बिधातो दाह बोला इहअ,

1 "दूर-दूर टापू दी बस्सै दै देशो, मेरी गल्‍ला शूणां धैन दैई,

हुंह आसा मेरी माए ओदरा ई का बिधाता छ़ांटअ द।

तेऊ हेरअ दा तधू ई मेरअ नाअं डाही।✝

2 बिधाता बणाऐं मेरै बैण तलबारा ज़िहै तिछै।

सह डाहा मुंह आपणैं हाथा करै बच़ाऊई,

तेऊ आसा हुंह पल़ैऐ दै तिछै कतीरा ज़िहअ

आपणैं किर्लू दी डाही डाहअ द।

3 बिधाता बोलअ मुल्है इहअ, ‘इज़राईल, तूह आसा मेरअ दास,

ताह करै करनअ सोभी लोगा मेरअ अदर।’✝

4 मंऐं बोलअ आप्पू लै इहअ, ‘मंऐं किई खास्सी मैन्थ, सह किअ मंऐं थोघै बाझ़ी आपणअ बगत ज़ांऐं!

मंऐं छ़ेक्‍कै आपणैं ज़ोर-ज़ाहण बृथा!’

पर तज़ी बी आसा मुंह बिधातो भरोस्सअ, तेऊ हेरनअ मेरअ नसाफ करी,

तेऊ हेरनअ मेरै कामों फल मुल्है दैई।

5 तेऊ आसा हुंह मेरी माए ओदरा का छ़ांटी हेरअ द,

तेऊ बणाअं हुंह आपणअ दास कि हुंह तेऊए परज़ा तेऊ सेटा फरेऊई आणे,

हुंह सारै देशै-देशै छिंघुऐ दै याकबे आद-लुआदा बापस आणे।

बिधाता दैनअ मुल्है अदर अर

मेरै बलो मूल़ आसा सह ई मेरअ परमेशर।

6 "बिधाता बोलअ मुल्है इहअ,

‘मेरै दास, मंऐं आसा ताल्है एता का बी बडअ काम डाहअ द।

अह आसा थोल़ी ज़ेही गल्‍ल कि तूह याकबे आद-लुआद इज़राईली झाल़े

ज़ुंण देशा-देशा मांझ़ै ज़िऊंदै आसा बच़ै दै,

पर मुंह बणाणअं तूह होरी सोभी देशा लै प्रैश्शै ज़िहअ

ताकि सारअ संसार बच़ी सके।’✝

7 इज़राईलो पबित्र परमेशर अर उद्धार करनै आल़अ बोला

तेऊ लै इहअ ज़हा सोभ मणछ बृथा समझ़ा,

ज़हा लै सोभ देश नफरत करा अर

ज़ुंण कई राज़ै आपणअ गलाम आसा डाहअ द बणाईं,

सोभी राज़ै भाल़णअ तूह आज़ाद हंदअ

तिन्‍नां करनअ खल़ै उझ़ुई तेरअ अदर,

इहअ भाल़ी टेक्‍कणअ राज़ै अर बज़ीरा बी

तेरै अदर करना लै ताह सेटा माथअ।

अह हणअ इहअ करै कि बिधाता छ़ांटअ तूह आपणअ दास,

इज़राईलो पबित्र परमेशर करा आपणीं ज़बान पूरी।

8 "बिधाता बोला आपणीं परज़ा लै इहअ,

‘ज़ेभै तम्हां बच़ाऊंणेओ बगत एछणअ, तेभै फिरनअ मुंह तम्हां बाखा,

मुंह हेरनी थारी लेर-पकार शूणीं कि तम्हैं मांगी मुखा मज़त।

थारी फाज़त अर धैन-खैल डाहणअ मुंह आप्पै,

तम्हां बाती करनीं मुंह सोभी लोगा संघै करार।

तम्हां दैणअ मुंह थारी आपणीं ज़ैगा भिई बस्सणै

ज़ुंण एभै शुन्‍नीं अर उज़र आसा पल़ी दी।✝

9 न्हैरै दी कैद किऐ दै मणछा लै बोल़णअ मुंह,

"डेओआ तम्हैं छ़ुटै ऐबै! बागै निखल़ा प्रैश्शै लै!"

तिंयां हणैं एही भेडा ज़िहै ज़हा निखल़ी धारा बी

च़रना लै बतेर्हअ भेटा।✝

10 तिंयां निं गलामी का बापस फिरदी कधि भुखै-नचिशै रहणैं।

रेगीस्तान अर चटाक्‍क धुप्पै करै बी निं तिन्‍नां किछ़ फरक पल़णअ,

किल्हैकि तिन्‍नां आजू-आजू हांढणै आल़अ आसा सह बिधाता ज़ुंण तिन्‍नां लै खास्सअ झ़ूरा।

तेऊ निंणै तिंयां पाणींए गाडा बाती।✝

11 आपणीं परज़ा हांढणा लै बणाणीं मुंह

बडी-बडी उछ़टी धारे ढेक्‍कै बी खुल्ही सल़का।

12 भाल़ा, मेरी परज़ा एछणी दूरा-दूर का

उतर, पछ़म अर मिसर दखण दिशा बाखा

सीनी लोगे देशा का बी फिरी।’

13 सरग! गिहा बोल, पृथूई, ज़ोरै-ज़ोरै बोली मनाऊं खुशी!

बडै-बडै पर्बता दैआ ज़ोरै-ज़ोरै ज़ै-ज़ैकार करनै!

बिधाता दैणीं आपणीं परज़ा लै शांती,

तेऊ करनीं आपणीं परज़ा लै झींण ज़ुंण दुख-तकलिफी दी आसा।✝

14 "पर एरुशलेम नगरीए लोग बोला इहअ,

‘म्हारै मालक बिधाता डाहै हाम्हैं शोटी!

मालक आसा हाम्हां बिस्सरुई गअ द।’

15 "बिधाता दैनअ तिन्‍नां लै ज़बाब,

‘इहअ निं हई सकदअ कि माआ आपणैं दुधा झुटदै शोहरू बिस्सरी पाऐ अर

आपणैं ओदरा का हुऐ दै शोहरू लै झींण निं करे!

माआ ज़ै आपणैं शोहरू बिस्सरी बी पाए,

पर हुंह निं तम्हां कधि बिस्सरदअ आथी।

16 एरुशलेम, हुंह निं ताह कधि बिस्सरदअ!

मंऐं आसा तेरअ नाअं आपणैं हाथे नथअई दी डाहअ द लिखी।

17 तेरै लान्हैं जाणैं छ़ेक्‍कै फिरी एछी ज़हा तूह भिई च़िणनी,

ज़ुंणीं तूह बरैबाद किई तिंयां निखल़णैं ताखा पोर्ही।

18 फेर दै नदर संघा भाल़ कि किज़ै आसा हंदअ लागअ द!

तेरै लोग झाल़्हदै लागै दै, तिंयां एछणैं घअरा लै फिरी!

ज़िहअ हुंह अटल़ आसा, तेही आसा मेरी ज़बान कि

ताह हणअ ऐहा नगरी अर एते लोगो इहअ लोभ

ज़िहअ बेटल़ी आपणैं गल़ै हारा बान्हणैंओ लोभ हआ।

19 अह ज़ैगा ती पठी बरैबाद अर शुन्‍नीं हुई दी

पर ऐबै निं अह ज़ैगा तिन्‍नां लै पूरी पल़णीं

ज़ुंण एथ बस्सणा लै एछणैं आल़ै आसा।

ज़ुंण तूह उज़र अर बरैबाद किई,

तिंयां काढणैं इधा का देशा दूर।’

20 तेरै लोग ज़ुंण गलामी दी हुऐ ज़ल्मैं दै आसा,

तिन्‍नां बोल़णअ एकी धैल़ी ताल्है इहअ,

‘अह ज़ैगा आसा थोल़ी

हाम्हां लोल़ी होर खास्सी ज़ैगा ज़ेथ हाम्हैं बस्सी सके!’

21 तेखअ बोल़णअ ताह आप्पू लै इहअ,

‘ईंयां एतरै लान्हैं कुंणी डाहै मुल्है पैईदा करी?

मेरै गऐ तै सोभ लान्हैं ज़ांऐं हई नां मेरै होर हई सकदै तै।

हुंह ती गलामी दी अर दूर काढी दी

ईंयां लान्हैं कुंणी आणै उझै?

हुंह ती कल्ही छ़ुटी दी,

ईंयां एतरै शोहरू-माठै आऐ किधा का?’

22 "मालक बिधाता बोला आपणीं परज़ा लै इहअ,

‘मुंह करनअ देशा-देशा लै फ्रहरअ खल़अ करी शारअ,

तिन्‍नां दैणैं तेरै शोहरू-माठै घअरै पजैल़ी।

23 राज़ै हणैं ताल्है बाबा ज़िहै अर

राणीं हणीं ईजा ज़ेही।

तिन्‍नां करनअ माथअ टेक्‍की तेरअ अदर,

तिन्‍नां करनअ नाका करै धरनीं रेखा देही तेरअ अदर।

तेखअ लागणअ ताखा थोघ कि हुंह आसा बिधाता,

ज़ुंण मेरै आसरै रहा तिंयां निं कधि शर्मिंदै हणैं।’✝

24 शूरबीरे हाथा का निं कोहै लुटी दी च़िज़ा छ़ड़ैऊई सकदअ!

नां नर्दैई मणछै कैद किअ द मणछ छ़ुटदअ।

25 "बिधाता बोला तज़ी बी इहअ,

‘ज़ाथी च़ाल्‍लअ इहअ ई हई,

शूरबीरे हाथा का छ़ड़ैऊंणी लुटी दी च़िज़ा ओर्ही!

अर नर्दैई मणछे कैदखानै का हणैं कैदी आज़ाद,

ताह बाखा मकाबलै लै हणअ हुंह आप्पै

अर तेरै शोहरू-माठै आणनैं मुंह बच़ाऊई।

26 ज़ुंण ताह हंतदै आसा लागै दै, तिंयां पाणै मुंह फेरा-फेर मारी,

तिन्‍नां का खैऊंणी तिन्‍नें ई मास्से शिखा अर तिन्‍नों ई आपणअ लोहू बझ़ैल़णअ मुंह तिन्‍नां का झुटणैं।

तेखअ लागणअ सोभी लोगा का थोघ कि हुंह आसा याकबो परमेशर बिधाता ज़हा का सारअ बल आसा,

ज़ुंणीं तम्हैं बच़ाऊऐ अर छ़ड़ैऊऐ।

तेखअ लागणअ तिन्‍नां का थोघ कि हुंह आसा इज़राईलो परमेशर ज़हा का सारी शगती आसा।’"✝