As 10 parábolas mais importantes de Jesus

3 Yesu wadaakambila vindhu vambili kwa chifani, niwakamba,

"Kudali ni mundhu mmojhi uyo wadapita kuvyala mbewu. 4 Yapo wamamijha mbeu zina zidagwela mnjila, mbalami zidajha ni kuzidya. 5 Zina zidagwela pa myala yapo palibe doti lambili. Zidamela chisanga pakuti padalibe dothi lambili. 6 Jhuwa yapo lidawala, mimela idafyota ni kuuma ndande mizo yake siidapite panjhi kupunda. 7 Zina zidagwela pakatikati pa minga, minga zijha zidakula ni kuzizinga ijha mimela ni kuzilepelecha kukula. 8 Zina zidagwela pa dothi la chaila, zidamela, ni zidakula ni kubala, imojhi idabala njele miya, ina adabala njele sitini, ni ina adabala njele selasini."

9 Yesu wadamalizila pokamba, "Uyo wali ni makutu, yovela wavele!"

Chifani cha mundhu wa wachikondi wa ku Samaliya

25 Pambuyo mundhu mmojhi woyaluza thauko wadaima kuti wamuyese Yesu, wadamfunjha, "Oyaluza, nichite chiyani kuti nikhale ni umoyo wamuyaya?" 26 Yesu wadamuyangha, "Uzindikila chiyani yapo usoma mmalembo ya thauko la Musa? Uyazindikila bwanji malembo yameneyo?" 27 Mundhu yujha wadamuyangha Yesu, "Mkonde Ambuye Mnungu wako kwa mtima wako wonjhe, ni kwa umoyo wako wonjhe, ni kwa mbhavu zako zonjhe ni kwa njelu zako zonjhe ni, ‘Umkonde njako ngati umo ujhikondela umwene.’ " 28 Yesu wadamkambila kuti, "Wayangha bwino. Chita chimwecho kuti ukhale ni umoyo."

29 Nambho mundhu woyaluza thauko yujha wamafuna kujhilangiza kuti iye ni wozindikila pamaso pa Mnungu, wadamfunjha Yesu, "Mundhu wapafupi wanga ni yani?" 30 Yesu wadayangha, "Mundhu mmojhi wamachokela ku Yelusalemu kupita ku Yeliko. Yapo wadali panjila wadaphezana ni achifwamba, adamvula njhalu, adammenya, adachoka ni kumusiya pamwepo wali pafupi kumwalila. 31 Kwa mwayi, mjhukulu wa Mnungu mmojhi wadali kupita njila imweijha. Yapo wadamuona mundhu yujha, wadampita kumbhepete. 32 Chimwecho, mthandizi wamjhukulu wa Mnungu mmojhi nayo wadafika pamalo pajha, wadamuona nayo wadampita kumbhepete ni kuchoka. 33 Nambho mundhu mmojhi wa jhiko la Asamaliya yapo wadali paulendo, wadafika yapo wadali mundhu yujha, niiye yapo wadamuona wadamulengela lisungu. 34 Ndiipo wadafika pafupi, wadavichuka vilonda vake kwa divai ni kumnyeka mafuta ni kuvimanga. Yapo wadamaliza kuchita chimwecho, wadamkweza pa chinyama chake ni kupita nayo kunyumba ya alendo kumdwaza. 35 Umawa wake, wadatenga vibandhu viwili va miyala yaphindu kupunda nikumpacha yujha mwene nyumba ya alendo, nikukamba, ‘Mdwaze mundhu uyu, ni chalichonjhe icho sichiongezeke sinijhe kubwezela nikabwela.’" 36 Ndiipo Yesu wadamfunjha, "Yani pakati pa wandhu atatuwa uyo wadalangiza kuti ni mundhu wapafupi wa yujha wahundukilidwa ni achifwamba?" 37 Yujha woyaluza thauko wadayangha, "Uyo wadamlengela lisungu nde mnjake wake." Yesu wadamkambila, "Nawenjho upite ukachite chimwecho."

4 "Ngati mundhu mmojhi pakati panu wakakhala ni mbelele mia mojha, ni mbelele imojhi yasowa, bwanji, siwazileka tisiini ni tisa zijha nikupita kuthengo kuifuna iyo yasowa mbaka waipate? Siwazileke tisini ni tisa zijha kuphululu ni kupita kuifuna ijha yasowa mbaka waipate. 5 Wakathoipata, siwainyamule paphewa uku ni wakondwela kupunda. 6 Yapo wafika kukhomo, waatana achabwenji lake ni majhilani wake ni kwakambila, ‘Tiyeni tikondwele pamojhi, ndande naipata ijha mbelele iyo idasowa.’ 7 Nikukambilani chimwecho, sikukhale chikondwelo chachikulu kumwamba ndande ya mundhu mmojhi wamachimo uyo walapa, kupitilila wandhu tisini ni tisa wovomelezeka pamaso pa Mnungu yawo kulapa."

Chifani cha mnyamata wataika

11 Pamenepo Yesu wadayendekela kukamba, "Kudali mundhu mmoji uyo wadali ni anyamata awili waachimuna. 12 Wamng’ono wadaakambila atate wake, ‘Atate, munipache vilanjo vanga.’ Ndiipo atate wao adagawa vindhu vao ni kumpacha chuma chake mwana wamng’onoyo. 13 Pambuyo pa masiku yochepa, mwana wamng’ono yujha wadatenga chuma chonjhe ni kupita ku jhiko la kutali, kumeneko wadatumila chuma chake kwa kuwananga. 14 Yapo wadawananga chuma icho wadalinacho, idachokela njala yaikulu mjhiko limenelo, wadayamba kuhangaika ndande wadalibe kandhu. 15 Chimwecho, wadapita kwa mundhu mmojhi wa jhiko lijha kupembha njhito, niiye wadampeleka ku munda kwake kudyechela nguluwe. 16 Chimwecho mnyamata yujha wadakhumbila kudya chakudya cha nguluwe, nambho padalibe mundhu uyo wadampacha chakudya chilichonjhe. 17 Nambho njelu yapo zidayamba kumbwelela, wadajhikambila mwene, ‘Mnyumba mwa atate wanga muli mbowa zochuluka, izo zikudya chakudya mbaka kutaya, ndande yanji ine nife ni njala!’ 18 Nibwelela kwa atate wanga ni kwaakambila, ‘Atate, nakuchimwilani imwe ni Amnungu kumwamba. 19 Sinifunikanjho kuti nitanidwe mwana wanu. Munichite ngati mmojhi wa mbowa zanu.’ 20 Ndiipo wadayamba ulendo wopita kwa atate wake. Nambho yapo wadali wakali patali, atate wake adamuona, adamlengela lisungu. Adamthamangila mwana wao ni kumkhumbatila kwa chisangalalo. 21 Mwana yujha wadaakambila atate wake, ‘Atate, nakuchimwilani imwe ni Mnungu. Sinifunikanjho kutanidwa mwana wanu.’ 22 Nambho atate wake adaakambila mbowa zake, ‘Pita chisanga katenge njhalu yabwino mumveke! Mvekeni pete ni malapasi ya mtengo waukulu! 23 Mkamtenge njinda ya ng’ombe wonona tichinje, tichite phwando ni tidye! 24 Chifuko mwanawangayu wadamwalila, nambho chipano wali wamoyo, wadataika, nambho wapatikana.’ Ndiipo adayamba kuchita phwando."

25 "Ndhawi imeneyo, mwana wamkulu yujha wadali wakali kumunda. Yapo wamabwela ni kuwandikila pakhomo pao, wadavela nyimbo ni ng’oma ni zibulidwa. 26 Wadamtana mmojhi wa mbowa ni kumfunjha, ‘Bwanji, kuli chiyani?’ 27 Yujha mbowa wadamuyangha, ‘Mphwako wabwela pakhomo, ni atate wako ampha njinda wonona ndande yake amlandila mphako wakali wamoyo.’ 28 Nambho mwana wamkulu yujha wadakwiya ni wadakana kulowa mnyumba. Ndiipo atate wake adatuluka kubwalo ni kumpempha kupunda. 29 Nambho iye wadayangha atate wake, ‘Vechelani! Nakutumikilani vyaka vonjhevi ni palibe siku ilo nakana kuchita icho munilamula, nambho simudanipachepo ata kamwana ka mbuzi kuti nichite phwando niachabwenji langa! 30 Nambho mwana wanu uyu uyo wawananga chuma chanu ni mahule, yapo wabwela pakhomo mwamphela njinda ya ng’ombe!’ 31 Atate wake adamuyangha, ‘Mwana wanga, iwe uli pamojhi nane masiku yonjheya, ni vindhu vonjhe ivo nilinavo ni vako. 32 Chimwecho, imafunika tichite phwando ni kukondwela, ndande mbale wakoyu wadamwalila, nambho chipano wali wamoyo ni wadataika nambho chipano wapatikana.’ "

Chifani cha mwala wa phindhu uwo utanidwa lulu

45 "Ufumu wa kumwamba ulingana ni wochita malonda mmojhi uyo wamafunafuna lulu ya bwino. 46 Yapo wadapeza lulu imojhi ya phindu lalikulu, wadapita kugulicha vonjhe ivo wadalinacho ni kugula lulu ijha."

Chifani cha Mfalisayo ni wolandila malipilo

9 Ndiipo Yesu wadakambila kwa chifani, wandhu anyiwajha amajhiona kuti avomelezeka pamaso pa Mnungu ni kwadelela wina, wadakamba, 10 "Wandhu awili adapita ku nyumba ya Mnungu kukapembhela. Mmojhi wadali Mfalisayo ni mwina wadali wolandila malipilo. 11 Yujha Mfalisayoyo wadaima ni kupembhela wadakamba kuusu iye mwene wake, ‘A Mnungu, nikuyamikani pakuti ine sinili ngati wandhu wina, anghunghu wina oyipa ni wina achigololo ni sinilingana ni mundhu ngati uyu wolandila malipilo. 12 Nimanga kudya kawili pa jhuma, nichocha fungu limojhi pa kila mafungu khumi pa chuma changa icho nipata.’ 13 Nambho wolandila malipilo yujha wadaima patali popande kukweza maso yake kumwamba, nambho wadajhibula pachidale kwa chisoni niwakamba, ‘Ambuye, nilengeleni lisungu ine wochimwa.’ 14 Nikukambilani yujha wolandila malipilo wadabwelela kukhomo kwake wavomelezedwa pamaso pa Mnungu, kupitilila yujha Mfalisayo. Pakuti, waliyonjhe uyo wajhikweza siwachichidwe, ni waliyonjhe uyo wajichicha siwakwezedwe."

Chifani cha mbowa atatu

14 "Chinchijha, ufumu wa Mnungu ulingana ni mundhu wadapita ku ulendo ni kwaika mbowa wake kuti aimilile chuma chake. 15 Wadampacha kila mmojhi kulingana ni umo wakhozela. Mmojhi wadampacha timathumba tisano ta zahabu, mwina timathumba elufu ziwili ta zahabu, ni mwina timathumba elufu imojhi ta zahabu. Ndiipo iye wadachoka kupita ku ulendo. 16 Yujha wadalandila tmatumba tisano ta zahabu, wadapita kuchita malonda ni wadabalicha timatumba tina ta tisano ta zahabu. 17 Chimchijha mbowa yujha wadalandila matumba yawili, wadayabalicha, yadaongezeka matumba ina yawili ya zahabu. 18 Nambho yujha wadalandila kathumba kamojhi ka zahabu, wadachoka ni kupita kukumba jhenje ni kukakwilila kajha kathumba ka zahabu wadapachidwa ni mkulu wake.

19 "Yapo yadatha masiku yambili, yujha wamkulu wake wadabwela ni kufuna kujhiwa ghani ya chuma chake. 20 Mbowa yujha wadalandila timatumba tisano, wadajha kupeleka timatumba tina tisano ta zahabu, uku ni wadakamba, ‘Iwe mbuye udanipacha timatumba tisano ta zahabu, penyani napeleka timatumba tina tisano ta zahabu.’ 21 Mkulu wake wadamkambila, ‘Wachita bwino, iwe ni mbowa wabwino ni ukhulupilika. Pakuti udakhulupilika kwa vindhu vochepa, chipano sinikupache vindhu va vikulu, majha ukondwele pamojhi ni mkulu wako!’ 22 Ndiipo wadajha yujha mbowa wadalandila timatumba tiwili ta zahabu, wadakamba, ‘Iwe mbuye udanipacha timatumba tiwili ta zahabu, kaonani napatanjho timathumba tiwili ta zahabu,’ 23 Mkulu wake wadakamba, ‘Wachita bwino, iwe ni mbowa wabwino ni okhulupilika. Pakuti udali wokhulupilika kwa vindhu vochepa, sinikuike uimilile vindhu va vikulu, majha ukondwele pamojhi ni mkulu wako!’ 24 Ndiipo wadajha yujha mbowa wadalandila kathumba kamojhi ka zahabu, wadakamba, ‘Iwe mbuye, nijhiwa iwe nimundhu wopande lisungu, ukolola yapo siuda vyale ukokola yapo siudamwaze, 25 Nidaopa, nidapita kubisa kathumba kanu ka zahabu pandhaka. Ili yapo kathumba kanu ka zahabu.’ 26 Mkulu wake wadamyangha, ‘Iwe mbowa woipa ni mlesi! Ujhiwa kuti ine nikolola yapo sinida vyale ni kukusa yapo sinida vyale mbeu? 27 Udafunika ukapache kathumba kako ka zahabu wandhu yawo aghulicha zahabu, kuti yapo sinibwele nipate phindu. 28 Mlandeni kathumba ka zahabu, ni mumpache yujha wali ni timathumba khumi ta zahabu. 29 Pakuti kila uyo wachitila njhito icho nampacha sinimchuluchile vina nayo siwakhale navo vambili. Nambho mundhu waliyonjhe uyo siwachitila njhito icho nimpacha, ata chaching’ono walinacho siwalandidwe. 30 Mbowa uyu woipa, mtaeni kubwalo kumdima uko sikukhale chililo ni kubukutula mano.’"

Mundhu wopata ni Lazalo

19 "Padali mundhu mmojhi wopata uyo wamavala njhalu zokhadwa zamtengo wapamwamba, uyo wamakhala kwa anasa masiku yonjhe. 20 Pachicheko chake padali wosauka mmojhi, jina lake Lazalo, uyo wadajhala vilonda thupi lambhumbhu. 21 Lazalo wamakhumbila kudya vakudya vokhalila ivo vimagwa panjhi pa meza ya mundhu wopatayo. Ata agalu amajha kumnyambita vilonda vake. 22 Pambuyo wosauka Lazalo wadamwalila, atamuki akumwamba Amnungu adamtenga ni kumuika wakhale pamojhi ni Ibulahimu. Mundhu wopata yujha nayonjho wadamwalila ni wadaikidwa mmanda. 23 Mundhu wopata yapo wadali mmavuto yayakulu kugahena, wadapenya, wadamuona Ibulahimu kwapatali, ni pafupi pake wadalipo Lazalo. 24 Chimwecho, mundhu wopatayo wadamtana Ibulahimu, ‘Atate Ibulahimu, nilengeleni lisungu, mumtume Lazalo wabize chala chake mmajhi kuti wajhe kuzizilicha lilime langa, chifuko nipata mavuto kupunda kuno ku Gahena.’ 25 Nambho Ibulahimu wadamuyangha, ‘Mwana wanga, kumbukila yapo udali wamoyo pajhiko udathopata vindhu vabwino ivo udavikhumbila, ni Lazalo wadapata mavuto. Nambho chipano, Lazalo wathilidwa mtima, ni iwe uvutika. 26 Ata chimwecho, pakati panu ni ife pali jhenje lalikulu, kuti yawo afuna kuchoka kuno kujha kumeneko sadakhoza, kapina yawo afuna kuchoka kumeneko kujha kuno kwathu alepele.’ 27 Ndiipo wopatayo wadampembha kupunda, ‘Basi nikupembhani atate wanga a Ibulahimu, mumtume Lazalo wapite kukhomo kwa achabale wanga. 28 Nili ni achabale asano kumeneko, wapite wakaonye kuti naonjho sadafika kumalo yano ya mavuto.’ 29 Nambho Ibulahimu wadamuyangha, ‘Achabale wako ali ni mathauko ya Musa ni malembo ya alosi, asiye ayavechele yameneyo.’ 30 Nambho wopatayo wadakambanjho, ‘Atate wanga a Ibulahimu, ngati mundhu wakachoka kuno nikwapitila, salape machimo yawo.’ 31 Ndiipo Ibulahimu wadamuyangha, ‘Ngati sayavela mathauko ya Musa pamojhi ni malembo ya alosi, sangakhoze kuvela ata ngati wakapitila mmojhi uyo wahyuka kuchokela kwa akufa.’"

Chifani cha matengo

24 Yesu wadaakambila wandhu chifani china, "Ufumu wa kumwamba ulingana ni mundhu uyo wadavyala mbeu zabwino mmunda mwake. 25 Nambho wandhu yapo adagona, mdani wake wadajha, wadavyala matengo pakati pa mapila, nikuchoka. 26 Mapila yapo yadamela ni kuyamba kubala, matengo nayo yadayamba kusetela. 27 Opota njhito adamchata mwene munda, adamkambila, ‘Imwe waakulu, simdavyala mbeu zabwino mmunda mwanu? Chipano matengo yachokela kuti?’ 28 Iye wadayangha, ‘Mdani ndeuyo wachita chimwecho.’ Ndiipo opota njhito wake adamfunjha, ‘Bwanji, ufuna tikayazule?’ 29 Iye wadaayangha, ‘Notho, msadayazula, pakuti pozula matengo, mkhoza kuzulanjho ni mapila. 30 Zisiyeni zonjhe zikulile pamojhi mbaka ndhawi yokolola. Ndhawi imeneyo sinaakambile wokolola kukusa matengo akayamange machakatamachakata ni kuyabucha. Nambho mapila kololani mkaiike mnghokwe mwanga.’"

Chifani cha anamwali khumi

1 "Ndhawi imeneyo, ufumu wakumwamba siulingane ni anamwali kumi atenga nyali zao nikupita kumlandila okwata. 2 Anamwali asano pakati pao adali asabobwa ni asano adali ni njelu. 3 Anamwali asabobwa wajha adatenga nyali zao nambho sadatenga mafuta ina, 4 Nambho anyiwaja adali ninjelu adatenga mabotolo yayo yadajhala mafuta ni pamojhi nyali zao. 5 Okwata wadachedwa kujha ni anamwali wonjhe adaojhela ni kugona.

6 "Usiku pakati padaveka mundhu niwaluluta ndhungululu, ‘lyaa, lyaa! Mwene ukwati uyuyapa, tieni timlandile iye.’ 7 Ndiipo anamwali wonjhe adauka ni kuzikonja nyali zao dala zikwelele bwino. 8 Anamwali asabobwa wajha adaakambila anamwali anjelu, ‘Tigawileni mafuta yanu pang’ono, nyali zathu zitothima.’ 9 Anamwali a njelu wajha adaayangha, ‘Notho, siyatikwana kupungulana ife ni anyiimwe. Mbasa mpite kwa wandhu yawo agulicha mafuta mkagule yanu.’ 10 Yapo amapita kugula mafuta, kumbuyo kwao okwata wadafika, anamwali anjelu wajha adajhikonjekela adalowa pamojhi ni okwata kuphwando la ukwati ni chicheko chidachekedwa."

11 "Pambuyo pang’ono, adajha anamwali asabobwa wajha, adatana, ‘Imwe wakulu, imwe wakulu! Tichakulileni chicheko!’ 12 Nambho wokwata yujha wadayangha kuti siwajhiwa ata pang’ono."

13 Ndiipo Yesu wadamalizila kukamba, "Mjhipenyelele pakuti simujhiwa siku kapina saa."