Reino dos céus

Agrɔ ə̂në ə zâ tə̂ ye wû

44 «Əgɔngerə tshelafɔ sə kwatə̂ye mata ə̈bə̈ agrɔ ə̂në əndje zâ wû gâ lə ə̈bə̈ kəndɨ. Ə̈bə̈ əzü sɔ̂tə̂ nə â zâ əndʉ nə wû kwatə̂ye. Tshelə ye mɔ̂ â tshə nâ ə kâ aərə nə̂ ye nɔ̂ â yɔ̂ kəndɨ səkɔ.»

Kədji əgerə ndogɔ

45 «Əgɔngerə tshelafɔ sə kwatə̂ye mata ə̈bə̈ awoka aərə ə̂në tshə sə kə pra ə̂rɔ̂ kədji ndə kə yɔ nə. 46 Alɔ ə̂në tshə sɔ̂tə̂ ə̈bə̈ nə ə̂në ndogɔ nə gbɔ̂ wââ kɔ, tshə nâ ə kâ aərə nə̂ ye nɔ̂ ə yɔ̂ kədji səkɔ.»

Ə̂ndjî mutardə

31 Jezu kwatə̂ye ə pâ ə̈bə̈ əpʉ kəwû kə əndje ə pa: «Əgɔngerə tshelafɔ sə mata ə̂ndjî ayɔ ə̂në əɨrɨ nə kə də̂ mutardə kɔ, ə̂në ə̈bə̈ əzü zâ ə lû gâ lə kəndɨ nə̂ ye kɔ. 32 Ə sə tə ə̂ndjî rəgo ə̂në ə sə teashe ə rô ə̂dû ə̂ndjî arəgo nɔ̂. Bale, alɔ ə̂në ə gêrə gâ ye kɔ ə rô ə̂dû akako gûsû tshelə kəndɨ nə nɔ̂. Ə mâ ndje tə əgerə ayɔ â ayanu na ə ma akomɔ əndje gâ lə ayana nə.»

Əyï mapa

33 Jezu kwatə̂ye ə pâ ə̈bə̈ ata əpʉ kəwû kə əndje ə pa: «Əgɔngerə tshelafɔ sə mata əyï mapa ə̂në ə̈bə̈ yashe zâ ə vɔ̂ gâ lə əgerə ndjuwu kə ma də mapa ə zâ tshelə nə ʉrrr â ômɔ nɔ̂.»

Əmbrʉ ebe

24 Jezu kwatə̂ye ə pâ ə̈bə̈ əpʉ kəwû kə əndje ə pa: «Əgɔngerə tshelafɔ sə mata əpʉ nə̂ ə̈bə̈ koshe ə̂në tshə lû ə̂rɔ̂ angwa rəgo gâ lə kəndɨ nə̂ ye. 25 Bale, alɔ ə̂në azü lô na ye gâ ye kɔ, əyïkowɔ nə̂ ye nâ ə lû əmbrʉ angwa rəgo gâ lə angwa ble nə ə rô ərə nə̂ ye. 26 Alɔ ə̂në rəgo nə kô ə gêrə gâ ye kɔ, ə vɔ̂tə̂ kə le nə, əmbrʉ ebe nə gêrə ndje. 27 Alayïkosəra nə̂ əyïnga kəndɨ nə nâ ə pâ kə ətshə ə pa: "Âgbɔ̂ əzü, ə də̂ ə̂rɔ̂ angwa rəgo də̂ bə lû gâ lə kəndɨ nə̂ zə nə kɔ ne a? Rəkɔ, əmbrʉ ebe səye to ənə̂ ye mata a?" 28 Tshə kîrə əpʉ kə əndje ə pa: "Ə̈bə̈ əyïkowɔ kə mâ ərə səkɔ." Bale, alayïkosəra nə yû ətshə ə pa: "Bə yində nə ə pa ä na ə su əmbrʉ ebe nə a?" 29 Tshə pâ kə əndje ə pa: "Bale ne. Mbrə ə̂në, kədə e sə kə su əmbrʉ ebe nə, e lï ndje äwä bale ndə kə su aəshe ble nə. 30 E kätə̂ nə nɔ̂ ə gerə äwä bale ʉrrr ndjɔ gâ tə̂ alɔ kə wa angwa rəgo nə. Kədə alɔ kə wa angwa rəgo nə kə lî gâ ye, mə sə kə pa kə alayïkosəra nə ə pa: e sü əmbrʉ ebe nə angbʉlînə ə ngbö gâ tə̂ nə ndə kə sho nə gâ ye kane. Bale, e ngbö ble nə gâ lə agrɔ nə̂ əmə."»

Jezu yîsə̂ âdâ əpʉ əmbrʉ ebe

36 Bale, Jezu kâtə̂ ə̂kpû azü nə â gû na ye gâ lə manda. Atrawaya nə̂ ye nâ trö də ətshə ə pâ kə ətshə ə pa: «Yisə̂ tshelə âdâ əpʉ kəwû əmbrʉ ebe ə̂në ə sə lə kəndɨ nə kɔ kə ä.» 37 Tshə kîrə əpʉ kə əndje ə pa: «Əzü ə̂në tshə lu ə̂rɔ̂ angwa rəgo nə kɔ, kə də̂ Əgblə nə̂ Əzü. 38 Kəndɨ nə kə də̂ tshepashɔ. Ə̂rɔ̂ angwa rəgo nə kə də̂ azü ə̂në əndje sə tə azü Əgɔngerə nə. Əmbrʉ ebe nə, kə də̂ aneshe nə̂ djablo. 39 Əyïkowɔ nə ə̂në tshə lû əmbrʉ ebe nə kɔ, kə də̂ djablo. Tshekɨ kə ko angwa rəgo nə kə də̂ kə nglɔ tshepashɔ nɔ̂. Azü kə ko angwa rəgo nə kə də̂ atrawaya nə̂ Ndjapä. 40 Mata ə̂në əndje ngbo əmbrʉ ebe gâ tə̂ nə ndə kə sho nə kɔ, ərə nə sə kə sə ndje äwä bale rə tə̂ alɔ kə nglɔ tshepashɔ. 41 Əgblə nə̂ Əzü sə kə wla atrawaya nə̂ Ndjapä. Əndje sə kə wutu də azü nɔ̂ ə̂në əndje sə kə ma ndə kə pa angâ əndje te gâ lə nyaka kɔ, də azü ə̂në əndje sə kə ma əmbrʉ ərə kɔ lə Əgɔngerə nə̂ Ndjapä gashu. 42 Əndje sə kə wli əndje gâ ala âgbɔ̂ əwo ə̂në ə rɨ rɨ tə̂ ərə ne kɔ. Kôto də̂ əndje sə kə kɨ nə də ngɔla əndje ə zɨ tshelə əji əndje. 43 Bale, aə̂rɔ̂ azü sə kə tshe mata alɔ lə Əgɔngerə nə̂ Abä əndje. Əzü ə̂në tshə sə də ətu kə dji də əpʉ, tshə djï!»

Əpʉ gbânda

47 «Əgɔngerə tshelafɔ sə kwatə̂ye mata gbânda ə̂në əndje wlî gâ ala ə̂ngû əngbrʉ ə̂në ə kô adongo agiangû nɔ̂. 48 Alɔ ə̂në agiangû nə sû tshelə gbânda nə gâ ye kɔ, aawopra agiangû nə gbə̂tɔ gbânda nə gâ tə̂ ama ə̂ngû nə, ə sə̂ gâ tʉ ə rô tshelə agiangû nə: əndje kô aə̂rɔ̂ əndje gâ lə akakli, bale, ə kô aəmbrʉ əndje nə vê-e. 49 Tə̂ alɔ kə nglɔ tshepashɔ, ə sə kə sə ndje äwä bale rə. Atrawaya nə̂ Ndjapä sə kə na ndə kə sɔ tshelə takpa tə̂ alayïnyaka də aə̂rɔ̂ azü 50 ə ko alayïnyaka nə wli gâ ala âgbɔ̂ əwo ə̂në ə rɨ rɨ tə̂ ərə ne kɔ. Kôto də̂ əndje sə kə kɨ nə də ngɔla əndje ə zɨ tshelə əji əndje.»

3 «Ənə̂ əndje tə ə̂rɔ̂nə,

azü ə̂në əndje wusə̂ nə ə pa alane sə tə alayïəyo lə aərə nə̂ Ndjapä kɔ,

mbrə ə̂në Əgɔngerə tshelafɔ sə tə ənə̂ əndje!

4 Ənə̂ əndje tə ə̂rɔ̂nə,

azü ə̂në əndje sə kə kɨ nə kɔ,

mbrə ə̂në Ndjapä ə tru ngɔla əndje je!

5 Ənə̂ əndje tə ə̂rɔ̂nə,

azü ə̂në əndje ma awlra ma tə̂ angâ əndje ne kɔ,

mbrə ə̂në ashɔ sə kə sə tə ərə ə̂në Ndjapä sə kə za kə əndje!

6 Ənə̂ əndje tə ə̂rɔ̂nə,

azü ə̂në əgo kə ma ərə də äwänə mi əndje ə mi kɔ,

mbrə ə̂në tshelə əndje ə su je!

7 Ənə̂ əndje tə ə̂rɔ̂nə,

azü ə̂në əndje sə kə wu əyo angâ əndje kɔ,

mbrə ə̂në Ndjapä ə wu əyo əndje je!

8 Ənə̂ əndje tə ə̂rɔ̂nə,

azü ə̂në lɔsu əndje sə mvo kɔ,

mbrə ə̂në əndje ə wu Ndjapä je!

9 Ənə̂ əndje tə ə̂rɔ̂nə,

azü ə̂në əndje sə kə ma ndə kə pa blatshe sə lə takpa tə̂ azü kɔ,

mbrə ə̂në əndje e əndje tə aləvu Ndjapä je!

10 Ənə̂ əndje tə ə̂rɔ̂nə,

azü ə̂në əndje sə kə gi əyo tə̂ əndje mbrə kə ma ərə də äwänə kɔ,

mbrə ə̂në Əgɔngerə tshelafɔ ə sə tə ənə̂ əndje je!

11 «Ənə̂ e tə ə̂rɔ̂nə, alɔ ə̂në azü sə kə gu e, ə sə kə ma awlra tə̂ e, ə sə kə pa aâkâ aâkâ aəmbrʉ aəpʉ əterə nɔ̂ gâ lə kumu e, mbrə əmə. 12 E sə̈ də amɔ tshelə e ə sə̈ də âgbɔ̂ ə̂rû tə̂ lɔsu e, mbrə ə̂në âkrâ nə̂ e sə kə sə gerətshe mâ lafɔ-e. Mbrə ə̂në ə sə ndje äwä bale rə də̂ azü mâ awlra tə̂ aawopandəma Ndjapä ə̂në əndje sə̂ ətshinə tə̂ e kɔ.»

Əde kə ro angâ nə lə Əgɔngerə tshelafɔ?

1 Tə̂ alɔ nə səkɔ, atrawaya nə nâ gâ ngotə̂ Jezu ə yû ətshə ə pa: «Əde kə sə tə âgbɔ̂ əzü ə rô angâ nə lə Əgɔngerə tshelafɔ?» 2 Bale, Jezu ê ə̈bə̈ aya əgblə ə zâ ətshə tɔ gâ lə ə̂grû tə̂ əndje 3 ə pâ: «Djatra əpʉ, mə pa kə e: kədə e tshi äwä angbrɔ kə ma tə̂ e tshi tʉ â sə sə mata aaya aneshe ne, e sə sə kə li gâ lə Əgɔngerə tshelafɔ bale ne. 4 Âdârə ə̂në əzü â ma tə̂ ye tə əngʉ əzü mata aya əgblə səye, tshə sə kə sə tə âgbɔ̂ əzü ə rô azü nɔ̂ lə Əgɔngerə tshelafɔ.

14 Bale, Jezu pâ: «E kätə̂ aaya aneshe əndje na gâ tə̂ əmə. E känga äwä känga tə̂ əndje ne. Mbrə ə̂në Əgɔngerə tshelafɔ sə tə ənə̂ azü ə̂në əndje sə mata əndje kɔ.»

23 Bale, Jezu pâ kə atrawaya nə̂ ye ə pa: «Djatra əpʉ, mə pa kə e, kə li awosə də aərə ngbatshe gâ lə Əgɔngerə tshelafɔ sə kə gbɔ tə bandanə. 24 Mə pa kwatə̂mə kə e: kə li awosə də aərə ngbatshe gâ lə Əgɔngerə tshelafɔ gbɔ ə rô kə ro agia ə̂në əndje djî əɨrɨ ye ə pa shamo* kɔ lə əgro swa.» 25 Alɔ ə̂në atrawaya djî əpʉ səkɔ, kumu əndje kpê pâ əndu əndje tə bandanə â əndje pâ: «Rəkɔ, əde kə lï ndə kə she lə kuzu?» 26 Jezu shêkɔ əndje ʉrrr ə pâ kə əndje ə pa: «Ərə ə̂në azü lï lï ndə kə ma nə ne, Ndjapä lï ndə kə ma nə.»

5 Alaye əmə ə̂në mə yində e tə bandanə kɔ, e djï əpʉ səye: Ndjapä kê kê də̂ azü ə̂në azü tshepashɔ wu əndje tə alayïəyo kɔ ndə kə pa əndje sə tə alayïrishi lə əpʉ lɔsu ne a? Tshə kê əndje ndje tə alayïəgɔngerə nə̂ ye ə̂në tshə zâ ama də əpʉ nə gâ ye kə azü ə̂në əndje yində ye kɔ.

Djatra atrawaya

21 «Ə də̂ azü nɔ̂ ə̂në əndje pa kə əmə ə pa: "Âgbɔ̂ Əyïngerə, Âgbɔ̂ Əyïngerə!" kɔ kə sə kə li gâ lə Əgɔngerə tshelafɔ ne. Bale, kʉtə̂ azü ə̂në əndje sə kə ma ərə ə̂në tshelə Abä əmə mâ lafɔ kɔ yində nə kɔ kə sə â li.

19 «Rəkɔ, əzü ə̂në tshə sə kə wəra tə̂ ye tə̂ ə̈bə̈ aya əpʉ lə âgbɔ̂ əpʉ səye, â yisə̂ nə kə azü ndə kə pa əndje wəra tə̂ əndje tə̂ nə äwä bale ndje, əndje sə kə e ətshə tə əngʉ əzü lə takpa tə̂ azü nɔ̂ lə Əgɔngerə tshelafɔ. Bale, əzü ə̂në tshə ma tə̂ ye Lïndə̂ nə â yisə̂ nə kə angâ nə ndə kə pa əndje ma tə̂ əndje Lïndə̂ nə, əndje sə kə e ətshə tə âgbɔ̂ əzü lə Əgɔngerə tshelafɔ. 20 Mbrə ə̂në, mə pa kə e, kədə ə̂rɔ̂ kə mbrə tə̂ e kə ro ənə̂ aawoyisə̂ âgbɔ̂ əpʉ nə̂ Mayïzə də ənə̂ Afariza ro ne, e sə sə kə li gâ lə Əgɔngerə tshelafɔ ne.»

9 «Rəkɔ, äwä ə̂në e lï ndə kə yu Ndjapä də nə kɔ kə səye:

"Abä ä ə̂në bə sə mâ lafɔ!

Ä yində nə ə pa azü nɔ̂ lʉ əɨrɨ zə ə̂në ə sə kpî kɔ,

10 əndje yerɔ əbə tə Əyïngerə nə̂ əndje,

əndje ma ərə ə̂në tshelə zə yində nə pâ ashɔ,

mata ə̂në əndje sə kə ma nə mâ lafɔ kɔ.

Zââ Batistə mʉ̂ əpʉ kə azü

1 Tə̂ alɔ nə səkɔ, Zââ Batistə yî kumu ye mâ lə ngbûndû əgɔ Jude â vɔ̂tə̂ kə yisə̂ Ə̂rɔ̂ Əpʉ. 2 Tshə pâ: «E tshï äwä angbrɔ kə mbrə aərə nə̂ e tʉ, mbrə ə̂në Əgɔngerə tshelafɔ* ndô trö gâ ye.»

17 Kʉ pə tə̂ alɔ nə səkɔ, Jezu vɔ̂tə̂ kə yisə̂ Ə̂rɔ̂ Əpʉ. Tshə pâ: «E tshï äwä angbrɔ kə ma aərə nə̂ e tʉ mbrə ə̂në Əgɔngerə tshelafɔ ndô trö gâ ye!»

7 E nä na ye ə mʉ̈ əpʉ ə pa: "Əgɔngerə nə̂ tshelafɔ sə trö!"

11 Mə pa kə e, azü ngbatshe sə kə afɔ djoko tə̂ tshepalɔ də lɔtebanga ə na ə sə gâ tʉ ndə kə zɨ ərə äwä bale də Abraamo də Izakə gâ ndə Jakɔbə lə Əgɔngerə tshelafɔ.

11 Djatra əpʉ, mə pa kə e, lə takpa tə̂ azü ə̂në əndje zû əndje ə zû kɔ, ə̈bə̈ âgbɔ̂ əzü ə̂në tshə rô Zââ Batistə kɔ guta gu ne. Bale, əngʉ əzü lə Əgɔngerə tshelafɔ sə tə âgbɔ̂ əzü ə rô ətshə. 12 Ə vɔ̂tə̂ nə tə̂ alɔ kə yisə̂ əpʉ nə̂ Zââ Batistə ʉrrr ndjɔ kpəsəye, azü sə kə ma awlra ndə kə li Əgɔngerə tshelafɔ. Alayïawlra kə sə kə pra äwä ndə kə li gâ lə nə.

28 Rəkɔ, ə̂në a sə kə sɔtə̂ ə̈bə̈ əgɔngerə ə̂në əzü sə sə kə meme ne kɔ, a tegbɔ ə̂rɔ̂tə̂ Ndjapä nə tə̂ äwä kə vrɔ ətshə, tə̂ äwä ə̂në tshelə ye mɔ tə̂ nə kɔ də lɔsu əzə̂ bale də awa, ndə kə pa a za mərshe kə ətshə. 29 Mbrə ə̂në Ndjapä nə̂ əzə̂ nə sə ndje tə əwo ə̂në ə ju ətshe ə ju kɔ.

10 Âdârə ə̂në, alaye, e mbrə̈ nɔ̂ kwatə̂-e ə ro ənə̂ ətshinə ndə kə pa e yisə̂ nə gashu ə pa e yində kə e e ə̂në Ndjapä nə ê e kɔ də kə ke e ə̂në tshə kê e kɔ gâ ye. Mbrə ə̂në kədə e sə kə mbrə rə, e sə sə kə te gâ lə əmbrʉ ərə alɔ bale ne. 11 Â rə də̂ äwä kə li gâ lə Əgɔngerə ə̂në ə daka pə piii kɔ, nə̂ Âgbɔ̂ Əyïngerə nə̂ əzə̂ də Awoshe əzə̂ də Jezu Kristə, sə kə krɔ gerətshe gashe kə e.

18 Âgbɔ̂ Əyïngerə sə kə djɔ əmə lə əmbrʉ ərə nɔ̂ ə̂në azü sə kə mbrə nə kɔ â tshɔ əmə lə kuzu mbrə Əgɔngerə tshelafɔ nə̂ ye je. A mbë ətshə də ə̂ngû də ə̂ngû piii! Asərəmə!

32 Awa mbrə̈ e mbrə̈ ne, e-e ə̂në e sə mata aya ə̂kpû aagia kɔ, mbrə ə̂në Abä e wû tə ə̂rɔ̂nə lə ala ye ndə kə pa e sə tə azü Əgɔngerə nə̂ ye.»

5 Mbrə ə̂në, e wüsə̂ nə ə pa, ə̈bə̈ əyïə̂trû wala awombrə aərə gana wala awoma əgo aərə nɔ̂ bale – kə ma əgo aərə nɔ̂ kə də̂ kə vrɔ amba ndjapä – sə sə kə li gâ lə Əgɔngerə nə̂ Kristə də Ndjapä ne.