Reino dos céus

I parabola bašo garavdo barvalipe

44 "O carstvo nebesno tano sar o barvalipe soj garavdo ki niva. Koga jekh manuš ka arakhel le, palem garavela le hem so radost džala, bikinela sa so isi le hem kinela adaja niva."

I parabola bašo biseri

45 "Palem, o carstvo nebesno tano sar jekh trgovco so rodela šuže bisejra. 46 Koga arakhela nesavo najskupo biseri, džala hem bikinela sa so isi le hem kinela le."

I parabola bašo sinapovo zrno

31 O Isus vakergja lenge javer parabola: "O carstvo nebesno tano sar o sinapovo zrno, so manuš lela le hem sadingja le ki pi niva. 32 Ov tano najtikno taro sa o semija, ama koga bajrola, ovela najbaro taro sa o rastenija ki bavča i ovela kaš, agjar so o čirikla avena hem kerena gnezdija upro leskere granke."

I parabola bašo kvasaci

33 I phengja lenge javer parabola: "O carstvo nebesno tano sar o kvasaci, so jekh džuvli lela le hem mešingja le ko biš kile varo sa dži kote na ušlilo."

I parabola bašo kakol

24 O Isus vakergja lenge javer parabola: "O carstvo nebesno tano sar jekh manuš so sadingja šukar seme ki pi niva. 25 Ama dži kote sarine sovena sine, alo leskoro dušmani hem ov da sadingja kakol maškar o giv hem gelo peske. 26 Koga o giv barilo hem angja plodija, togaš o kakol da iklilo.

27 O sluge ale ko po gazda hem vakerge leske: ‘Gospodare, na sadingjan li šukar seme ki ti niva? E kotar alo akava kakol?’

28 Ov phengja lenge: ‘Mo dušmani kergja adava.’

A o sluge pučle le: ‘Mangeja li te dža hem te ikala o kakol?’

29 Ov odgovoringja lenge: ‘Na, adaleske so tumen ko ikalibe adava šaj te ikalen o giv da. 30 Mukhen o solduj te bajron dži ki žetva. Togaš ka phenav okolenge so khedena: Prvo kheden o kakol hem phanden le ki kupa te šaj te tharel pe, a poslem kheden o giv hem legaren le ki mi štala.’ "

O Isus objasninela i parabola bašo kakol

36 Togaš o Isus mukhla e manušen hem khugja ko jekh kher. Ale leskere učenikija ki leste hem phenge leske: "Vaker amenge so manglan te phene akale parabolaja bašo kakol ki niva."

37 A ov odgovoringja: "Adava so sadingja o šukar seme tano o Čhavo Manušeskoro, 38 a i niva tani o sveto. O šukar seme tane o čhave taro carstvo nebesno, a o kakol tane o čhave e Bengeskere. 39 A o dušmani so sadinela o kakol tano o Beng. I žetva tani o krajo e svetoskoro, a okola so khedena tane o angejla.

40 Sar so o kakol ikalela pe hem tharela pe ki jag, agjar ka ovel hem ko krajo e svetoskoro. 41 O Čhavo Manušeskoro ka bičhavel pe angelen, hem ola ka ikalen len taro carstvo sarinen so čhivena javeren te grešinen hem so kerena lošno 42 hem ka frden len ki thari pečka, kote so ka ovel rojba hem krckjiba dandencar. 43 Togaš o pravednikija ka svetinen sar o kham ko carstvo pumare Dadeskoro. Kas isi kana neka šunel."

I parabola baši mreža

47 "Palem, o carstvo nebesno tano sar mreža so frdela pe ko ezero, so late astarela pe razna mačhe. 48 Koga phergjola, o ribajra ikalena la avrik. Poslem bešena hem khedena e šukar mačhen ko korpe, a e lošnon frdena. 49 Agjar ka ovel hem ko krajo e svetoskoro. O angejla ka aven hem ka odvinen e lošnon taro pravednikija 50 hem ka frden e lošnon ki thari pečka, kote so ka ovel rojba hem krckjiba dandencar.

3 "Blagoslovime tane o čorole ko duho,

soske lengoro tano o carstvo nebesno.

4 Blagoslovime tane okola so tugujnena,

soske ola ka oven utešime.

5 Blagoslovime tane o krotka,

soske ola ka nasledinen i phuv.

6 Blagoslovime tane o bokhale hem o žedna baši pravda,

soske ola ka čajloven.

7 Blagoslovime tane o milostliva,

soske lenge ka sikavel pe milost.

8 Blagoslovime tane o čista ko srce,

soske ola ka dikhen e Devle.

9 Blagoslovime tane okola so anena mir,

soske ola ka vikinen pe čhave e Devleskere.

10 Blagoslovime tane okola soj progonime baši pravda,

soske lengoro tano o carstvo nebesno.

11 Blagoslovime sijen tumen koga o manuša uvredžinena hem progoninena tumen, vakerindor protiv tumende razno lošnipe hovajbe baši mange. 12 Radujnen tumen hem veselinen tumen! Adaleske so bari tani tumari nagrada ko nebo, soske agjar e prorokon da progoninge so sine angleder tumende."

Koj tano najbaro

1 Ko adava vreme ale o učenikija ko Isus hem pučle le: "Togaš koj tano najbaro ko carstvo nebesno?"

2 O Isus vikingja ki peste jekhe tikne čhave hem čhigja le maškar lende 3 hem phengja: "Čače vakerava tumenge, ako na promeningjen tumen hem na ulen sar tikne čhave, nikat nane te khuven ko carstvo nebesno. 4 Adaleske, koj ponizinela pe hem ovela sar akava tikno čhavo, ov tano najbaro ko carstvo nebesno.

14 A o Isus phengja lenge: "Mukhen e tikne čhaven te aven ki mande hem ma zaptinen len, soske asavkjenge pripadinela o nebesno carstvo."

23 Togaš o Isus vakergja pe učenikonge: "Čače phenava tumenge, pharo i adaleske soj barvalo te khuvel ko nebesno carstvo. 24 I palem phenava tumenge, polokhe ka ovel e kamilake te nakhel maškar o kan e suvijakoro, nego e barvaleske te khuvel ko carstvo e Devleskoro."

25 Koga o učenikija šunge akava, sine but čudime hem pučle: "Togaš, koj šaj te ovel spasimo?"

26 O Isus dikhla len šukar hem phengja: "Akavaj nešto so o manuša našti te keren, ama o Devel šaj kerela sa."

Nikat na pendžargjum tumen

21 "Na sekoj so ka vakerel: ‘Gospode, Gospode’, ka khuven ko nebesno carstvo, nego okova so kerela i vojla me Dadeskiri soj ko nebo.

19 Adaleske, koj ka mukhel jekh taro akala najtikne zapovedija hem ka sikavel javeren te keren agjar, ka ovel najtikno ko carstvo nebesno. Ama koj ka ikerel hem ka sikavel sa akala zapovedija, ka ovel baro ko carstvo nebesno. 20 Soske vakerava tumenge deka ako tumari pravednost na nakhagja okoja e farisejengiri hem učitelengiri e Zakonestar, našti nisar te khuven ko carstvo nebesno."

9 Adaleske agjar molinen tumen:

‘Dade amareja, so sijan ko nebo,

neka ovel sveto to anav,

10 te avel to carstvo,

neka ovel ti vojla,

sar ko nebo agjar ki phuv.

O Jovan Krstitel spreminela o drumo

1 Ko adala dive alo o Jovan Krstitel, so propovedinela sine ki Judejsko pustina 2 vakerindor: "Pokajnen tumen! Adaleske so paše tano o nebesno carstvo."

17 Taro adava vreme o Isus počmingja te propovedinel: "Pokajnen tumen! Adaleske so paše tano o nebesno carstvo."

7 Dži kote džana vakeren akava: ‘Alo paše o carstvo nebesno.’

11 A vakerava tumenge deka but džene ka aven taro istok hem taro zapad hem ka len than te han e Avraameja, e Isakoja hem e Jakoveja ko carstvo nebesno.

11 Čače vakerava tumenge, maškar sa o manuša soj bijame nijekh nane pobaro taro Jovan Krstitel, ama sekoj soj najtikno ko carstvo nebesno tano pobaro lestar. 12 Taro dive e Jovane Krstiteleskoro koga počmingja te propovedinel dži akana, o carstvo nebesno cidela muka, hem o siladžije lena le silaja.

18 O Gospodari ka ikalel man taro sekova lošnipe hem ka legarel man sasto vesto ko po nebesno carstvo. Leske slava ko sa o vekija. Amin.

32 Ma daran, mo tikno stado! Adaleske so tumare Dadeskiri vojla tani te del tumen o carstvo.