As 10 parábolas mais importantes de Jesus

3 Wakababuja zwinhu zwinji nemikwejaniso, eti,

"Umbyali wakenda kunobyala. 4 Akale ebyala imwe imbeyu yakawila munzila, kova inyuni jizha, akale jikailya. 5 Imwe yembeyu yakawila pamwala, nokukambija yakamela sezwo pakaba pesina ivu inji, 6 asi izhuba palyakabhuda, yakapya ikahwihwinyala, nokuti yaluba isina miji. 7 Imwe imbeyu yakawila mumiwha, koga miwha ikakubuka ikayimanikija. 8 Imwe imbeyu yakawila muvu ibuyanana, ikazwala kasakasa, imwe izana, imwe makumi mashanu ane limwempela, imwe makumi matatu.

9 "Iye une nzebe ngewhe."

UnSamariya umbuya

25 Undayiji woMulawo wakanyamuka eda kukweja Jesu akati," Ndayiji, biya ndilokwelela kutani kuti ndiwane ifuma yobupenyu businopela?"

26 Jesu wakonshandula eti, "Mulokwalwa kuwhini mumulawo? Mwakabalani"

27 Wakashandula eti, "Ida She Mwali uwo, nomwoyo uwo wose, nompepo uwo wose, nesimba lilyo lyose, nendangalilo jijo jose, akale ida umbakijani uwo sobwaunozwida iwi nokuko."

28 Wakati kwaali "Washandula zwibuyanana, ita yezwi uchalalama." 29 Koga iye eda kuzwilulamisa, wakati kunaJesu, "Umbakijani wangu ndiyani?"

30 Jesu wakashandula, eti, "Umwe unhu wakabekwenda ekunuka eva kuJelusalema enda kuJeliko, wakapambwa nembava jikombula zwimbalo, jikondoba, jikonsiya ekazilika. 31 Kwakaswika untebuji epinda ekwenda nenzila yakaleyo, asi paakabona unhu yoyo wakanyenduluka akapinda kumbali. 32 Nenzila yakaleyo kwakaswika unLevi akombona, akanyenduluka bo akapinda kumbali. 33 Koga unSamariya wakabekwenda muneyo inzila wakaswika paali, paakombona wakonwhila ishe, 34 wakenda kwaali, akondila mafuta newaini akapomba uncheka pezwilonda zwizwe kova onyamula nemhuka yiye, akoonsenga kungumba inoswikila bakwendi akanondinda. 35 Muchimuka wakabhisa madinari mabili akapa unolinga bugalo yobo, akati, ‘Ndilingileni unhu yoyu, mungoshingisa imwe imali inopinda yeyi, ndinoomubwilizila imali yenu pandichanobuya."’

36 Jesu wakajibija ebhuza eti, "Pakati paba batatu, unoyeya kuti ndiyani wakabeli umbakijani woyo unhu, wakabhatwa nembava?"

37 Wakati, "Ndiyoyo wakonwhila ishe."

Jesu wakati kwaali, "Inda neebo unota alo."

4 "Ndiyani pakati penu, unezana lyemhwizi, kova elashikilwa nemwempela, usinosiya imhwizi makumi mashanu ana mana neshanu jine jina mushango, enda kunoshaka yeyo imwempela yalashika kujine aibona na? 5 Unoti kana aiwana unoyipika pamapi awe nolushanto. 6 Kana aswika pasha, unoshoba bakwaina nababakijani babe kova eti kwabali, ‘shantani nami nokuti ndaiwana imhwizi yangu yabalashika.’ 7 Nezwo mwakalemo, zwinokwelana, nokuti kunooba nolushanto kudenga pakushanduka kwonchinyi umwempela, kupinda makumi mashanu ana mana anabashanu nabana abanhu bakalulama basinoda kushanduka.

Mwananhulumyana wakalashika

11 Jesu wakati akale, "Kwaluba nomwe unhulume wakabeli nabana banhulumyana babili, 12 untukutuku wakati kuna tate babe, ‘Tate ndikobeleni chuma changu ngweno.’ Bakabakobela mububili bwabo. 13 Mushule mwamazhuba mashomanana mwananhulumyana untukutuku wakatola chuma chiche akabhuda pasha akenda kunyika ikokule kasa, yoko kwaakanotataula ifuma yiye yose mubupenyu bwobuhungu. 14 Payakati yompelela ifuma yiye yose, kwakaba nenzhala ihulwana kasa muneyo inyika, nokudalo wakatanga kuyabula. 15 Ndipo pakenda kunoshingila umwe ungali wokunyika yakaleyo, akanopiwa unshingo wokulela ingulube muminda. 16 Wakadisisa kuzwigutisa namakwepele akabepiwa ingulube, nokuti apana unhu wakompa. 17 Asi paakatanga kuyeya zwanana wakati, ‘Bangana bashingi batate bangu banowana kulya kwabo kulokwana, ngweno imi yopano ndimufa nenzhala! 18 Ndinobhuda yokuno ndinde kuna tate bangu ndinoti kwabali, "Tate ndakachinya kunawedenga akale nokunamwi. 19 Andichilokwelela kuwhi ndiMwananhulumyana wenu, nditoleni soumwe wabashingi benu."’ 20 Wakanyamuka, akenda kuna tate babe. Wakati epamuka, echikule, tate babe pabakombona, bakawha ishungu, bakondabukila, bakomungutila akale bakomyonta. 21 Mwananhulumyana wakati kwabali, ‘Tate ndakachinya kunawedenga nokunamwi, andichilokwelela kuti ndiwhi ndiMwananhulumyana wenu.’ 22 Asi tate bakashoba bashingi babo bakati, ‘Kambijani! Buzani chimbalo chibuyanana kasa kupinda zwose mumbajike mumbige iseka pakanyala kake, neshangu kumakumbo awe, 23 akale mubuze inamani lilokojwa, mulibulaye, tilye tishante, 24 nokuti yoyu mwananhulumyana wangu wakabafa, asi wamuka, wakabalashika, asi waboneka.’ Bakatanga kushanta.

25 "Panoyo unshaji unkulu uwe wakaba eli kuminda, pakubuya kukwe wakati aba pelyo nengumba, wakawha bundimbwa nokuzana. 26 Wakashoba umwe wabashingi akabhuza eti, ‘Ini zwimutikana?’ 27 Iye wakati kwaali, ‘Ununa uwo wabuya, nokudalo tate babo babulaya inamani lilokojwa nokuti bontambula elimpenyu akale zwanana.’ 28 Unkulu uwe wakanyema, aajakada kungwina mungumba. Tate babe bakabhuda, bakombweta, 29 asi iye wakashandula akati kunatate babe, ‘Lingani makole ose yaya ndagala ndimushingila, akale andijanu ndaleka kutobeleja milawu yenu, koga amujakandipa kana kabujana zwako kuti nami ndishante nabakwaina bangu! 30 Asi yoyu mwananhukumyana wenu, wakanopalaja ifuma yiye namavemu, ngweno wezha mwombulayila inamani lilokojwa!’ 31 Asi ibo bakati, ‘Mwanangu, iwi tigele tose unshaji wose, zwose zwangu ngozwizwo. 32 Asi kwabekwelela kuti tishante, nokuti ununa uwo wakabafa, asi nasi wamuka, wakabalashika, koga nasi waboneka."’

Unkwejaniso wobulungu Bulokosha

45 "Akale bushe bokudenga bunanga sonshambaji ukumupyanga bulungu bulokosha. 46 Abuwana bulungu bulokosha, wakenda akatengesa zwose zwaakabeli nazwo akabutenga."

Unkwejaniso womFalisi noNtelesi

9 Jesu wakababuja unkwejaniso yoyu, kunaaboyabo bakabeyeya kuti ndibo balolulama akale belingila bamwe pasi, akati: 10 "Pakabelipo banhu babili bakenda mutempeli kunonamata, umwe wakabeli umFalisi, umwe eli untelesi. 11 UmFalisi wakama, akanamata eti, ‘Mwali, ndinomuboka, nokuti anditokwelana nabamwe banhu, mapazwi, basilolulama, nabapomboli, kana kuba soyu untelesi. 12 Ndinozwiminya kulya kabili neviki, ndinopila chegumi chezwose zwandinowana.’ 13 Koga untelesi wakamila kule, esinoda kulinga zhezhulu kudenga, wakaloba chifuba chiche eti, ‘Mwali ibani neshe kwandili imi unchinyi!’ 14 Ndinomubuja, yoyu unhu wakenda kungumba kukwe alulamiswa, asi yondiya umwe pe, nokuti yoyo unozwifufumula unootonhobajwa, noyo unozwininipisa, unonyamulwa"

Unkwejaniso Wabashingi Batatu

14 "Akale bushe bwaMwali bunanga sonhu wakabeli nolwendo, wakashoba bashingi babe, akabasiyila ifuma iye ilimumaboko abo, 15 umwe wakompa tuputu tushanu twendalama, umwe tubili, umwebo kamwempela, umwe noumwe wabo wakapiwa sokutubula kukwe. Kova enda. 16 Iye wakapiwa tuputu tushanu wakatenga nokutengesa, akawana tumwe tuputu tushanu. 17 Akale yoyo wakapiwa tuputu tubili wakatenga nokutengesa bo, akawana ingwano yotumwe tubili pezhulu. 18 Koga iye wakatambula kaputu kamwempela wakenda akakachila pasi, esisa imali yatezi uwe."

19 "Ngweno kwapinda unshaji undefu tezi wabashingi yaba wakabuya, akababhuza kuti bakatani nemali yaakababasiyila. 20 Wakezha yoyo wakabapiwa tuputu tushanu, ebuza tumwe tushanu, eti, ‘Tezi, mwakandisiyila tuputu tushanu, lingani ndawana tumwe tushanu.’ 21 Tezi uwe wakati kwaali, ‘Wata zwibuyanana, iwi unshingi umbuyanana ulobimbika, wabimbika pazwitukutuku, ndokubiga pezhulu pezwinji, ngwina, mulushanto lwatezi uwo.’ 22 Akale iye bo wakapiwa tuputu tubili, wakezha eti, ‘Tezi, mwakandisiyila tuputu tubili, ndakawana imwe ingwano yotumwe tubili pezhulu.’ 23 Tezi uwe wakati kwaali, ‘wata zwibuyanana, iwi unshingi umbuyanana ulobimbika, wakabimbika panazwitukutuku, ndokubiga pezhulu pezwinji, ngwina mulushanto lwatezi uwo.’ 24 Iye bo wakapiwa kaputu kamwempela wakezha mbeli, akati, ‘Tezi, ndakabeziba kuti unhu unkukutu, unovuna pausijakabyala, akale unobunganisa pausakamezha, 25 Nezwo ndakatya, ndikakachila nokukasisa pasi, haka kaputu kako.’ 26 Koga tezi uwe wakashandula, eti, ‘Iwi unshingi umbi kasakasa, akale usimbe, wakabeziba kuti ndinovuna pandisijakabyala, akale ndobunganisa pandisijakamezha? 27 Wakabokwelela kubiga imali yangu mubhenki, kutila kuti pandichaswika ndipiwe ili yazwala. 28 Nokudalo tolani kaputu kwaali, mupe yoyo unatuputu tuligumi. 29 Nokuti kuna iye wose unanazwo, unoopiwa zwilopamhijika, unooba nezwinji, koga yoyo usina, kana nezwaananazo zwinootolwa. 30 Akale poselani unshingi yoyu usina lubhancho munhilima yokuzhe, yoko banhu kwabanoolila nokuziya meno.’

Umfumi naLazalo

19 "Kwakaba kulina umfumi walumbala zwimbalo zwinalubala lwensulubele nemicheka mibuya akale elalama bupenyu bwokuzwishantisa mazhuba ose. 20 Akale kwaluba nonsheti waluwhi Lazalo, egala peshubo lyolukuta, umbili uwe ulizhele zwilonda, 21 wakabelakamila kulya tupemu twalumbwela tuva petebuli lyomfumi, nembwa neebo jakabezha komyanguta zwilonda zwizwe. 22 Unsheti wakafa akanyamulwa nengilozi jikonsenga pechifuba chaAbhulahamu. Umfumi wakafabo akajikwa, 23 elimuhadesi eyangata kasa, wakanyamula mesho awe, akabona Abhulahamu kule kule, Lazalo elipelyo naye. 24 Wakashomeja eti, ‘Tate Abhulahamu ndiwhileni ishe, tumani Lazalo engwinise imhela yakanyala kake muvula, etonhoje lulimi lwangu, nokuti ndikumuyangata muntutumo yoyu.’ 25 Asi Abhulahamu wakati, ‘Mwananhulumyana, yeya mubupenyu bubo wakaba upiwa zwose zwinhu zwibhodo, asi Lazalo wakaba epiwa zwinhu zwibi; feno iye umunyalajwa iwi ukumuyangata. 26 Azwitoba yezwi chete, panegolonga linomila pakati pedu, linotisa kuti yabo banoda kutaluka beva yokuno bezha yoko abatotubula, apana akale angataluka eva yoko ezha kunasu.’ 27 Akale wakati, ‘Tate, kana zwakadalo ndimukumbila kuti muntume kungumba yatate bangu, 28 nokuti ndinabanuna bashanu, kuti enobachenjeja kutila kuti besizhe yokuno kubugalo bwokujiijwa.’ 29 Koga Abhulahamu wakati, ‘Banuna babo bana naMozesi nabalebambeli baMwali, ngebebawhilile.’ 30 Wakati iye, ‘Tate Abhulahamu atoba imo pe, kana umwe amuka mubafi enda kwabali, yopo bangashanduka.’ 31 Iye wakati kwaali, ‘Kana besinowhilila Mozesi nabalebambeli baMwali, abangawhilile kojoba umwe amuka mubafi ebakwekweteja."’

Unkwejaniso wedihwa

24 Jesu wakabapa umwe unkwejaniso, eti, "Bushe bwedenga bungakwejaniswa nonhu wakabyala imbeyu imbuya muminda uwe." 25 Asi banhu belilele, chita chiche chakezha chikabyala idihwa mukati mwekoloni iye, chikenda. 26 Payakamela imbeyu, yakazwala zwilyo, neebo idihwa lyakaboneka bo. 27 Bashingi babe bakezha kuna iye bakati, ‘tezi amujakabyala imbeyu imbuya muminda wenu na? Ani biya idihwa lyakavapi?’ 28 ‘Wakati kwabali, zwakatiwa nombengi.’ Bashingi bakati kwaali, ‘Unoda na kuti tinde tinobhisa tibunganise idihwa na?’ 29 Asi iye wakati, "pe, nokuti pamuchaba mubunganisa idihwa, mungoobhisikija nekoloni. 30 Lekani zwose zwikubukile pamwempela kuswikila unshaji wokuvuna. Nonshaji wokuvuna ndinooti kubavuni, ‘tangisani kubunganisa idihwa, mulisunge pamwempela kuti lipiswe, koga ikoloni muyibige mugombana lyangu.’ "

Unkwejaniso WeMhandala Igumi

1 "Nooyo unshaji bushe bwedenga bunookwejaniswa nemhandala igumi jakenda namalambi ajo kunotandamija unkwasha. 2 Bashanu baluba malema akale bashanu bakabeli bachenjevu. 3 Yabaya baluba malema, bakanyamula malambi abo, koga abajakanyamula mafuta, 4 koga bachenjevu bakenda namafuta muhali pamwempela namalambi abo. 5 Unkwasha ajilwa kuswika, bose bakachugula, bakalala."

6 "Koga pakati pobusiku kwakashomejwa kuwhi, ‘Mukani unkwasha waswika, bhudani pazhe muuntandamije!’ 7 Pakalepo jose imhandala jakanyamuka akale jakalonganya malambi ajo. 8 Akale malema akati kubachenjevu, ‘Tipenibo mamwe mafuta enu, nokuti malambi edu amujima.’ 9 Koga bachenjevu bakashandula beti, ‘aatotikwana isu namwi, imwi indani kuna banotengesa munozwitengela.’ 10 Pabakenda kunotenga, unkwasha wakaswika. Yabaya bakabakazwilonganyila bakangwina naye mumabhiko okulobolana, unkoba ukakonywa."

11 "Mushule mwozwo jimwe imhandala jakaswikabo, jiti, ‘tezi, tezi, tizhulileni.’ 12 Koga iye wakashandula, eti, ‘chokomende, anditomuziba imwi.’ "

13 "Nokudalo galani mwakamilila, nokuti amutoziba izhuba kana unshaji."