1 Alɔ ə̂në Jezu pâ əpʉ səkɔ ə kâ gâ ye kɔ, tshə âfɔ lə əgɔ Galile ə nâ na ye mâ lə ashɔ əgɔ Jude ə̂në ə sə djoko ətshî Jurda kɔ. 2 Ə̂kpû azü zâ äwä ye â tshə grɔ̂ rəka tə̂ əndje tə̂ ətshe səkɔ.

3 Alabə̈ Afariza nâ trö də ətshə, əndje yîndə kə le ətshə ə le. Əndje yû ətshə ə pa: «Âgbɔ̂ əpʉ nə̂ əzə̂ zâ äwä kə əzü ndə kə pa tshə grɔ əwɔ nə mbrə aâkâ aəpʉ nɔ̂ a?» 4 Tshə kîrə əpʉ ə pa: «E dɨ̂ dɨ̂ əpʉ ə̂në Əpʉ Ndjapä pâ kɔ ne a? "Tə̂ əlînə, Ndjapä ə̂në tshə mâ aərə nɔ̂ kɔ, tshə mâ koshe də yashe," 5 mandânə, tshə pâ: "Âdârə ə̂në koshe sə kə katə̂ abä nə də əyï nə â sə kə tɔ popo əwɔ nə â əndje bishi nɔ̂ sə kə sə tə əzü bale." 6 Rəkɔ, əndje sə sə pə kwatəndje tə azü bishi ne, bale, əndje sə kə sə tə əzü kpiabale. Rəkɔ, ərə ə̂në Ndjapä ngbô gâ tə̂ nə gâ ye kɔ, əzü sɔ̈ tshelə nə sɔ̈ ne.» 7 Afariza nə yû ətshə ə pa: «Mbrə yekɔ də̂ Mayïzə zâ ama kə koshe ndə kə pa tshə za fraka kə katə̂ ətshe kə əwɔ nə ka ə grɔ ətshə kɔ?» 8 Jezu kîrə əpʉ kə əndje ə pa: «Mbrə ə̂në e sə tə azü ə̂në kumu e gbɔ ə gbɔ də̂ Mayïzə zâ äwä kə e ndə kə pa e grɔ alawɔ e kɔ. Bale, tə̂ əlînə, ə sə sə rə ne. 9 Bale, mə pa kə e: əzü ə̂në tshə grɔ əwɔ nə grɔ tshî kʉ mbrə kə pra akoshe ne, â za ə̈bə̈ ata yashe, kandää tshə mâ nyaka gâ ye.»

10 Atrawaya nə̂ ye nə pâ kə ətshə ə pa: «Kədə ərə nə kə sə rə lə ə̂grû tə koshe də yashe, ə sə tə ə̂rɔ̂nə ndə kə pa əzü za yashe za ne.» 11 Tshə kîrə əpʉ kə əndje ə pa: «Əpʉ ə̂në mə pa kə e kɔ, ə də̂ azü nɔ̂ də̂ kə sə kə dji tshelə nə ne. Bale, kʉtə̂ azü ə̂në Ndjapä za äwä nə kə əndje ndə kə pa əndje dji tshelə nə kɔ kə dji tshelə âdâ nə. 12 Alabə̈ aərə kpî kpî kpî sə je ə̂në ə kânga äwä tə̂ azü ndə kə pa əndje ko ayashe: ənə̂ alabə̈ azü, əndje zû əndje ə zû də nə kʉ rə. Alabə̈ əndje ko ayashe ko ne mbrə ə̂në alabə̈ azü mâ əndje tə alayïmoa gâ ye. Alabə̈ aata əndje wəra tə̂ əndje ndə kə ko ayashe mbrə Əgɔngerə tshelafɔ. Əzü ə̂në tshə lï ndə kə dji tshelə əpʉ səye, tshə djï.»

13 Bale, azü kô aaya aneshe ə nâ də əndje kə Jezu ndə kə pa tshə za kəna ye gâ pâ əndje ə yu Ndjapä mbrə əndje. Bale, atrawaya nə ngâ kə azü nə. 14 Bale, Jezu pâ: «E kätə̂ aaya aneshe əndje na gâ tə̂ əmə. E känga äwä känga tə̂ əndje ne. Mbrə ə̂në Əgɔngerə tshelafɔ sə tə ənə̂ azü ə̂në əndje sə mata əndje kɔ.» 15 Tshə zâ kəna ye gâ pâ əndje â âfɔ tə̂ ətshe səkɔ â rô.

16 Mandânə, ə̈bə̈ koshe nâ trö də Jezu ə pâ kə ətshə ə pa: «Awoyisə̂ ərə, ə̂rɔ̂ ərə yekɔ də̂ mə lï ndə kə ma nə ndə kə sɔtə̂ sorô nə̂ alɔnɔ̂?» 17 Tshə kîrə əpʉ kə ətshə ə pa: «Mbrə yekɔ də̂ bə yu əmə gâ pâ əpʉ ərə ə̂në ə sə tə ə̂rɔ̂ nə kɔ? Kʉtə̂ Ndjapä tshî kə sə tə ə̂rɔ̂ əzü. Kədə bə yində kə li gâ ə̂sə̂ sorô, bata aəpʉ lə âgbɔ̂ əpʉ nə̂ Əyïlingû.» 18 Koshe nə yû ətshə ə pa: «Aəpʉ ənə̂ta a?» Jezu kîrə əpʉ ə pa: «Wö əzü wö ne, prä əwɔ əzü prä ne, zɨ̈ angba zɨ̈ ne, pä əterə pä gâ lə kumu əzü gâ ətshi alayïngbanga ne, 19 lʉ̈ abä zə də əyï zə, yïndə ngâ zə mata ə də əbə də ə̂tə̂ zə.» 20 Mɔdɔ nə pâ kə ətshə ə pa: «Mə bâta aəpʉ sə̂ nɔ̂. Ərə yekɔ kə daka pə ndə kə pa mə ma nə kwatə̂mə?» 21 Jezu pâ kə ətshə ə pa: «Kədə bə yində kə sə tə ə̂rɔ̂ əzü nɔ̂, gü ə kä aərə nə̂ zə nɔ̂, ə krü tshelə ngendja nə tə̂ alayïəyo ka ə sɔtə̂ aərə mâ lafɔ-e. Mandânə, nä gâ əmə ə zä äwä əmə.» 22 Mandânə ə̂në mɔdɔ nə djî əpʉ səkɔ, tshə kô əyo tə̂ ye tə bandanə â gû na ye mbrə ə̂në tshə sə̂ də aərə ngbatshe.

23 Bale, Jezu pâ kə atrawaya nə̂ ye ə pa: «Djatra əpʉ, mə pa kə e, kə li awosə də aərə ngbatshe gâ lə Əgɔngerə tshelafɔ sə kə gbɔ tə bandanə. 24 Mə pa kwatə̂mə kə e: kə li awosə də aərə ngbatshe gâ lə Əgɔngerə tshelafɔ gbɔ ə rô kə ro agia ə̂në əndje djî əɨrɨ ye ə pa shamo*19.24 Wu Mar 10.25. kɔ lə əgro swa.» 25 Alɔ ə̂në atrawaya djî əpʉ səkɔ, kumu əndje kpê pâ əndu əndje tə bandanə â əndje pâ: «Rəkɔ, əde kə lï ndə kə she lə kuzu?» 26 Jezu shêkɔ əndje ʉrrr ə pâ kə əndje ə pa: «Ərə ə̂në azü lï lï ndə kə ma nə ne, Ndjapä lï ndə kə ma nə.»

27 Bale, Piarə zâ əpʉ ə pâ kə ətshə ə pa: «Wü-a! Ä tshî aərə nɔ̂ tʉ gâ ye â za äwä zə kɔ. Ənə̂ ä, ərə nə sə kə sə atâ a?» 28 Jezu kîrə əpʉ kə əndje ə pa: «Djatra əpʉ, mə pa kə e, alɔ ə̂në Əgblə nə̂ Əzü sə kə sə gâ pâ mbata ngerə nə̂ ye, lə ə̂yî, pâ tafa tshepashɔ ə̂në Ndjapä sə kə ma nə kɔ, e-e ə̂në e zâ äwä əmə kɔ, e sə kə sə ndje gâ pâ ambata ngerə morofo amanə bishi ndə kə wa ngbanga gâ lə kumu amarä morofo amanə bishi nə̂ əgɔ Isərayalə. 29 Əzü nɔ̂ ə̂në tshə tshî aanda nə̂ ye, alaye nə, alakobɔ nə, abä nə, əyï nə, əwɔ nə wala aləvu nə, wala ashɔ nə̂ ye tʉ mbrə əɨrɨ əmə, tshə sə kə sɔtə̂ aərə äwä ngbangbo bale rô pâ nə, â sə kə sə tə sorô piii. 30 Bale, azü tshitshinə ngbatshe sə kə sə tə azü tshe mandânə, â azü tshe mandânə ngbatshe sə kə sə tə azü tshitshinə.»