1 I khugja palem o Isus ki sinagoga, a adathe sine manuš so leskoro vas sine šuko hem našti sine te koristinel le. 2 Adathe sine manuša so adžikerena sine te dikhen dali o Isus ka sasljarel e manuše ki sabota, te šaj te tužinen le.

3 Togaš o Isus vakergja e manušeske so sine leskoro vas šuko: "Ava hem tergjov maškaral!" 4 I pučlja len: "Soj dozvolimo te kerel pe ki sabota: šukaripe ili lošnipe? Te spasinel pe životo ili te mudarel pe?"

A ola kjutinena sine.

5 I o Isus dikhla len holamo, hem sine leske but pharo bašo lengere barale vile. Hem phengja e manušeske: "Pružin to vas!"

Ov pružingja po vas hem leskoro vas saslilo.

6 Togaš o fariseja iklile hem odma khedinge pe e Irodeskere manušencar te dogovorinen pe sar te mudaren e Isuse.

7 O Isus cidingja pe učenikoncar adathar hem gelo ko Galilejskoro ezero, a pali leste džana sine but narodo tari Galileja hem tari Judeja, 8 taro Erusalim, taro Idumeja, taro javer strana tari reka Jordan hem taro thana Tir hem Sidon. Sa adala manuša ale ko Isus, soske šunge deka kerela sine but čudija.

9 Koga o Isus dikhla adaja gužva, vakergja pe učenikonge te spreminen leske o čamco te šaj o narodo te na gurinen pe upro leste. 10 Soske adava dive sasljargja bute manušen hem avena sine nasvale, so mangena sine te pipinen le, te šaj te oven saste. 11 Koga dikhena le sine o lošna duhija, so sine ko manuša, perena sine ko kočaka hem vikinena sine: "Tu sijan o Čhavo e Devleskoro!" 12 A ov silno opomeninela len sine te na vakeren nikaske koj tano ov.

13 Palo adava o Isus gelo ki gora hem vikingja adalen so mangla, hem ola ale ki leste. 14 Togaš o Isus biringja dešuduje manušen so vikingja len apostojla, te oven leja hem te bičhavel len te propovedinen 15 hem te ovel len avtoriteti te ikalen e demonen. 16 A akala tane o anava e dešudujengere so sine birime:

o Simon, (so o Isus dengja le o anav Petar),

17 o čhave e Zavedejeskere,

o Jovan hem o Jakov, so dengja len anav Voanerges, (so značinela "Čhave e gromeskere"),

18 o Andrej,

o Filip,

o Vartelomej,

o Matej,

o Toma,

o Jakov, o čhavo e Alfejeskoro,

o Tadej,

o Simon Kananiec

19 hem o Juda Iskariot, so ka predajnel e Isuse.

20 Togaš o Isus gelo khere hem palem adathe khedisalili bari gužva, adaleja so o Isus hem leskere učenikija našti sine te han. 21 Koga šunge i familija e Isuseskiri bašo adava, ale te len le hem te legaren le, soske ola mislinge deka dilisalilo.

22 A o učitejla e Zakoneskere ale taro Erusalim hem vakerge: "O Veelzevul, o gospodari e demonengoro tano leste andre! Leskere silaja ikalela e demonen."

23 O Isus vikingja len uza peste hem počmingja te vakerel lenge ko parabole: "Sar šaj o Beng te ikalel e Benge? 24 Ako isi carstvo, so jekh jekheja marena pe, adava carstvo našti te ačhol. 25 Ili kher kote so nane sloga, adava kher našti te ačhol. 26 Ako o Beng uštilo protiv peste hem odvisalilo, ov ka našti te ačhol, ama alo leskoro krajo. 27 Nikoj našti te čorel taro kher, kote so bešela zoralo manuš, sa dži kote na phandela le. Togaš koga ka phandel le, ka šaj te čorel taro kher.

28 Čače vakerava tumenge: e manušenge šaj te oven oprostime sa o grevija hem o hule so hulinena. 29 A koj hulinela upro Sveti Duh nikat nane te ovel leske oprostimo, hem adava ka ovel leske večno grevo."

30 Ov phengja adava soske phenge deka ov sine opsednimo lošno duhoja.

31 Togaš e Isuseskiri daj hem o phrajla leskere ale adathe. Dži kote adžikerena sine avrijal bičhalge nekas te vikinen le.

32 A uza leste bešena sine but manuša hem vakerge leske: "Avrik ti daj hem te phrajla adžikerena te dikhen tut."

33 A o Isus pučlja len: "Koj tani mi daj hem me phrajla?"

34 Koga dikhla e manušen, so bešena sine uza leste, vakergja: "Akje, akala tane mi daj hem me phrajla. 35 Soske, sekoj so kerela i vojla e Devleskiri, ov tano mo phral, mi phen hem mi daj."