18 ज़धू ईशू मसीहो ज़ल्म हुअ, सह हुअ इहअ कि ज़धू तेऊए ईज मरिअम कुंआरी आसा ती, तेसे बरनीं लाई युसुफा संघै। तिन्‍नें बैहा हणैं का आजी हुई मरिअम पबित्र आत्मां करै सुंदी।

19 मरिअमो लाल़अ युसुफ त धर्मीं मणछ। सह निं मरिअमा बदनाम करनअ च़ाहंदअ त। युसुफै सोठअ इहअ कि तेऊ दैणीं मरिअम च़ुपच़ाप छ़ाडी।

20 ज़ांऊं युसुफ इना गल्‍ला सोठदअ थिअ लागअ द, परमेशरो एक स्वर्ग दूत शुझुअ तेऊ का सुपनै अर तेऊ स्वर्ग दूतै बोलअ युसुफा लै इहअ, "राज़ै दाबेदे लुआद युसुफा, तूह निं मरिअमा संघै बैहा करनै का निं डरी। किल्हैकि तेसे ओदरै पल़दअ गर्भ आसा पबित्र आत्मां करै। 21 तेसो हणअ एक शोहरू, तेऊ शोहरू नाअं डाहै तूह ‘ईशू,’ तेऊ करनअ आपणैं लोगा लै तिन्‍नें पापा का छ़ुटकारअ।"✝

22 अह हुअ तैही कि ज़ुंण बैण प्रभू आपणैं गूर ईशायाह बाती बोलै तै, तिंयां पूरै होए,

23 "हेरा, एक कुंआरी शोहरी का हणअ एक शोहरू,

तेऊ शोहरू नाअं डाहणअ तैहा ‘इमानुएल’

तेतो मतलब आसा इहअ कि परमेशर आसा हाम्हां संघै।"

24 युसुफ उझ़ुअ निंजा का खल़अ अर ज़िहअ प्रभूए स्वर्ग दूतै तेऊ लै सुपनै बोलअ त, तिन्‍नां गल्‍ला मनी किअ तेऊ मरिअमा संघै बैह। 25 ज़ेभै तैणीं तेसो शोहरू नांईं हुअ, तेभै तैणीं निं सह मरिअमा संघै कठा सुत्तअ आथी। तेऊ डाहअ तेऊ शोहरूओ नाअं "ईशू।" ✝

14 पर मालक बिधाता दैणअ तम्हां लै तज़ी बी नछ़ैण ज़रूर। एकी कुंआरी शोहरी का हणअ एक शोहरू, तेऊ शोहरू नाअं डाहणअ तैहा ‘इमानुएल।’✝

26 इलीशिबा सुंदी हणें छ़हा भिन्‍नैं बाद छ़ाडअ परमेशरै जिबराईल नाओं स्वर्ग दूत गलील मुल्खै नासरत नाओंऐं नगरी एकी कुंआरी सेटा। 27 तैहा कुंआरी नाअं त मरिअम अर तेसे बरनीं ती दाबेदे राज़े खिंबे एकी युसुफा नाओंऐं मर्धा संघै हुई दी।

30 तेखअ बोलअ स्वर्ग दूतै तैहा लै, "हे मरिअम, तूह निं फिकर करी ताल्है किई परमेशरै झींण। 31 भाल़, तूह हणीं सुंदी अर तेरअ हणअ एक शोहरू अर तूह डाहै तेऊ नाअं ‘ईशू।’✝ 32 सह हणअ महान अर परम प्रधान परमेशरो पूत। परमेशर बिधाता तेरै दाद-बाब राज़ै दाबेदे राज़गाद्दी तेऊ लै।✝ 33 तेऊ करनअ याकबे घरानै दी सदा राज़, अर सह हणअ सदा लै राज़अ।"✝

34 मरिअमै बोलअ स्वर्ग दूता लै, "इहअ किहै करै सका हई? हुंह, कुंआरी आसा?"

35 स्वर्ग दूतै बोलअ तैहा लै, "ताल्है एछणअ पबित्र आत्मां अर परम प्रधान परमेशरे शगती रहणीं ताह संघै। ज़ुंण सह पबित्र शोहरू पैईदा हणैं आल़अ आसा, तेऊ लै बोल़णअ परमेशरो पूत।"

13 तंऐं आसा मेरी देही भितरे सोभै गल्‍ला बणाईं दी,

मेरी आसा आपणैं हाथै मेरी माए ओदरै हुंह बूणअ द।

14 हुंह करा तेरअ शूकर किल्हैकि ताखा लागा डरनअ ई,

ज़ेऊ साबै तंऐं हुंह बणाअं सह आसा बडअ ज़बर अर नोखअ!

ऐहा गल्‍ला समझ़ा हुंह ज़ाथी राम्बल़ै करै।

15 मेरी माए ओदरै ज़ोल़ै तंऐं

मेरै हाडकै-हाडकै बडै राम्बल़ै करै,

हुंह त गुप्त बझ़दअ लागअ द

पर ताखा निं मेरी किछ़ै च़ीज़ गुप्त आथी ती,

16 तूह त मेरै ज़ल्म हणैं का आजी मुंह बझ़दै भाल़अ लागअ द।

मेरै ज़ल्म हणैं का आजी थिऐ तंऐं

मेरी ज़िन्दगीए हर धैल़ै

आपणीं कताबा दी लिखी हेरै दै डाही।

5 "तूह आसा मंऐं तेरी माए ओदरा का छ़ांटअ द,

तूह आसा मंऐं तेरै ज़ल्म हणैं का आजी छ़ांटी हेरअ द कि

तूह देशा-देशा लै मेरअ गूर होए।"✝

9 पर हे बिधाता, तंऐं काढअ हुंह मेरी माए ओदरा का संसारै राज्ज़ी-राम्बल़अ,

च़ूई झुटणें अमरा ओर्ही आअ तूह मुंह बच़ाऊंदी।

10 ज़धू हुंह हुअ, तधा ओर्ही आसा हुंह तेरै ई आसरै अर

मेरी माए ओदरा ओर्ही आसा तूह मेरअ परमेशर।

6 मेरी सारी ज़िन्दगी आसा तेरै ई आसरै।

तूह आअ मुंह मेरी ईजै ओदरा ओर्ही मेरी फाज़त करदी।

मुंह करनी सदा तेरी ई ज़ै-ज़ैकार।

15 "बिधाता दैनअ तिन्‍नां लै ज़बाब,

‘इहअ निं हई सकदअ कि माआ आपणैं दुधा झुटदै शोहरू बिस्सरी पाऐ अर

आपणैं ओदरा का हुऐ दै शोहरू लै झींण निं करे!

माआ ज़ै आपणैं शोहरू बिस्सरी बी पाए,

पर हुंह निं तम्हां कधि बिस्सरदअ आथी।

9 सियोन, मंऐं कै इहअ लाअ करी कि सूंणें धैल़ै तैणीं बी पजैल़ी अर तेखअ निं मंऐं सूंणैं दैनअ?" अह गल्‍ल डाही बिधाता बोली।

14 ईशू बोलअ तिन्‍नां लै, "लान्हैं दैआ मुंह सेटा लै एछणैं, इना निं रोक्‍का, किल्हैकि इना लान्हैं ज़िहै मणछो ई आसा स्वर्गो राज़।"

4 ज़ुंण बी आप्पू एऊ लान्हैं ज़िहअ भोल़अ बणें, सह हणअ स्वर्ग राज़ा दी बडअ।

5 "ज़ुंण बी मेरै नाओंऐं एक इहै लान्हें कदर करे, सह करा मेरी कदर।

16 ईशू बशैल़ै तिंयां लान्हैं आपणैं भोसल़ै अर तिन्‍नें मुंडै हाथ फेरी करै दैनी तिन्‍नां लै बर्गत।

3 असली बर्गत हआ लान्हैं सुन्हैं हणैं,

तिंयां हआ बिधाता हाम्हां लै

आप्पू बाखा दैनी दी भैंट।

27 अह आसा सह ई शोहरू ज़ेता लै मंऐं बिधाता सेटा अरज़ किई ती, अर बिधाता दैनअ मुल्है ज़िहअ मंऐं मांगअ तिहअ ई।

4 हे बिधाता, तंऐं किअ हुंह आपणैं महान कामां करै खुश,

तेरै इना महान कामां लै करा हुंह तेरी ज़ै-ज़ैकार।

3 ईशू दैनअ तेऊ लै ज़बाब, "हुंह खोज़ा ताखा का सत्त, ज़ै कोई नऊंअ ज़ल्म नांईं लए, सह निं परमेशरो राज़ भाल़ी सकदअ।"

21 ज़ांऊं बेटल़ी सूंणें दाह लागा, तेभै पल़ा तैहा लै दुख-सांगट, किल्हैकि तेभै हआ तैहा लै दुखा तकलिफे घल़ी आई दी। पर ज़ांऊं सह बच्च़ै लै ज़ल्म दैई हेरा, ऐहा गल्‍ले खुशी कि एकी मणछ लअ संसारै ज़ल्म, तैहा दुखा सांगटे घल़ी निं सह आद करदी।*ईशा. 26:17; मिक. 4:9

9 ज़ुंण बी परमेशरे लुआद आसा सह निं कधि पाप करदअ। किल्हैकि परमेशरो बेज़अ रहा तेऊ दी टेक्‍की अर सह निं पाप करी ई सकदअ, किल्हैकि सह आसा परमेशरे लुआद।

9 बिधाते ज़ै-ज़ैकार करना लै बोला गिहा!

तेऊ ज़ुंण महान नुआहरै काम किऐ, तेता खोज़ा सोभी का।