1 O Isus iklilo adathar pe učenikoncar hem alo ko than kaj so barilo. 2 Koga ali i sabota, ov počmingja te sikavel ki sinagoga, i but džene šunena sine hem čudinena pe sine ko leskoro učibe. Hem vakerena sine: "Kotar leske sa akava? Hem savi tani akaja mudrost, soj leske dendi? Sar šaj te kerel asavke čudija pe vastencar? 3 Nane li akava o stolari, o čhavo e Marijakoro, o phral e Jakoveskoro, e Josijaskoro, e Judaskoro hem e Simoneskoro? Hem nane li akate maškar amende o phenja leskere?" Togaš nerviringe pe hem na mangle te prifatinen le.

4 O Isus phengja lenge: "E proroko ko sa o thana poštojnena le, samo ko than kote so barilo, maškar leskiri familija hem leskoro kher, na poštojnena le."

5 Adathe na kergja but čudija, samo čhigja pe vasta nesave nasvalenge hem sasljargja len. 6 I čudisalilo so na sine len vera.

Hem počmingja te džal ko gava hem te sikavel e manušen.

7 Togaš o Isus vikingja e dešuduje učenikon, hem počmingja te bičhavel len duj po duj, hem dengja len avtoriteti upro lošno duhija. 8 Ov zapovedingja lenge te na len ništo peja ko drumo – ni maro, ni torbe, ni pare – samo jekh kaš phiribaske, 9 a te uraven pe ko sandale hem te na len peja javer gad.

10 Hem phengja lenge: "Ako khugjen ko nesavo kher hem priminge tumen, ačhoven adale khereste, sa dži kote na džana tumenge taro adava than. 11 Ako negde na priminge tumen ili na mangle te šunen tumen, ikloven adathar hem tresinen i prašina taro tumare pre sar znako deka nane tumen ništo lencar."

12 Hem o učenikija gele hem propovedinena sine bašo pokajanie. 13 Ikavena sine bute demonen hem makhle bute nasvalen ujleja, hem ola saslile.

14 I o car Irod šungja bašo Isus, adaleske so leskoro anav sine prešundo. Nesave manuša vakerena sine: "Ov tano o Jovan Krstitel. Uštilo taro mule hem adaleske šaj kerela asavke čudija."

15 Javera vakerena sine: "Ov tano o Ilija." A javera vakerge: "Ov tano proroko, sar o javera prorokija so sine ko purano vreme."

16 Koga o Irod šungja adava, vakergja: "Adava tano o Jovan, kaskoro šero čhingjum le me. Ov uštilo taro mule!"

17 Soske korkori o Irod angleder bičhalgja te astaren e Jovane hem te frden le ko zatvor. A adava kergja baši i Irodijada, i romni leskere phraleskiri e Filipeskiri, so o Irod lela la romnake. 18 Soske o Jovan Kristitel phenela sine e Irodeske: "Nane tuke dozvolimo te le romnake te phraleskere romna." 19 I Irodijada doborom zamrzingja e Jovane, hem mangla te mudarel le. Ama našti kerela sine adava, 20 soske o Irod darala sine taro Jovan, adaleske so džanela sine deka tano pravedno hem sveto manuš, hem arakhela le sine. Koga o Irod šunela sine e Jovane ov sine bunimo, ama ov palem mangela sine te šunel le.

21 Konečno, peli šuži šanca e Irodijake. A adava dive sine o rodenden e Irodeskoro, koga ov spremingja hajbe pijbe, vikingja sa e manušen so sine generajla vojskakere hem bare manuša tari Galileja. 22 Togaš ali angli lende e Irodijadakiri čhaj hem khelela sine. Adava sine but šukar e Irodeske hem leskere gostenge.

I o Irod phengja e čhajake: "Rode mandar sa so mangeja, hem me ka dav tut." 23 Hala lake sovli hem phengja: "Sa so mangeja, ka dav tut! Ako trebno ka dav tut ekvaš taro mo carstvo."

24 Oj iklili avrik hem pučlja pe daja: "So te rodav?"

A oj odgovoringja lake: "O šero e Jovane Krstiteleskoro."

25 I čhaj odma khugja hem phengja e Irodeske: "Mangava odma akana te de man ko čaro o šero e Jovane Krstiteleskoro!"

26 E Irodeske sine but žal, ama na mangla te iranel i sovli so dengja la anglo gostija. 27 I odma naredingja e dželateske te džal hem te anel o šero e Jovaneskoro. Ov gelo, čhingja leskoro šero ko zatvor 28 hem angja le ko čaro i dengja le e čhajake, a oj dengja le pe dajake.

29 Koga šunge adava o učenikija e Jovaneskere, ale hem lele leskoro telo hem čhige le ko grobo.

30 O apostojla irange pe ko Isus hem vakerge leske sa so kerge, hem sa so sikavge e manušen.

31 A e Isuse hem e učenikon na sine len vreme te han maro, soske but manuša avena sine hem džana. Togaš o Isus phengja lenge: "Aven ka dža ko nesavo mirno than korkori hem adathe ka odmorina amen."

32 I ola lele o čamco te džan ko jekh čučo than. 33 A but džene dikhle len sar džana hem pendžarge len, hem taro sa o gradija prastandile te resen angleder lende ko adava than. 34 Koga o Isus iklilo taro čamco, dikhla bute manušen hem alo leske but pharo baši lenge, soske ola sine sar bakhre bizo pastiri. I počmingja but bukja te sikavel len.

35 I koga sine kasno, ale leskere učenikija hem phenge leske: "Kasno i više a ko akava than nane ništo. 36 Mukh e manušen te džan ko najpaše gava hem thana te šaj kinena peske maro."

37 O Isus phengja lenge: "Den len tumen nešto hajbaske!"

Ola pučle le: "Kotar? Amenge trebela pare so dena pe jekhe beršeske te šaj te kina maro sa akale manušenge!"

38 A ov pučlja len: "Kozom mare isi tumen? Džan hem dikhen."

Koga dikhle, vakerge: "Pandž mare hem duj mačhe."

39 Togaš o Isus vakergja sarinenge te bešen ko grupe tele ki zeleno čar. 40 Hem bešle ko grupe po šel hem po pinda džene.

41 Ov lela o pandž mare hem o duj mačhe, dikhla upre ko nebo, hem blagodaringja bašo hajbe. Phagla o mare hem dengja pe učenikonge te delinen e manušencar, hem isto agjar ov delingja sarinenge adala duj mačhe. 42 I sarinen hale hem čalile. 43 Sa adava so ačhilo, khedinge, hem ačhilo len panda dešuduj korpe maro hem mačhe. 44 A adala so hale sine pandž ilade murša (bizo te gejnen pe o romna hem o čhave).

45 Odma palo adava o Isus phengja pe učenikonge te uklen ko čamco hem angleder lestar te džan ki okoja strana taro ezero ki Vitsaida, dži kote ov bičhavela e manušen pe kherende. 46 Koga ispratingja len, gelo upre ki gora te molinel pe.

47 Koga rakjilo avrik, o čamco ačhilo maškar ko ezero, a o Isus sine ki kopno. 48 Hem dikhla e učenikon sar phareste veslinena o čamco, soske prema lende phudela sine i bavlal. A sine paše maškar o trin dži ko šov o sati sabajle. Togaš ov alo ki lende phirindor upro pani hem haričkake ka nakhel sine uza lende, 49 ama ola, koga dikhle le sar phirela upro pani, počminge te vikinen, soske mislinge deka tano duho. 50 Sarinen dikhle le hem uklingja len bari dar. A o Isus odma phengja lenge: "Oven silna! Ma daran! Me sijum."

51 Togaš khugja ko čamco hem i bavlal ačhili. A ola but čudinge pe taro sa akava, 52 adaleske so ola na svatinge o čudo so ulo e marencar, soske lengere vile sine but barale.

53 Koga o Isus nakhla pe učenikoncar ki okoja strana taro ezero, resle ki phuv Genisaretsko hem adathe phanle o čamco. 54 Samo so iklile taro čamco, o manuša odma pendžarge e Isuse. 55 Hem sarinen prastandile te vakeren javerenge deka alo o Isus, i počminge te legaren sa e nasvalen anglo Isus. 56 Hem kaj so khuvela sine o Isus ko gava, gradija ili mahale, anena sine sa e nasvalen ko ploštadija hem molinena sine e Isuse samo te mukhel len te pipinen pe ko krajo taro leskere šeja. Hem sarinen so pipinena pe sine leske ko šeja, sasljona sine.