Nascimento de Jesus

5 Mwakundigwa kumamaakhanya mbui inga viya Yesu Klistu ekuwavyo amamaakhanya, 6 nekawa inga Muungu mwe namna zose, akini khekumamakhanya kuwa inga Muungu ni kintu cha kushuutiza.

7 Kwaivyo kwa kukundisa kwakwe mwenye akabada ayo yose,

akawa inga mndima,

akavyaigwa inga mntu avyaigwavyo

na akaoneka inga mntu eivyo.

8 Nee kazumiia na kutegeeza adi kuuya na nyuma

adi kuuya na nyuma he mhamba.

4 Akini kisingi chekupangwacho na Muungu chekubuwaho, akamwagiiya Mwanawe mwe inusi, ekuwaye mntu inga swie na kwekaa asi ya miagiiyo ya Musa, 5 adahe kuwaohowa wada wekuwao waongweewa ni miagiiyo ya Musa, ili tidahe kuwa wana wa Muungu.

14 Kwaviya wana awo ukunekhao wana phome na mwii, na Yesu mwenye nekawa mntu inga wowo ili kwaajii ya kuuya na nyuma kwakwe amdagamize Ibiisi mwenye udaho wa kuuya na nyuma, 15 na ivyo ili awaohoe wada wekuwao watumwa mwe wekaisi wao wose kwaajii ya kuogoha kuuya na nyuma.

17 Kwaajii iyo imkunda awe inga wanduguze kwa kia mbui, ili atende kuwa Mviki Mkuu ekuwae mzumiiwa na mwenye mbazi kwa kumgosoea ndima Muungu, ili awaekee na kuwausia wantu mavigaviga yao.

16 Kwaviya Muungu kaikundisa inusi ata akamlavya mwanawe wa ikedu, ili kia mntu endae amzumiiye asekwaga, iya awe na ugima wa misi yose kwesiho kisiikizi.

Kuvyaigwa kwa Yesu Klistu

18 Naho kuvyaigwa kwa Yesu Klistu nekuwa ivi, Malia mami yakwe ekuwaho kaombwa na Yusufu. Akini kisingi khawazati kuteguana akaoneka ana ifu kwa udaho wa Muye wa Muungu.

20 Ekuwaho akamamakhanya mbui iyo, mndima wa uko uwanga kwa Muungu wa Zumbe akamwawiiya mwe sozi, nakumwamba "Yusufu mwana Daudi wesekuogoha kumdoa Malia atende mkazio mana kenua ifu kwa udaho wa Muye wa Muungu. 21 Endaavyae mwana kigosi na wendaumwekhe zina da Yesu, kwa viya yee nee mwendae awaohoe wantu wakwe kulawa mwe mavigaviga yao."

22 Naho aya yose yalawiiya ili iiganie ida mbui ya Zumbe ekugombekayo kwembokea kwa muoni wa Muungu 23 "Kauwa mvyee mwenye kiwaa endaenue ifu. Na kuvyaa mwana kigosi, nae endaetangwe Imanueli" mana yakwe, "Muungu hamwe na swie."

24 Naye Yusufu ekwenukaho mwe usisiza akagosoa inga mndima wa uko uwanga kwa Muungu wa Zumbe ekumwambavyo, akamdoa mkaziwe adi kaya. 25 Akini khekugonana nae adi Maliamu ekuvyaaho mwana kigosi. Na Yusufu akamwekha zina da Yesu.

30 Mndima wa uko uwanga kwa Muungu akamwamba Malia, "Usekuogoha kwaviya Muungu kakujaiya wedi wakwe, 31 Wendawenue ifu, naho wendauvyae mwana kigosi, na zina dakwe wendaumwetange Yesu. 32 Uyo endaatende mkuu naho endaetangwe Mwana wa Muungu ekuwaye uko uwanga wa vyose. Zumbe Muungu endaamwekhe kigoda cha useuta cha Daudi tati yake. 33 Endaawe seuta wa kolwa da Yakobo kwa misi yose kwesiho kisiikizi, naho useuta wakwe khaunauwe na kisiikizi."

4 Yusufu naye akahauka kulawa mwe mzi wa Nazaleti si ya Galilaya, kwaviya nekawa wa uvyaigwa wa Daudi akaita Betilehemu mwe mzi wa Yudea ekuvyaigwaho Seuta Daudi. 5 Akaita kwe kutaaziwa hamwe na Malia ekuwaye kamuomba, na Malia mwenye nee anaifu. 6 Wekuwaho uko Betilehemu, msi wakwe Malia wa kuvyaa neibua. 7 Nee avyaa mwanawe wa bosi, mwana kigosi akamvika nguo za kiteke, akamgoneza mwe dewa da kudiiya ng’ombe kwaajii khawekupata phasi mwe nyumba zakugona wageni.

10 Mndima wa uko uwanga kwa Muungu akagombeka, "Msekuogoha, khiwaetea mbui yedi yendayoiwatamize wantu wose. 11 Ivyeo mwe mzi wa Daudi kavyaigwa mwohozi kwaajii yenu, yee nee Zumbe Klistu." 12 Inu ne yendayoiwe utangio kwenu, mwendamumbwiiye mwana mteke kazengetezwa magunya na kagonezwa mwe dewa da kudiiya ng’ombe.

15 Wandima wa uko uwanga kwa Muungu wakahauka na kuuya uwanga kwa Muungu, wada waisi wakagombekana mbui, "Titeni mwe mzi wa Betilehemu tikakauwe ido dekulawiado, Zumbe ekutigombekado."

16 Naho wakaita kinyio, wakambwiiya Malia na Yusufu hamwe na yuda mwana mteke kagonezwa mwe dewa da kudiiya ng’ombe. 17 Waisi awo wekumuonaho uyo mwana wakagombeka wavyazi wakwe mbui zose wekwembiwazo na wandima wa uwanga wa Muungu kuusu uyo mwana. 18 Wose wekusikiaho ayo nee wahondomaa uwanga ya mbui izo wekugombekwazo na waisi.

37 Aho Pilato akamwamba, "Ivi wee u Seuta?"

Yesu akamtambaisa, "Weye wamba miye ni Seuta, miye khivyaigwa kwaajii iyo, na kwaajii iyo ncheza mwe inusi kuwamba wantu ukwei na kia mntu azumiiyae ukwei, uyo anitegeeza."

9 Wekubindaho kumtegeeza seuta, awo wamanyi wa ntoondo wakahauka, wakaongweewa na ida ntoondo wekuiyonayo awio da zua adi hantu hada hekuwaho yuda mwana, 10 Wenye umanyi wekuonaho ida ntoondo igooka nawo wakawa na nyemi muno. 11 Wakengia mda nyumbani, wakamwona yuda mwana hamwe na Malia mami yakwe wakakinta mavindi, wakamvika. Naho wakavugua sanduku na kulavya funge zao, zahabu na ubani na mzigi kwaajii ya wana wekwetangwao manemane.

12 Ivyo wakauya mwe si yao kwa sia ntuhu, kwaviya Muungu nee kawahaza mwe sozi wasekuuya kwa Helode.