1 Rano sabajleja o prvosveštenikija, o starešine, o učitejla e Zakoneskere hem celo Evrejsko Sovet kerge pumaro plani. I phandle e Isuse, legarge le hem denge le ko Pilat.

2 I o Pilat pučlja le: "Tu li sijan o caro e Evrejengoro?"

O Isus odgovoringja leske: "Adava tu pheneja."

3 A o prvosveštenikija kerge le krivo bute bukjenge.

4 O Pilat palem pučlja le: "Nane li te odgovorine ništo? Dikh kozome bukjenge kerena tut krivo."

5 Ama o Isus ništo na odgovoringja, a o Pilat čudinela pe sine.

6 O Pilat ki sekoja Pasha sine le adeti te oslobodinel po jekh zatvoreniko, so o narodo ka roden lestar. 7 I sine jekh manuš so vikinela pe sine Varnava, so sine ko zatvor javere tepačencar, so ki jekh buna kergja mudariba. 8 Hem i bari gužva ali te rodel taro Pilat te kerel lenge adava so kerela le sine stalno.

9 A o Pilat pučlja len: "Mangena li te oslobodinav tumenge e Evrejsko care?"

10 Adaleske so ov džanela sine deka o prvosveštenikija predajnge e Isuse tari ljubomora.

11 Ama o prvosveštenikija pherge e narodo te roden e Pilatestar te oslobodinel lenge e Varnava.

12 A o Pilat palem pučlja len: "So te kerav okoleja so vikinena le Evrejsko caro?"

13 Ola vikinena sine: "Čhiv le ko krsto!"

14 Togaš o Pilat pučlja: "Soske? Savo lošnipe kergja?"

Ama ola panda po više vikinge: "Čhiv le ko krsto!"

15 A o Pilat kerindor e manušengiri vojla oslobodingja e Varnava, a e Isuse dengja te kamšikujnen le hem te čhiven le ko krsto.

16 I nesave vojnikija legarge e Isuse ko Pretorijum ki palata e Pilateskiri, hem vikinge celo vojska te kheden pe. 17 Urage le carsko mantili, pletinge kruna taro kare hem čhige la leske ko šero. 18 Hem počminge te vikinen: "Zdravo, Evrejsko care!"

19 I khuvena le sine ko šero kašteja hem čhungarena le sine. Ola perena sine ko kočaka angli leste hem kerena pe sine deka slavinena le. 20 A palo adava koga khelge peske leja, ikalge lestar o mantili, hem urage le leskere šeja i legarge te čhiven le ko krsto.

21 Ko drumo nakhela sine jekh manuš so vikinela pe sine Simon tari Kirineea, o dad e Aleksandareskoro hem e Rufeskoro, so avela sine tari niva, hem čhige le te phiravel e Isuseskoro krsto. 22 Hem ange e Isuse ko adava than so vikinela pe Golgota – so značinela "Than e Čerepeskoro." 23 I dena le sine mol mešimo smirnaja, ama ov na lela. 24 I koga čhige le ko krsto, delinge leskere šeja maškar peste agjar so frdinge ždrepka te dikhen koj so ka lel.

25 Koga čhige le ko krsto sine o sati enja sabajle. 26 I sine pišimo natpis baši leskiri krivica:

"O CARO E EVREJENGORO."

27 A leja čhige ko krsto duje buntovnikon, jekh tari desno strana, hem jekh tari levo strana. 28 [Hem agjar pherdilo o Sveto Lil so vakerela: "Dikhle le sar jekh kriminalco."]

29 A okola so nakhena sine, iranindor po šero uvredžinena le sine vakerindor: "Ej! Tu so peraveja o Hrami hem vazdeja le trine divenge, 30 huli tele taro krsto hem spasin tut!"

31 Isto agjar o prvosveštenikija hem o učitejla e Zakoneskere asana sine maškar peste: "Javeren spasingja, a korkori pes našti te spasinel! 32 Ako ov tano o Hristos, o caro e Izraeleskoro, neka hulel akana taro krsto, te šaj te dikha hem te verujna ki leste."

A uvredžinena le sine okola da so sine leja ko krsto.

33 A ko dešuduj o sati temnisalilo ki celo phuv hem agjar sine trin satija. 34 Ko trin o sati paloručko, o Isus vikingja sa pe glasoja: "Eloi, Eloi, lama sabahtani?" (so značinela "Mo Devel, mo Devel, soske mukhlan man?").✝

35 Koga šunge adava nesave so tergjovena sine paše, vakerge: "Šunen, ov vikinela e Ilija!"

36 Nekoj lendar prastandilo, hem topingja o sungjeri ko šut hem čhiga le ko kaš i dengja e Isuse te pijel, vakerindor: "Adžikeren! Ajde te dikha dali o Ilija ka avel te hujlarel le!"

37 A o Isus vikingja sa pe glasoja, hem mukhla pi duša.

38 Ko adava momenti i zavesa taro Hrami pharavdili ko ekvaš upral dži tele. 39 Koga dikhla o Rimsko kapetani so tergjola sine angli leste sar mulo o Isus, vakergja: "Čače akava manuš sine o Čhavo e Devleskoro!"

40 A adathe sine nesave romnja so dikhle duraldan. Maškar lende sine i Marija tari Magdala, hem Marija i daj e poterne Jakoveskiri hem e Josifeskiri, hem i Salomija. 41 Ola džana sine palo Isus hem pomožinena le sine ki Galileja, a adathe sine panda but romnja so ale leja ko Erusalim.

42 Adava sine Dive bašo Spremiba, o dive angleder i sabota. Adaleske koga počmingja te rakjol, 43 o Josif tari Arimateja, so sine poštojmo členi ko Sovet e Evrejengoro, koj korkori adžikerela sine o carstvo e Devleskoro, bizo dar gelo ko Pilat hem rodingja o telo e Isuseskoro. 44 O Pilat čudisalilo so šungja deka mulo više o Isus. I vikingja e Rimsko kapetane hem pučlja le, dali čače mulo o Isus. 45 Koga šungja lendar adava, o Pilat dozvolingja te lel o telo leskoro o Josif. 46 O Josif kingja laneno čaršafi, hujlargja o telo e Isuseskoro, pakjargja le ko čaršafi hem čhigja le ko grobo, so sine kerdi dupka ki karpa. Hem guringja baro bar ko udara taro grobo. 47 I Marija tari Magdala hem i Marija e Josifeskiri daj, dikhena sine kaj čhivela leskoro telo.