8 Aakhar, yꞌarawaan, igirmaayeekna teena tidaayiit whamaad astehaleent tibna. Teena oosdik ikatiint, sharafwa, shibootwa, nhisuuytwa, reerwa, hamooyseewwa ikwasiint tinaatee igirmaayeekna tibna.

2 Oon tuduniyaati dehay tꞌiiteeb baaꞌakeena, laakiin Ukwaasana usalal whaay teekwinneeb bagayyari. Malya Ukwaasana dꞌuuy hookna harriiweet toonaawwa tudaayiinaay barooh afirhistiniitwa timmiima iikan tiyadna.

13 Digwagwna, tikwakwna kwinna. Yasuuꞌa Umasiih lawiiniyihoob, Ukwaasana bareekna dehookna ishbuub indiyeet toona winneet sꞌayaamaana.

20 Oontꞌa kassuuh umatuun Ukwaasana, wꞌadgriiniinaay ikati, yꞌakriraah yꞌalya hineeb shagaameeneeb, hinin raatnayeet tari neekwineet toonaatiika gwidakaana tankwiikw. 21 Umatuun bariiyooh baꞌiikti tukaniisaatiibwa Umasiih Yasuuꞌi geebiiwwa diimaabwa kassoohoobwa taas taasii baꞌiikti! Aamiin.

12 Ukwaasanaay ibhali dhhaniiba aree diimaab eefeena, baraah malu ginnali bꞌadhdhiika hasikaaba. Baraah eenfiswa eeshuukwa han yꞌadhidhna, eebꞌiiwwa tumiigꞌoolwa yꞌadhidhna, iginꞌiit kwoonaniiwwa tiniyaawwa han yꞌadhidhna.

20 Yasuuꞌa masi, "Oodehayii titfarꞌi tuuna oodehay yiwaashiistini. 21 Tehooytee oodehayi ginꞌaayee wꞌamaag niya itfarꞌi, faddaadamtiibwa, gwihartwa, madarwa, 22 Jikuunwa, akuushwa, hadaniyaabwa, talasaabwa, moogamtiibwa, hasaadaatwa, neewwa, kibirwa, afreebwa ikatiin. 23 Kastuuh tuun tuumaag oodehayi ginꞌaayee firꞌatiit oodehay yiwaashiistini." idi.

25 Oontꞌaaneet ani andi hookna: ukwiraayiisookna baahasiikna, naan tamteeneeb tari gwꞌiteeneeb tari igarooyeekna naan teetkwiineeb baahasiikna. Umidhhan tumꞌariitiika daayikaab kiiki han? Ugaru aree yhalakaayeeka daayikaab kiiki han?

7 Aree siileelteenihoob, Ijintiileet baajawaana. Baraah igwida bhaliiyeesoohna itmassiiwneeb hiiseen.

1 Been oodoor gwida alfa dehay idbalnihoob, baraah gal eeraw eetiyaan. Yasuuꞌa hankaab ikwiriyaatayeeh hadiidsamiya: "Ifariisi hamiirii digwagwna! Been baruuh mishuush ikati. 2 Kwabaasna lawi baadiit kitehaay, tari dhꞌimaana ituukkin baadiit kitehaay. 3 Ibhali uthibniib tiyadneeb, oombꞌi itmissiw iyadna. Ibhali taktakeeb yꞌangwileeb igawaayeet hooyteeb hadiidteeneeb, igawaayi mhakwal soomami iyadna." idi.

4 Yasuuꞌa "Ani andi hookna, yꞌarawaanay! Baliib ugaru dirtiit malya weenaati dꞌuuy baaꞌadgirayaab hooy baarakwiina. 5 Laakiin ibakii aab tireekwneeb ani rhisi hookna andi: Ubashar dirtiit harꞌii, barook tunꞌeetiib haay ingiidi akrir ibariib beeb rikwiina. Awooh, barooh rikwiina, andi hookna. 6 Ayt kilay maloot jineehiitee kiidilabna han? Laakiin Ukwaasana gaat han bateesooh kiibaadhin. 7 Laakiin bareekna igirmaayeetaakna tehamu han kastaah atdhagwgwiyaata. Baarakwiina! Baraakna gwidaat kilayteeka alyakaabaana.

8 Ani andi hookna, oodehayi suurii aniib ikatiyeet toona isookiinka, beeb Wꞌaadami Oor han Ukwaasanaay imalaki suurii barooh isuukin indi. 9 Laakiin oodehayi suurii aneeb ittawiib, Ukwaasanaay imalaki suurii Wꞌaadami Oor han barooh ittiw indi. 10 Tak gaalka Wꞌaadami Oori kehii naat indiib, afoomi indi. Laakiin Eeshuuk Imugaddasaayee kanfiirka, afoomi kiidi.

11 Iyahuudi diini gawaawwa isuurkinaawwa yhaakmaayi suuriiwwa bareekna haay yꞌeenihoob, baraakna kak igarooyookna teheebneeb tari naan iyaad tiyadneeb, baahasiikna. 12 Been oodoor naan iyaad tiyadneeb Aashuuk Imugaddasa allami hookna iyadna." idi.

13 Gaal oodehayi bitikii bariiyooh dehaay, "Seedna, usanu tikwasa yꞌandhiidheetu toona sooyaa." idi.

14 Yasuuꞌa "Yhaa, aaw bareeyookna bitik gaadiib tari aadhdhiib ikwaaseheeb?" idi. 15 Malya oodehayii dehaay, "Digwagwna, baakaashna! Wꞌaadami midhhan gwida miraayi kinaamtii kiiki." idi.

16 Malya bareeh een eemtaal dehaay hadiidiya: "Gaba tak gaal iifi. Tudirꞌaatuuh gwida harru tifirꞌa. 17 Uun uutak uukna ikwin, ‘Naan adanꞌi? Oon wharru kassooh hooy adanbiyi mhiin kaabari.’ idi. 18 Malya baruuh, ‘Bak saki andi, umikhsanu katꞌeetiit, weer winkaab iidꞌir andi. Aree kassooh wharrooyoowwa igadhꞌeewwa beentooy idaab andi. 19 Aree ugarooyu dehaay, "Ugarooyu, gwida hawla hadiit daasamaat gwidaat daayiinay tibariya. Rayhamaa! Tamaa! Gwꞌaa! Aree afirhaa!" iyaad andi.’ idi.

20 Laakiin Ukwaasana bariiyooh dehaay, ‘Baruuk afrii takwa! Amsi whawaad aashuuk hook ittiyiw iyadna. Malya beet toona ugarooyook dehaay soomiraab tikatiyeet aayt iikti tindi?’ idi.

21 Uutak ugarooyooh dehaay teena danbiib, oontꞌaaneet iikti indi. Laakiin Ukwaasanaay geeb baruuh gaba tak kiiki." idi.

22 Yasuuꞌa ikwiriyaatayeeh dehaay: "Aflaay andi hookna, umidhhaniyookna dehaay baahasiikna! Naan tami tiyadneeb, tari igarooyeekna naan istuukw tiyadneeb, baahasiikna. 23 Umidhhan tumꞌariitiika alyakaab ikati. Aree ugaru yhalakaayeeka takweetikaab ikati. 24 Ikwiikwꞌay shibibna! Baraah kiiꞌadiina, tari kiiwikna, mikhsanaab tari geesaab kiibariin. Laakiin bareeh Ukwaasana tamsiini. Aflaay, baraakna ikwiikwꞌayeeka alyakaabaana! 25 Aaw bareesookna hansiikihoob, umidhhaniyooh gaat saaꞌa eeshiwi? 26 Teen teena tidabalooya tidꞌanee dehaay bitadgirayneek, aflaay naanhooy teena tirawtee dehaay tehasikna?" idi.

27 Yasuuꞌa "Umingaayi hindi idaawriib shibibna kak yakeena. Baraah kashagaamiyaana tari igarooyeehna kiisitookwna. Masi ani andi hookna: Suleemaan kassooh ugibliisooh een yhindiyeet akwaay kiiki. 28 Aree uusyaam, amsi tubuuti kehii eefeeb, lhayt tunꞌeetiib itoogiid. Ukwaasana barooh bak istookwiyeek, aflaay bareekna ishalik iimaaniyay, kak gwidaana istuukw hookna indi! 29 Naan tamteeneebwa naan gwꞌiteeneebwa uginꞌiyookna baadꞌiina. Beet toona hooy baahasiikna! 30 Uudehay diin baabariin kasteeh teen tinaati harꞌii dhaabeen. Laakiin Baabuukna bateeh tehariwneet toona ikteen. 31 Laakiin tehadꞌaayeetooh hariwna! Taan taana han ittiyiw hookna iyadna.

32 Yaa ikwiriyaatay idabalooya, baarikwiina! Baabuukna tehadꞌaayi afirhaa iniiw hookna." idi. 33 Yasuuꞌa masi "Titibariina dilibnaat, imhallaga imiskiina hiina. Igarooyeekna dehaay baashꞌiit mhallagaayeet shanta dꞌiina, aree umraayookna tibreeteeb dibiina. Beentooy igwihara kiikitimna aree uusuus kiimig. 34 Umraayuukna hooy eefiyeeb oomhiin, iginꞌuukna han hooy daayiini." idi.

35 Yasuuꞌa, "Shagaamtii dehaay marnaat kweena, aree tilambaateekna baloolsaana. 36 Idoobeet aduumaatii itꞌagiir wꞌankwanaayoohna yhagit eenda tꞌiiteeb akeena. Aflaay baruuh yꞌeetiit udheefa inkwiilihoob, baraah willa bariiyooh dehaay inagilna. 37 Wꞌankwanaayuuhna yꞌiiniyihoob bareeh bꞌaraa marriyeeb ikishiya baliin libaabiyaan. Oosdik andi hookna, baruuh shagaamtii dehaay itlibib indi. Bareeh tumꞌariitii dehaay soosꞌiit yhigit indi. 38 Baruuh whawaadi tarabeeb tari teekwihi yꞌiiniyeek, amar akay marriyeeb ikishiya baliin libaabiyaan. 39 Laakiin toon toona afhamaana: Ugawikina ugwihara yꞌiiniyeet toosꞌa ikteeniyeek, baruuh ugawooh kiisigwihar. 40 Baraakna han ibakii marna! Wꞌaadami Oor bitsꞌayaamayneet saaꞌaatiib yꞌi indiyayt, marna!" idi.

41 Bitrus raatiya, "Wꞌankwanaay, baruuk een eemtaal hinee dehaay tindiya han, kassooh oodehay haay tisehariiwa?" idi.

42 Yasuuꞌa igwibi, "Uwakiil usidkiiwwa ufagarwa aflaay aabu? Been bareeh timꞌari udooriyooh iniiwee dehaay wꞌankwanaayuuh ikishiyaayeeh kehii suurkinaab ikwasiyeeb aabu? 43 Wꞌankwanaayuuh itꞌagiirihoob, been toona sakee marriyeeb ukishiya been libaabiya. 44 Oosdik andi hookna, wꞌankwana oon ootak kassooh umraayooh isꞌibik indi. 45 Laakiin uun ukishiya ugarooyooh dehaay, ‘Wꞌankwanaayu willa itꞌigir kiidi’ diit, malya baruuh ikishiyaawwa, tikishiyaawwa eethibꞌeek, tamiiniyeek, gwꞌiiniyeek, aree askiriiniyeek, 46 wꞌankwanaayuuh baruuh biisꞌayaamayeet saaꞌaatiib tari biikaani dooriib, yꞌi indi. Oon ukishiya katꞌiit iirfit indi, aree barooh ootkaal aagibi mhiin daasiini.

47 Ukishiya wꞌankwanaayiitooh tuniya kanee dehaay amaar baakaay, tari baruuh harriiweet toona baadꞌiib, been baruuh akra kwirbaajii jasaami indi. 48 Laakiin ukishiya wꞌankwanaayuuh harriiweet toona kanaab baakaay sakiiniib, aree jasaab astehaltiniina sakiiniib been baruuh shoof kwirbaajii jasaami indi. Gwidaana attiyeewiyaab ootakiika, gwidaana hooy itehirriw tindi. Beeb gwidaana sꞌabkaab ikatiineeb, gwidakaana raatamami indi." idi.

49 Yasuuꞌa "Ani toobuur nꞌeet hooy iidꞌa miyaadiib yꞌaabu, aree suur akay alaawt tiiktiyeet toona minniiman. 50 Laakiin ani ibakii atoomiis, aree beet tuuna faayamtiniyeeb hadiit winneet lhami andi. 51 Ani tubuuti kehii mꞌasig haay yꞌaniyeeb hiisteena han? Een kiikeen, laakiin oodehay khilaafiib adanꞌiyee dehaay yꞌaabu, andi hookna. 52 Amseenee fidnaab dhiwaab galneeb ay daayeen baraah gaal ooraawi kehii yakeen, mhay malooni kehii yakeen, aree maloob mhayni kehii yakeen. 53 Baraah itꞌadhiidhna, ubaaba wꞌoori kehii yakiini, aree wꞌoor ubaabaay kehii yakiini. Tuundi tꞌooti kehii yaktini, aree tꞌoor toondeeti kehii yaktini. Teham wꞌooriitooh takati kehii yaktini, wꞌooriit takat tehamtiyooh kehii yaktini." idi.

54 Yasuuꞌa kassooh oodehayii dehaay: "Uyindhibii bꞌaluuk firꞌee rhiteenihoob, baraakna igidiyeesookna, ‘Biri yꞌiini,’ tiyadna, aree bak ikati. 55 Oosꞌiidi baraam nanfiyihoob, baraakna ‘Nabꞌuuyt eetni’ tiyadna, aree bak tikati. 56 Baraakna uumshuush! Toobuutwa teebreewwa shibibtiit kak fassarteeneeb tikteenna. Laakiin oon amseeneeb udamaani fassarti kak kitkanna?

57 Tushboonaayti sakti naanhooy ikanaayaakna kaꞌafhamtaana? 58 Ugariimiyook geeb tumhakama beeti giigtiniyeet midda, usalaliib barooh timꞌaddiileet toona winneet jarraba. Bak biikaayeek baruuh ugaadi beeti imoorhiif hook. Ugaadi aree udaabit beeti hassiini hook, aree udaabit usijniib ingiid hook. 59 Andi hook, baruuk kasseeh imhallaga neekalt anu kwansiyeeb ookiik itfirꞌa kitdiya." idi.

3 Ani attiyeewiyaab akatiyeet tinꞌimaati sabbii, bareekna kasseekna andi hookna: Ugarooyook hallaay tehayeeb whaaliisookka hayiskaab baahiisa. Laakiin ugarooyook daayiib hooy kwina. Ukwaasana hiiyyaayook ikatiyi wꞌiimaani abaariit hayꞌaatii hakima.

10 Isanaayaanwa tikwaataanwa, Wꞌankwanaayoon Yasuuꞌaab Umasiihiib oosmii waliikani hookna, kassaakna gaal uraawi geeb taafagteeneet toonaati. Aflaay beentooy ibitkeekna adhidh daayi kiidi aree ufikriiwwa uginꞌiiwwa gal akeena.

11 Wꞌaadamiit kwoonanii ikteeniib, wꞌaadami ookna oobhaat ikati. Oontꞌaaneet, Ukwaasana inkwiineet toona ikteeniib, Ukwaasanaay Eeshuuk eebhat ikatiin.

18 Igarooyookna baatiilna! Oon udamaani haaliib bareekna gaal han hookna fagar hiisiiniyeek, baruuh afrii ikatiyeet toonaatu, aflaay fagar han ikati.