakuzwa mugunzi eelyo, mukakunkumune lusuko lyabo kumawulu aanu eezi ziyooba bukamboni biyo atala ambabo."

6 Bakazwa mpawo bakayinda mumyuunzi, kabalikukambawuka makani mabotu akuponiya bantu mumasena woonse.

7 Lino Herodi mweendelezi naakamvwa mpuwo yazezyo zintu zyoonse zyakachitwa, takukwe nakakkalinkana pe, nkaambo zyakali zyaambwa kuti Joni wabuka kuzwa kubafu, 8 Lino bamwi bantu bakati ngu Elayija waliyubununa, alimwi bamwi bakati musinsimi wachiindi wabuka lubo. 9 Herodi wakati, "Joni ndakamugonka mutwe; pesi ngwani ooyu ngundiliikumvwa atala azintu zili boobu?" Alimwi wakalombozya kumubona.

10 Nibakabweeda batumwa bakamwaambila zyoonse nzibakachita. Mpawo wakababweza weenda aabo kuchisi chitegwa Bbetisayida. 11 Inkamu niyakamvwa, yakatobela; mpawo wakiitambula alimwi wakaambuula aabo atala abwami bwaLeza, akuponiya aabo bakali kuyanda kuponesegwa.

12 Lino izuba nilyakaya kukubbila; balikkumi ababili bakaza mpawo bati kulinguwe, "Leka bantu aaba beende, baye mumyuunzi amunyika zilaafwiifwi, bakajane busena bwakoona achakulya; nkaambo swebo omuno tuli mubusena buli abulikke."

13 Pesi Jesu wakati kulimbabo, "Amubape chakulya."

Mpawo bakati, "Taakwe nchitulaacho kunze zinkwa zilimusanu abaswi babili kunze kwakuti tweende tukawule chakulya chabantu boonse aaba." 14 Nkaambo kwakali baalumi bakali mbuli zyuulu zilimusanu.

Mpawo wakati kuli basikwiiya bakwe, "Amubalayilile bakkale aansi mutubunga, twamakumi alimusanu."

15 Alimwi bakachita oobo, mpawo bakabalayilila kuti bakkale aansi boonse. 16 Mpawo wakabweza zinkwa zilimusanu abaswi babili walanga kujulu, mpawo wakazilongezya akuzikwamuna, mpawo wakapa basikwiiya bakwe kuti baabile nkamu. 17 Alimwi boonse bakalya mpawo bakkuta. Alimwi bakabwezelela bufwefwelenga bwakachaala, bazuzya zisuwo zilikkumi azibili.

18 Alimwi kwakaba kuti mulichimwi chiindi nakalikukomba basikwiiya bakwe bakalaanguwe; mpawo wakababuzya wati, "Ani bantu bandaamba kuti ndimeni?"

19 Bakavwiila bati, "Joni muBbapatizi; pesi bamwi bakati, nguElayija; alimwi bamwi bakati, ngumwi wabasinsimi wachiindi wabuka."

20 Mpawo wakabuzya wati, "Pesi nywebo mundaamba kuti ndimeni?"

Pita wakavwiila wati, "Nduwe Kkirisitu waLeza."

21 Pesi wakabaambila akubalayilila kuti bataambili nikuba uumwi, 22 kati, "Mwana aMuntu uyoopenzegwa munzila zyiingi, akuyootamwa abapati babantu abapayizi bapati abayiisyi bamulawu akujayigwa, mpawo mubuzuba bwachitatu kuzwa mubuzuba mbwaakafwa uyoobusigwa."

23 Alimwi wakati kuli boonse, "Naakuti muntu wayanda kunditobela, uleelede kulitakata akubweza chiingano chakwe mazuba woonse akunditobela. 24 Nkaambo kufumbwa ukwaabilila buumi bwakwe uyobusweekelwa; alimwi kufumbwa usweekelwa buumi bwakwe nkaambo kangu, uyoobujana. 25 Nkaambo nimpindunzi muntu njajana kuti wajana nyika yoonse mpawo wasweekelwa muuya wakwe? 26 Nkaambo kufumbwa ufwa bweeme nkaambo kangu alimwi nkaambo kamajwi angu, alakwe Mwana aMuntu uyoomufwida bweeme aakuza mubulemu bwakwe abulemu bwaWisi abwa baangelo basalala. 27 Pesi ndamwaambila kasimpe, kuli bamwi bayimvwi aawa tabakwe kuyoolabila lufu pe kabatana bona bwami bwaLeza."

28 Lino nikwayinda mazuba alimusanu aatatu awo Jesu nakaamba aaya majwi, wakeenda aPita aJoni aJakkobbu, mpawo wakatanta aabo chilundu kukuyookomba. 29 Mpawo naakalichili kukomba, busyu bwakwe bwakasanduka, alimwi zisamo zyakwe zyakatuba bu akubayima mbuli kalabi. 30 Alimwi laanga, baalumi babili bakali kwaambuula awe, aabo bakali Mozesi aElayija, 31 bakayubunuka mubulemu bwakwe alimwi wakaambuula aabo atala alufu lwakwe mbwaakaleelede kuyozuzikizigwa kuJerusalemu. 32 Lino Pita abaabo mbakali aabo, bakafuntwa ngonzi; nibakabuka, bakabona bulemu bwaJesu abaalumi babili bakaliimvwi aawe. 33 Alimwi aaba baalumi nibakali kwanzana, Pita wakati kuli Jesu, "Mwami, tee chibotu na kulindiswe kuti tukkale aano tuyake zidyumba izitatu, chimwi chako, chimwi chaMozesi, alimwi chimwi chaElayija." (Katazi nzyakali kwamba.)

34 Naakachili kwaambuula oobo, kwakaza joba lyabavumba; mpawo bakayoowa nibakali kuvumbwa ajoba. 35 Mpawo kwakazwa jwi lyaLeza kuzwa mujoba, lyakati, "Ooyu Mwana wangu, nguNdakasala; amumuswilile!"

36 Mpawo jwi nilyakamana kwaambuula, Jesu wakachaala kalaalikke. Alimwi basikwiiya bakazibaamba nkilinsiiswa teebaakambila muntu pe naba uumwi muchiindi eecho atala nzibakabona.

37 Lino buzuba butobela, nibakaseluka kuzwa kuchilundu, nkamu mpati yakamutambula. 38 Mpawawo uumwi mwaalumi wakali munkamu eeyi wakompolola wati, "Muyiisyi, ndakukumbila kuti ufwide luse mwanaangu, nkaambo ngunguwe alikke. 39 Alimwi laanga muuya mubi ngawamunjila, mpawo ulakwiila; alimwi ngawamuchisa mpawo wamugwisya kkovu, ngawamuzapawula mpawo uzwa chabuyumuyumu. 40 Ndakakumbila basikwiiya bako kuti bawutande pesi wakabakachila."

41 Mpawo Jesu wakavwiila wati, "Nywebo izyalani litakwe lusyomo liswekede, kuyooba liili kandichikkede andinywe akumulampisizya moyo? Amumweete okuno mwana."

42 Mulombe nakali kuyobuza kuli Jesu, sikazwa wakamusuntula wawida ansi, wakagwayala. Pesi Jesu wakalayilila muuya mubi, alimwi mulombe wakapona mpawo wakamutola kuli wisi.

43 Alimwi boonse bakagambwa kubona nguzu zyaLeza.

Pesi nibakachiligambide umwi awumwi kuzintu zyakachitwa aJesu, wakaambila basikwiiya bakwe wati,

44 "Aya majwi nganjile mumatwi anu; nkaambo Mwana aMuntu uyoowabwa mumaanza abantu." 45 Pesi tebakaamvwisisisya pe nchaakali kwaambuula kuti chaambaanzi, nkaambo chakilisisidwe kulimbabo, kuchitila kuti batachimvwi, alimwi bakayoowa kukumbila kubuzya, kuti zyaambanzi.

46 Mpawo kwakaba kukazyaniya kuti utakabe mupati akati kabo ngwani. 47 Pesi Jesu naakaziba nzibakali kuyeeya, wakabweeza mwana muniini, mpawo wamwiimikizya kumbali lyakwe, 48 alimwi Jesu wati, "Kufumbwa utambula mwana muniini muzina lyangu wanditambula ndimwini, mpawo ooyo utambula ndime watambula ooyo wakandituma; nkaambo ooyo wamamanino akati kanu moonse uyooba mupati."

49 Joni wakavwiila wati, "Mwami, twamubona umwi kalikutanda muuya mubi muzina lyako, mpawo swe tweezya kumukalalila, nkaambo tali uumwi wesu pe."

50 Pesi Jesu wakati, "Mutamukasyi pe; nkaambo ooyu utalwani anyweebo talisinkondonyokwe pe."

51 Awo mazuba naakaba afwiifwi akuti atolwe kujulu, wakapanga lweendo lyakuuya kuJerusalemu. 52 ✝Alimwi wakatuma batuumwa kuti batunge kunembo lyakwe, kuti bakamubambile; mpawo bakakunjila mumuunzi yabaSamariya, kuti bakakumubambile, 53 pesi bantu bankuko teebakamutambula pe, nkaambo busyu bwakwe bwakali kutondezya kuti uyobuya kuJerusalemu. 54 ✝ Awo basikwiiya baJesu Jakkobbu aJoni nibakabona eezi, bakamubuzya bati "Mwami, ulayanda na kuti tulayilile mulilo useluke kuzwa kujulu, ubanyonyone?" 55 Pesi Jesu wakabacheba mpawo wabakalalila. 56 Mpawo bakaya kuluumbi muunzi.

57 Nibakali kuyabweenda munzila, uumwi mwaalumi wakati kuli Jesu, "Mwami ndilakutobela kufumbwa nkutaye." 58 Mpawo Jesu wakamwaambila wati, "Bamwaaba bala mpako, alimwi bayuni bawuluka kujulu balaazisaba, pesi Mwana aMuntu takwe mpalaabusena bwakulyokeezya."

59 Mpawo wakati kuli uumbi mwaalumi "Nditobele."

Pesi wakamuvwiila wati, "Mwami, ndileke saansi ndiinke ndikazikke ndeende."

60 Jesu wakamwaambila wati, "Amuleke bafwide bavwike bafwide; pesi iwe, kuuya ukakambawuke ibwami bwaLeza."

61 Alimwi umwi alakwe wakati, "Mwami, ndilakutobela; pesi ndileke saansi ndiinke ndikalaye aabo bampuli."

62 Mpawo Jesu wakamwaambila wati, "Takwe muntu ujata jamba kalanga musule, ulaacheelelo mubwami bwaLeza."